1-4. Ki situashon difísil Pedro a enfrentá, i kon abo lo a sinti bo si bo tabata den su situashon?

 PEDRO a skucha un zonido duru ora e sòldánan a sera un porta grandi di heru su tras. Pedro tabata mará na dos kadena entre dos sòldá romano. Nan a hib’é na su sèl. Einan, lo e mester a warda vários ora, kisas asta algun dia, promé ku el a haña sa kiko lo a pasa kuné. Será den su sèl, e úniko kosnan ku e por a mira tabata e murayanan di prizòn, e baranan, e kadenanan i e wardadónan di prezu.

² Por fin Pedro a haña sa loke tabata bai sosodé kuné, pero no tabata nada bon. Rei Heródes Agripa I tabata determiná pa mata Pedro. a Su intenshon tabata pa presentá Pedro na e pueblo despues di Pasku Hudiu i laga mat’é pa komplasé e multitut. Pedro tabata sa ku Heródes tabatin poder pa laga mat’é, pasobra Heródes a laga mata un otro apòstel kaba, Santiago.

³ Purba di imaginá kon Pedro lo a sintié e anochi promé ku Heródes tabata di bai mat’é. Pedro tabata su so den su sèl i tabata skur. Kisas e tabata pensa riba loke Hesus a bis’é algun aña promé. Hesus a bis’é ku un dia nan lo a mar’é kontra di su boluntat i laga mat’é. (Huan 21:18, 19) Kisas Pedro tabata puntra su mes si ta e dia ei a yega.

⁴ Si abo tabata den Pedro su situashon, kon lo bo a sinti? Hopi hende lo a sinti nan desanimá i pensa ku lo no tabatin speransa mas pa nan. Sinembargo, pa berdadero disipel di Hesukristu, ningun situashon no ta kompletamente sin speransa. Kiko nos por siña for di e manera ku Pedro i e otro kristiannan a trata ku persekushon? Ban wak.

5, 6. (a) Dikon Rei Heródes Agripa I a persiguí e kongregashon kristian, i kon el a hasi esei? (b) Dikon e morto di Santiago tabata un sla duru pa e kongregashon kristian?

⁵ Manera nos a mira den e kapítulo anterior di e publikashon akí, Kornelio i su famia a kombertí i bira kristian. Esei tabata un suseso importante pa e kongregashon kristian. E hudiunan ku no a bira kristian lo a keda di shòk ora nan a haña sa ku hopi hudiu kristian a kuminsá adorá Dios huntu ku hende ku no tabata hudiu.

⁶ Heródes tabata un polítiko sabí. El a mira e situashon komo oportunidat pa kai na agrado di e hudiunan. Pues, el a kuminsá maltratá e kristiannan. Probablemente, el a tende ku Apòstel Santiago tabata hopi será ku Hesus. P’esei , el “a laga mata Santiago, ruman di Huan, ku spada.” (Echo. 12:2) Esei tabata un sla duru pa e kongregashon kristian. Santiago tabata un di e tres apòstelnan ku a mira e transfigurashon di Hesus i otro milager ku e sobrá apòstelnan no a mira. (Mat. 17:1, 2; Mar. 5:37-42) Hesus a yama Santiago i su ruman hòmber Huan “Yunan di Dònder” pasobra nan tabatin hopi entusiasmo. (Mar. 3:17) Pues, ora Santiago a ser matá, e kongregashon a pèrdè un ruman fiel ku tabatin hopi kurashi, un apòstel masha stimá.

7, 8. Kiko e kongregashon a hasi ora Pedro a kai será?

⁷ Manera Heródes a spera, e ehekushon di Santiago a komplasé e hudiunan. Reakshon di e hudiunan a duna Heródes kurashi pa bai tras di Pedro tambe. Manera nos a mira na komienso di e kapítulo akí, el a laga arestá Pedro. Pero probablemente, Heródes a kòrda ku den pasado e apòstelnan a ser librá milagrosamente for di den prizòn. Kapítulo 5 di e buki akí a mustra un ehèmpel di esei. P’esei, Heródes a laga mara Pedro ku kadena entre 2 sòldá. Ademas, tabatin 16 sòldá ku tabata tuma turno pa vigilá Pedro di dia i anochi pa hasi sigur ku lo e no a hui. Si Pedro lo a hui, e sòldánan ei lo a haña mesun sentensia ku Pedro, esta, morto. Bou di e sirkunstansianan difísil ei, kiko e otro kristiannan por a hasi pa yuda Pedro?

⁸ E kongregashon tabata sa eksaktamente kiko pa hasi. Echonan 12:5 ta bisa: “Pues, Pedro tabata será den prizòn, pero e kongregashon tabata hasi masha hopi orashon na Dios p’e.” E orashonnan ku e kongregashon a hasi pa nan ruman stimá tabata petishon ku a sali di nan kurason. E morto di Santiago no a laga nan pèrdè nan fe. Ainda, nan tabata kere firmemente ku Yehova tabata skucha nan orashonnan. Orashon ta masha importante pa Yehova. Si nan ta na armonia ku su boluntat, lo e kontestá nan. (Heb. 13:18, 19; Sant. 5:16) Esei ta un lès importante pa tur kristian awe.

9. Kon nos por imitá e rumannan di promé siglo ku a hasi orashon pa Pedro?

⁹ Bo konosé ruman ku ta pasando den vários prueba, òf difikultat? Kisas nan ta enfrentá persekushon, gobièrnu ta prohibí nan trabou òf nan ta haña nan ku desaster natural. Lo bo por hasi orashon pa nan. Òf kisas bo sa di ruman ku ta enfrentá otro tipo di prueba, manera oposishon di famia, desanimashon òf nan fe ta ser poné na prueba. Si bo tuma un tiki tempu pa pensa promé ku bo hasi orashon, sin duda, lo bo kòrda riba vários hende ku bo por menshoná den bo orashonnan na Yehova, kende ta “skucha orashon.” (Sal. 65:2) Bon mirá, bo tambe mester pa bo rumannan hasi orashon pa bo ora bo ta pasa den tempu difísil.

10, 11. Deskribí kon un angel di Yehova a libra Pedro for di prizòn.

¹⁰ Pedro tabatin miedu di muri? Nos no por bisa sigur. Pero durante su último anochi den prizòn, e tabata morto na soño entre e dos sòldánan. Pedro tabatin fe fuerte den Yehova. P’esei, e tabatin sigur ku sin importá kiko lo a pasa, Yehova lo a kòrda riba dje. (Rom. 14:7, 8) Pero probablemente, Pedro nunka lo por a imaginá e susesonan ku lo a bai tuma lugá. Diripiente, un lus a bria den su sèl di prizòn. Un angel tabata pará einan, i ta parse ku e sòldánan no tabata mira e angel. E angel a sagudí Pedro, i Pedro a lanta. Anto e kadenanan ku tabata parse di ta asina fuerte a simplemente kita kai for di Pedro su man!

¹¹ E angel a duna Pedro vários instrukshon kòrtiku: “Lanta lihé! . . . Bisti bo paña i bo sandalia. . . . Bisti bo mantel.” Pedro a obedesé mesora. Finalmente, e angel a bis’é: “Sigui mi,” i Pedro a hasi esei. Ketu ketu nan a pasa e sòldánan ku tabata vigilá e sèl, i nan a bai na e porta grandi di heru. Kisas Pedro lo a puntra su mes kon nan lo a pasa via e porta ei. Pero Pedro no mester a keda preokupá su mes ku esei pa un tempu largu. Ora nan a yega na e porta, e porta “a habri di su mes pa nan.” Mesora nan a sali i yega riba kaya. Na e momento ei, e angel a disparsé. Pedro tabata su so riba kaya, i el a realisá loke a kaba di pasa. No tabata un vishon; e tabata liber!​—Echo. 12:7-11.

12. Dikon e manera ku Yehova a salba Pedro ta animá nos?

¹² Ta masha animante pa pensa riba e poder sin límite ku Yehova tin pa salba su sirbidónan. Pedro tabata prizonero di un rei ku tabatin apoyo di e imperio romano, e gobièrnu di mas poderoso ku mundu tabatin. Apesar di esei, Pedro a simplemente kana sali for di prizòn. Ta bèrdat ku Yehova no ta salba tur su sirbidónan milagrosamente. E no a hasi esei pa Santiago ni e no a hasi esei mas despues pa Pedro, ora Hesus su palabranan tokante e apòstel ei a kumpli. Komo kristian, nos no ta spera ku Yehova lo salba nos milagrosamente awe. Sinembargo, nos ta keda kòrda ku Yehova no a kambia. (Mal. 3:6) Pronto lo e usa su Yu pa libra miónes di hende for di morto, un prizòn ku ta parse ku hende no por skapa for di dje. (Huan 5:28, 29) E promesanan ei por yuda nos tin kurashi ora nos haña nos ku prueba.

13-15. (a) Kon e kongregashon ku tabata reuní na Maria su kas a reakshoná ora Pedro a yega? (b) Riba kiko e buki Echonan a enfoká despues, i kiko Pedro a sigui hasi pa su rumannan spiritual?

¹³ Pedro tabata pará riba kaya, den skuridat, purbando di disidí unda pa bai. Tabatin un señora kristian ku tabata biba serka ei banda; su nòmber tabata Maria. Pues, Pedro a disidí di bai serka dje. Ta parse ku Maria tabata un biuda relativamente riku. E tabatin un kas sufisientemente grandi pa un kongregashon por a reuní einan. E tabata mama di Huan Marko, kende e buki Echonan ta menshoná pa promé biaha akinan. Ku tempu, Huan Marko a bira manera un yu hòmber pa Pedro. (1 Ped. 5:13) Riba e anochi ku Pedro a ser librá, aunke ku tabata lat, hopi hende di e kongregashon tabata na Maria su kas hasiendo orashon fervientemente. Sin duda, nan tabata hasi orashon pa Pedro sali liber. Pero, nan lo a keda di shòk ora nan mira kon Yehova a kontestá nan orashonnan.

¹⁴ Pedro a bati na porta di e entrada prinsipal, ku tabata hiba na e plenchi dilanti di e kas. Un kriá ku yama Roda a bin wak ta ken. Su nòmber tabata un nòmber griego bon konosí ku ta nifiká “Rosa.” E no por a kere loke el a tende. Tabata stèm di Pedro! En bes di habri e porta, tur entusiasmá, el a kore bai bèk paden pa purba di konvensé e kongregashon ku Pedro tabata einan. Nan a bis’é ku su kabes no ta bon. Pero el a keda para ariba ku tabata Pedro. Komo ku e tabata keda para ariba, algun hende den e kongregashon a bisa ku kisas loke el a tende tabata un angel ku tabata representá Pedro. (Echo. 12:12-15) Turesten, Pedro a keda bati na porta te ora nan a bin habri e porta p’e.

¹⁵ “Ora nan a habri porta i mira Pedro, nan no por a kere loke nan tabata mira.” (Echo. 12:16) Nan tabata asina kontentu ku Pedro mester a pidi nan keda ketu pa asina e por a splika nan loke a pasa. Ademas, el a bisa nan pa konta disipel Santiago i e otro ruman hòmbernan loke a pasa. Despues, el a sali bai promé ku e sòldánan di Heródes por a hañ’é. Pedro a sigui sirbi Yehova fielmente na un lugá mas safe. E úniko otro biaha ku Pedro ta ser menshoná den e buki Echonan ta na kapítulo 15. Einan e ta bisa ku Pedro a yuda resolvé e kuestion di sirkunsishon. Despues, e buki Echonan ta enfoká riba e trabou i e biahenan di Apòstel Pablo. Sinembargo, nos por tin sigur ku Pedro a fortalesé fe di su rumannan unda ku el a bai. Ora el a despedí di e grupo ku tabata reuní na Maria su kas, nan tabata masha felis.

16. Dikon nos por tin sigur ku nos lo tin un futuro felis den futuro?

¹⁶ Tin biaha, Yehova ta duna su sirbidónan muchu mas di loke nan por a spera, i esei ta laga nan keda masha kontentu. Sin duda, ta asina Pedro su rumannan spiritual a sinti nan e anochi ei. Awe, kisas nos tambe ta sinti asina ora Yehova bendishoná nos. (Pro. 10:22) Den futuro, nos lo mira kon Yehova su promesanan lo kumpli rònt mundu. E bendishonnan ku nos lo risibí ta muchu mas di loke nos por imaginá. Si nos keda fiel na Yehova, nos por tin sigur ku nos lo tin un bida felis den futuro.

17, 18. Pakiko e multitut a labia Heródes?

¹⁷ Heródes a keda sorprendí ku Pedro a skapa for di prizòn; esei a pon’é rabia masha hopi. Mesora Heródes a laga buska Pedro tur kaminda, i el a interogá e wardadónan di prezu. “El a duna òrdu pa kastigá nan,” probablemente nan lo a haña kastigu di morto. (Echo. 12:19) Heródes Agripa no tabata konosí komo un persona ku tabata tene kompashon di hende ni mustra miserikòrdia. E hòmber kruel ei lo a keda sin haña kastigu?

¹⁸ Kisas Heródes a sintié humiá pasobra e no a logra mata Pedro, pero pronto lo el a haña oportunidat pa hasi algu ku lo a lag’é sintié orguyoso atrobe. Algun di su enemigunan a bai serka dje pasobra nan kier a sera pas kuné. Esei a dun’é oportunidat pa papia dilanti di un multitut grandi. Lukas a skirbi ku promé ku Heródes a duna su spich, el “a bisti su pañanan ofisial di rei.” E historiadó hudiu Hosefo a skirbi ku e pañanan di Heródes tabata di plata, pues ora e rei tabata den lus, e tabata bria asina tantu ku hende tabata pensa ku e tabata un dios. E ora ei, e polítiko arogante ei a duna su spich. E multitut ku kier a labia Heródes a kuminsá grita: “Esaki no ta palabra di hende sino palabra di un dios!”​—Echo. 12:20-22.

19, 20. (a) Dikon Yehova a kastigá Heródes? (b) Dikon e relato tokante Heródes su morto por konsolá nos?

¹⁹ Ta Dios so meresé e tipo di gloria ei, i e tabata mira loke tabata pasando. Heródes por a evitá di haña kastigu. E por a korigí e multitut òf a lo ménos bisa nan ku e no tabata di akuerdo ku nan. En bes di esei, el a demostrá ku e palabranan di Proverbionan ta bèrdat: “Orguyo ta hiba na destrukshon.” (Pro. 16:18) “Mesora, un angel di Yehova a laga Heródes bira malu,” i esei a laga e hòmber egoista i orguyoso ei muri un morto kruel i repugnante. “Bichi a kom’é, i el a muri.” (Echo. 12:23) Hosefo tambe a indiká ku Heródes a bira malu diripiente i ku Heródes mes a atmití ku el a bira malu pasobra el a aseptá e labiamentu di e multitut; el a laga nan glorifik’é. Hosefo a skirbi ku Heródes tabata malu sinku dia promé ku el a muri. b

²⁰ Tin biaha, por parse ku hende malbado ta hasi kos malu sin haña kastigu. Esei no mester sorprendé nos, pasobra “henter mundu ta den poder di e Malbado.” (1 Huan 5:19) Asina mes, algun sirbidó fiel di Dios por sinti nan malu ora ta parse ku hende malbado no ta haña kastigu. P’esei, e tipo di relatonan akí ta konsolá nos. Nan ta mustra nos ku Yehova ta husga hende malbado i ku e ta stima hustisia. (Sal. 33:5) Tardi òf trempan, Yehova lo husga hende malbado.

21. Kiko ta e lès di mas importante di Echonan kapítulo 12, i dikon e ta animá nos awe?

²¹ Loke ta animá nos mas ainda ta kon e relato akí a konkluí. E ta bisa: “Palabra di Yehova a sigui plama i e kantidat di disipel a sigui oumentá.” (Echo. 12:24) Esei ta mustra nos ku Yehova a sigui bendishoná e trabou di prediká, i e ta hasi meskos awe. Klaru ku e punto mas importante di Echonan kapítulo 12 no ta ku un apòstel a muri i un otro a skapa for di prizòn. Mas bien, e kapítulo ta siña nos tokante Yehova i loke Yehova a hasi pa stroba Satanas di kaba ku e kongregashon kristian i stòp e trabou di prediká. Satanas no a logra stòp e trabou di prediká, i ningun otro hende lo no logra hasi esei tampoko. (Isa. 54:17) Di otro banda, hende ku skohe pa adorá Yehova i sigui Hesus ta hasi un trabou ku lo no faya nunka. Esei ta masha animante. Awe ta un gran privilegio pa por prediká “palabra di Yehova”!