Kerido Lektor:

Abo tin un relashon íntimo ku Dios? Pa hopi hende, esei ta parse kasi imposibel. Algun hende ta haña ku e ta muchu leu for di nan; otronan ta sinti nan asina indigno ku nan no ta kere ku un dia nan por hala serka Dios. Sin embargo, Beibel ta insta nos na un manera amoroso pa “hala serka Dios i e lo hala serka boso.” (Santiago 4:8) Dios ta asta garantisá su sirbidónan: “Ami ta SEÑOR bo Dios, Kende ta sostené bo man drechi, Kende ta bisa bo: ‘No tene miedu, lo mi yuda bo.’”—Isaias 41:13.

Kon nos por yega di tin un relashon íntimo asina ku Dios? Wèl, kualkier amistat ku nos forma ta basá riba loke nos sa di e persona, di su karakterístikanan úniko ku nos ta atmirá i balorá. Pues ta importante pa studia loke Beibel ta revelá tokante e kualidatnan di Dios i e forma ku e ta aktua. Ora nos meditá riba e manera ku Yehova ta manifestá kada un di su kualidatnan, kon Hesukristu a reflehá nan perfektamente, i ora nos komprondé kon nos tambe lo por kultivá nan, nos lo hala mas serka Dios. Nos lo mira ku Yehova ta e Soberano legítimo i ideal di universo. Es mas, e ta e Tata ku nos tur tin mester, pasobra e ta poderoso, hustu, sabí i amoroso, i nunka e ta bandoná su yunan fiel.

Ohalá e buki aki por yuda bo hala mas i mas serka Yehova Dios, pa bo por forma un relashon inkebrantabel kuné, ku lo permití bo biba pa alab’é pa semper.