LÈS 1
Un Sekreto Ku Nos Ta Kontentu di Sa
Un hende a yega di konta bo algu anto bisa bo pa no konta niun hende?— * Un kos asina yama un “sekreto.” Den Beibel tin un sekreto spesial ku yama “e sekreto sagrado.” Beibel ta yam’é un sekreto pasobra hende no tabata sa kiko e ta. I e sekreto ta sagrado pasobra e ta un kos di Dios. Asta e angelnan tabatin gana di sa mas tokante e sekreto ei. Abo ke sa kiko e ta?—
Kiko bo ta kere ku e angelnan ei tabata purba di haña sa?
Hopi hopi tempu pasá, Dios a traha e promé hende hòmber i e promé hende muhé. Nan nòmber ta Adam ku Eva. Dios a pone nan biba na un lugá masha bunita mes ku yama e Hòfi di Edén. Si Adam ku Eva a hasi loke Dios a bisa nan, nan lo por a traha huntu ku nan yunan i hasi henter mundu bira un paradeis meskos ku e hòfi ei. Anto nan tur por a keda biba den Paradeis sin muri nunka. Pero, bo ta kòrda kiko Adam ku Eva a hasi?—
Adam ku Eva no a hasi loke Dios a bisa nan, i ta p’esei awe mundu no ta un paradeis. Pero Dios a bisa ku e ta bai hasi henter mundu bira bunita i ku tur hende lo biba felis pa semper. Kon Dios ta bai hasi e kos ei? Pa masha hopi tempu, niun hende no tabata sa presis. E tabata un sekreto.
Ora Hesus a bini na mundu, el a siña hende mas kos di e sekreto ei. El a bisa nan ku e sekreto ei ta tokante e Reino di Dios. Hesus a siña hende pidi Dios pa e Reino ei bini. Dios lo usa e Reino ei pa hasi mundu un paradeis masha bunita.
Bo ta kontentu di sa e sekreto akí?— Kòrda ku ta hende ku ta obedesé, esta, hasi loke Yehova ta bisa, so ta bai biba den Paradeis. Beibel ta konta nos di hopi hende ku a obedesé Yehova. Bo ke tende nan historia?— Ban wak ken nan ta i kon nos por ta manera nan.
BAN LESA DEN BO BEIBEL
^ par. 3 Na diferente lugá den e historianan akí, lo bo topa un strepi manera esaki (—) tras di un pregunta. Lo ta bon si bo pousa un ratu na e strepi i laga bo yu kontestá.
