LÈS 10
Kon e Reunionnan di Testigunan di Yehova Por Yuda Bo?
Bo a yega di asistí na un reunion di Testigunan di Yehova? Si nunka bo no a yega di bai, kisas e idea di asistí pa promé bes por hasi bo un poko nèrvioso. Podisé bo ta puntra bo mes: ‘Kiko ta sosodé na e reunionnan ei? Dikon nan ta importante? Dikon mi tin ku asistí na nan?’ Den e lès akí, lo bo siña kon e reunionnan por yuda bo tin un amistat mas será ku Dios. Ademas, lo bo mira den ki otro manera e reunionnan por yuda bo.
1. Dikon Testigunan di Yehova ta reuní huntu?
Un eskritor di Beibel a menshoná kiko ta e motibu di mas importante pa e sirbidónan di Dios reuní huntu. El a bisa: “Lo mi alabá bo meimei di e kongregashon.” (Salmo 22:22) Meskos ku e sirbidónan di Dios di pasado, awe nos komo Testigunan di Yehova ta haña goso ora nos ta reuní huntu. Rònt mundu, nos ta reuní tur siman pa alabá Dios, kanta i hasi orashon. Ademas, algun biaha pa aña nos ta reuní na grupo grandi pa siña tokante Yehova i ador’é.
2. Kiko lo bo siña na nos reunionnan?
Loke nos ta siña na nos reunionnan ta basá riba Palabra di Dios i nos ta haña splikashon pa komprondé loke tin skirbí den dje. (Lesa Nehemías 8:8.) Ora bo bai nos reunionnan, lo bo siña tokante Yehova i su bunita kualidatnan. Segun ku bo ta sigui siña tokante e amor ku Dios tin pa bo, bo amistat kuné lo bira mas fuerte. Ademas, lo bo siña kon Yehova por yuda bo tin un bida yen di satisfakshon.—Isaías 48:17, 18.
3. Ki benefisio bo por haña ora bo papia ku otro hende na reunion?
Yehova ke pa nos “presta atenshon na otro pa nos por stimulá otro pa mustra amor i hasi bon obra, i [pa nos] no keda sin bai e reunionnan.” (Hebreonan 10:24, 25) E hendenan ku lo bo topa na reunion ta stima otro i, meskos ku bo, ke siña mas tokante Dios. Na reunion, lo bo tende diskurso i komentario animante basá riba Beibel. (Lesa Romanonan 1:11, 12.) Ademas, lo bo por sera konosí i kòmbersá ku vários hende ku ta felis apesar di nan problemanan. Esaki ta djis algun di e motibunan pakiko Yehova ke pa nos reuní regularmente ku otro.
KIKO MAS NOS POR SIÑA?
Laga nos wak kiko ta tuma lugá na e reunionnan di Testigunan di Yehova i wak dikon ta importante pa bo hasi esfuerso pa bai e reunionnan akí.
4. Reunion di Testigunan di Yehova
Den promé siglo, regularmente e kristiannan tabata reuní huntu pa adorá Yehova. (Romanonan 16:3-5) Lesa Kolosensenan 3:16. Despues, analisá e siguiente pregunta:
-
Kon e kristiannan di promé siglo tabata adorá Yehova?
Awe, Testigunan di Yehova tambe ta reuní regularmente huntu. Pa wak kiko ta sosodé na un reunion, pasa e VIDIO. Despues, wak e plachi ku ta mustra kiko ta pasa na reunion i analisá e siguiente preguntanan:
-
Ki similaridat bo ta mira entre loke ta sosodé na un Salòn di Reino i loke bo a lesa na Kolosensenan 3:16?
-
Bo a mira algu den e vidio òf riba e plachi ku bo a gusta di nos reunionnan?
Lesa 2 Korintionan 9:7. Despues, analisá e siguiente pregunta:
-
Dikon e reunionnan di Testigunan di Yehova ta grátis?
Wak huntu ku e persona ku ta studia bo kiko lo ser tratá na e siguiente reunion.
-
Kua parti di e reunion bo ta pensa lo yuda bo òf interesá bo mas?
Bo tabata sa?
Riba jw.org, bo por haña sa na unda i ki ora e reunionnan ta tuma lugá rònt mundu.
-
Na nos reunionnan, tin diskurso, demostrashon i vidio. Nos reunionnan ta kuminsá i kaba ku kantika i orashon
-
Durante algun parti di e reunion, e presentenan por duna komentario
-
Tur hende ta bon biní. Pues, famia, hende soltero, hende di edat i mucha por asistí na e reunionnan
-
Nos reunionnan ta grátis. Testigunan di Yehova no ta kobra pa entrada ni ta pasa kolèkt
5. Nos mester hasi esfuerso pa bai reunion
Tuma por ehèmpel famia di Hesus. Tur aña, nan mester a hasi un biahe di Názarèt pa Herúsalèm pa bai tèmpel. Pa nan por a yega ei, nan mester a kana mas o ménos tres dia i pasa den tereno ku hopi seru. Lesa Lukas 2:39-42. Despues, analisá e siguiente preguntanan:
-
Bo ta kere ku e biahe ku e famia di Hesus a hasi a rekerí esfuerso?
-
Den bo kaso, kiko ta algun kos ku lo por stroba bo di asistí na reunion i kiko bo por hasi pa nan no stroba bo?
-
Bo ta kere ta bale la pena hasi esfuerso pa bo bai reunion? Dikon bo ta bisa esei?
Beibel ta bisa ku ta masha importante pa nos reuní huntu pa adorá Yehova. Lesa Hebreonan 10:24, 25. Despues, analisá e siguiente pregunta:
-
Dikon nos mester bai reunion regularmente?
LOKE HENDE SA BISA: “Bo no mester reuní ku otro hende pa adorá Dios. Si bo lesa Beibel na kas mes ta bon.”
-
Ki teksto òf ehèmpel di Beibel ta mustra Yehova su punto di bista tokante e asuntu akí?
RESÚMEN
Ora bo bai reunion, lo bo siña mas tokante Yehova, bo amistat kuné lo bira mas fuerte i lo bo ador’é huntu ku otro hende.
Repaso
-
Dikon Yehova ta animá nos pa reuní huntu pa ador’é?
-
Kiko ta algun kos ku lo bo siña na e reunionnan di Testigunan di Yehova?
-
Den ki otro manera bo ta kere e reunionnan por yuda bo?
MAS INFORMASHON INTERESANTE
Kiko si bo ta sinti bo nèrvioso pa bai reunion? Wak kon un hòmber ku na promé instante tabata nèrvioso pa asistí na reunion a kuminsá gusta e reunionnan.
Wak dikon un hóben tabata gusta e reunionnan i wak kiko el a hasi pa e por a sigui bai reunion.
Wak kiko algun hende ta pensa tokante baimentu di reunion.
“Dikon Ta Bon pa Bai Reunion di Testigunan di Yehova?” (artíkulo na spañó riba jw.org)
Wak kon un hòmber ku tabata forma parti di un gang violento a kambia su bida despues ku el a asistí na un reunion di Testigunan di Yehova.
“Semper Mi Tabata Kana Armá” (E Toren di Vigilansia di 1 di yüli 2014)
Otro Artíkulo Interesante
PREGUNTA KU HOPI HENDE SA HASI
Kon un Kurso di Beibel Ku Testigunan di Yehova Ta Bai?
Pa sigui un kurso di Beibel interaktivo grátis ku Testigunan di Yehova, bo por usa kualke tradukshon di Beibel ku bo ta preferá. Sinti bo liber pa invitá henter bo famia òf kualke amigu pa sigui e kurso di Beibel huntu ku bo.
