1. Ki yudansa e disipelnan a haña ora nan a reuní huntu, i dikon nan tabatin mester di dje?

 DJIS despues di e resurekshon di Hesus, su disipelnan a reuní huntu pa animá otro. Ma e portanan di e lugá kaminda nan tabata reuní tabata na yabi, ya ku nan tabatin miedu di nan enemigunan. Nan miedu sigur a kita ora Hesus a presentá meimei di nan i bisa nan: “Risibí spiritu santu.” (Lesa Huan 20:19-22.) Mas despues, e disipelnan a bolbe reuní huntu, i Yehova a drama su spiritu santu riba nan. Esei sin duda a fortalesé nan pa hasi e trabou di prediká ku tabatin nan dilanti!—Echo. 2:1-7.

2. (a) Kon Yehova ta duna nos fortalesa, i dikon nos tin mester di dje? (b) Dikon e areglo di Adorashon Komo Famia ta asina importante? (Wak e nota i e kuadro “ Adorashon Komo Famia,” página 175.)

² Nos ta konfrontá kasi e mesun retonan ku nos rumannan di e promé siglo. (1 Ped. 5:9) Tin biaha algun di nos por tin miedu di hende, i nos tin mester di e fortalesa ku Yehova ta duna pa nos por perseverá den e trabou di prediká. (Efe. 6:10) Yehova ta perkurá gran parti di e fortalesa ei mediante nos reunionnan. Aktualmente, nos tin e oportunidat di asistí na 2 reunion semanal masha instruktivo: e Reunion Públiko i Estudio di Toren di Vigilansia i nos reunion di den siman ku yama Nos Bida i Sirbishi Kristian. a Tambe nos ta disfrutá di 4 evenemento anual: un kongreso regional, dos asamblea di sirkuito i Konmemorashon di e morto di Kristu. Dikon ta asina importante pa nos asistí na tur e reunionnan ei? Kon nos reunionnan djawe a desaroyá? I kiko nos aktitut pa ku e reunionnan ta revelá?

3, 4. Kiko Yehova ta rekerí di su pueblo? Duna algun ehèmpel.

³ For di den pasado, un di e rekisitonan di Yehova tabata pa su pueblo reuní huntu pa ador’é. Por ehèmpel, na 1513 promé ku Kristu, Yehova a duna su Lei na e nashon di Israel. Segun e Lei ei, nan mester a warda un sabat semanal, ya asina kada famia por a adorá Yehova i ser instruí den e Lei. (Deu. 5:12; 6:4-9) Ora e israelitanan a sigui e mandamentu akí, esei a fortalesé famianan i e nashon den su totalidat a keda limpi i fuerte den sentido spiritual. Ora e nashon a keda sin sigui e Lei—neglishando por ehèmpel e rekisito di reuní huntu regularmente  pa adorá Yehova—nan a pèrdè e aprobashon di Dios.—Lev. 10:11; 26:31-35; 2 Kró. 36:20, 21.

⁴ Pensa tambe riba e ehèmpel ku Hesus a pone. E tabatin e kustumber di bai snoa tur siman riba sabat. (Luk. 4:16) Despues di su morto i resurekshon, su disipelnan a sigui ku e kustumber di reuní huntu regularmente maske nan no tabata bou di e lei di sabat mas. (Echo. 1:6, 12-14; 2:1-4; Rom. 14:5; Kol. 2:13, 14) Na e reunionnan ei, e kristiannan di e promé siglo no solamente a haña instrukshon i animashon sino tambe a ofresé sakrifisio di alabansa na Dios ku nan orashon-, komentario- i kantikanan.—Kol. 3:16; Heb. 13:15.

5. Dikon nos ta asistí na reunionnan semanal i na asamblea- i kongresonan anual? (Wak tambe e kuadro “ Reunionnan Anual Ku Ta Uni e Pueblo di Dios,” página 176.)

⁵ Esei ta konta pa nos tambe. Ora nos ta asistí na nos reunionnan semanal i na nos asamblea- i kongresonan anual, nos ta demostrá ku nos ta apoyá e Reino di Dios, nos ta risibí fortalesa for di Dios su spiritu santu i nos ta animá otro rumannan ku nos ekspreshonnan di fe. Mas importante ainda, nos tin e oportunidat di adorá Yehova. Kon? Ku nos orashon-, komentario- i kantikanan. Kisas e manera ku nos ta tene nos reunionnan ta un poko diferente for di e reunionnan ku e israelitanan i e kristiannan di e promé siglo tabata asistí na dje, pero nan tin e mesun importansia. Kon nos reunionnan djawe a desaroyá?

6, 7. (a) Kiko ta e propósito di nos reunionnan? (b) Kon e reunionnan tabata varia di un grupo pa otro?

⁶ Ora Ruman Charles Taze Russell a kuminsá buska pa sa e bèrdat ku tin den e Palabra di Dios, el a mira ku tabata  nesesario pa reuní ku otro hende ku tabatin e mesun meta. Na 1879, Russell a skirbi: “Ami, den kompania di mas hende di Pittsburgh, a organisá un klas [òf, grupo] di Beibel pa investigá e Skritura. Nos ta reuní tur djadumingu.” Lektornan di E Toren di Vigilansia tambe a haña e animashon pa reuní huntu, i pa 1881, nan tabata tene reunion tur djadumingu i djárason na Pittsburgh, Pennsylvania. E Toren di Vigilansia di novèmber 1895 a bisa ku e propósito di e reunionnan ei tabata pa kultivá ‘amor i amistat kristian’ i pa duna esnan ku reuní e oportunidat pa animá otro.—Lesa Hebreonan 10:24, 25.

⁷ Pa hopi aña, e frekuensia i manera di organisá e reunionnan di e Studiantenan di Beibel tabata varia di un grupo pa otro. Por ehèmpel, un karta ku a keda publiká na 1911, di un grupo na Merka, a bisa: “Nos ta tene por lo ménos sinku reunion tur siman.” Nan tabata tene e reunionnan ei riba djaluna, djárason, djabièrnè i dos biaha riba djadumingu. Anto un karta ku a keda publiká na 1914, di un grupo na Afrika, a bisa: “Nos ta tene reunion dos biaha pa luna, di djabièrnè pa djadumingu.” Pero ku tempu nos reunionnan a kuminsá haña e formato aktual. Laga nos repasá brevemente e historia di kada reunion.

8. Kua tabata algun tópiko di e promé diskursonan públiko?

⁸ Reunion Públiko. Na 1880, un aña despues ku Ruman Russell a kuminsá publiká E Toren di Vigilansia, el a imitá e ehèmpel di Hesus i a kuminsá ku un gira di predikashon. (Luk. 4:43) Ku esei, Ruman Russell a establesé e patronchi pa loke a bira awor nos Reunion Públiko. E anunsio den E Toren di Vigilansia tokante e gira a bisa ku gustosamente Russell “lo tene reunionnan públiko tokante ‘Asuntunan relashoná ku e Reino di Dios.’” Na 1911, despues ku a establesé vários klas, òf kongregashon, den diferente pais, kada kongregashon a haña e animashon pa manda oradónan apto na áreanan den bisindario pa duna un seri di 6 charla riba tópikonan manera huisio i e reskate. Na final di kada diskurso, nan tabata anunsiá nòmber di e oradó i tema di e diskurso di e siguiente siman.

9. Kon e Reunion Públiko a kambia atraves di añanan, i kon bo por apoyá e reunion akí?

⁹ Na 1945, E Toren di Vigilansia a anunsiá ku ta bai kuminsá ku un kampaña mundial di Reunion Públiko ku a enserá un seri di 8 charla bíbliko ku a trata “problemanan urgente di nos era.” Pa hopi dékada, oradónan asigná a usa no solamente e tópikonan ku e esklabo fiel a suministrá sino tambe nan a duna diskursonan ku nan mes a traha. Pero na 1981, tur oradó a haña instrukshon pa basa nan diskursonan riba e boskehonan ku e kongregashonnan a risibí. b Te ku 1990, algun di e boskehonan pa diskurso públiko a inkluí partisipashon di ouditorio òf demostrashon; pero e aña ei a ahustá e instrukshonnan, i djei en adelante diskursonan públiko a konsistí di  diskurso so. Na yanüari 2008 tabatin un ahuste mas ora ku a redusí diskurso públiko di 45 minüt pa 30 minüt. Apesar ku a kambia e forma un poko, te awe diskursonan públiko bon prepará ta sigui edifiká fe den e Palabra di Dios i eduká nos tokante vários aspekto di e Reino di Dios. (1 Tim. 4:13, 16) Ta bon pa invitá e hendenan ku bo ta rebishitá i otro personanan ku no ta Testigu di Yehova pa bin tende e diskursonan importante ei basá riba Beibel. Bo ta hasi esei ku smak?

10-12. (a) Kon e manera di tene e Estudio di Toren di Vigilansia a kambia ku tempu? (b) Kiko ta bon pa nos puntra nos mes?

¹⁰ Estudio di Toren di Vigilansia. Na 1922, ruman hòmbernan konosí komo peregrino—sirbidónan mandá pa Sosiedat Watch Tower pa duna diskurso na e kongregashonnan i pa dirigí e trabou di prediká—a rekomendá pa tene un reunion regular pa studia E Toren di Vigilansia. E sugerensia akí a ser aseptá, i na kuminsamentu e rumannan tabata tene e estudio di E Toren di Vigilansia tur siman, sea meimei di siman òf riba djadumingu.

¹¹ E Toren di Vigilansia di 15 di yüni 1932 a duna mas instrukshon riba e manera ku mester a dirigí e reunion akí. Usando e estudio ku tabata tene na Kas di Bètel komo patronchi, e artíkulo a deklará ku ta un ruman hòmber mester dirigí e reunion. Tres ruman hòmber por a sinta te dilanti den e lugá di reunion i lesa e paragrafnan bùrt pa bùrt. E tempu ei e artíkulonan no tabatin pregunta imprimí, pues e konduktor a haña instrukshon pa pidi e presentenan hasi pregunta riba e informashon ku nan tabata analisá. Despues di esaki, e konduktor tabata yama riba hende den ouditorio pa kontestá e preguntanan ei. Si ainda tabata falta mas klarifikashon, e konduktor mester a duna un splikashon “breve i al kaso.”

 ¹² Na prinsipio, kada kongregashon tabatin mag di skohe e edishon di revista ku e mayoria einan kier a studia. Pero E Toren di Vigilansia di 15 di aprel 1933 a sugerí pa tur kongregashon usa e edishon di e luna koriente. Na 1937, nan a haña instrukshon pa tene e estudio riba djadumingu. Mas refinamentu ku a restrukturá e reunion na e forma ku nos konosé awe a sali den E Toren di Vigilansia di 1 di òktober 1942. Di promé, e revista a anunsiá ku awor lo bai tin pregunta na pia di kada página di e artíkulonan di estudio i ku mester usa e preguntanan ei. Despues, e revista a bisa ku e reunion mester dura un ora. Tambe el a animá e rumannan ku ta duna kontesta pa ekspresá nan mes “ku nan propio palabra” en bes di lesa for di e paragraf. Te awe e Estudio di Toren di Vigilansia ta e reunion prinsipal ku e esklabo fiel ta usa pa perkurá kuminda spiritual na e debido tempu. (Mat. 24:45) Ta bon pa kada un di nos puntra nos mes: ‘Mi ta prepará tur siman pa e estudio di E Toren di Vigilansia? Mi ta hasi esfuerso pa duna komentario?’

13, 14. Kon e Estudio di Beibel di Kongregashon a desaroyá, i kiko bo ta gusta di e reunion akí?

¹³ Estudio di Beibel di Kongregashon. Meimei di e dékada di 1890, despues ku a publiká vários tomo di e seri Ourora di Milenio, Ruman H. N. Rahn, un Studiante di Beibel ku tabata biba na Baltimore (Maryland, Merka), a sugerí pa organisá grupo pa studia Beibel i yama nan “Sírkulonan di Ourora.” Na promé instante, e reunionnan akí tabata un eksperimento i hopi biaha tabata tene nan den kasnan privá. Pero ya pa sèptèmber 1895 tabata tene e Sírkulonan di Ourora ku éksito den gran kantidat di stat na Merka. P’esei E Toren di Vigilansia di e luna ei a sugerí pa tur studiante di e bèrdat tene e reunionnan ei. E artíkulo a bisa ku e ruman ku ta dirigí e reunion mester ta un bon lesadó. E mester a lesa un frase i despues warda pa e presentenan komentá. Despues ku el a lesa kada un di e frasenan di un paragraf i a analisá nan, e mester a buska e tekstonan bíbliko menshoná i lesa nan. Na final di e kapítulo, kada persona presente mester a duna un repaso breve di e informashon.

¹⁴ E nòmber di e reunion akí a kambia vários biaha. El a bira konosí komo Sírkulonan di Berea pa Estudio di Beibel, refiriendo na e hendenan di Berea di e promé siglo, kendenan a analisá e Skritura kabalmente. (Echo. 17:11) Ku tempu e nòmber a kambia pa Estudio di Buki di Kongregashon. Awor e yama Estudio di Beibel di Kongregashon, i henter e kongregashon ta reuní huntu na Salòn di Reino, en bes di den grupo na kasnan privá. Atraves di dékadanan, nos a usa vários buki, foyeto i asta artíkulo di E Toren di Vigilansia komo base pa e estudio. For di kuminsamentu a animá tur presente pa partisipá den e reunion. E reunion akí a yuda nos haña un  konosementu mas profundo di Beibel. Bo ta prepará regularmente pa e reunion akí i hasi bo bèst pa partisipá den dje?

15. Kiko tabata e propósito di e Skol di Ministerio Teokrátiko?

¹⁵ Skol di Ministerio Teokrátiko. “Djaluna anochi, 16 di febrüari 1942, tur ruman hòmber ku tabata miembro di e famia di Bètel di Brooklyn a haña invitashon pa inskribí nan mes den loke despues a bira konosí komo e Skol di Ministerio Teokrátiko,” segun Carey Barber, kende e tempu ei tabata sirbi na e sede mundial na Brooklyn, New York. Ruman Barber, kende hopi tempu despues a bira un miembro di Kuerpo Gobernante, a deskribí e skol komo “un di e desaroyonan mas sobresaliente den Yehova su trato ku su pueblo den tempu moderno.” E kurso tabata un éksito rotundo i a yuda e rumannan bira mas kapas den siña hende i den prediká. P’esei, kuminsando na 1943, e foyeto Kurso den Ministerio Teokrátiko a bira gradualmente disponibel pa tur kongregashon na mundu. E Toren di Vigilansia  di 1 di yüni 1943 a bisa ku e propósito di e Skol di Ministerio Teokrátiko ta pa yuda e pueblo di Dios “entrená nan mes pa nan ta mihó predikadó den proklamashon di e Reino.”—2 Tim. 2:15.

16, 17. Ta e téknika di duna diskurso so e Skol di Ministerio Teokrátiko a siña nos? Splika esei.

¹⁶ Na prinsipio, mayoria di ruman tabatin masha difikultat pa papia dilanti di un públiko grandi. Clayton Woodworth, Jr., kende su tata a ser enkarselá inhustamente huntu ku Ruman Rutherford i otronan na 1918, ta kòrda kon el a sintié ora el a djòin e promé skol na 1943. Ruman Woodworth a konta: ‘Tabata masha difísil pa mi duna parti. Mi lenga tabata bira pisá, mi boka tabata bira seku seku i mi stèm tabata zona masha straño.’ Pero segun ku Clayton a bira mas ábil, el a haña hopi oportunidat pa duna diskurso públiko. E skol a siñ’é mas ku djis e téknika di duna diskurso. E skol a siñ’é e balor di humildat i e importansia di dependé riba Yehova. El a bisa: “Mi a  bin realisá ku e oradó mes no ta importante. Loke ta importante ta pa e prepará bon i pone tur su konfiansa den Yehova. E ora ei e oyentenan lo skuch’é ku plaser i siña algu.”

¹⁷ Na 1959, ruman muhénan a haña invitashon pa skirbi nòmber den e skol. Ruman Edna Bauer ta kòrda ku el a tende e anunsio na asamblea. El a konta: “Mi ta kòrda kon emoshoná e ruman muhénan tabata. Mas oportunidat a habri pa nan awor.” Atraves di añanan, hopi ruman hòmber i ruman muhé a probechá di e oportunidat pa partisipá den e Skol di Ministerio Teokrátiko i ser siñá pa Yehova. Awe nos ta sigui haña e tipo di entrenamentu ei na nos reunion di den siman.—Lesa Isaías 54:13.

18, 19. (a) Kon nos ta risibí guia práktiko awe pa kumpli ku e trabou di prediká? (b) Dikon nos ta kanta na nos reunionnan? (Wak e kuadro “ Kantamentu di e Bèrdat.”)

¹⁸ Reunion di Sirbishi. For di 1919 kaba e rumannan tabata tene reunion pa prepará pa bai den sirbishi di vèlt. E tempu ei, no ta tur hende den kongregashon tabata asistí na e reunionnan akí; solamente esnan ku tabata direktamente enbolbí den distribushon di literatura. Na aña 1923 nan a kuminsá tene un Reunion di Sirbishi un biaha pa luna, i henter e kongregashon mester a asistí. Pa 1928, kongregashonnan a haña e animashon pa tene e Reunion di Sirbishi tur siman. Na 1935, E Toren di Vigilansia a animá tur kongregashon pa basa nan Reunion di Sirbishi riba e informashon ku tabata sali den Direktor (ku despues nan a yama Informadó i mas despues, Nos Ministerio di Reino). Poko despues, e reunion akí a bira parti di e programa di reunion di tur kongregashon.

¹⁹ Awe nos ta risibí guia práktiko pa kumpli ku e trabou di prediká na nos reunion di den siman. (Mat. 10:5-13) Si bo ta bini na remarke pa haña un kopia di e material i tarea pa reunion, bo ta hasi bon uso di dje? Bo ta studi’é i pone e sugerensianan ku tin den dje na práktika den sirbishi?

20-22. (a) Dikon nos ta konmemorá e morto di Hesus? (b) Ki benefisio bo ta saka dor di asistí na Memorial tur aña?

²⁰ Hesus a instruí su siguidónan pa konmemorá su morto te na su yegada. Meskos ku e selebrashon di Pasku Hudiu, ta ún biaha pa aña ta tene e Konmemorashon, òf Memorial, di e morto di Hesus. (1 Kor. 11:23-26) E reunion akí ta hala miónes di hende tur aña. E ta rekordá e ungínan ku nan tin e privilegio di ta heredero di e Reino huntu ku Kristu. (Rom. 8:17) Serka e otro karnénan, e reunion akí ta stimulá lealtat na e Rei di e Reino di Dios i rèspèt profundo p’e.—Huan 10:16.

²¹ Ruman Russell ku su kompañeronan a rekonosé e importansia di konmemorá e Sena di Señor, i nan tabata sa ku mester ten’é un biaha pa aña so. E Toren di Vigilansia di aprel 1880 a bisa: “Ya pa vários aña hopi di nos aki na Pittsburgh tin e kustumber di . . . konmemorá e Pasku Hudiu [Memorial] i  kome e emblemanan di e kurpa i sanger di nos Señor.” Poko despues di esei a kuminsá tene kongreso pareu ku Memorial. E promé biaha ku a tene registro di e okashon ei tabata na 1889, ora ku 225 hende a asistí i 22 a batisá.

²² Awe, nos no ta tene Memorial mas komo parti di un programa di kongreso, pero sí nos ta invitá tur hende, sin importá unda nos ta biba, pa reuní huntu ku nos na un Salòn di Reino lokal òf un lugá ku nos a hür. Na 2013, mas ku 19 mion hende a konmemorá e morto di Hesus. Pues, nos tin e gran privilegio di no solamente asistí na e Konmemorashon sino tambe di animá otro hende pa reuní huntu ku nos riba e anochi di mas sagrado akí! Bo ta hasi bo máksimo esfuerso pa tur aña bo invitá mas tantu hende posibel pa bini Memorial?

23. Kon bo ta mira nos reunionnan?

²³ Sirbidónan leal di Yehova no ta konsiderá e instrukshon pa reuní huntu un karga. (Heb. 10:24, 25; 1 Huan 5:3) Rei David, por ehèmpel, tabata gusta bai e kas di Yehova pa rindi adorashon, foral den kompania di hende ku tambe tabata stima Dios. (Sal. 27:4; 35:18) Anto pensa tambe riba e ehèmpel di Hesus. For di yòn, e tabatin un deseo profundo di ta den e kas di adorashon di su Tata.—Luk. 2:41-49.

24. Ora nos ta asistí na reunion, nos tin oportunidat di hasi kiko?

²⁴ Ora nos ta asistí na reunion, nos ta demostrá nos amor pa Yehova i nos deseo pa edifiká nos rumannan den fe. Tambe esei ta ekspresá nos anhelo di ke siña kon nos mester biba komo siudadano di e Reino di Dios, pasobra ta prinsipalmente na nos reunionnan, asambleanan i kongresonan nos ta haña e entrenamentu ei. Ademas, nos reunionnan ta duna nos e kapasidat i fortalesa ku nos mester pa perseverá den un di e aktividatnan di mas importante ku e Reino di Dios ta efektuando awe, esta, e trabou di hasi hende disipel di Rei Hesukristu i entrená nan. (Lesa Mateo 28:19, 20.) Pues, no tin duda ku e profundidat di nos deseo pa reuní huntu ta revelá kon real e Reino di Dios ta pa kada un di nos. Laga nos semper duna nos reunionnan nan debido balor!