Dios ta invitá tur tipo di hende pa hala serka dje den orashon. (Salmo 65:2) Pero no ta tur orashon e ta skucha òf aseptá. Por ehèmpel, e no ta skucha orashon di un hòmber ku ta maltratá su kasá. (1 Pedro 3:7) I tempu ku e israelitanan a persistí den maldat, Dios no a skucha nan orashonnan tampoko. No opstante, Dios lo skucha orashon asta di hende ku kometé piká grave, basta nan arepentí. P’esei, ta un privilegio di por hasi orashon na Yehova.—Lesa Isaías 1:15; 55:7.

Wak e vidio Dios Ta Skucha Tur Orashon?

Orashon ta parti di nos adorashon. P’esei, nos mester hasi orashon solamente na nos Kreador, Yehova. (Mateo 4:10; 6:9) Ademas, komo hende imperfekto nos tin ku hasi orashon den nòmber di Hesus, ya ku el a muri pa nos pikánan. (Huan 14:6) Yehova no ke pa nos ripití orashon ku nos a siña for di kabes òf orashon skirbí. Mas bien, e ke pa nos papia kuné di kurason.—Lesa Mateo 6:7; Filipensenan 4:6, 7.

Nos Kreador por skucha asta orashon ku hende ta hasi den silensio. (1 Samuel 1:12, 13) Dios ta animá nos pa hasi orashon tur ora bai, por ehèmpel, ora nos lanta, promé ku nos bai drumi, ora di kome i ora nos tin problema.—Lesa Salmo 55:22; Mateo 15:36.

No ta fásil pa hala serka Dios pasobra nos ta biba meimei di hende ku no tin fe den Dios i ku ta hasi bofon di su promesa di trese pas riba tera. (2 Timoteo 3:1, 4; 2 Pedro  3:3, 13) P’esei, nos tin mester di e animashon di nos rumannan kristian, meskos ku nan tin mester di esun di nos.—Lesa Hebreonan 10:24, 25.

Nos por hala serka Dios ora nos ta asosiá ku hende ku ta stima Dios. I e reunionnan di Testigunan di Yehova ta duna nos bon oportunidat pa risibí estímulo for di nos rumannan.—Lesa Romanonan 1:11, 12.

Bo por hala serka Yehova ora bo ta meditá riba loke bo ta siña for di su Palabra. Reflekshoná riba Yehova su aktividat-, instrukshon- i promesanan. Orashon i meditashon ta yuda nos komprondé kon grandi Dios su amor i sabiduria ta.—Lesa Hosue 1:8; Salmo 1:1-3.

Bo por tin un bon relashon ku Dios solamente si bo tin konfiansa i fe den dje. Fe ta manera un mata. Meskos ku bo tin ku muha un mata regularmente pa e keda na bida, asina bo tin ku sigui alimentá bo fe pa e keda bibu. I bo por hasi esei ora bo ta repasá e base di bo kreensianan regularmente.—Lesa Mateo 4:4; Hebreonan 11:1, 6.

Yehova ta masha interesá den hende ku ta stim’é. E por protehá nan kontra tur loke por pone nan pèrdè nan fe i speransa di bida eterno. (Salmo 91:1, 2, 7-10) E ta spièrta nos kontra un estilo di bida ku ta perhudiká nos salú i kita nos felisidat. Sí, Yehova ta siña nos e mihó manera di biba.—Lesa Salmo 73:27, 28; Santiago 4:4, 8.