Nan a hiba Hesus na un lugá no muchu leu for di e stat kaminda é i dos ladron lo a ser ehekutá. “Djaleu” hende por a mira e lugá akí, ku tabata yama Gólgota, òf Lugá di Karpachi.—Marko 15:40.

Nan a kita paña di e tres hòmbernan akí for di nan kurpa i a duna nan biña mesklá ku droga (mira i un supstansia marga) pa bebe. Podisé ta algun hende muhé di Herúsalèm a prepará e meskla akí. I e romanonan no a prohibí nan di duna esnan ku lo a ser ehekutá e bibida akí ku tabata sirbi pa fria doló. Pero ora Hesus a purb’é, el a nenga di beb’é. Dikon? E tabata ke keda bon na tinu durante e prueba grandi akí di su fe; e tabata ke keda konsiente i fiel te na morto.

E sòldánan a pone Hesus riba e staka. (Marko 15:25) Anto nan a klaba su man- i pianan; e klabunan a penetrá su kueru i e kabuyanan di su djòintnan i a kous’é un inmenso doló. Anto ora nan a hisa e staka pon’é para, su doló a bira mas fuerte pasobra e peso di su kurpa a habri su heridanan mas ainda. No opstante, Hesus no a papia malu ku e sòldánan. Al kontrario, el a hasi orashon pa nan, bisando: “Tata, pordoná nan, pasobra nan no sa kiko nan ta hasi.”—Lukas 23:34.

Awor, e romanonan tabatin e kustumber di kologá un bòrchi na kabes di staka pa indiká pa ki krímen e malechor a ser kondená. Pero den kaso di Hesus, Pilato a laga pone un bòrchi ku tabata bisa: “Hesus e Nazareno, Rei di e Hudiunan.” E palabranan akí tabata skirbí na hebreo, latin i griego, pues mayoria di hende por a les’é. Asina, Pilato kier a mustra su disgustu pa e hudiunan ku a insistí pa mata Hesus. E saserdotenan prinsipal no a gusta esaki i nan a protestá: “No skirbi ‘Rei di e Hudiunan,’ sino ku ta é a bisa: ‘Mi ta Rei di e Hudiunan.’” Pero Pilato no tabata ke pa nan us’é atrobe. El a bisa: “Loke mi a skirbi, mi a skirbi!”—Huan 19:19-22.

E saserdotenan furioso a sigui ripití e testimonio falsu ku a ser duná mas promé dilanti di Sanedrin. P’esei no tabata nada straño ku e hendenan ku tabata pasa ei banda tabata sagudí kabes, hasi bofon i papia malu ku Hesus, bisando: “Ahá! Abo ku a bisa ku lo bo basha e tèmpel abou i lant’é bèk den tres dia, salba bo mes i baha for di e staka ei!” E saserdotenan prinsipal i e eskribanan tambe tabata hasi bofon di dje. Nan tabata bisa otro: “Laga Kristu, e Rei di Israel, baha for di e staka ei, pa nos por mira i kere.” (Marko 15:29-32) Asta e ladronnan ku tabata kologá na kada banda di dje tabata insult’é, aunke e tabata e úniko ku tabata realmente inosente.

E kuater sòldánan romano tambe tabata hasi chèrchi di Hesus. Podisé nan tabata bebe biña zür i pa hasi bofon di dje nan tabata ofres’é un poko pasobra nan tabata sa ku e no por a saka man tuma nada. I refiriendo na e bòrchi ku tabatin riba su kabes, nan tabata bis’é: “Si bo ta Rei di e hudiunan, salba bo mes.” (Lukas 23:36, 37) Imaginá bo! E hendenan tabata insultá i maltratá  e hòmber ku a duna prueba di ta e kaminda, e bèrdat i e bida. Pero Hesus a para firme durante tur e sufrimentu akí; e no a papia malu ku e hudiunan ku tabata para mira ni ku e sòldánan romano ku tabata hasi bofon di dje ni ku e dos kriminalnan banda di dje.

E kuater sòldánan a kue Hesus su pañanan djariba i parti nan den kuater. Nan a tira lòt pa wak kua pida kada ken lo a haña. Pero Hesus su paña djabou tabata di mihó kalidat: E tabata un paña “sin nat, ya ku e tabata di weef tur na un.” E sòldánan a rasoná ku otro, bisando: “Laga nos no sker e, ma ban tira lòt pa disidí ken ta keda kuné.” Asina nan a kumpli ku e profesia ku ta bisa: “Nan a parti mi pañanan djariba entre nan, i nan a tira lòt riba mi pañanan.”—Huan 19:23, 24; Salmo 22:18.

No a tarda muchu ku un di e kriminalnan a realisá ku Hesus en bèrdat tabata un rei. El a skual su kompañero, bisando: “Bo no tin niun tiki temor di Dios? Bo ta hañando e mesun kastigu kuné. Nos kastigu ta na su lugá, pasobra nos ta risibí plenamente loke nos meresé pa e kosnan ku nos a hasi. Ma e hòmber akí no a hasi nada malu.” I el a roga Hesus: “Kòrda riba mi ora bo drenta bo Reino.”—Lukas 23:40-42.

Hesus a bis’é: “Di bèrdat mi ta bisa bo awe: Lo bo ta ku mi den Paradeis.” (Lukas 23:43) E promesa akí tabata diferente for di esun ku Hesus a hasi su apòstelnan. El a primintí nan ku nan lo a sinta riba trono huntu kuné den e Reino. (Mateo 19:28; Lukas 22:29, 30) Muy probablemente e malechor akí, kende tabata un hudiu, a tende di Paradeis, e hòfi ku Yehova a duna Adam ku Eva komo hogar pa nan i nan desendientenan. E ladron akí a muri ku e speransa ei.