Huan Boutista tabatin un aña kaba den prizòn. No opstante, el a tende di e maravioso obranan ku Hesus tabata hasi. Bo por imaginá bo kon kontentu Huan lo a keda ora su disipelnan a kont’é tokante e resurekshon di e yu hòmber di e biuda di Nain? Pero Huan tabata ke tende direktamente for di Hesus kiko tur e obranan maravioso akí a nifiká. P’esei, el a manda yama dos di su disipelnan pa nan bai serka Hesus pa puntr’é si ta é ta Esun ku mester a bini òf si nan tabatin ku spera un otro.—Lukas 7:19.

Akaso esei tabata un pregunta straño? Huan tabata un hòmber deboto na Dios. Ora el a batisá Hesus, un dos aña promé, el a mira spiritu santu baha riba Hesus i a tende Dios bisa ku Hesus tin Su aprobashon. Nos no tin ningun motibu pa kere ku Huan su pregunta tabata un indikashon ku su fe a bira suak. Si esei tabata e kaso, Hesus lo no a papia bon di Huan. Pero si Huan no tabatin duda tokante Hesus, dikon el a manda hasi Hesus e pregunta ei?

Kisas Huan tabata ke djis haña un konfirmashon di Hesus mes ku ta é ta e Mesías. Esaki lo a fortalesé Huan, kende tabata sufri den prizòn. Pero ta parse ku tabatin un pensamentu mas profundo tras di su pregunta. Huan tabata sa ku e Skritura a profetisá ku e Ungí di Dios lo a bira rei i libertador. Pero lunanan a pasa desde ku Hesus a batisá i ainda Huan tabata den prizòn. P’esei, Huan lo tabata puntra su mes si mester a bini un susesor di Hesus ku lo mester a kaba di kumpli ku tur loke e Skritura a profetisá tokante e Mesías.

Pero Hesus no a djis kontestá Huan su disipelnan i bisa nan ku ta e mes tabata Esun ku mester a bini. Nò, el a hasi milager, kurando tur sorto di malesa i krekeché ku e hendenan por tabatin, pa asina duna e disipelnan di Huan prueba ku e tabatin Dios su apoyo. Despues, el a bisa nan: “Bai konta Huan loke boso ta tende i mira: Siegu ta mira atrobe, koho ta kana bon, leproso ta kura, surdu ta tende, morto ta lanta i hende pober ta tende e bon notisia.”—Mateo 11:4, 5. 

Kisas Huan a hasi e pregunta ei pensando tambe ku Hesus lo a hasi mas di loke e tabata hasiendo e tempu ei, kisas asta sak’é for di prizòn. Pero Hesus kier a bisa Huan pa e no a spera mas di loke e tabata hasiendo.

Ora e disipelnan di Huan a bai, Hesus a sigurá e multitut ku Huan tabata mas ku un profeta. Huan tabata “e mensahero” ku Yehova a profetisá di dje na Malakías 3:1. Ademas, e tabata e profeta Elías ku Malakías 4:5 i 6 a papia di dje. Hesus a bisa e multitut: “Di bèrdat mi ta bisa boso: Di tur hende ku a nase di muhé, no a lanta ningun mas grandi ku Huan Boutista; ma esun ku ta mas chikitu den e Reino di shelu ta mas grandi kuné.”—Mateo 11:11.

E echo ku Hesus a bisa ku e persona mas chikitu den e Reino di shelu ta mas grandi ku Huan ta mustra ku Huan lo no forma parti di e Reino selestial. Huan a prepará e kaminda pa Hesus, pero el a muri promé ku Hesus a habri kaminda pa hende por bai shelu. (Hebreonan 10:19, 20) Pero Huan tabata un profeta fiel; pues, lo e ta un di e hendenan ku lo biba riba tera komo súpdito di e Reino di Dios.