UN HOMBER di New York (Merca) ta conta: “Mi yu homber Jonathan tabata bishitando amigunan bibando un par di kilometer leu. Mi esposa, Valentina, no tabata gusta p’e bai te ei banda caminda su amigunan tabata biba. Semper Valentina tabata nervioso tocante e tráfico. Pero Jonathan tabata stima electrónica i su amigunan tabatin un shop caminda e por a haña experencia práctico. Mi tabata na cas den west Manhattan, New York. Mi esposa tabata den exterior bishitando su famianan na Puerto Rico. ‘Djis Jonathan lo ta bek,’ mi a pensa. Anto bel di porta a ring. ‘Esei sigur t’e.’ No tabata asina. Tabata polis i paramédiconan. ‘Bo ta reconocé e rijbewijs aki?’ e oficial di polis a puntra. ‘Sí, esei ta di mi yu homber, Jonathan.’ Nos tin mal noticia pa bo. Tabatin un accidente, i . . . bo yu homber, . . . bo yu homber a muri.’ Mi promé reaccion tabata, ‘No por ta berdad!’ E bom ei a habri un herida den nos curason cu no a caba di cura te ainda, añanan despues.”

 Un tata na Barcelona (Spaña) ta skirbi: “Den e Spaña di añanan 60, nos tabata un famia felis. Tabatin María, mi casá, i nos tres yunan, David, Paquito i Isabel, di 13, 11 i 9 aña di edad respectivamente.

“Riba un dia na mart 1963, Paquito a bini cas for di scol kehando di dolor di cabes fuerte. Nos tabata confundí en cuanto kico por ta e causa—pero no pa hopi tempu. Tres ora despues e tabata morto. Un derame cerebral a kita su bida.

“Paquito su morto a tuma lugá mas cu 30 aña pasá. Tog, e dolor profundo dje pérdida ei ta cu nos te na dia djawe. Mayornan no por perde un yu sin sinti cu nan a perde algu di nan mes​—sin importá cuantu tempu pasa of cuantu otro yu nan por tin.”

E dos experencianan aki, caminda mayornan a perde nan yu, ta ilustrá con profundo i duradero  e herida ta ora un yu muri. Ki cierto ta e palabranan di un dokter kende a skirbi: “E morto di un yu ta generalmente mas trágico i traumático cu e morto di un persona mas bieu pasobra un mucha ta e último persona den e famia cu bo ta spera pa muri. . . . E morto di cualkier yu ta representá e pérdida di soñonan di futuro, di relacionnan [yu homber, suegra, nietunan], experencianan . . . cu no a ser disfrutá di dje ainda.” I e sintimentu aki di gran pérdida tambe por aplicá na cualkier hende muher cu a perde un barica.

Un esposa cu a perde su casá ta splica: “Mi esposo, Russell, a sirbi como un dokter asistent den e área di guera di Laman Pacífico durante Guera Mundial II. El a mira i a sobrebibí algun bataya teribel. El a regresá na Merca i na un bida mas trankil. Despues el a sirbi como un minister dje Palabra di Dios. Ora e tabatin entre 60 pa 65 aña el a cuminsá haña síntomanan di problema di curason. El a trata na hiba un bida activo. Anto, un dia na juli, 1988, el a sufri un atake di curason severo i a muri. Perdiend’e den morto tabata devastador. Nunca mi a haña ni sikiera chens di yam’é ayó. E no tabata simplemente mi casá. E tabata mi mihó amigu. Nos a compartí 40 aña di bida huntu. Awor ta parce cu mi tabatin cu enfrentá un tipo di soledad special.”

Esakinan ta djis un par dje miles di tragedianan cu ta dal famianan rond parti di mundu tur dia. Manera mayoria hende den tristesa lo bisá bo, ora morto tuma bo yu, bo esposo, bo esposa, bo mayor, bo amigu, berdaderamente e ta loke e escritor cristian Pablo a yam’é, “e último enemigu.” Hopi bes e promé reaccion natural n’e noticia horibel por ta nengamentu, “No por ta berdad! Mi no ta kere esei.” Otro reaccionnan hopi bes ta sigui, manera nos lo mira.​—1 Corintio 15:​25, 26.

Sin embargo, promé cu nos considerá e sintimentunan di tristesa, laga nos contestá algun pregunta importante. Morto ta nificá e fin dje persona ei? Tin cualkier speransa cu nos por mira nos sernan kerí atrobe?

E escritor bíblico Pablo a ofrecé speransa di alivio for dje “último enemigu,” morto. El a skirbi: “Morto mester ser reducí na nada.” “E último enemigu pa ser eliminá ta morto.” (1 Corintio 15:​26, The New English Bible) Pakico Pablo por tabata asina sigur di esei? Pasobra el a ser siñá dor di un persona cu a ser lantá for di morto, Jesucristo. (Echo 9:​3-19) Ta p’esei tambe Pablo por a skirbi: “Siendo cu morto ta pa medio di un homber [Adam], resureccion dje mortonan tambe ta pa medio di un homber [Jesucristo]. Pasobra mescos cu den Adam tur ta muri, asina tambe den Cristo tur lo ser hací bibu.”​—1 Corintio 15:​21, 22.

Jesus a sinti duele profundo ora el a topa e biuda di Naín i a mira su yu homber morto. E relato bíblico ta conta nos: “Ora [Jesus] a yega cerca porta dje stad [Naín], pues mira! nan tabata saca un homber morto, e único yu di su mama. Ademas, e tabata biuda. Un multitud considerabel dje stad tambe tabata cuné. I ora Señor a haña bista dje biuda, el a ser conmoví pa duele di dje, i a bis’é: ‘Stop di yora.’ Cu esei el a hala cerca i a mishi cu e cama di morto, i e cargadornan a para ketu i el a bisa: ‘Hóben, mi ta bisá bo, Lanta!’ I e homber morto a lanta sinta i a cuminsá papia, i el a dun’é na su mama. Awor  temor a dominá nan tur, i nan a cuminsá glorificá Dios, bisando: ‘Un gran profeta a ser lantá den nos,’ i ‘Dios a dirigí su atencion na su pueblo.’” Ripará con Jesus a ser conmoví pa duele, di manera cu el a resucitá e biuda su yu homber! Imaginá kico esei ta indicá p’e futuro!​—Lucas 7:12-16.

Ei, dilanti di testigonan ocular, Jesus e efectuá un resureccion inolvidabel. Esei tabata un muestra dje resureccion cu el a pronosticá caba algun tempu promé cu e suceso aki, un restoracion na bida riba tera bou di “un cielu nobo.” N’e ocasion ei Jesus a bisa: “No straña riba esaki, pasobra e ora ta bini den cua tur esnan cu ta den graf memorial lo tende su bos i sali.”​—Revelacion 21:​1, 3, 4; Juan 5:​28, 29; 2 Pedro 3:13.

Otro testigonan ocular di un resureccion a incluí Pedro, huntu cu algun otro dje diesdosnan cu a compañá Jesus riba su biahenan. En realidad nan a tende Jesus resucitá papia cerca e Laman di Galilea. E relato ta conta nos: “Jesus a bisa nan: ‘Bin, tuma boso desayuno.’ Ni un dje disipelnan tabatin e curashi di puntr’é: ‘Ken bo ta?’ pasobra nan tabata sa cu tabata Señor. Jesus a bini i a tuma e pan i a duna nan, i e piscá tambe. Awor esaki tabata di tres bes cu Jesus a aparecé n’e disipelnan despues cu el a ser lantá for di morto.”​—Juan 21:​12-14.

Pues anto, Pedro por a skirbi cu pleno conviccion: “Bendicioná sea e Dios i Tata di nos Señor Jesucristo, pasobra segun su gran misericordia el a duna nos un nacimentu nobo na un speransa bibu mediante e resureccion di Jesucristo for di morto.”​—1 Pedro 1:3.

Apostel Pablo a expresá su speransa sigur ora el a bisa: “Mi ta kere tur loke ta pará skirbí den e Ley i skirbí den e Profetanan; i mi tin speransa en cuanto Dios, cua speransa e hombernan aki mes tambe ta carga, cu lo bai tin un resureccion tantu di hende hustu como di hende inhustu.”​—Echo 24:​14, 15.

Miyones di hende pues por tin e speransa sólido di mira nan sernan kerí bibu atrobe riba tera pero bou di circunstancianan masha diferente. Con e circunstancianan ei lo ta? Mas detaye dje speransa basá riba Bijbel pa nos sernan kerí morto lo ser considerá den e seccion final dje foyeto aki, titulá “Un Speransa Sigur pa Hende Morto.”

Pero promé laga nos considerá preguntanan cu bo por tin si bo ta den tristesa debí n’e pérdida di un ser kerí: Ta normal pa sinti tristesa asina’ki? Con mi por biba cu mi tristesa? Kico otro hende por haci pa yudá mi enfrent’é? Con ami por yuda otro hende cu ta den tristesa? I principalmente, Kico Bijbel ta bisa tocante un speransa sigur pa hende morto? Lo mi yega di mira mi sernan kerí un dia atrobe? I na unda?