1-6. Konta un eksperensia ku ta mustra ku Testigunan di Yehova ta prediká bou di diferente sirkunstansia.

 REBECCA, un Testigu di Yehova hóben na Gana, a mira skol komo su teritorio personal. Semper e tabatin publikashon basá riba Beibel den su tas. Den pousa, e tabata buska oportunidat pa prediká na su kompañeronan di skol. Rebecca a kuminsá studia Beibel ku vários mucha den su klas.

² Riba e isla Madagascar, serka di kosta di Afrika, un pareha pionero tabata kana 25 kilometer den kalor pa yega un pueblito isolá. Nan tabata hasi e biahe ei regularmente pa dirigí vários estudio di Beibel ku hende interesá.

³ Pa yega na e hendenan ku ta biba banda di e riunan Paraguay i Paraná, un grupo di Testigu di Yehova di Paraguay huntu ku 15 boluntario di otro pais a traha un boto grandi. E boto akí tabata grandi sufisiente pa 12 hende biba ariba. Riba e boto akí, nos rumannan tabata prediká bon notisia na e áreanan ku tabata difísil pa yega na dje.

⁴ Na Alaska, nos rumannan a mira un bon oportunidat pa prediká na e turistanan den temporada di zomer. Hende for di diferente pais ta bishitá Alaska riba krusero den e temporada ei. E Testigunan a organisá predikashon den área públiko serka di e barkunan, i nan tabatin literatura den vários idioma. Den e region ei, e publikadónan mester a usa avion pa bai e pueblonan isolá serka e hendenan indígena, manera e aleutiananan, atabascananan, chimesiananan i tlingitnan.

⁵ Larry, un ruman hòmber, na Texas, Merka, tabatin un teritorio spesial: e kas di kuido kaminda e tabata keda. Aunke ku Larry tabata den ròlstul pa motibu di un aksidente, e tabata buska oportunidat pa prediká. E tabata konta tur hende tokante e Reino di Dios i tokante su speransa pa futuro. E tabatin sigur ku den e mundu nobo lo e bolbe kana.​—Isa. 35:5, 6.

⁶ Un grupo di Testigu kier a asistí na un asamblea den e parti nort di Myanmar. Pa logra esei, nan mester a biaha tres dia riba fèri for di e stat Mandalay. Yen di gana di kompartí bon notisia ku otro hende, nan tabata bai ku literatura basá riba Beibel pa ofresé na otro pasahero riba e boto. Kada biaha ku e fèri tabata stòp na un stat òf pueblito, nos rumannan tabata baha lihé for di e fèri; nan tabata bishitá mas tantu hende posibel i ofresé nan literatura. Miéntras ku nan tabata prediká, pasahero nobo tabata subi e fèri, i asina nos rumannan tabatin un grupo nobo di hende pa prediká na dje ora nan a bai bèk riba e fèri.

7. Ki método Testigunan di Yehova ta usa pa prediká tokante e Reino di Dios, i kiko ta nan meta?

⁷ Meskos ku e rumannan ku nos a kaba di menshoná den e paragrafnan anterior, Testigunan di Yehova rònt mundu ta duna “testimonio kabal tokante e Reino di Dios” yen di entusiasmo. (Echo. 28:23) Nan ta prediká di kas pa kas, papia ku hende riba kaya, skirbi karta i papia ku hende na telefòn. Pues, sea ku nan ta den bùs, den parke òf durante nan pousa na trabou, nan ta buska tur oportunidat pa papia tokante e Reino di Dios. Sin importá ki método nos usa pa prediká, nos meta ta pa kompartí bon notisia tur kaminda ku nos haña hende.​—Mat. 10:11.

8, 9. (a) Dikon nos por bisa ku e echo ku nos ta sigui prediká bon notisia di e Reino awe ta manera un milager? (b) Ki pregunta interesante ta bon pa nos analisá, i kiko nos mester hasi pa kontestá e pregunta ei?

⁸ Abo ta un di e miónes di Testigunan di Yehova ku ta predikando na mas ku 235 pais? Si esei ta e kaso, bo por ta felis pasobra bo ta yuda hiba bon notisia na mas tantu hende posibel. Loke Testigunan di Yehova ta hasi rònt mundu ta manera un milager. Pasobra, apesar di difikultat, inkluso prohibishon di nos trabou i persekushon, Testigunan di Yehova ta duna testimonio kabal tokante e Reino di Dios na hende di tur nashon.

⁹ Pensa riba esaki: Aunke nos ta enfrentá hopi opstákulo i Satanas ta purba di stroba nos, nos a sigui prediká bon notisia di e Reino. Dikon niun hende ni Satanas no a logra stòp e trabou di prediká? Pa kontestá e pregunta ei, nos mester wak kiko a sosodé den promé siglo. Pasobra awe, Testigunan di Yehova ta sigui ku e trabou di prediká ku a kuminsá den e tempu ei.

10. Kiko tabata e trabou di mas importante ku Hesus a hasi ora e tabata riba tera, i kiko e tabata sa tokante e trabou akí?

¹⁰ Hesukristu, kende a funda e kongregashon kristian, a dediká su mes na prediká bon notisia tokante e Reino di Dios; esei tabata e trabou di mas importante ku el a hasi ora e tabata riba tera. Un biaha el a bisa: “Mi tin ku deklará e bon notisia di e Reino di Dios na e otro statnan tambe, pasobra ta pa esaki Dios a manda mi.” (Luk. 4:43) Hesus tabata sa ku el a kuminsá ku un trabou ku e mes no por a kaba kuné. Djis promé ku su morto, el a bisa ku bon notisia di e Reino lo ser prediká “den tur nashon.” (Mar. 13:10) Pero kon esei lo a tuma lugá, i ken lo a hasié?

11. Ki trabou importante Hesus a duna su disipelnan, i ki yudansa nan lo a haña pa kumpli ku e trabou ei?

¹¹ Despues ku Hesus a muri i resusitá, el a aparesé na su disipelnan i duna nan un trabou importante. El a bisa nan: “P’esei bai, i hasi hende di tur nashon mi disipel, i batisá nan den nòmber di e Tata i di e Yu i di spiritu santu, i siña nan kumpli ku tur loke mi a manda boso. I wak!, mi ta ku boso tur e dianan, te na konklushon di e era akí.” (Mat. 28:19, 20) E palabranan “mi ta ku boso” a indiká ku lo e apoyá e disipelnan den e trabou di prediká i di siña hende. E disipelnan lo tabatin mester di e apoyo ei, pasobra Hesus a bisa ku hende di “tur nashon lo odia [nan].” (Mat. 24:9) Ademas, Hesus a primintí e disipelnan ku nan lo a haña un otro fuente di yudansa tambe. Djis promé ku Hesus a subi bai shelu, el a bisa nan ku spiritu santu lo duna nan e forsa ku nan tin mester pa sigui prediká “te na e partinan di mas leu di tera.”​—Echo. 1:8.

12. Ki pregunta importante ta bon pa nos pa nos analisá, i dikon ta importante pa nos sa e kontestanan?

¹² Awor, esei ta hiba nos na algun pregunta importante: E apòstelnan di Hesus i otro disipel di promé siglo a hasi tur loke nan tabata por pa obedesé Hesus su mandamentu pa bai prediká? E grupo chikitu di kristiannan ei a logra duna testimonio kabal tokante e Reino di Dios aunke nan a ser persiguí severamente? Di bèrdat nan por a konta ku Yehova su yudansa i ku yudansa di spiritu santu den e trabou di hasi hende disipel? E buki Echonan ta kontestá e preguntanan ei i otro pregunta similar. Ta importante pa nos sa e kontestanan ei. Dikon? Hesus a primintí nan ku e trabou di prediká lo sigui “te na konklushon di e era akí.” Pues, tur kristian berdadero, inkluso nos ku ta bibando den e tempu di fin, mester obedesé Hesus su mandamentu pa prediká. Pa e motibu ei, nos ta interesá den e historia ku tin skirbí den e buki Echonan.

13, 14. (a) Ken a skirbi e buki Echonan, i kon e eskritor a haña su informashon? (b) Ki informashon tin den e buki Echonan?

¹³ Ken a skirbi e buki Echonan? E buki mes no ta menshoná ken e eskritor ta. Pero e komienso di e buki ta mustra bon kla ku e eskritor di Echonan ta e mesun eskritor di Evangelio di Lukas. (Luk. 1:1-4; Echo. 1:1, 2) P’esei, pa hopi tempu hende a aseptá Lukas komo eskritor di e buki Echonan. Lukas tabata konosí tambe komo un “dòkter stimá” i un bon historiadó. (Kol. 4:14) E buki Echonan ta kubri un periodo di 28 aña: for di tempu ku Hesus a subi bai shelu na aña 33 despues di Kristu te na Apòstel Pablo su enkarselashon na Roma rònt di aña 61 despues di Kristu. E echo ku Lukas a usa tantu e pronòmber “nan” komo “nos” den su relato ta indiká ku e tabata presente na hopi di e susesonan ku el a deskribí. (Echo. 16:8-10; 20:5; 27:1) Komo ku Lukas kier a skirbi eksaktamente loke a tuma lugá, probablemente el a papia ku Pablo, Bárnabas, Felipe i otro hende promé ku el a skirbi e buki Echonan.

¹⁴ Den Lukas su Evangelio, ku el a skirbi poko mas promé ku e buki Echonan, Lukas a skirbi tokante e kosnan ku Hesus a bisa i hasi. Pero ki informashon tin den e buki Echonan? Den e buki Echonan, Lukas a skirbi tokante loke e disipelnan di Hesus a bisa i hasi. Pues, e buki Echonan ta un historia di hende ku a kumpli ku un trabou ekstraordinario, aunke hopi hende tabata konsiderá nan “hende gewon ku no tabatin muchu edukashon.” (Echo. 4:13) E buki akí ku Lukas a skirbi ku yudansa di Dios su spiritu santu ta konta nos kon e kongregashon kristian a ser fundá i kon el a krese. E buki Echonan ta mustra tambe e métodonan ku e kristiannan di promé siglo a usa pa prediká i ku ki aktitut nan tabata hasi e trabou. (Echo. 4:31; 5:42) Ademas, e buki ta mustra kon spiritu santu a yuda nan plama bon notisia di e Reino. (Echo. 8:29, 39, 40; 13:1-3; 16:6; 18:24, 25) Meskos ku e otro bukinan di Beibel, e buki Echonan ta enfatisá e tema prinsipal di Beibel, esta, kon e Reino di Dios goberná pa Kristu ta santifiká Dios su nòmber. Ademas, e buki ta mustra kon e disipelnan a logra prediká bon notisia di e Reino apesar di hopi oposishon.​—Echo. 8:12; 19:8; 28:30, 31.

15. Kon nos lo benefisiá ora nos analisá e buki Echonan?

¹⁵ Ta masha emoshonante pa analisá e buki Echonan. Sin duda, esei lo fortalesé nos fe den Dios. Si nos meditá riba e entusiasmo i kurashi ku e disipelnan di promé siglo tabatin, nos lo sinti nos animá pa imitá nan bunita ehèmpel di fe i nos lo haña mas apresio pa nan. Di e manera ei, nos lo ta mas prepará pa kumpli ku e mandamentu ku Hesus a duna nos, esta, di “bai, i hasi hende . . . disipel.” E publikashon ku bo ta lesando aworakí lo yuda bo hasi un estudio profundo di e buki Echonan.

16. Ki tres meta e publikashon akí tin?

¹⁶ Ki tres meta e publikashon akí tin? (1) E ta sigurá nos ku Yehova ta usando su spiritu santu pa apoyá e trabou di prediká i di siña hende bon notisia. (2) E ta yuda nos haña mas entusiasmo pa prediká segun ku nos ta analisá e ehèmpel di Kristu su disipelnan di promé siglo. (3) E ta yuda nos haña mas rèspèt pa Yehova su organisashon i pa e rumannan ku ta dirigí e trabou di prediká i ta supervisá e kongregashonnan.

17, 18. (a) Kon e informashon den e publikashon akí ta hinká den otro? (b) Kiko mas tin den e publikashon akí ku lo yuda bo ku bo estudio di Beibel?

¹⁷ Kon e informashon den e buki akí ta hinká den otro? E buki akí ta partí den ocho sekshon, i kada sekshon ta trata un parti di e buki Echonan. E meta di e siguiente kapítulonan no ta pa analisá e buki Echonan versíkulo pa versíkulo, sino pa saka lès for di e susesonan deskribí den e buki Echonan i pa yuda nos mira kon nos por apliká loke nos ta siña den nos bida. Na komienso di kada kapítulo tin un frase ku ta splika e tema prinsipal di e kapítulo i ku ta indiká ki parti di e buki Echonan lo ser analisá.

¹⁸ Ademas, e publikashon akí tin mas kos ku lo yuda bo den bo estudio di Beibel personal. Tin bunita plachi ku lo yuda bo visualisá kiko ta tumando lugá den e relatonan di e buki Echonan. Hopi kapítulo tin kuadro ku ta duna informashon adishonal. Algun kuadro ta duna informashon tokante bida di personahe bíbliko ku ta bale la pena pa imitá. Otro kuadro ta duna mas detaye tokante sierto lugá, suseso, kustumber òf otro personahe bíbliko menshoná den Echonan.

19. Kiko ta bon pa nos hasi de bes en kuando?

¹⁹ E publikashon akí por yuda bo analisá bo mes. Sin importá kuantu tempu bo tin ta prediká, ta importante pa de bes en kuando bo para ketu i pensa ta kiko tin prioridat den bo bida i kiko ta bo punto di bista di e trabou di prediká. (2 Kor. 13:5) P’esei, puntra bo mes: ‘Ainda mi ta mira e urgensia di e trabou di prediká? (1 Kor. 7:29-31) Mi ta prediká bon notisia di Reino ku konvikshon i entusiasmo? (1 Tes. 1:5, 6) Mi ta hasi mas tantu posibel den e trabou di prediká i di hasi disipel?’​—Kol. 3:23.

20, 21. Dikon nos trabou di prediká ta asina urgente, i kiko mester ta nos determinashon?

²⁰ Nunka nos no mester lubidá ku e trabou di mas importante ku nos tin ta di prediká i di hasi disipel. Kada dia ku pasa, e trabou ei ta bira mas urgente, pasobra fin di e sistema akí ta yegando mas i mas serka. Pues, awor mas ku nunka promé, hende mester tende loke nan tin ku hasi pa sobrebibí Armagedon. Nos no sa kuantu hende mas lo ta dispuesto pa aseptá nos mensahe. (Echo. 13:48) Pero ta nos responsabilidat pa yuda e hendenan ei promé ku ta lat.​—1 Tim. 4:16.

²¹ P’esei, ta masha importante pa nos imitá e entusiasmo di e predikadónan di promé siglo. Nos ta spera ku lo bo haña mas zelo i kurashi pa prediká segun ku bo ta studia e publikashon akí, i ku lo bo ta mas determiná pa sigui duna “testimonio kabal tokante e Reino di Dios.”​—Echo. 28:23.