1-3. Kon Hesus a bai laga su apòstelnan, i ki pregunta esei ta lanta?

 ORA Hesus a muri, su apòstelnan tabata masha tristu. Pero ora Hesus a resusitá, nan a bira masha kontentu mes. Durante 40 dia, Hesus a aparesé vários bes na su disipelnan. El a siña nan i animá nan. Nan a disfrutá di e tempu ku nan por a pasa huntu ku Hesus, i nan no tabata ke pa e bai laga nan. Pero lamentablemente, e dia a yega ku nan lo a mira Hesus pa último biaha.

² Miéntras ku nan tur tabata pará huntu riba seru Oleifi, e apòstelnan tabata presta bon atenshon na tur loke Hesus tabata bisa. Nan tabata ke pa e sigui siña nan, pero Hesus a stòp di papia. El a hisa su man i bendishoná nan. Despues di esei, Hesus a kuminsá subi bai shelu. Hesus su apòstelnan a keda wak e ta bai laira te ora un nubia a tap’é, i nan no por a mir’é mas. Hesus a bai, pero nan a keda pará einan ta wak shelu.​—Luk. 24:50; Echo. 1:9, 10.

³ E suseso ei a kambia bida di Hesus su apòstelnan. Kiko nan lo a hasi awor ku nan Maestro, Hesukristu, a subi bai shelu? Nos por tin sigur ku Hesus a prepará nan pa sigui ku e trabou ku el a kuminsá kuné. Kon Hesus a prepará nan pa e asignashon importante ei, i kon nan a apliká loke el a siña nan? Kiko e kristiannan awe por siña for di e relato akí? E promé kapítulo di e buki Echonan ta kontestá e preguntanan ei.

4. Kon Lukas a kuminsá su relato den e buki Echonan?

⁴ Lukas a kuminsá su relato papiando ku Teófilo, e mesun hòmber na ken el a skirbi su Evangelio mas promé. a Lukas ta mustra bon kla ku e relato akí ta un kontinuashon di e relato ku el a skirbi promé. P’esei, na kuminsamentu di e buki Echonan, Lukas a resumí e susesonan ku el a skirbi na final di su Evangelio, pero el a usa otro palabra i a agregá algun detaye nobo.

5, 6. (a) Kiko Hesus a hasi pa fortalesé fe di su disipelnan? (b) Ki prueba konvinsente ta yuda e kristiannan awe pa nan por tin berdadero fe?

⁵ Kiko Hesus a hasi pa fortalesé fe di su disipelnan? Na Echonan 1:3, nos ta lesa ku durante e 40 dianan despues ku Hesus a resusitá, el “a duna nan hopi prueba pa mustra bon kla ku e tabata na bida.” Tin biaha, Hesus a aparesé na un òf dos apòstel. Otro biaha, el a aparesé na tur su apòstelnan. Anto na un okashon, Hesus a aparesé na mas ku 500 di su disipelnan. (1 Kor. 15:3-6) Tur esaki, sin duda, tabata prueba konvinsente ku Hesus tabata bibu, i esei a fortalesé fe di Hesus su disipelnan!

⁶ Awe tambe, fe di kristian berdadero ta basá riba “hopi prueba” konvinsente. Tin prueba ku ta mustra ku di bèrdat Hesus a biba riba tera, muri pa nos pikánan i ser resusitá? Sí! Nos ta haña prueba konvinsente den Dios su Palabra ku ta kontené relato konfiabel di hende ku a mira e susesonan ei. Ora nos studia e relatonan ei i pidi Yehova pa yuda nos komprondé nan, nos por fortalesé nos fe. Kòrda, nos tin mester di prueba konvinsente pa nos por tin berdadero fe, i nos mester tin berdadero fe pa nos por haña bida eterno.​—Huan 3:16.

7. Kiko tabata Hesus su enfoke ora di prediká i siña hende, i riba kiko nos tambe tin ku enfoká?

⁷ Ademas, Hesus “tabata papia ku [su disipelnan] tokante e Reino di Dios.” Por ehèmpel, el a splika profesia ku a mustra ku e Mesías lo tin ku sufri i muri. (Luk. 24:13-32, 46, 47) Ora Hesus a duna su disipelnan mas detaye di kiko lo e hasi komo e Mesías, el a enfoká riba e Reino di Dios. Dikon? Pasobra ta é lo a bira e futuro Rei di e Reino ei. Hesus semper tabata prediká tokante e Reino, i su siguidónan awe ta sigui hasi meskos.​—Mat. 24:14; Luk. 4:43.

8, 9. (a) Ki dos idea robes e apòstelnan di Hesus tabatin? (b) Kon Hesus a korigí e manera di pensa di su apòstelnan, i kiko ta e lès pa nos awe?

⁸ E último bes ku e apòstelnan a reuní ku Hesus riba tera tabata riba seru Oleifi. Na e okashon ei, nan a puntr’é: “Señor, ta aworakí lo bo bolbe establesé e reino na Israel?” (Echo. 1:6) E pregunta ei a revelá dos idea robes ku e apòstelnan tabatin. Di promé, nan a asumí ku e Reino di Dios lo a kuminsá dirigí e nashon di Israel riba tera. Di dos, nan a ferwagt ku e Reino di Dios lo a kuminsá goberná mesora, “aworakí.” Kon Hesus a yuda nan korigí nan manera di pensa?

⁹ Hesus probablemente tabata sa ku e promé idea robes ku nan tabatin lo a ser korigí pronto. De echo, apénas dies dia despues, su disipelnan lo a mira e komienso di un nashon nobo: Israel di Dios. Despues di esei, e nashon di Israel lo no tabata Dios su pueblo spesial mas. Pa Hesus por a korigí e di dos idea robes di e apòstelnan, na un manera amabel, el a bisa nan: “Boso no tin nodi di sa e tempu ni e temporada. Ta mi Tata so tin outoridat pa determiná esei.” (Echo. 1:7) Ta Yehova so tin outoridat pa disidí ki ora su boluntat lo tuma lugá. Ora Hesus tabata riba tera, el a bisa ku ni e no tabata sa “e dia i ora” ku fin lo yega, “sino e Tata so.” (Mat. 24:36) Awe tambe, si un kristian kuminsá preokupá tokante ki ora e fin lo yega, lo e ta preokupando tokante kos ku e “no tin nodi di sa.”

10. Ki bon aktitut e apòstelnan tabatin, i dikon nos tambe mester tin e mesun aktitut?

¹⁰ Apesar di e ideanan robes ku Hesus su apòstelnan tabatin, nos no mester husga nan. Pasobra nan tabata hòmbernan ku hopi fe, i humildemente nan a aseptá korekshon. Ademas, maske nan tabatin algun idea robes, e pregunta ku nan a hasi Hesus a mustra ku nan tabatin un bon aktitut. Bes tras bes, Hesus a bisa nan: “Keda vigilá.” (Mat. 24:42; 25:13; 26:41) Nan tabata hòmbernan spiritualmente alerta ku tabata buska señal ku lo a mustra ku Yehova tabata a punto di tuma akshon. Ta e bon aktitut ei di e apòstelnan ta loke nos tambe tin ku imitá awe. Bon mirá, awe ta asta mas importante ainda pa nos keda vigilá, pasobra nos ta bibando “den e último dianan.”​—2 Tim. 3:1-5.

11, 12. (a) Kiko Hesus a manda su disipelnan hasi? (b) Dikon Hesus a kòrda su disipelnan ku nan lo haña yudansa di spiritu santu promé ku el a manda nan prediká?

¹¹ Hesus a kòrda su apòstelnan loke mester ta mas importante pa nan. El a bisa: “Boso lo risibí poder ora spiritu santu baha riba boso. I boso lo ta mi testigunan na Herúsalèm, na henter Hudea i Samaria, i te na e partinan di mas leu di tera.” (Echo. 1:8) E apòstelnan lo a kuminsá prediká tokante Hesus su resurekshon na Herúsalèm, kaminda hende a mata Hesus. Djei, nan lo a prediká na henter Hudea, kaba na Samaria i despues te na e partinan di mas leu di tera.

¹² Promé ku Hesus a manda su disipelnan prediká, el a kòrda nan ku lo e manda spiritu santu pa yuda nan. No ta solamente na Echonan 1:8 e ekspreshon “spiritu santu” ta aparesé den e buki Echonan; e ta aparesé mas ku 40 bes den e teksto original di e buki Echonan. Hopi biaha, e buki di Beibel emoshonante akí ta mustra bon kla ku nos no por kumpli ku Yehova su boluntat sin yudansa di spiritu santu. Pues, ta masha importante pa nos pidi Yehova pa su spiritu santu regularmente! (Luk. 11:13) Awor mas ku nunka, nos tin mester di yudansa di spiritu santu.

13. Kon grandi e teritorio di prediká di Dios su pueblo ta awe, i dikon nos mester keda okupá den e trabou di prediká?

¹³ Pa Dios su sirbidónan awe, e ekspreshon “te na e partinan di mas leu di tera” ta enserá un teritorio muchu mas grandi di loke el a enserá pa Hesus su apòstelnan. Sinembargo, manera nos a mira den e kapítulo anterior, Testigunan di Yehova a aseptá e asignashon akí pa prediká i ta kumpli kuné ku henter nan kurason. Nan sa ku Dios ke pa tur sorto di hende skucha bon notisia di e Reino. (1 Tim. 2:3, 4) Abo ta keda okupá den e trabou akí ku por salba bida di hende? No tin un trabou ku lo duna bo mas satisfakshon. Kòrda ku Yehova lo duna bo e forsa ku bo tin mester pa hasi e trabou akí. Anto e buki Echonan lo yuda bo mira vários método ku bo por usa pa hasi e trabou na un manera efektivo, i lo e yuda bo mira tambe ki aktitut bo mester tin pa bo tin éksito den e trabou akí.

14, 15. (a) Kiko e angelnan a bisa tokante e manera ku Hesus lo bolbe, i kiko nan tabata ke men? (Wak nota tambe.) (b) Dikon nos por bisa ku Hesus a bolbe “di mesun manera” ku el a bai?

¹⁴ Na komienso di e kapítulo akí, nos a menshoná ku Hesus a subi bai shelu i su disipelnan no por a mir’é mas. Pero, e 11 apòstelnan a keda pará einan ta wak shelu. Finalmente, dos angel a aparesé i a korigí nan na un manera amoroso bisando: “Hòmbernan di Galilea, pakiko boso ta para wak shelu? Hesus, kende tabata ku boso i ku Dios a tuma den shelu, lo bolbe di mesun manera ku boso a mir’é bai shelu.” (Echo. 1:11) Akaso e angelnan tabata ke men ku Hesus lo bolbe den e mesun kurpa manera algun religion ta siña? Nò! Kon nos por sa esei?

¹⁵ E angelnan a bisa ku Hesus lo bolbe “di mesun manera,” b i no den e mesun forma, òf e mesun kurpa. Den ki manera Hesus a bai? Ora e angelnan a papia ku e apòstelnan, ya Hesus no tabata visibel mas. Ta solamente algun hòmber, esta, e apòstelnan, a mira i realisá ku Hesus a bandoná tera i ku e tabata bayendo serka su Tata den shelu. Pues, Kristu lo a bolbe di e mesun manera, i ta esei mes a sosodé. Awe, ta solamente hende ku ta komprondé Beibel i ta konsiente di e tempu ku nos ta bibando aden ta realisá ku Hesus ta gobernando komo Rei di Dios su Reino. (Luk. 17:20) P’esei, ta importante pa nos mira e pruebanan ku ta mustra ku Hesus ta gobernando komo Rei i yuda otro hende pa nan tambe mira e urgensia di e tempu ku nos ta bibando aden.

16-18. (a) Kiko nos ta siña for di Echonan 1:13 i 14 tokante nos reunionnan kristian? (b) Kiko nos por siña for di Maria, mama di Hesus? (c) Dikon nos reunionnan kristian ta importante awe?

¹⁶ Manera nos por a spera, e apòstelnan “a bai Herúsalèm bèk ku gran goso.” (Luk. 24:52) Pero, nan lo a kumpli ku e instrukshonnan ku Hesus a duna nan? Na Echonan kapítulo 1, versíkulo 13 i 14, nos ta lesa ku nan a reuní den un “kamber ariba,” i nos ta siña algun detaye interesante tokante e tipo di reunionnan ei. E tempu ei, e kasnan na Palestina tabatin un trapi parti pafó ku tabata hiba na un “kamber ariba.” Kisas, ta na kas di Marko su mama nan a reuní, e kas ku ta ser menshoná na Echonan 12:12. Sea ku esei tabata e kaso òf nò, probablemente, e tabata un lugá simpel i un lugá apropiá pa Kristu su siguidónan reuní. Pero ken a reuní einan e dia ei, i kiko nan a hasi?

¹⁷ E reunion no tabata solamente pa e apòstelnan ni pa hende hòmber so. “Algun hende muhé” tabata einan, inkluso Maria, mama di Hesus. Pues, Maria tabata adorá Dios humildemente huntu ku su rumannan sin hala atenshon na su mes. Esei ta último bes ku Beibel ta menshoná Maria, mama di Hesus. E echo ku e otro kuater yu hòmbernan di Maria tabata presente mester tabata un konsuelo p’e, pasobra ora Hesus tabata riba tera, nan no a pone fe den dje. (Mat. 13:55; Huan 7:5) Pero, despues di Hesus su morto i resurekshon, nan aktitut a kambia.​—1 Kor. 15:7.

¹⁸ Ta bon pa nos tuma nota di e motibu pakiko e disipelnan a reuní huntu riba e dia ei. Echonan 1:14 ta bisa: “Nan tabata uní, i nan tur huntu a sigui hasi hopi orashon.” Esei ta mustra nos ku for di e tempu ei e kristiannan tabata reuní huntu. Pues, un parti importante di nos adorashon komo kristian ta di reuní huntu. Nos ta reuní huntu pa animá otro, pa haña instrukshon i konseho, i riba tur kos, pa nos por adorá nos Tata selestial, Yehova. E orashonnan ku nos ta hasi na nos reunionnan i e kantikanan di alabansa ku nos ta kanta ta agradá Yehova i ta animá nos tambe. Nunka nos no ke keda sin bai e reunionnan sagrado akí!​—Heb. 10:24, 25.

19-21. (a) Kiko nos por siña for di e echo ku Yehova a usa Pedro pa resolvé un problema importante den kongregashon? (b) Dikon mester a remplasá Hudas, i kiko nos por siña for di e manera ku nan a hasi esei?

¹⁹ E siguidónan ei di Kristu mester a resolvé un problema importante, i Apòstel Pedro a tuma inisiativa pa buska un solushon. (Versíkulo 15-26) Ta hopi animante pa mira kon Yehova a bolbe usa Pedro asta despues ku el a nenga Hesus tres biaha. (Mar. 14:72) Nos tur tin e tendensia di peka, i nos mester kòrda nos mes konstantemente ku Yehova ta “bon i semper kla pa pordoná” hende ku arepentí di bèrdat.​—Sal. 86:5.

²⁰ Pedro a komprondé ku mester a remplasá Hudas, e apòstel ku a traishoná Hesus. Pero ken lo a remplas’é? E apòstel nobo mester tabata un hende ku a sigui Hesus durante henter Hesus su sirbishi i ku tabata testigu di su resurekshon. (Echo. 1:21, 22) Esei tabata kuadra ku loke Hesus mes a primintí: “Boso ku a sigui mi tambe lo sinta riba 12 trono i husga e 12 tribunan di Israel.” (Mat. 19:28) Ta parse ku Yehova tabata ke pa e ‘12 piedranan di fundeshi’ ku lo a forma Herúsalèm Nobo tabata 12 apòstel ku a sigui Hesus durante su sirbishi riba tera. (Rev. 21:2, 14) Pues, Dios a laga Pedro komprondé ku e siguiente profesia lo mester a kumpli den kaso di Hudas: “Laga un otro hende tuma su responsabilidatnan.”​—Sal. 109:8.

²¹ Kon nan a disidí ken pa skohe? Nan a tira lòt, algu ku tabata komun den tempu di Beibel. (Pro. 16:33) Sinembargo, esaki ta e último bes ku Beibel ta menshoná ku nan a usa tiramentu di lòt di e manera ei. Ta parse ku tiramentu di lòt no tabata nesesario mas despues ku spiritu santu a ser dramá. Pero, wak dikon nan tabata tira lòt. E apòstelnan a pidi den orashon: “O Yehova, abo ku sa kiko tin den kurason di tur hende, por fabor, indiká kua di e dos hòmbernan akí bo a skohe.” (Echo. 1:23, 24) Nan tabata ke pa Yehova tuma e desishon. E lòt a kai riba Matías, kende probablemente tabata un di e 70 disipelnan ku Hesus a manda pa bai prediká. Pues, Matías a bira un di “e 12 apòstelnan.” c​—Echo. 6:2.

22, 23. Dikon nos mester ta sumiso i obediente na e rumannan ku ta dirigí e kongregashonnan awe?

²² E relato akí ta kòrda nos ku Dios ke pa su pueblo ta organisá. Awe, meskos ku den pasado, ta skohe hòmber responsabel pa sirbi komo superintendente den kongregashon. E ansianonan ta tuma tempu pa analisá e rekisitonan ku tin den Beibel pa un ruman hòmber por bira un superintendente, i nan ta hasi orashon pa spiritu santu guia nan. P’esei, e kongregashon por tin konfiansa ku ta spiritu santu a nombra e rumannan ei. Si nos ta sumiso i obediente na e rumannan ku ta dirigí kongregashon, nos lo promové union den nos kongregashon.​—Heb. 13:17.

²³ E echo ku Hesus a aparesé na su disipelnan despues di su resurekshon sigur a animá nan. Anto e kambionan ku a tuma lugá den e manera ku ta organisá e trabou, tambe lo a fortalesé e disipelnan. Pues, nan tabata kompletamente prepará pa loke lo a tuma lugá despues. Den e siguiente kapítulo, nos lo trata e suseso importante ei ku a tuma lugá.