Imaginá bo e siguiente esena: Karen ta na un fiesta pa mas o ménos dies minüt ora e ta tende un stèm konosí su tras.

Karen ta bira wak i ta mira su amiga Jessica ku dos bòter di serbes habrí den su man. Jessica ke duna Karen un di nan i ta bis’é: “Bo no ta muchu yòn pa pasa dushi, tòg?”

Karen ke bisa nò, pero Jessica ta su amiga. I Karen no ke pa su amiga pensa ku e ta laf. Ademas, Jessica ta un bon mucha. Si Jessica mes ta bebe, e ora ei un serbes no por ta dje malu ei. ‘Ta djis un serbes,’ Karen ta bisa den su mes. ‘No ta droga mi ta usa.’

Si abo haña bo den un situashon asina, kiko lo bo hasi?

Pa bo por tuma un desishon sabí den un situashon asina, bo mester sa ki tipo di hende bo ta. Esei ta enserá sa kiko bo norma- i balornan ta i kiko bo ta kere aden. Si bo sa esei, ta abo ta disidí kiko bo ta hasi den bo bida i no otro hende.—1 Korintionan 9:26, 27.

Kon bo por haña e forsa pa logra esei? Bo por kuminsá na kontestá e siguiente preguntanan.

Si bo sa kiko ta bo abilidatnan i kualidatnan positivo, bo por tin mas konfiansa den bo mes.

EHÈMPEL DI BEIBEL: Apòstel Pablo a skirbi: “Asta si mi no ta muchu ábil den mi forma di papia, un kos ta sigur: konosementu sí mi tin.” (2 Korintionan 11:6) Pablo tabatin un komprondementu profundo di e Skritura i esei a yud’é pa e para firme ora otronan tabata kuestion’é. E no a laga komentario negativo di otro hende debilitá su konfiansa.—2 Korintionan 10:10; 11:5.

ANALISÁ BO MES. Skirbi aki bou un abilidat òf algu ku bo ta bon den dje.

Awor, skirbi un kualidat fuerte ku bo tin. (Por ehèmpel, bo ta mustra interes den otro hende? Bo ta generoso? Bo ta konfiabel? Bo ta puntual?)

Si bo no traha riba bo puntonan débil i si bo laga esakinan dominá bo bida, bo por pèrdè bo norma- i balornan.

EHÈMPEL DI BEIBEL: Pablo tabata konsiente di su debilidatnan. El a skirbi: “Realmente, mi tin plaser den e lei di Dios segun e hende ku mi ta di paden, pero mi ta mira den mi kurpa un otro lei ku ta bringa kontra e lei di mi mente. I e lei di piká akí tin mi prezu.”—Romanonan 7:22, 23.

ANALISÁ BO MES. Kua ta bo debilidatnan ku bo mester siña dominá?

Lo bo drenta un taksi i bisa e shofùr pa e keda dal rònchi te ora ku su gasolin kaba? Esei lo ta bobo di bo parti i lo kosta bo hopi sèn!

Kiko ta e lès? Pa evitá ku, na moda di papia, bo ta keda dal rònchi den bida, bo mester pone meta. E ora ei bo sa unda bo ta bai i bo tin un plan kon pa yega kaminda bo ta bai.

EHÈMPEL DI BEIBEL: Pablo a skirbi: “E forma ku mi ta kore no ta manera kos ku mi no sa unda mi ta bai.” (1 Korintionan 9:26) Pablo no a biba pa biba; el a pone meta i a biba segun e metanan ei.—Filipensenan 3:12-14.

ANALISÁ BO MES. Skirbi aki bou tres meta ku bo ke logra den e siguiente aña.

Si bo no sa kiko bo ta kere aden, lo bo ta indesiso. Lo bo ta meskos ku un kameleon; lo bo keda kambia koló pa adaptá bo mes na bo pareunan. Esei ta un señal ku bo no tin bo mes identidat.

Di otro banda, ora bo akshonnan ta basá riba loke bo ta kere aden, bo ta mantené bo identidat, sin importá kiko otro hende ta hasi.

EHÈMPEL DI BEIBEL: Aunke Daniel lo tabata un tiner ainda, el a “proponé den su kurason” pa obedesé e leinan di Dios, maske e no tabata huntu ku su famia. (Daniel 1:8) Asina ei Daniel a protehá su identidat. El a para pa loke el a kere aden.

ANALISÁ BO MES. Kiko abo ta kere aden? Por ehèmpel: Bo ta kere den Dios? Si ta sí, kiko ta pone bo kere den dje? Kiko ta konvensé abo ku e ta eksistí?

Bo ta kere ku e normanan moral di Dios ta pa bo mes bon? Si ta sí, kiko ta pone bo kere esei?

Al final, manera kiko bo ke ta? Manera un blachi ku ta kai i ku bientu ta supla paki i p’aya, òf manera un palu ku por wanta asta un tormenta fuerte? Para firme pa loke bo ta kere aden, i e ora ei lo bo ta manera e palu ei. Esei lo yuda bo kontestá e pregunta: Ken mi ta?