1-3. (a) Deskribí loke a pasa e anochi ku Eutiko a muri. (b) Kiko Pablo a hasi i kiko esaki ta siña nos di Pablo?

 PABLO a reuní ku hopi ruman di kongregashon Troas den un kamber ariba. Tabatin asina tantu kos ku Pablo kier a konta nan ku el a keda papia ku nan te lat. A bira meianochi. Tabatin hopi lampi sendé den e kamber, a kuminsá hasi mas kalor i kisas tabatin hopi huma. Un yònkuman ku yama Eutiko tabata sintá den bentana. Miéntras ku Pablo tabata papia, Eutiko a bai un soño profundo i el a kai abou for di e di tres piso!

² Komo ku Lukas tabata dòkter, probablemente e tabata un di e promé hendenan ku a kore bai pafó pa yuda Eutiko. Sinembargo, no por a hasi nada mas p’e. Eutiko a muri. (Echo. 20:9) Pero despues, un milager a sosodé. Pablo a kai drumi riba e yònkuman, i bisa e multitut: “Stòp di hasi bochincha; e ta bibu.” Pablo a lanta Eutiko for di morto!​—Echo. 20:10.

³ E resurekshon di Eutiko ta demostrá e kosnan maravioso ku Yehova por hasi mediante su spiritu santu. No tabata Pablo su falta ku Eutiko a muri. Pero, e no tabata ke pa e rumannan bira tristu ni pèrdè nan fe den Yehova debí na loke a pasa. Pablo a konsolá e rumannan i fortalesé nan pa nan por a sigui prediká ku entusiasmo. Sin duda, Pablo tabata sa ku bida ta masha balioso. Esei ta laga nos kòrda loke el a bisa: “Mi no ta responsabel pa morto di niun hende.” (Echo. 20:26) Laga nos wak kon e ehèmpel di Pablo por yuda nos tin e mesun rèspèt pa bida.

4. Ki eksperensia horibel Pablo a pasa aden?

⁴ Manera nos a mira den e kapítulo anterior, Pablo a pasa den un eksperensia horibel. Hopi hende na Efeso a rabia mashá debí na loke e tabata prediká. Tur e hendenan ku tabata traha i bende imágen pa adorá e diosa Artémis, a partisipá den e rebelion! Echonan 20:1 ta bisa: “Despues ku e situashon a kalma, Pablo a manda yama e disipelnan. El a animá nan; kaba, el a yama nan ayó i kuminsá su biahe pa Masedonia.”

5, 6. (a) Mas o ménos kuantu tempu Pablo a keda Masedonia, i kiko el a hasi pa e rumannan ei? (b) Kiko Pablo tabata pensa di su rumannan?

⁵ Na kaminda pa Masedonia, Pablo a para na e haf di Troas, i el a keda einan pa un tempu. Pablo a spera di topa Tito, kende a bai Korinto mas promé. (2 Kor. 2:12, 13) Sinembargo, ora Pablo a ripará ku Tito lo no por a bini, el a bai Masedonia i kisas el a keda un aña “animando e disipelnan masha hopi mes.” a (Echo. 20:2) Ku tempu Tito a topa Pablo na Masedonia. El a konta Pablo ku e rumannan na Korinto a reakshoná hopi bon riba Pablo su promé karta. (2 Kor. 7:5-7) Esei a motivá Pablo pa skirbi nan un otro karta, ku awe nos konosé komo 2 Korintionan.

⁶ Ta remarkabel ku Lukas a usa e palabranan “animá” i “animashon” pa deskribí Pablo su bishitanan na e rumannan na Efeso i na Masedonia. Esei a mustra kuantu Pablo tabata stima su rumannan! E no tabata manera e fariseonan ku tabata kere ku nan ta superior na otro hende. Mas bien, e tabata kontentu pa sirbi Dios huntu ku su rumannan. (Huan 7:47-49; 1 Kor. 3:9) Nunka, el a pensa ku e tabata mihó ku otro hende, ni ora e mester a duna nan konseho fuerte.​—2 Kor. 2:4.

7. Kon e superintendentenan den nos tempu por imitá Pablo su ehèmpel?

⁷ Den nos tempu, e ansianonan di kongregashon i e superintendentenan di sirkuito ta trata di imitá Pablo su ehèmpel. Asta ora un ruman mester di konseho fuerte, semper nan ta purba di duna konseho na un manera animante. E superintendentenan ta purba di komprondé kon otro hende ta sinti i animá nan, en bes di husga nan. Un superintendente di sirkuito ku hopi eksperensia a bisa: “Mayoria di nos rumannan ke hasi loke ta korekto, pero hopi biaha nan ta sinti nan mes frustrá, anshá i nan no sa kiko pa hasi.” E ansianonan por fortalesé e rumannan ei.​—Heb. 12:12, 13.

8, 9. (a) Dikon Pablo mester a kambia su plannan pa bai Siria? (b) Pakiko e hudiunan tabatin masha rabia riba Pablo?

⁸ Pablo a bai di Masedonia pa Korinto. b Despues ku el a keda tres luna na Korinto, e tabatin gana di bai Senkrea, kaminda e kier a subi un barku pa bai Siria. Di einan, e por a bai Herúsalèm pa hiba e kontribushonnan pa e rumannan ku tabata den nesesidat. c (Echo. 24:17; Rom. 15:25, 26) Pero, diripiente algu a pasa ku a kambia e plannan di Pablo. Echonan 20:3 ta bisa: “E hudiunan a traha un kòmplòt pa mat’é”!

⁹ E hudiunan tabatin masha rabia riba Pablo pasobra pa nan, Pablo tabata un apóstata. Komo ku Pablo a prediká na Korinto algun tempu promé, e lider di snoa, Krispo, a bira kristian. (Echo. 18:7, 8; 1 Kor. 1:14) Na otro okashon, e hudiunan na Korinto a hiba Pablo dilanti di e gobernador di Akaya, Galio. Nan a akusá Pablo di a kibra lei, pero Galio no a aseptá nan akusashon. Esei a pone ku nan a rabia mashá. (Echo. 18:12-17) E hudiunan na Korinto kisas tabata sa òf tabata pensa ku Pablo lo a subi un barku for di Senkrea. P’esei, nan a traha un plan pa ward’é einan i mat’é. Laga nos wak kiko Pablo a hasi.

10. Pablo a hasi malu di no bai Senkrea? Splika.

¹⁰ Pablo a disidí pa no bai Senkrea, pero pa bai bèk Masedonia. El a hasi esei pasobra e kier a protehá su mes bida i tambe e kontribushonnan di e rumannan. Pero, biaha na pia tambe tabata peligroso. Tabatin hopi ladron ku tabata skonde riba e rutanan ei. Asta e lugánan di keda tabata insigur. Sinembargo, Pablo a pensa ku e ruta ei tabata mas sigur ku bai Senkrea. E kos bon tabata ku Pablo no a biaha su so. Su kompañeronan di biahe tabata Aristargo, Gayo, Sekundo, Sopatro, Timoteo, Trófimo i Tikiko.​—Echo. 20:3, 4.

11. Kiko nos por hasi awe pa protehá nos mes, i ki ehèmpel Hesus a pone pa nos?

¹¹ Meskos ku Pablo, awe nos komo kristian ta hasi loke nos por pa protehá nos mes ora nos ta den sirbishi. Den algun área, nos ta prediká den grupo òf por lo mes huntu ku un otro ruman. Kiko nos por hasi ora nos haña nos ku persekushon? Nos sa ku nos no por evitá persekushon. (Huan 15:20; 2 Tim. 3:12) Pero, nos no ta pone nos mes den peliger innesesario ora nos ta prediká. Laga nos wak e ehèmpel ku Hesus a pone. Na un okashon, ora e opositornan di Hesus na Herúsalèm a kohe piedra pa dal e kuné, “Hesus a skonde i sali bai for di tèmpel.” (Huan 8:59) Mas despues, ora e hudiunan a traha kòmplòt pa mat’é, “Hesus no tabata kana públikamente mas entre e hudiunan. El a kita for di einan i a bai na e region serka di desierto.” (Huan 11:54) Hesus a protehá su mes ora tabata nesesario pa e por a kumpli ku boluntat di Dios. Awe, nos ta hasi meskos.​—Mat. 10:16.

12, 13. (a) Kon e kongregashon a sinti ora Pablo a resusitá Eutiko? (b) Ki speransa por konsolá nos awe ora un ser kerí di nos muri?

¹² Tempu ku Pablo i su kompañeronan tabata na Masedonia, nan tabata biaha huntu. Despues, ta parse ku nan a separá pa un tempu. Kisas e grupo a bolbe topa na Troas. d E relato ta bisa: “Den sinku dia, nos a yega serka nan na Troas.” e (Echo. 20:6) Ta einan Pablo a resusitá e mucha hòmber Eutiko manera nos a trata na kuminsamentu di e kapítulo akí. Imaginá bo kon e rumannan den e kongregashon ei a sinti ora nan amigu Eutiko a ser resusitá! Manera e relato ta bisa “nan a keda masha kontentu mes.”​—Echo. 20:12.

¹³ Ta bèrdat ku e milagernan ei no ta pasa den nos tempu. Pero, awe tambe, hende ku a pèrdè un ser kerí den morto ta “keda masha kontentu mes” ku e speransa di resurekshon ku tin den Beibel. (Huan 5:28, 29) Kòrda ku Eutiko a bolbe muri mas despues pasobra e tabata imperfekto. (Rom. 6:23) Sinembargo, e hendenan resusitá den e mundu nobo di Dios tin speransa di biba pa semper! Ademas, hende ku ser resusitá pa goberná ku Hesus den shelu lo haña bida inmortal. (1 Kor. 15:51-53) Pues, tantu e ungínan komo e “otro karnénan” den nos tempu lo “keda masha kontentu mes” ku e speransa di resurekshon.​—Huan 10:16.

14. Kiko Pablo a bisa e ansianonan na Efeso ora el a reuní ku nan na Mileto?

¹⁴ Pablo i su kompañeronan a biaha for di Troas pa Ásos, despues pa Mitilene, Kios, Samos i Mileto. Pablo tabata kier a yega Herúsalèm na tempu pa e Fiesta di Pentekòste. P’esei, el a skohe pa bai Herúsalèm bèk riba un barku ku lo no a pasa Efeso. Pablo tabata kier a papia ku e ansianonan na Efeso. P’esei, el a pidi nan pa bin top’é na Mileto. (Echo. 20:13-17) Ora e ansianonan a bini serka dje, Pablo a bisa nan: “Boso sa kon mi a komportá mi mes ora mi tabata serka boso, sí, for di e promé dia ku mi a pone pia na provinsia Asia. Mi a sirbi Señor manera esklabo, ku tur humildat i ku lágrima. I mi a haña mi den hopi prueba pa motibu di e kòmplòtnan di e hudiunan. Pero mi no a keda sin bisa boso tur loke ta pa boso mes bon. Mi a siña boso públikamente i predikando di kas pa kas. Sí, mi a prediká kabalmente na hende hudiu i na hende griego ku nan mester arepentí, akudí na Dios i pone fe den nos Señor Hesus.”​—Echo. 20:18-21.

15. Dikon e método di kas pa kas ta e manera prinsipal ku nos ta usa pa prediká?

¹⁵ Awendia, nos ta usa diferente método pa prediká. Meskos ku Pablo, nos ta hasi esfuerso pa bai kaminda nos ta topa hende, manera na parada di bùs, kaminda sa tin hopi hende òf kaminda tin negoshi. Sinembargo, e método di kas pa kas ta keda nos manera prinsipal di prediká. Dikon? Un motibu ta ku e método ei ta duna tur hende e oportunidat pa skucha di Beibel regularmente. Esei ta mustra ku Dios ta imparsial. Un otro motibu ta ku nos ta yuda tur hende sinsero siña konosé Dios . Ademas, e método ei ta hasi nos fe mas fuerte i nos ta siña perseverá. Sin duda, awe hende por rekonosé ku nos ta kristian berdadero pa e echo ku nos ta prediká ku entusiasmo, “públikamente i . . . di kas pa kas.”

16, 17. Kon Pablo a demostrá kurashi, i kon nos por imitá su ehèmpel?

¹⁶ Pablo a splika e ansianonan na Efeso ku e no tabata sa ki peliger lo e mester a enfrentá ora el bolbe Herúsalèm. El a bisa nan: “Sinembargo, mi bida no ta importante pa mi. Esaki ta importante pa mi: kore e kareda akí te final i kumpli ku e trabou ku mi a risibí di Señor Hesus, esta, e trabou di prediká kabalmente bon notisia tokante e bondat inmeresí di Dios.” (Echo. 20:24) Pablo tabatin kurashi. E no a laga problema di salú ni persekushon ni nada otro strob’é di kumpli ku su asignashon.

¹⁷ Awe nos tambe ta enfrentá vários problema. Algun ruman ta biba kaminda tin persekushon. Otro ruman tin problema di salú òf problema emoshonal, pero nan ta perseverá ku kurashi. E hóbennan kristian ta haña nan ku preshon di pareu na skol. Meskos ku Pablo, nos ta determiná pa “prediká kabalmente bon notisia.”

18. Dikon Pablo por a bisa ku e “no ta responsabel pa morto di niun hende,” i kon e ansianonan na Efeso por a hasi meskos?

¹⁸ Ora e ansianonan di Efeso a topa Pablo, el a duna nan konseho kla i rekordá nan kon el a kuida e kongregashonnan. El a bisa nan ku probablemente esei lo tabata e último biaha ku nan lo a mir’é. Despues el a bisa: “Mi no ta responsabel pa morto di niun hende, pasobra mi a konta boso tur kos tokante Dios su boluntat pa hende, sin tene nada atras.” Kon e ansianonan na Efeso por a imitá Pablo, kende a bisa ku e “no ta responsabel pa morto di niun hende”? El a bisa nan: “Paga tinu na boso mes i kuida tur e karnénan di Dios, pasobra spiritu santu a pone boso responsabel pa kuida e kongregashon di Dios, sí, e kongregashon ku el a kumpra ku sanger di su propio Yu.” (Echo. 20:26-28) Pablo a spièrta ku “lobo feros” lo a drenta e kongregashon i lo a “trose e bèrdat pa pone e disipelnan bai nan tras.” Kiko e ansianonan lo mester a hasi? Pablo a spièrta nan: “Keda alerta, i kòrda ku tres aña largu, di dia i anochi, mi no a stòp di konsehá kada un di boso. Mi a asta papia ku boso ku awa na wowo.”​—Echo. 20:29-31.

19. Kiko a pasa na fin di promé siglo i kiko tabata e konsekuensianan mas despues?

¹⁹ Na fin di promé siglo “lobo feros” a drenta e kongregashon. Rònt di aña 98 despues di Kristu, Apòstel Huan a skirbi: “Wèl, awor akí mes kaba hopi antikristu a aparesé . . . Nan tabata meimei di nos, pero nan a bai laga nos pasobra nan no tabata di nos; pasobra si nan tabata di nos, nan lo a keda ku nos.” (1 Huan 2:18, 19) Mas o ménos 200 aña despues di morto di Hesus, e lidernan apóstata a haña ku nan tabata superior na otro hende den kongregashon. Un 300 aña despues di morto di Hesus, e emperador romano Konstantino públikamente a rekonosé e forma di “kristianismo” falsu ei. E lidernan religioso apóstata a trose e bèrdat. Nan a meskla siñansa di Beibel ku kreensia i kustumber pagano pa nan parse di ta kristian. Den nos tempu, e iglesianan ainda ta sigui e kustumbernan falsu ei.

20, 21. Kon Pablo a demostrá sakrifisio propio i kon e ansianonan awe por imit’é?

²⁰ Pablo no tabata manera e lidernan religioso ku despues a usa e kongregashon pa benefisiá nan mes. E tabata traha pa kubri su gastunan pa e no bira un karga pa e kongregashon. E tabata hasi hopi pa su rumannan, pero nunka el a spera di haña sèn for di nan. Pablo a animá e ansianonan di Efeso pa sirbi nan rumannan na un manera inegoista. El a bisa nan: “Boso mester traha duru pa yuda hende ku tin mester di yudansa. I boso mester kòrda loke Señor Hesus mes a bisa: ‘Tin mas felisidat den duna ku den risibí.’”​—Echo. 20:35.

²¹ Meskos ku Pablo, e ansianonan den nos tempu ta mustra sakrifisio propio. Nan no ta manera e lidernan di kristiandat ku ta tuma sèn for di hende pa bira riku. Nan ta komprondé ku Dios a duna nan e responsabilidat pa kuida su kongregashon, i nan ta hasi esei na un manera inegoista. Den e kongregashon kristian no tin lugá pa hende orguyoso ni ambisioso pasobra, ku tempu, hende ku ta buska nan “mes onor” lo frakasá. (Pro. 25:27) Finalmente, arogansia ta hiba na humiashon.​—Pro. 11:2.

22. Dikon e ansianonan di Efeso tabata stima Pablo?

²² E ansianonan tabata stima Pablo pasobra e tabata stima nan di kurason. Pues, ora tempu a yega pa Pablo bai, “nan tur a basha na yoramentu, i nan a brasa Pablo i sunch’e.” (Echo. 20:37, 38) Manera Pablo, nos ta apresiá i stima e rumannan ei ku ta usa nan tempu, energia i kos material pa kuida e tou. Despues ku nos a trata e ekselente ehèmpel di Pablo, tabata bisto ku el a papia e bèrdat ora el a bisa: “Mi no ta responsabel pa morto di niun hende.”​—Echo. 20:26.