1-3. Kiko Hesus a hasi ora el a mira ku hende tabata hasi e tèmpel impuru?

 HESUS tabatin masha rèspèt pa e tèmpel na Herúsalèm pasobra e tabata sa ku e tèmpel pa hopi tempu tabata e sentro di adorashon berdadero riba tera. Pero e adorashon ei—adorashon di Yehova, e Dios santu—mester ta limpi i puru. Pues, nos por imaginá nos kon Hesus a sintié ora ku dia 10 di nisan di aña 33, el a bai na e tèmpel i a haña hende ta hasi e tèmpel impuru. Kiko tabata e problema?—Lesa Mateo 21:12, 13.

² Wèl, den un patio di e tèmpel (Plenchi pa Pagano), komersiante- i kambiadónan di plaka golos pa ganashi tabata probechá di e hudiunan ku a bini einan pa presentá ofrenda na Yehova. a Ora Hesus a mira esei, el a “kore ku tur hende ku tabata bende i kumpra kos den tèmpel, i el a bòltu mesa di e kambiadónan di plaka.” (Kompará ku Nehemías 13:7-9.) El a kondená e hòmbernan egoista ei pasobra nan a hasi e kas di su Tata “un kueba di ladron.” Asina Hesus a demostrá ku e tabatin rèspèt pa e tèmpel i pa Esun ku a ser adorá einan. E adorashon di su Tata ta algu ku mester a keda limpi!

³ Siglonan despues, ora ku Hesus a keda koroná komo Rei Mesiániko, el a bolbe limpia—òf purifiká—un tèmpel, unu ku ta enbolbé tur hende ku awe ke adorá Yehova na e manera ku ta aseptabel p’e. Ta kua tèmpel esei ta?

4, 5. (a) Kon e siguidónan ungí di Hesus a ser refiná i purifiká di 1914 pa kuminsamentu di 1919? (b) Akaso esei tabata final di e proseso di refiná i purifiká e pueblo di Dios? Splika esei.

⁴ Manera nos a mira den Kapítulo 2 di e buki akí, despues ku Hesus a keda koroná komo Rei na 1914, e ku su Tata a bin inspekshoná e tèmpel spiritual, esta, Dios su areglo pa adorashon puru. b Debí na e inspekshon ei, e Rei a mira ku mester a refiná i purifiká kristiannan ungí, “e yu hòmbernan di Levi.” (Mal. 3:1-3) Di 1914 pa kuminsamentu di 1919, Yehova, e Refinador, a permití su pueblo pasa dor di vários prueba i difikultat ku a sirbi pa refiná nan i purifiká nan. Felismente, e kristiannan ungí akí a sali den un kondishon mas limpi for di e pruebanan  kayente ei. Es mas, nan tabata ansioso pa demostrá ku nan ta apoyá e Rei Mesiániko!

⁵ Akaso esei tabata final di e proseso di refiná i purifiká e pueblo di Dios? Nò. Durante di e último dianan, Yehova, via e Rei Mesiániko, a sigui yuda su siguidónan pa nan ta limpi pa asina nan por keda den e tèmpel spiritual. Den e siguiente dos kapítulonan, nos lo mira kon el a refiná nan den sentido moral i asta pa loke ta e struktura di nan organisashon. Pero promé, laga nos analisá e purifikashon spiritual ku a tuma lugá. Nos fe ta bira mas firme ora nos konsiderá loke Hesus a hasi—tantu na maneranan bisto komo tras di kortina—pa yuda su siguidónan pa nan por ta spiritualmente limpi.

6. Kon e mandamentunan ku Yehova a duna e eksiliadonan hudiu ta yuda nos komprondé kiko puresa spiritual ta enserá?

⁶ Kiko ta puresa spiritual? Pa kontestá esei, laga nos analisá loke Yehova a bisa e eksiliadonan hudiu ora nan tabata a punto di bandoná Babilonia na aña 537 promé ku Kristu. (Lesa Isaías 52:11.) E motibu prinsipal pakiko e hudiunan ei tabata regresá Herúsalèm tabata pa rekonstruí e tèmpel i restorá adorashon berdadero. (Èsd. 1:2-4) Pues, Yehova tabata ke pa su pueblo laga tur rastro atras di e religion di Babilonia. Tuma nota ku el a duna nan un seri di mandamentu: “No mishi ku nada impuru,” “sali for di meimei di dje” i “purifiká boso mes.” Nan no mester a mancha e adorashon puru di Yehova ku nada di adorashon falsu. Kiko nos por konkluí for di esaki? Puresa spiritual ta enserá keda liber di e siñansa- i práktikanan di religion falsu.

7. Ki kanal Hesus a usa pa yuda su siguidónan pa nan por ta limpi den sentido spiritual?

⁷ Poko despues ku Hesus a keda koroná komo Rei, el a establesé un kanal di komunikashon ku tabata fásil pa rekonosé i via kua el a yuda su siguidónan keda spiritualmente limpi. E kanal ei ta e esklabo fiel i prudente ku Kristu a nombra na 1919. (Mat. 24:45) Ya pa e aña ei, e Studiantenan di Beibel a purifiká nan mes kaba di hopi siñansa religioso falsu. Pero ainda nan tabata falta mas purifikashon spiritual. Via e esklabo fiel, Kristu a iluminá su siguidónan gradualmente tokante vários selebrashon i práktika ku nan mester a stòp kuné. (Pro. 4:18) Laga nos konsiderá algun ehèmpel di esaki.

8. Kiko e Studiantenan di Beibel a rekonosé pa hopi tempu kaba tokante Pasku, pero kiko nan no a mira klaramente?

⁸ Pa hopi tempu e Studiantenan di Beibel a rekonosé ku Pasku tabata di orígen pagano i ku Hesus no a nase dia 25 di desèmber. E Toren di Vigilansia di desèmber 1881 a deklará: “Nan a trese miónes di hende den iglesia for di paganismo. Pero gran parti di e kambio tabata pa nòmber: E saserdotenan pagano a bira saserdotenan kristian i e dianan di fiesta pagano a haña nòmber kristian. Anto Pasku di Nasementu tabata un di e fiestanan akí.”  Na 1883, bou di e tema “Ki Tempu Hesus A Nase?,” E Toren di Vigilansia a rasoná ku Hesus a nase na kuminsamentu di òktober. c Pero, e tempu ei e Studiantenan di Beibel no a mira klaramente ainda ku nan mester a stòp di selebrá Pasku. Asta e famia di Bètel di Brooklyn a sigui selebr’é. Ma despues di 1926 kos a kuminsá kambia. Dikon?

9. Kiko e Studiantenan di Beibel a bin realisá tokante Pasku?

⁹ Ora ku e Studiantenan di Beibel a analisá e tópiko ei mas a fondo, nan a bin realisá ku, bon mirá, e orígen di Pasku i e práktikanan konektá kuné ta desonrá Dios. E artíkulo “E Orígen di Pasku,” ku a sali den E Époka di Oro di 14 di desèmber 1927, a bisa ku Pasku ta un selebrashon pagano ku ta konsentrá riba plaser i ta enserá adorashon di dios falsu. E artíkulo a splika bon kla ku Kristu no a manda pa tene e selebrashon ei i a konkluí ku e deklarashon skèrpi akí tokante Pasku: ‘E echo ku mundu, nos karni pekaminoso i Diabel ta di akuerdo pa sigui kuné i selebr’é ta netamente e argumento final i determinante pa hende ku ta kompletamente dediká na e sirbishi di Yehova no selebr’é.’ Pues, no tabata un sorpresa ku e famia di Bètel no a selebrá Pasku e aña ei, ni nunka mas despues!

10. (a) Ki splikashon detayá di e bèrdat tokante Pasku a keda presentá na desèmber 1928? (Wak tambe e kuadro “ E Orígen i Propósito di Pasku.”) (b) Kon e pueblo di Dios a ser spièrtá pa otro dianan di fiesta i selebrashonnan ku nan mester a evitá? (Wak e kuadro “ E Bèrdat Tokante Otro Selebrashon- i Dianan di Fiesta.”)

¹⁰ E siguiente aña, e Studiantenan di Beibel a haña un splikashon mas detayá ainda di e bèrdat tokante Pasku. Dia 12 di desèmber 1928, Ruman Richard H. Barber, un miembro di staf di e ofisina prinsipal, a duna un diskurso na radio ku a mustra bon kla e orígen impuru di e selebrashon akí. Kon e pueblo di  Dios a reakshoná riba e guia kla akí ku nan a haña for di e ofisina prinsipal? Ruman Charles Brandlein, kòrdando tempu ku e ku su famia a stòp di selebrá Pasku, a bisa: “Akaso nos tabatin problema pa pone e kosnan pagano ei un banda? Apsolutamente ku nò! . . . Pa nos, esei tabata meskos ku kita un paña sushi benta’fó.” Un otro ruman ku a reflehá un aktitut similar tabata Ruman Henry A. Cantwell, kende despues a sirbi komo superintendente biahero. El a konta: “Nos tabata kontentu ku nos por a stòp di hasi algu pa asina demostrá nos amor pa Yehova.” Pues, e siguidónan leal di Kristu tabata dispuesto pa hasi e kambionan nesesario i stòp di partisipá den un selebrashon ku a originá di adorashon impuru. d—Huan 15:19; 17:14.

11. Kon nos por demostrá ku nos ta apoyá e Rei Mesiániko?

¹¹ Ki un bon ehèmpel e Studiantenan di Beibel fiel ei a pone pa nos! Ora nos ta meditá riba nan ehèmpel, ta bon pa nos puntra nos mes: ‘Kon ami ta mira e guia ku nos ta haña for di e esklabo fiel? Mi ta asept’é ku gratitut i ta pone na práktika loke mi ta siña?’ Si nos ta kla pa obedesé, nos ta demostrá ku nos ta apoyá e Rei Mesiániko, kende ta usando e esklabo fiel pa duna nos kuminda spiritual na e debido tempu.—Echo. 16:4, 5.

12. Pa hopi aña, kon e Studiantenan di Beibel a konsiderá krus?

¹² Pa hopi aña, e Studiantenan di Beibel a konsiderá krus un símbolo aseptabel pa representá kristianismo. Pero un kos sí, nan no a kere ku mester a adorá krus, ya ku nan a komprondé ku Beibel ta kondená idolatria. (1 Kor. 10:14; 1 Huan 5:21) For  di 1883 kaba E Toren di Vigilansia a deklará frankamente ku “tur idolatria ta abominabel pa Dios.” Pero tòg na prinsipio e Studiantenan di Beibel no a mira nada malu den loke nan a pensa tabata uso apropiá di krus. Por ehèmpel, ku orguyo nan tabata bisti un borstspeld ku e emblema di un krus i korona pa identifiká nan mes. Segun nan, esei a nifiká ku si nan keda fiel te na morto, nan lo risibí e korona di bida. Kuminsando na 1891, E Toren di Vigilansia tabatin e símbolo di un krus i korona riba su portada.

13. Ki klarifikashon e siguidónan di Kristu a haña tokante uso di krus? (Wak tambe e kuadro “ Klarifikashon Progresivo Tokante Uso di Krus.”)

¹³ E Studiantenan di Beibel tabata stima e emblema di un krus i korona. Pero na final di dékada di 1920, e siguidónan di Kristu progresivamente a kuminsá haña klarifikashon tokante uso di krus. Reflekshonando riba e asamblea di 1928 ku tabatin na Detroit, Michigan, Ruman Grant Suiter, kende despues a sirbi den e Kuerpo Gobernante, a bisa: “Na e asamblea ei a bini dilanti ku e emblema di un krus i korona no solamente tabata innesesario sino asta kuestionabel.” Den transkurso di e añanan ku a sigui a bini mas klarifikashon. Tabata bisto ku krus no a pas den adorashon ku ta puru i spiritualmente limpi.

14. Kon e pueblo di Dios a reakshoná riba e klarifikashon progresivo ku nan a haña tokante krus?

¹⁴ Kon e pueblo di Dios a reakshoná riba e klarifikashon progresivo ku nan a haña tokante krus? Akaso nan a sigui usa nan emblema tan stimá di un krus i korona? Nò. Lela Roberts, un sirbidó di Yehova di hopi tempu, a bisa: “Unabes nos a realisá kiko el a representá, nos a legumai e mesora.” Ursula Serenco, un otro ruman muhé fiel, a ekspresá e sintimentu di hopi ruman, bisando: “Nos a bin realisá ku loke un tempu nos tabata balorá komo símbolo di e morto di nos Señor i di nos deboshon kristian tabata en realidat un símbolo pagano. Na armonia ku Proverbionan 4:18, nos a keda masha gradisidu ku e lus riba e kaminda a bira hopi mas kla.” Pues, e siguidónan leal di Kristu no ke tabatin nada di hasi ku e práktikanan impuru di religion falsu!

15, 16. Kon nos por demostrá ku nos ta determiná pa tene e patio terenal di Yehova su tèmpel spiritual limpi?

¹⁵ Nos awe tin e mesun determinashon. Nos sa ku Kristu a bin ta usa un kanal di komunikashon ku ta fásil pa rekonosé—su esklabo fiel i prudente—pa yuda su pueblo keda spiritualmente limpi. P’esei, ora e kuminda spiritual ku nos ta haña ta spièrta nos pa un selebrashon, práktika òf kustumber ku ta kontaminá pa religion falsu, nos ta hasi kaso mesora. Meskos ku nos rumannan ku a biba na kuminsamentu di e presensia di Kristu, nos tambe ta determiná pa tene e pationan terenal di Yehova su tèmpel spiritual limpi.

¹⁶ Durante henter e periodo di e último dianan, Kristu a traha tambe tras di kortina pa protehá e kongregashonnan di e pueblo di Yehova kontra personanan ku lo por a kousa kontaminashon spiritual. Kon el a hasi esei? Laga nos wak.

17, 18. Den e ilustrashon di e reda, kiko ta nifiká (a) ku a baha e reda na laman, (b) ku a “kue tur sorto di piská,” (c) ku a hinka e piskánan bon den makutu i (d) ku a tira e piskánan ku no ta sirbi afó?

¹⁷ Rei Hesukristu ta masha pendiente di e kongregashonnan di e pueblo di Dios rònt mundu. Na maneranan ku nos no por komprondé kompletamente, e ku e angelnan ta hasiendo un trabou di separashon. Hesus a deskribí e trabou akí den su ilustrashon di e reda. (Lesa Mateo 13:47-50.) Kiko e ilustrashon ei ta nifiká?

¹⁸ “Un reda ku nan a baha na laman.” E reda ta representá e trabou di prediká e Reino ku ta tumando lugá den henter e “laman” di humanidat. “Kue tur sorto di piská.” E bon notisia ta atraé tur tipo di hende: esnan ku ta dal paso pa bira kristian berdadero, i tambe hopi otro hende ku kisas na promé instante ta mustra interes pero ku en realidat no ta tuma un posishon firme na fabor di adorashon puru. e “Saka esnan bon hinka den makutu.” Personanan dispuesto pa siña e bèrdat ta ser hinká den makutu, esta, den kongregashon, kaminda nan por rindi adorashon puru na Yehova. Ta tira piská ‘ku no ta sirbi’ afó. Durante di e último dianan, Kristu i e angelnan a separá “e malbadonan for di e hustunan.” f Pues, Kristu no a permití personanan ku no tin un kurason sinsero—kendenan kisas no ta dispuesto pa legumai nan kreensia- i práktikanan robes—kontaminá e kongregashonnan. g

19. Kiko bo ta pensa di loke Kristu a bin ta hasi pa protehá e puresa di e pueblo di Dios i e puresa di adorashon berdadero?

¹⁹ Nos ta sinti nos bon sabiendo ku nos Rei, Hesukristu, ta protehá esnan ku ta bou di su kuido, no ta bèrdat? Ademas, ta un konsuelo pa sa ku awe e ta purifiká i protehá adorashon berdadero—i adoradónan berdadero—ku e mesun fervor ku el a limpia e tèmpel den e promé siglo. Nos ta masha gradisidu ku Kristu ta trahando duru pa protehá e puresa spiritual di e pueblo di Dios i e puresa di adorashon berdadero. P’esei nos ta evitá tur kontakto ku religion falsu pa asina demostrá ku nos ta apoyá e Rei i su Reino.