1-3. (a) Ken Pablo a skohe komo su kompañero di biahe e biaha akí, i kiko nos sa di dje? (b) Kiko nos lo siña den e kapítulo akí?

 APÒSTEL PABLO i Timoteo tabata kana di un stat pa otro. Miéntras ku nan tabata kana, Apòstel Pablo tabata opservá e yònkuman ku tabata band’i dje. Timoteo tabatin rònt di 20 aña, i e tabata yen di vigor i entusiasmo. Segun ku nan a sali for di Listra i Ikonio, Timoteo tabata laga su kas atras. Kiko lo a spera nan? Pablo lo tabatin algun idea, pasobra esaki tabata su di dos biahe komo misionero. E tabata sa ku nan lo a enfrentá hopi peliger i difikultat. Kisas Pablo tabata puntra su mes kon Timoteo lo a trata ku e difikultatnan ku nan lo a haña nan kuné.

² Pablo tabatin konfiansa den Timoteo, kisas asta mas konfiansa ku Timoteo tabatin den su mes. Pablo tabata sa ku e tabatin mester di e persona korekto pa biaha kuné. Nan lo mester a bishitá i fortalesé e kongregashonnan. Pues, nan lo mester tabata uní i determiná pa hasi e trabou ei. Kiko lo por a pone Pablo pensa asina? Un motibu lo por tabata e desakuerdo ku tabatin entre e i Bárnabas mas promé.

³ Den e kapítulo akí, nos lo siña kiko pa hasi ora surgi desakuerdo. Ademas, nos lo siña dikon Pablo a skohe Timoteo komo su kompañero di biahe, i nos lo haña sa mas tokante e trabou importante ku superintendente di sirkuito ta hasi awe.

4. Dikon Pablo a bai riba su di dos biahe komo misionero?

⁴ Den e kapítulo anterior, nos a siña kon Pablo, Bárnabas, Hudas i Sílas a fortalesé e kongregashon na Antiokia ora nan a bisa nan e desishon ku e kuerpo gobernante a tuma tokante sirkunsishon. Kiko Pablo a hasi despues di esei? El a bisa Bárnabas: “Laga nos bai bèk pa bishitá e rumannan na tur e statnan kaminda nos a prediká e palabranan di Yehova pa wak kon ta ku nan.” (Echo. 15:36) Pablo no tabata ke men ku nan lo a djis bai bishitá e rumannan nobo ei. E buki Echonan ta bisa nos bon kla dikon Pablo a bai riba su di dos biahe komo misionero. Di promé, lo e por a informá e rumannan tokante e desishonnan ku e kuerpo gobernante a tuma. (Echo. 16:4) Di dos, komo superintendente biahero, Pablo tabata determiná pa fortalesé fe di su rumannan den e diferente kongregashonnan. (Rom. 1:11, 12) Kon e organisashon di Testigunan di Yehova awe ta sigui e ehèmpel ku e apòstelnan a pone?

5. Kon Kuerpo Gobernante ta animá i guia e kongregashonnan awe?

⁵ Awe, Kristu ta usa Kuerpo Gobernante di Testigunan di Yehova pa dirigí su kongregashon. E ruman hòmbernan ungí akí ta usa karta, publikashon imprimí i digital, reunion i otro medio di komunikashon pa animá i guia e kongregashonnan rònt mundu. Ademas, Kuerpo Gobernante ta purba di tin bon kontakto ku kada kongregashon. P’esei, nan ta manda superintendente di sirkuito pa bishitá e kongregashonnan. Kuerpo Gobernante a nombra míles di ansiano kualifiká rònt mundu pa sirbi komo superintendente di sirkuito.

6, 7. Awe, kiko ta algun kos ku superintendente di sirkuito ta hasi?

⁶ Awe, superintendente di sirkuito ta mustra interes na tur e kongregashonnan i ta purba di fortalesé fe di e rumannan. Kon nan ta hasi esei? Nan ta imitá ehèmpel di superintendente biahero di promé siglo, manera Pablo. El a bisa Timoteo, e superintendente ku tabata huntu kuné: “Prediká e palabra, okupá bo kuné ku urgensia den tempu faborabel i den tempu difísil, reprendé, spièrta seriamente, stimulá, ku tur pasenshi i arte di siña. . . . Hasi e trabou di un predikadó di e bon notisia.”​—2 Tim. 4:2, 5.

⁷ Na armonia ku e palabranan ei, e superintendente di sirkuito huntu ku su esposa, si e ta kasá, ta partisipá den vários forma di sirbishi huntu ku e publikadónan di e kongregashon ku e ta bishitá. Komo ku nan ta bon maestro i nan ta stima e trabou di prediká, nan bon ehèmpel ta animá e rumannan. (Rom. 12:11; 2 Tim. 2:15) Superintendente di sirkuito ta demostrá berdadero amor. Nan ta kontentu di por usa nan tempu i energia pa sirbi otro hende. Tin biaha nan tin ku biaha ora wer ta malu, i nan sa bai asta den área ku ta peligroso. (Flp. 2:3, 4) Ademas, superintendente di sirkuito ta animá, siña i spièrta kada kongregashon pa medio di diskurso basá riba Beibel. Ta bon pa nos tur pensa riba nan bunita ehèmpel i imitá nan fe.​—Heb. 13:7.

8. Kon Bárnabas a reakshoná riba Pablo su sugerensia pa bishitá e rumannan?

⁸ Bárnabas a bai di akuerdo ku Pablo “pa bishitá e rumannan.” (Echo. 15:36) Nan a yega di traha bon huntu kaba, i ya nan tabata konosé e rumannan den e kongregashonnan ku nan lo a bai bishitá. (Echo. 13:2–14:28) Pues, a parse un bon idea pa nan traha huntu atrobe. Pero, un problema a presentá. Echonan 15:37 ta bisa: “Bárnabas a insistí pa Huan bai huntu ku nan, esta, Huan ku nan tabata yama Marko.” Bárnabas no a puntra Pablo si el a pensa ku tabata un bon idea pa Marko bai ku nan. El “a insistí” pa su primu Marko bai huntu ku nan riba nan biahe komo misionero.

9. Dikon Pablo no tabata di akuerdo ku Bárnabas?

⁹ Pablo no tabata di akuerdo. Dikon? E relato ta bisa: “Sinembargo, Pablo no tabata di akuerdo [pa Marko] bai huntu ku nan, pasobra anteriormente el a bai ku nan, pero e no a keda pa hasi e trabou di prediká. Mas bien, el a bai laga nan na Pamfilia.” (Echo. 15:38) Marko a biaha huntu ku Pablo i Bárnabas riba nan promé biahe komo misionero. Pero, e no a keda ku nan te na final di nan biahe. (Echo. 12:25; 13:13) Na komienso di e biahe, ora ainda nan tabata na Pamfilia, Marko a bai laga nan i bai bèk Herúsalèm. Beibel no ta bisa dikon Marko a bai bèk kas. Pero, ta parse ku Apòstel Pablo no tabata di akuerdo ku loke Marko a hasi, i kisas e tabata duda si nan por a dependé riba Marko.

10. Kiko a sosodé despues di e desakuerdo entre Pablo i Bárnabas?

¹⁰ Asina mes, Bárnabas tabata determiná pa hiba Marko huntu ku nan. Pero, Pablo tabata mesun determiná pa Marko no bai huntu ku nan. Echonan 15:39 ta bisa: “E ora ei, Pablo i Bárnabas a kuminsá pleita pisá ku otro, i nan a separá for di otro.” Bárnabas a hiba Marko huntu kuné, i nan a nabegá bai Chipre, e isla kaminda Bárnabas a nase. Pablo sí a bai riba su biahe komo misionero. E relato ta bisa: “Pablo a skohe Sílas. Despues ku e rumannan a pidi Yehova pa bendishoná Pablo, el a bai.” (Echo. 15:40) Huntu ku Sílas, Pablo “a pasa dor di Siria i Silisia, i e tabata fortalesé e kongregashonnan.”​—Echo. 15:41.

11. Kiko lo yuda nos pa no kibra nos amistat ku un persona ku a ofendé nos?

¹¹ Kisas e relato akí ta kòrda nos ku nos tur ta imperfekto. Pablo i Bárnabas a ser nombrá komo representante spesial di e kuerpo gobernante. Anto kisas Pablo mes a ser nombrá komo miembro di e kuerpo gobernante ei mas despues. Asina mes, imperfekshon a pone ku nan a rabia pisá na e okashon ei. Nan a laga e situashon ei kibra nan amistat? Nò. Aunke ku Pablo i Bárnabas tabata imperfekto, nan tabata humilde, i nan a purba di imitá Hesus. Mas despues, nan a pordoná otro i drecha nan amistat. (Efe. 4:1-3) Ademas, despues Pablo i Marko a traha huntu atrobe den otro asignashon teokrátiko. a​—Kol. 4:10.

12. Meskos ku Pablo i Bárnabas, ki kualidat tur ansiano mester desplegá awe?

¹² Pablo i Bárnabas a rabia na e okashon ei, pero esei no tabata nan kustumber. Bárnabas tabata un persona asina kariñoso i generoso ku e rumannan no tabata yam’é na su nòmber Hose, nan tabata yam’é Bárnabas, ku ta nifiká “un persona ku ta animá otro hende.” (Echo. 4:36) Pablo tambe tabata konosí komo un persona amabel i kariñoso. (1 Tes. 2:7, 8) Awe, tur ansiano, inkluso superintendente di sirkuito, mester imitá Pablo i Bárnabas. Nan mester ta humilde, i nan mester trata e rumannan den kongregashon i e otro ansianonan ku bondat i kariño.​—1 Ped. 5:2, 3.

13, 14. (a) Ken Timoteo tabata, i kon Pablo a sera konosí kuné? (b) Dikon Pablo tabata impreshoná ku Timoteo? (c) Ki trabou importante Timoteo a haña?

¹³ Riba su di dos biahe komo misionero, Pablo a bishitá e kongregashonnan na Galasia, ku tabata bou di gobernashon romano. Despues di un tempu, “Pablo a yega e stat Derbe, i despues el a bai Listra.” E relato ta sigui bisa: “Na Listra, tabatin un disipel ku yama Timoteo. Su mama tabata hudiu i un disipel, pero su tata tabata griego.”​—Echo. 16:1. b

¹⁴ Ta parse ku Pablo a sera konosí ku Timoteo su famia ora el a biaha pa promé bes na e área ei rònt di aña 47 despues di Kristu. Awor, durante su di dos bishita na e área ei, mas o ménos dos òf tres aña despues, Pablo tabata masha impreshoná ku e hóben Timoteo. Dikon? Pasobra e rumannan “tabata papia bon di Timoteo.” Timoteo tabatin un bon reputashon den su mes kongregashon, pero tambe den e kongregashonnan den su área. E relato ta splika ku tantu e rumannan na Listra komo na Ikonio, ku tabata keda mas o ménos 30 kilometer leu, tabatin bon kos di bisa di Timoteo. (Echo. 16:2) Bou di guia di spiritu santu, e ansianonan a pidi Timoteo pa hasi un trabou masha importante, pa yuda Pablo i Sílas komo un superintendente biahero.​—Echo. 16:3.

15, 16. Dikon e rumannan tabata papia asina bon di Timoteo?

¹⁵ Dikon Timoteo tabatin un bon reputashon na un edat asina yòn? Akaso tabata su inteligensia, su aparensia físiko òf su abilidatnan? E kosnan ei hopi bes ta impreshoná hende. Un biaha, asta profeta Sámuèl a husga un persona a base di loke el a mira. Pero Yehova a bisa Sámuèl: “Hende no ta mira kos manera Dios ta mira nan, pasobra hende ta mira loke un persona ta di pafó, pero Yehova ta wak kurason.” (1 Sám. 16:7) Pues, e rumannan tabata papia bon di Timoteo no pa motibu di su abilidatnan sino pa motibu di su bon kualidatnan.

¹⁶ Mas despues, apòstel Pablo a referí na e bunita kualidatnan ku Timoteo tabatin. Pablo a papia di e amor i bon disposishon ku Timoteo tabatin i di e trabou duru ku el a hasi pa e kongregashonnan. (Flp. 2:20-22) Timoteo tabata konosí tambe pa su “fe sin hipokresia.”​—2 Tim. 1:5.

17. Kon e hóbennan awe por imitá Timoteo?

¹⁷ Awe, hopi hóben ta imitá Timoteo ora nan ta hasi esfuerso pa kultivá bon kualidat. Di e manera ei, nan ta traha un bon nòmber serka Yehova i su sirbidónan, asta na un edat yòn. (Pro. 22:1; 1 Tim. 4:15) Nan ta demostrá fe sin hipokresia, i nan no ta hiba un bida dòbel. (Sal. 26:4) Komo resultado, hopi hóben awe ta balioso den kongregashon, meskos ku Timoteo. Nan ta hasi tur hende den kongregashon kontentu ora nan bira publikadó i ora nan dediká nan mes na Yehova i batisá!

18. (a) Kon Pablo i Timoteo a yuda e kuerpo gobernante? (b) Kon e kongregashonnan a benefisiá?

¹⁸ Pablo i Timoteo a traha huntu pa vários aña. Komo superintendente biahero, nan tabata hasi loke e kuerpo gobernante tabata dirigí nan pa hasi. Beibel ta bisa: “Miéntras ku Pablo i su kompañeronan tabata bishitá e statnan, nan tabata informá e rumannan tokante e desishonnan ku e apòstelnan i e ansianonan na Herúsalèm a tuma; asina, e rumannan por a kumpli ku nan.” (Echo. 16:4) Ta parse ku e kongregashonnan a sigui guia di e apòstelnan i e ansianonan na Herúsalèm. Komo ku nan a obedesé, “fe di e rumannan den e kongregashonnan a bira mas fuerte, i e kantidat di disipel a sigui oumentá dia tras dia.”​—Echo. 16:5.

19, 20. Dikon nos mester obedesé “esnan ku ta dirigí” nos?

¹⁹ Di mes manera, si awe nos obedesé guia di “esnan ku ta dirigí” nos, Yehova lo bendishoná e kongregashon. (Heb. 13:17) Komo ku e esena di e mundu akí ta kambia konstantemente, ta masha importante pa nos keda al dia ku e guia ku ta bini di “e esklabo fiel i prudente.” (Mat. 24:45; 1 Kor. 7:29-31) Si nos hasi esei, nos fe lo ta fuerte, i nos lo mantené nos mes sin mancha di mundu.​—Sant. 1:27.

²⁰ Ta bèrdat ku tur ansiano awe, inkluso e miembronan di Kuerpo Gobernante, ta imperfekto meskos ku Pablo, Bárnabas, Marko i otro ansiano ungí di promé siglo tabata. (Rom. 5:12; Sant. 3:2) Pero komo ku Kuerpo Gobernante ta pega na e Palabra di Dios i ta sigui ehèmpel di e apòstelnan, nan ta demostrá ku nan ta konfiabel. (2 Tim. 1:13, 14) Komo resultado, fe di e rumannan den e kongregashonnan ta bira mas fuerte.