Imaginá bo e siguiente esena: Tim ta hunga ku su amigunan i ta tira un bala ku ta bai dal den bentana di un bisiña i kibr’é.

Si ta abo ta Tim, kiko lo bo hasi?

BO TIN TRES OPSHON:

1. Kore limpi bai.

2. Tira falta riba un otro hende.

3. Bisa e bisiña kiko a pasa i ofresé pa paga pa e daño ku bo a hasi.

Podisé lo bo tin gana di skohe Opshon A. Pero, semper tin bon motibu pa atmití bo foutnan, sea ku esei ta enserá un bentana ku a kibra òf algu otro.

1. Esei ta e mihó kos pa hasi.

   Beibel ta bisa: “Nos ke komportá nos mes na un manera onesto den tur kos.”—Hebreonan 13:18.

2. Ta mas fásil pa pordoná un persona ku ta atmití su fayonan.

   Beibel ta bisa: “Esun ku skonde su pikánan lo no prosperá, ma esun ku konfesá i laga nan lo haña miserikòrdia.”—Proverbionan 28:13.

3. Mas importante ainda, Dios lo keda kontentu ku esei.

   Beibel ta bisa: “Pasobra SEÑOR ta repudiá esnan ku no ke tin di aber kunÉ, pero ku esnan ku ta tende di djE E ta anda ku konfiansa.”—Proverbionan 3:32, BPK.

Karina, di 20 aña di edat, a purba di skonde un but for di su tata. Pero, e no por a skonde esei pa semper. Karina ta bisa: “Mas o ménos un aña despues, mi tata a haña sa ku tabatin un but na mi nòmber. El a rabia hopi ku mi!”

Kiko nos por siña for di esaki? Karina ta bisa: “Ora bo skonde algu, ta pió so e ta bira. Tardi òf trempan lo bo tin ku karga e konsekuensianan!”

Beibel ta bisa: “Nos tur ta faya hopi biaha.” (Santiago 3:2, nota) I manera nos a mira, si bo atmití bo foutnan mesora bo ta mustra ku bo ta un hende humilde i maduro.

E siguiente paso ta pa siña di bo foutnan. Un mucha muhé ku yama Vera ta bisa: “Mi ta purba di mira kada fayo komo algu ku mi por siña for di dje i lag’é yuda mi bira un mihó persona i mihó prepará pa dil ku e situashon na un manera diferente un otro biaha.” Ban wak kon bo por hasi esei.

Bo ta fia bo tata su baiskel i ta kibra algu na dje. Kiko lo bo hasi?

• Keda ketu i spera ku bo tata no ta ripará nada.

• Bisa bo tata presis kiko a pasa.

• Bisa bo tata kiko a pasa pero tira falta riba otro hende.

Bo a haña mal punto pa un prufwèrk ku bo no a siña p’e. Kiko lo bo hasi?

• Tira falta riba e prufwèrk.

• Aseptá ku bo a haña un mal punto pasobra bo no a siña pa e prufwèrk.

• Bisa ku ta e maestro no ta gusta bo.

 Awor ban bèk na e esenanan anterior i purba di imaginá ku bo ta (1) bo tata i (2) bo maestro. Kiko bo tata òf e maestro lo pensa di bo si bo ta kla pa atmití bo fout? Kiko nan lo pensa di bo si bo ta purba di skonde bo fout?

Awor pensa riba un fout ku bo a kometé den e aña ku a pasa i purba di kontestá e siguiente preguntanan.

Kiko tabata e fout? Kon bo a dil ku e fout?

• Mi a skond’é.

• Mi a tira falta riba otro hende.

• Mi a atmití mi fout mesora.

Si bo no a atmití bo fayo, kon bo a sinti bo despues?

• Bon—Nan no a gara mi!

• Malu—Mi mester a papia e bèrdat.

Kon bo por a dil mas mihó ku e situashon?

Kiko bo a siña di bo fout?

Dikon algun hende no ke atmití nan foutnan?

Kiko hende lo pensa di bo si semper bo ta purba di skonde bo foutnan, pero kiko nan lo pensa di bo si bo ta atmití bo foutnan?—Lukas 16:10.