Despues ku Hesus i su disipelnan a sali Yériko, nan a keda tres anochi na Betania. Awor, tabata djaluna 10 di nisan. Nan a sali mainta trempan pa bai Herúsalèm. Hesus tabatin hamber. P’esei, ora el a mira un palu di figu, el a kana bai na dje. Tabatin figu na e palu?

Wèl, tabata kabamentu di mart i ta te yüni tabata temporada di figu. Pero komo ku e palu a saka blachi trempan, Hesus a kere ku tabatin figu na e palu. Ma e no a haña nada. E blachinan a duna un impreshon robes. Hesus a bisa e palu: “Djawe padilanti, nunka mas hende lo haña fruta di bo pa kome.” (Marko 11:14) I mesora e palu a kuminsá seka. E siguiente dia, Hesus lo a splika su disipelnan kiko esei a nifiká.

No a dura muchu ku Hesus i su disipelnan a yega Herúsalèm. Un dia promé, atardi lat, atentamente el a tira un bista den e tèmpel, pero awor el a bini pa tuma akshon, manera el a hasi tres aña promé durante e Pasku Hudiu di aña 30 di promé siglo. (Huan 2:14-16) El a kore ku tur e hendenan ku tabata “bende i kumpra kos den tèmpel.” El a “bòltu mesa di e kambiadónan di plaka i banki di esnan ku tabata bende palomba.” (Marko 11:15) El a asta prohibí e hendenan ku tabata hiba kos na otro parti di e stat di pasa via e plenchi di tèmpel pa kòrta kaminda.

Dikon Hesus a kore ku e hendenan ku tabata kambia sèn i bende bestia den e tèmpel? El a bisa: “No ta pará skirbí: ‘Mi kas lo ser yamá un kas di orashon pa tur e nashonnan’? Ma boso a hasié un kueba di ladron.” (Marko 11:17) El a yama nan ladron pasobra nan tabata kobra karu pa e bestianan ku e hendenan mester a kumpra pa hasi sakrifisio. Pa Hesus, esaki tabata ladronisia.

Ta klaru ku e suseso akí a yega na orea di e saserdotenan prinsipal, e eskribanan i e hendenan mas prominente, òf e lidernan, di e pueblo. I nan a bolbe kuminsá buska manera pa mata Hesus. No opstante, nan a haña nan ku un dilema. Komo ku e pueblo a basha bini pa tende Hesus, nan no por a haña un manera pa mat’é.

Tantu hudiu komo prosélito, esta, hende ku a kombertí i bira hudiu, a bini pa selebrá Pasku Hudiu. Entre e hendenan tabatin algun griego tambe ku a bini pa adorá Dios na e fiesta. Nan a aserká Felipe, kisas pasobra nan a sinti nan kómodo kuné debí ku e tabatin un nòmber griego, i a pidié pa nan mira Hesus. Ta parse ku Felipe no tabatin sigur si esaki tabata un bon idea, p’esei el a bai deliberá ku Andres. Nan dos a bai papia ku Hesus, kende aparentemente tabata na e tèmpel ainda.

Pa Hesus, kende tabata konsiente ku lo e mester a muri denter di un par di dia, e momento ei no tabata ora pa satisfasé kuriosidat di hende òf pa buska fama. El a kontestá e dos apòstelnan kontando nan e siguiente ilustrashon: “E ora a yega pa e Yu di hende ser glorifiká. Di bèrdat bèrdat mi ta bisa boso: A ménos ku un pipita di trigu kai na tera i muri, e ta keda ún pipita so; ma si e muri, e ta pari hopi fruta.”—Huan 12:23, 24.

Un pipita di trigu por parse un simia di poko balor. Pero kiko si bo plant’é i e “muri,” esta, stòp di eksistí komo simia? Wèl, e por sprùit i ku tempu e por krese i produsí hopi trigu. Di igual manera, Hesus tabata un solo hòmber perfekto. Kedando fiel te na morto, lo el a bira esun pa medio di ken Dios lo duna bida eterno na hopi hende, kendenan tin mesun spiritu di sakrifisio propio ku Hesus. P’esei, Hesus a bisa: “Esun ku ta stima su alma ta destruyé, ma esun ku ta odia su alma den e mundu akí lo konserb’é pa bida eterno.”—Huan 12:25.

Pero Hesus no a enfoká solamente riba su papel, pasobra el a bisa tambe: “Si un hende ke sirbi mi, lag’é sigui mi, i kaminda mi ta, einan mi  sirbidó tambe lo ta. Si un hende ke sirbi mi, e Tata lo onr’é.” (Huan 12:26) Esei sigur ta un gran bendishon! Esnan ku e Tata lo onra lo bira ko-gobernante ku Kristu den e Reino di Dios.

Awor Hesus, kende tabata konsiente di e sufrimentu i morto agonisante ku tabata sper’é, a bisa: “Aworakí mi alma ta intrankil, i kiko lo mi bisa? Tata, libra mi di loke ta bai pasa.” Pero Hesus no tabatin intenshon di keda sin kumpli ku e boluntat di Dios. El a sigui bisa: “Sinembargo, ta pa esaki mes mi a bini.” (Huan 12:27) Sí, Hesus semper tabata i ta kla pa kumpli ku Dios su propósito; e tabata asta dispuesto pa entregá su bida komo sakrifisio.