Imaginá bo e siguiente esena: Ta djárason atardi. Awor ku Jeff di 17 aña a kaba di hasi trabou di kas, e meresé un tiki tempu pa e sinta sosegá un ratu! E ta sende e televishon i benta su kurpa den su stul faborito.

Nèt e ora ei su tata ta bin para den porta, no muchu kontentu.

Si ta abo ta Jeff, kiko lo bo a hasi otro pa evitá e klèsh akí?

Komunikashon ku bo mayornan ta meskos ku korementu di outo. Si bo haña bo ku un opstákulo den kaminda, bo por skohe un otro ruta.

 POR EHÈMPEL:

Un mucha muhé ku yama Leah ta bisa: “Mi ta haña ta difísil pa papia ku mi tata. Tin biaha mi ta papia kuné i despues di un ratu e ta bisa mi, ‘Sòri, ta ku mi bo ta papia?’”

LEAH TIN POR LO MÉNOS TRES OPSHON.

1. Grita su tata.

   Leah ta grita su tata i bis’é: “Ban serio Tata; bo tin ku skucha mi si pasobra e kos akí ta importante!”

2. Keda sin papia ku su tata.

   Leah no ta purba di papia ku su tata mas tokante su problema.

3. Buska un otro oportunidat pa trese su punto dilanti.

   Leah ta papia ku su tata kara-kara na un otro okashon, òf e ta skirbié un karta tokante su problema.

Kua opshon abo lo rekomendá Leah?

ANALISÁ LO SIGUIENTE: E tata di Leah tin otro kos na su kabes i na e momento ei e no tin atenshon pa Leah su problema. Pues, si Leah skohe Opshon A, su tata lo no komprondé dikon e ta grit’é. Anto, su tata lo no ta habrí tampoko pa loke Leah ke bis’é, i Leah lo no ta mustrando onor i rèspèt na su tata. (Efesionan 6:2) En realidat, e opshon akí lo no benefisiá niun di nan dos.

Opshon B por parse esun di mas fásil, pero e no ta esun di mas sabí. Dikon nò? Pasobra pa Leah por dil ku su problemanan, e mester papia ku su tata. E tata mester sa kiko ta pasando ku Leah pa e por yud’é. Den e kaso akí, silensio lo no yuda ku nada.

Pero si Leah skohe Opshon C, e no ta laga e opstákulo akí stòp e di sigui purba. Na lugá di esei, e ta trata di papia ku su tata na un otro momento. Anto, si e skohe pa skirbi su tata un karta, mesora e por kuminsá sintié mas mihó.

Si Leah disidí di skirbi su tata un karta, e por skirbi presis loke e ke bisa. Ora e tata lesa e karta, e lo haña sa kiko Leah kier a bis’é i esaki lo yud’é komprondé Leah su problema mihó tambe. Pues, opshon C lo benefisiá tantu Leah komo su tata. Sea Leah papia kara-kara ku su tata òf skirbié un karta, e opshon akí ta basá riba e konseho di Beibel pa “buska e kosnan ku ta promové pas.”—Romanonan 14:19.

Ki otro opshon Leah lo por tin?

Wak si bo por pensa un otro opshon. Anto, skirbi kiko lo por ta e resultado di e opshon ei.

Kòrda ku loke bo bisa i loke bo mayornan ta kere ku bo ta bisa no ta semper meskos.

POR EHÈMPEL:

Bo mayornan ta puntra bo dikon bo tin mal beis. Bo ta bisa nan: “Mi no ke papia over di e kos ei.”

Pero, bo mayornan ta tende: “Mi no ta konfia boso sufisiente pa mi papia ku boso. Mi ta preferá di papia ku mi amigunan tokante mi problema, pero no ku boso.”

Imaginá bo ku bo tin un problema serio i bo mayornan ke yuda bo. Pero bo ta bisa: “No wòri. Mi mes por dil kuné.”

• Kiko bo mayornan por tende?

• Kiko por ta un mihó manera pa kontestá?