Durante Hesus su último dianan riba tera, el a sigui usa ilustrashon pa desenmaskará e eskribanan i e saserdotenan prinsipal. P’esei, nan tabata buska manera pa mat’é. (Lukas 20:19) No opstante, Hesus a sigui saka nan kosnan na kla. El a konta un otro ilustrashon:

“E Reino di shelu ta manera un hòmber, un rei, ku a pone un fiesta di kasamentu pa su yu hòmber. Anto el a manda su esklabonan bai yama e invitadonan pa e fiesta di kasamentu, ma nan no kier a bini.” (Mateo 22:2, 3) Tuma nota ku Hesus a kuminsá su ilustrashon menshonando “e Reino di shelu.” Pues, e “rei” mester ta Yehova Dios. Awor, kiko di e yu di e rei i e invitadonan pa e fiesta di kasamentu? Wèl, no ta difísil pa identifiká e yu di e rei: E ta e Yu di Yehova, kende tabata kontando e ilustrashon. I e invitadonan ta e hendenan ku lo ta huntu ku e Yu den e Reino di shelu.

Awor, ken tabata e promé personanan ku a haña invitashon? Wèl, na ken Hesus i su apòstelnan tabata prediká e Reino? Na e hudiunan. (Mateo 10:6, 7; 15:24) Na aña 1513 promé ku Kristu, e nashon akí a aseptá e pakto di Lei i asina e hudiunan tabata e promé personanan ku a bini na remarke pa bira ‘un reino di saserdote.’ (Éksodo 19:5-8) Pero na ki tempu nan a haña invitashon pa e “fiesta di kasamentu”? Ta lógiko ku nan a kuminsá haña invitashon for di aña 29 di promé siglo ora Hesus a kuminsá prediká tokante e Reino di shelu.

Kon mayoria di e israelitanan a reakshoná? Wèl, manera Hesus a bisa, nan “no kier a bini.” Mayoria di lider religioso i mayoria di e otro hendenan di e nashon no a aseptá Hesus komo e Mesías i komo Dios su Rei nombrá.

Pero Hesus a mustra den su ilustrashon ku e hudiunan lo a haña un otro oportunidat. El a bisa: “[E rei] a bolbe manda otro esklabo i a bisa nan: ‘Bisa e invitadonan: “Mi a prepará mi kuminda, mi a laga mata mi toronan i mi bestianan gòrdá, i tur kos ta kla. Bini e fiesta di kasamentu!”’ Pero e invitadonan a bira bai sin preokupá nan kabes. Un a bai su kunuku, e otro  a bai su negoshi, ma e otronan a gara e esklabonan, insultá nan i maltratá nan, i despues mata nan.” (Mateo 22:4-6) Esei ta loke a sosodé ora e kongregashon kristian a keda establesí. E tempu ei, ainda e kaminda tabata habrí pa e hudiunan drenta e Reino; no opstante, mayoria di nan a rechasá e invitashon akí; nan a asta ‘maltratá e esklabonan di e rei.’—Echonan 4:13-18; 7:54, 58.

Ki konsekuensia esaki tabatin pa e nashon? Hesus a bisa: “E rei a bira furioso, i el a manda su ehérsito bai mata e asesinonan ei i kima nan stat.” (Mateo 22:7) Esei ta loke a pasa ku e hudiunan na aña 70 di promé siglo ora ku e romanonan a destruí “nan stat,” Herúsalèm.

Awor, e echo ku nan a nenga di aseptá e rei su invitashon a nifiká ku niun hende mas lo a ser invitá? Wèl, segun e ilustrashon di Hesus, esei lo no tabata e kaso. Hesus a sigui bisa: “Anto [e rei] a bisa su esklabonan: ‘E fiesta di kasamentu ta kla, ma e invitadonan no tabata digno di ta presente. P’esei, bai den e kamindanan prinsipal i invitá ken ku boso topa na e fiesta di kasamentu.’ Asina anto, e esklabonan a sali bai den e kamindanan prinsipal, i nan a trese tur hende ku nan a haña, tantu bon hende komo mal hende. I e sala di kasamentu a keda yen di invitado.”—Mateo 22:8-10.

De echo, mas despues, apòstel Pedro a kuminsá yuda hende di e nashonnan—esta, personanan ku no tabata hudiu di nasementu òf ku no a kombertí i bira hudiu—pa bira kristian berdadero. Na aña 36 di promé siglo, Kornelio, un ofisial di e ehérsito romano, i su famia a risibí Dios su spiritu santu i a bini na remarke pa un lugá den e Reino di shelu ku Hesus a papia di dje.—Echonan 10:1, 34-48.

Pero, manera Hesus a indiká, no ta tur hende ku bini e fiesta lo ta aseptabel pa “e rei.” El a bisa: “Ora e rei a drenta pa inspekshoná e invitadonan, el a mira un hòmber ku no tabatin paña di kasamentu bistí. Di manera ku el a puntr’é: ‘Mi amigu, ki mishi bo aki den sin paña di kasamentu bistí?’ E hòmber no por a bisa nada. E ora ei e rei a bisa su sirbidónan: ‘Mar’é na man ku pia i tir’é den e skuridat ku tin pafó. Ei ta kaminda lo e yora i morde riba djente.’ Pues, hopi ta invitá, ma poko ta skohé.”—Mateo 22:11-14.

Probablemente, e lidernan religioso ku tabata skucha Hesus no a komprondé tur e kosnan ku e tabata papia. No opstante, nan a rabia mashá i tabata mas determiná ainda pa kaba ku esun ku tabata pone nan kara na bèrgwensa.