1, 2. Ken tabata biahando for di Filipo pa Tesalónika, i tokante kiko nan lo tabata pensa?

 PABLO, Sílas i Timoteo tabata biahando di Filipo pa Tesalónika. Durante e biahe ei nan lo mester a kana 130 kilometer i pasa entre vários seru. Nan tabata kanando riba un kaminda di piedra ku e romanonan a traha. E kaminda tabata drùk, pasobra hopi hende tabata biaha riba e kaminda ei. Por ehèmpel, sòldá, komersiante i artesano. Nan por a skucha hende ta papia i zonido di wil di garoshi i di bestia. E biahe lo no tabata fásil, foral pa Pablo i Sílas. Pasobra, ainda nan tabata rekuperando for di e sotanan ku bara ku nan a haña na Filipo.​—Echo. 16:22, 23.

² Kiko e hòmbernan ei a hasi pa nan no desanimá durante nan biahe largu? Sin duda, nan tabata kòmbersá ku otro i animá otro. Ainda nan lo tabata kòrda riba e eksperensia di e wardadó di prezu i su famia ku a bira kreyente na Filipo. E eksperensia ei lo a animá e hòmbernan pa sigui prediká. Pero segun ku nan tabata yega e stat Tesalónika, ku tabata keda kant’i laman, nan lo tabata puntra nan mes kon e hudiunan na e stat ei lo a bai trata nan. Nan lo a bolbe ataká i bati nan manera a sosodé na Filipo?

3. Kon Pablo su ehèmpel por yuda nos haña kurashi pa prediká awe?

³ Mas despues, Pablo a skirbi kon e tabata sinti den un karta ku el a manda pa e kristiannan na Tesalónika. El a skirbi: “Manera boso mes sa, despues ku na promé instante nos a sufri i a ser insultá i maltratá na Filipo, nos a tuma un kurashi ku yudansa di nos Dios pa konta boso e bon notisia di Dios meimei di hopi oposishon.” (1 Tes. 2:2) Pues, ta parse ku Pablo tabata preokupá pa loke lo a pasa ora nan yega e stat Tesalónika, foral despues di loke a pasa na Filipo. Bo por komprondé dikon Pablo tabata sinti asina? Bo ta haña ku tin ora ta difísil pa prediká e bon notisia? Pablo a konfia ku Yehova lo a dun’é e forsa i yudansa ku e tabatin mester pa prediká ku kurashi. Si bo meditá riba Pablo su ehèmpel, esei lo yuda bo pa hasi meskos.​—1 Kor. 4:16.

4. Dikon ta parse ku Pablo a keda mas ku tres siman na Tesalónika?

⁴ E relato ta bisa nos ku Pablo a prediká tres sabat den snoa na Tesalónika. Pero, esei no ta nifiká ku el a keda na Tesalónika pa tres siman so. Kisas e no por a bai snoa mesora ora el a yega Tesalónika. Ademas, Pablo su kartanan ta mustra ku ora e tabata na Tesalónika, tantu e komo su kompañeronan a traha pa kubri nan gastunan. (1 Tes. 2:9; 2 Tes. 3:7, 8) Anto miéntras ku Pablo tabata na Tesalónika, dos biaha e rumannan na Filipo a manda algun kos pa e kubri su nesesidatnan. (Flp. 4:16) Pues, ta parse ku Pablo a keda mas ku tres siman na Tesalónika.

5. Kiko Pablo a hasi pa purba di konvensé e hendenan ku e tabata siña?

⁵ Despues ku Pablo a haña kurashi pa prediká, el a papia ku e hendenan ku tabata reuní na snoa. Manera tabata su kustumber, “el a usa Skritura pa rasoná ku e hendenan presente. E tabata splika e hudiunan i mustra nan for di loke tabatin skirbí den Skritura ku Kristu mester a sufri, muri i ser lantá for di morto. Anto el a bisa nan: ‘Ta Hesus ta Kristu, i ta tokante dje mi ta papia ku boso.’” (Echo. 17:2, 3) Manera e teksto ei ta mustra, Pablo no tabata djis purba di impreshoná e hendenan ku su palabranan. E tabata purba di yuda nan rasoná riba loke e tabata papia. E tabata sa ku e hendenan ku tabata bai snoa tabata konosé i respetá e Skritura. Pero, nan no tabatin un bon komprondementu di e Skritura. Pues, Pablo a rasoná ku nan; el a splika nan i komprobá for di e Skritura ku Hesus di Názarèt tabata e Mesías primintí, òf Kristu.

6. Kon Hesus a rasoná for di e Skritura, i kiko tabata e resultado?

⁶ Pablo a imitá Hesus, kende semper tabata siña hende for di e Skritura. Por ehèmpel, durante Hesus su sirbishi riba tera, vários bes el a bisa su siguidónan ku segun e Skritura e yu di hende mester sufri, muri i ser lantá for di morto. (Mat. 16:21) Despues di Hesus su resurekshon, el a aparesé na su disipelnan. Sin duda, ora nan a mir’é, nan a keda konvensí ku loke el a bisa tabata bèrdat. Pero, Hesus a duna nan asta mas motibu pa konfia den Dios su Palabra. Beibel ta deskribí kon el a siña algun di su disipelnan. E ta bisa: “Kuminsando ku Moises i tur e Profetanan, el a splika nan e kosnan tokante su mes den henter e Skritura.” Kiko tabata e resultado? E disipelnan a keda asombrá i a bisa otro: “Nos kurason no tabata manera na kandela ora e tabata papia ku nos na kaminda, segun ku e tabata splika nos e Skritura na plaka chikí?”​—Luk. 24:13, 27, 32.

7. Dikon ta importante pa nos usa Beibel ora nos ta siña hende?

⁷ E mensahe ku tin den Dios su Palabra ta poderoso. (Heb. 4:12) E kristiannan awe ta usa Beibel pa siña hende meskos ku Hesus, Pablo i e otro apòstelnan a hasi. Nos ta mustra e hendenan ku nos ta prediká na dje ku loke nos ta siña nan ta bini for di Beibel. Nos ta usa Beibel pa rasoná ku nan i pa yuda nan komprondé loke e tekstonan ta nifiká. Nos ta hasi esei, pasobra e mensahe ku nos ta kompartí no ta bini di nos. Ora nos tin e kustumber di usa Beibel, nos ta yuda hende mira ku loke nos ta prediká no ta nos mes pensamentunan, sino loke Dios ta bisa. Ademas, semper nos ta keda kòrda ku e mensahe ku nos ta prediká ta kompletamente basá riba e Palabra di Dios. Pa e motibu ei, hende por konfia nos mensahe. Esei no ta duna bo konfiansa pa prediká ku kurashi meskos ku Pablo a hasi?

8-10. (a) Kon e hendenan na Tesalónika a reakshoná ora nan a skucha e bon notisia? (b) Dikon algun di e hudiunan a bira yalurs riba Pablo? (c) Kiko e hudiunan ku tabata oponé nan a hasi?

⁸ Pablo ya a hañ’é ku persekushon. Pues, e tabata sa ku Hesus tabatin rason ora el a bisa: “Un esklabo no ta mas ku su doño. Si nan a persiguí mi, nan lo persiguí boso tambe; si nan a kumpli ku mi palabra, nan lo kumpli ku di boso tambe.” (Huan 15:20) Ora Pablo a prediká na Tesalónika, e hendenan a reakshoná na diferente manera, meskos ku Hesus a bisa. Algun di nan a aseptá e bèrdat mesora i otro a opon’é. Lukas a skirbi lo siguiente tokante e hendenan ku a aseptá e bèrdat: “Algun di e hudiunan ei a bira kreyente [kristian], i nan a djòin Pablo i Sílas. Un grupo grandi di griego ku tabata adorá Dios tambe a djòin nan, huntu ku basta hende muhé prominente.” (Echo. 17:4) Sin duda, e disipelnan nobo ei tabata kontentu ku nan por a komprondé e Skritura bon.

⁹ Algun hende a gusta loke Pablo tabata siña nan, i otro a rabia kuné. Algun hudiu na Tesalónika tabata yalurs pasobra “un grupo grandi di griego” a aseptá e mensahe ku Pablo tabata prediká. E hudiunan ei tabata purba di konvensé e hendenan griego ku no tabata hudiu pa aseptá e religion hudiu. P’esei, nan tabata siña e hendenan griego for di e Skritura Hebreo, i nan tabata pensa ku e hendenan griego tabata pertenesé na nan. Pero, diripiente tabata parse ku Pablo tabata hòrta e hendenan griego for di nan, pasobra e tabata konvensé nan pa bira kristian. Anto e tabata hasi esei den snoa! Pues, nan a rabia masha pisá.

¹⁰ Lukas ta bisa nos loke a sosodé despues: “E otro hudiunan a bira yalurs, i nan a bai buska algun hòmber malbado ku tabata sinta pòrnada riba plasa. Nan a forma un grupo grandi di hende i kousa disturbio den e stat. Nan a drenta kas di Yason, i nan tabata buska Pablo i Sílas pa entregá nan na e multitut. Ora nan no a haña nan, nan a lastra Yason i algun ruman hiba dilanti di e gobernantenan di e stat, gritando: ‘E hòmbernan ku ta kousa problema tur kaminda ta akinan tambe. I Yason a risibí nan komo huéspet na su kas. Tur e hòmbernan ei ta rebeldiá kontra e dekretonan di Sésar; nan ta bisa ku tin un otro rei, esta, Hesus.’” (Echo. 17:5-7) Kiko a pasa ku Pablo i su kompañeronan pa motibu di loke e multitut violento a hasi?

11. Ki akusashon nan a lanta kontra Pablo i e otro ruman hòmbernan, i ki lei nan a purba di usa kontra nan? (Wak nota.)

¹¹ Un multitut ku ta rabiá por hasi hopi kos teribel. Nan ta kousa mes tantu daño ku un riu brutu ku ta basha over. Esei ta e arma ku e hudiunan a usa kontra Pablo i Sílas pa purba di kaba ku nan. Despues ku e hudiunan a “kousa disturbio den e stat,” nan a purba di konvensé e gobernantenan ku Pablo i su kompañeronan tabata meresé kastigu. E promé akusashon ku nan a lanta kontra Pablo i e otro ruman hòmbernan ta ku nan a “kousa problema tur kaminda,” aunke Pablo i su kompañeronan no tabata esnan ku a kousa disturbio na Tesalónika! E di dos akusashon ku e hudiunan a lanta kontra nan tabata hopi mas èrg. E hudiunan a bisa ku e misioneronan tabata bisa ku tin un otro rei, esta Hesus, i ku di e manera ei nan tabata kibra lei di e emperador. a

12. Kon nos por sa ku e akusashonnan ku e hudiunan a lanta kontra e kristiannan na Tesalónika por tabatin konsekuensia serio?

¹² Kisas bo ta kòrda ku e eskribanan i e fariseonan a akusá Hesus di algu similar. Nan a bisa Pilato: “Nos a haña e hòmber akí ta instigá nos nashon pa rebeldiá, . . . i e ta bisa ku e mes ta Kristu, e rei.” (Luk. 23:2) Kisas Pilato tabatin miedu ku e emperador romano lo a pensa ku e tabata traishon’é. P’esei el a sentensia Hesus na morto. Asina tambe, e akusashonnan ku e hudiunan a lanta kontra e kristiannan na Tesalónika por a pone bida di e kristiannan na peliger. Un buki di referensia ta bisa: “E akusashon ei tabata hopi peligroso, pasobra si nan tabata ‘djis sospechá ku un persona tabata di traishoná e emperador, hopi bes e tabata ser matá.’” Akaso e plan malbado di e hudiunan tabatin éksito?

13, 14. (a) Dikon e multitut violento no a logra stòp e trabou di prediká? (b) Kon Pablo a demostrá ku e ta kouteloso meskos ku Hesus, i kon nos por imitá su ehèmpel?

¹³ E multitut violento no a logra stòp e trabou di prediká na Tesalónika. Dikon? Na promé lugá, nan no por a haña Pablo ku Sílas. Ademas, ta parse ku e gobernantenan no tabata konvensí ku e akusashonnan tabata bèrdat. Despues ku Yason i e otro rumannan a “paga bòrg,” nan a laga nan bai. (Echo. 17:8, 9) Pablo a sigui Hesus su konseho pa ta “kouteloso manera kolebra i tòg inosente manera palomba.” Pues, el a purba di keda leu for di peliger pa asina e por a sigui prediká otro kaminda. (Mat. 10:16) E kurashi ku Pablo a demostrá no tabata ke men ku e no tabata kouteloso. Kon nos por imitá su ehèmpel?

¹⁴ Den nos tempu, e lidernan religioso hopi bes a purba di instigá multitut violento pa bai kontra Testigunan di Yehova. Nan ta akusá Testigunan di Yehova di ta traha kontra di gobièrnu i di traishoná nan pais, i nan ta usa e akusashonnan ei pa purba di konvensé e gobernantenan pa persiguí nan. Meskos ku den tempu di Pablo, hende ta oponé nos awe pasobra nan ta yalurs ku mas i mas hende ta aseptá e bèrdat. Kon nos ta reakshoná? Komo kristian berdadero, nos no ta buska problema. Te kaminda ta posibel, nos ta evitá konfrontashon ku hende ku ta rabiá i ku no ta rasonabel. Nos ta skohe pa sigui hasi nos trabou na pas, asta si esei ta nifiká ku nos tin ku bini bèk despues ora e situashon a kalma.

15. Kon e hudiunan na Berea a reakshoná riba e bon notisia?

¹⁵ E ruman hòmbernan a manda Pablo i Sílas Berea, ku tabata keda mas o ménos 65 kilometer leu, pa hasi sigur ku nan tabata safe. Ora nan a yega, Pablo a bai snoa i a kuminsá papia ku e hendenan ku tabata reuní einan. Sin duda, lo e tabata masha felis di por a haña hende ku kier a skucha e bon notisia. Lukas a skirbi ku “e hudiunan na Berea [tabata mas dispuesto pa siña] ku e hudiunan na Tesalónika, pasobra nan tabata masha dispuesto pa aseptá palabra di Dios. I tur dia, nan tabata analisá Skritura pa wak si e kosnan ku nan tabata tende tabata bèrdat.” (Echo. 17:10, 11, nota) Esei no ta nifiká ku e hendenan na Tesalónika ku a aseptá e bèrdat no tabatin un bon aktitut. Mas despues, Pablo a skirbi nan lo siguiente: “Nos ta gradisí Dios tur ora bai, pasobra ora boso a risibí e palabra di Dios, ku boso a tende for di nos, boso no a asept’é komo palabra di hende sino, manera loke e ta di bèrdat, komo e palabra di Dios, ku ta obra tambe den boso komo kreyente.” (1 Tes. 2:13) Pero, dikon e hudiunan na Berea tabata mas dispuesto pa siña?

16. Dikon Lukas a bisa ku e hudiunan di Berea “tabata mas dispuesto pa siña”?

¹⁶ Aunke e hudiunan na Berea tabata skuchando algu nobo, nan no tabata sospechoso di Pablo ni di su mensahe; nan no tabata pleita kontra dje. Pero, na mes momento nan no tabata e tipo di hendenan tampoko ku ta kere tur kos sin ningun prueba. Promé, nan a presta bon atenshon pa skucha kiko Pablo tabatin di bisa. Despues, nan a hasi sigur ku loke nan tabata siña tabata bèrdat. Pa hasi esei nan a analisá e Skritura ku Pablo a yuda nan komprondé. Ademas, nan tabata studia Dios su Palabra na un manera diligente, no djis riba Sabat, pero tur dia. “Nan tabata masha dispuesto pa aseptá palabra di Dios,” nan a tuma tempu pa komprondé kon e kosnan nobo ku nan tabata siña tabata kuadra ku loke e Skritura tabata bisa. Despues, nan a demostrá ku nan ta humilde sufisiente pa hasi kambio, pasobra “hopi di nan a bira kreyente.” (Echo. 17:12) Pues, ta fásil pa komprondé dikon Lukas a bisa ku nan “tabata mas dispuesto pa siña”!

17. Kon nos por imitá e ehèmpel di e hendenan di Berea, i kon nos por sigui hasi esei asta si nos ta den e bèrdat pa hopi tempu?

¹⁷ E hendenan di Berea lo no a pensa ku nan bon aktitut relashoná ku e bon notisia lo a ser skirbí den Beibel i ku lo el a sirbi komo un bon ehèmpel pa nos awe. Nan a hasi eksaktamente loke Pablo a spera ku nan lo a hasi i loke Yehova Dios tabata ke pa nan hasi. De echo, ta esei nos ta animá hende pa hasi awe tambe, esta, pa analisá Beibel ku sumo atenshon, pa asina nan fe ta basá riba Dios su Palabra. Klaru ku despues ku nos aseptá e bèrdat, nos mester sigui ta dispuesto pa siña. Segun ku tempu ta pasa, ta bira asta mas importante pa nos ta dispuesto pa siña for di Yehova i apliká loke nos ta siña. Di e manera ei, nos ta laga Yehova forma nos i entrená nos di akuerdo ku su boluntat. (Isa. 64:8) Ora nos ta hasi esei, nos lo sigui ta útil pa nos Tata selestial, i nos lo sigui agrad’é.

18, 19. (a) Dikon Pablo a bai for di Berea, pero kiko el a sigui hasi i kon nos por imit’é? (b) Na ken Pablo lo a bai prediká despues i na unda?

¹⁸ Pablo no a keda largu na Berea. Beibel ta bisa: “Ora e hudiunan di Tesalónika a haña sa ku Pablo tabata prediká palabra di Dios na Berea tambe, nan a bini einan i instigá e pueblo. E ora ei, mesora e rumannan a manda Pablo te na kosta, pero Sílas i Timoteo sí a keda atras. E rumannan ku a kompañá Pablo a hib’é te na e stat Aténas. Despues, nan a bai bèk. Pablo a duna nan rospondi pa bisa Sílas i Timoteo ku nan mester bini serka dje mas pronto posibel.” (Echo. 17:13-15) E hendenan ku tabata oponé e trabou di prediká no tabata bai stòp di kousa problema pa e kristiannan. No tabata sufisiente pa nan pa kore ku Pablo for di Tesalónika, nan a biaha bai Berea tambe i a purba di instigá e multitut pa kousa e mesun tipo di problema einan. Pero, nan no tabatin éksito. Pablo tabata sa ku su teritorio tabata grandi. Pues, el a simplemente bai prediká otro kaminda. Awe tambe, nos ta determiná pa no laga ningun hende stòp nos di prediká!

¹⁹ Despues ku Pablo a duna testimonio kabal na e hudiunan na Tesalónika i Berea, lo e mester a mira e importansia di prediká ku kurashi i di yuda hende rasoná for di Beibel. I nos tambe ta mira e importansia di esei. Sinembargo, awor Pablo tabata di bai prediká na hende kende nan kreensianan tabata kompletamente diferente for di esun di dje. Pablo lo a bai prediká na hende di Aténas ku no tabata hudiu. Kon e hendenan di e stat ei lo a reakshoná riba su mensahe? Nos lo bai mira esei den e siguiente kapítulo.