TIN hende ta bisa ku ta den kos ku nan por mira so nan ta kere. Pero esei ta kos di bobo. Tin yen di kos ku ta eksistí, pero ku nunka nos no a mira ku nos wowo. Bo por bisa mi un di nan?—

Kiko di e rosea ku nos ta hala? Nos por sintié?— Tene bo man dilanti bo boka, anto supla riba dje. Bo ta sinti algu?— Sí. Pero bo no por mira e airu, tòg?—

Nos a papia kaba tokante spiritu. Nan tampoko nos no por mira. Nos a siña ku un par di nan ta bon, i un par di nan ta malu. Menshoná un par di bon persona spiritual ku nos no por mira.— Sí, Yehova Dios ta un di nan, i tin Hesus i e bon angelnan tambe. Tin mal angel tambe?— Beibel ta bisa ku sí. Konta mi kiko bo a siña tokante nan.—

Un kos ku nos sa ta ku tur bon angel i mal angel tin mas forsa ku nos. E Gran Maestro tabata sa hopi kos tokante angel. E tabata sa tur e kosnan ei pasobra e mes tabata un angel promé ku el a nase komo beibi na tera. E tabata biba huntu ku otro angelnan den shelu. E tabata konosé miónes di angel. Tur angel tin nòmber?—

Wèl, manera nos a siña, Dios a duna tur strea nòmber. P’esei nos por tin sigur ku tur angel tambe tin nòmber. I nos sa ku nan ta papia ku otro, pasobra Beibel ta bisa ku tin un ‘idioma di angel.’ (1 Korintionan 13:1) Di kiko bo ta kere angel ta papia ku otro? Bo ta kere ku nan ta papia tokante nos ku ta aki riba tera?—

 Nos sa ku demoño, e angelnan di Satanas, ta purba pone nos desobedesé Yehova. Awèl, nan mester ta papia ku otro tokante kon pa hasié. Nan ke pa nos ta manera nan, ya e ora ei Yehova no ta gusta nos tampoko. Pero, kiko di Dios su angelnan fiel? Bo ta kere ku nan tambe ta papia tokante nos?— Sí, asina mes. Nan ke yuda nos. Laga mi konta bo kon algun angel di Dios a yuda hende ku a stima Yehova i a sirbié.

Por ehèmpel tabatin un hòmber ku yama Daniel. E tabata biba na Babilonia. Hopi hende n’e lugá ei no a stima Yehova. Nan a asta traha un lei ku ta bisa ku mester kastigá ken ku resa na Yehova Dios. Pero Daniel no kier a stòp di resa na Yehova. Bo sa kiko nan a hasi ku Daniel?—

Sí, mal hende a laga tira Daniel den kueba di leon. Daniel tabata su so ei den ku un par di leon yen di hamber. Bo sa kiko a  sosodé e ora ei?— Daniel a bisa ku “Dios a manda su angel i a sera boka di e leonnan.” Nada-nada no a pas’é! Angel por hasi kos maravioso pa hende ku ta sirbi Yehova.—Daniel 6:18-22.

Tambe nos por kòrda un biaha ku Pedro tabata den prizon. Manera bo por ta kòrda, Pedro tabata amigu di e Gran Maestro Hesukristu. Algun hende no a gusta ora Pedro a bisa nan ku Hesus ta e Yu di Dios. P’esei, nan a sera Pedro den prizon. Tabatin sòldá ta wak Pedro, pa sòru pa e no hui. Ta ken por a yuda Pedro?—

Pedro tabata drumí meimei di dos sòldá, ku su mannan na kadena. Pero wak kiko Beibel ta bisa: ‘Mira, un angel di Yehova a bini, i un lus a kuminsá bria den e sèl di prizon. E angel a  mishi ku Pedro na su kustia pa lant’é for di soño, anto a bis’é: “Lanta lihé!”’

Mesora e kadenanan a kita kai for di Pedro su man! Anto e angel a bis’é: ‘Bisti bo paña, bisti bo sandalia i sigui mi.’ E sòldánan no por a stòp nan, pasobra e angel tabata yuda Pedro. Anto ora nan a yega n’e porta di heru, un kos straño a sosodé. E porta a habri su so! E angel a saka Pedro for di prizon pa e por a sigui prediká.—Echonan 12:3-11.

Angel di Dios por yuda nos tambe?— Sí, nan por. Pero kiko esei kier men? Ku nunka nan no ta laga nada-nada malu pasa nos?— Nò, angel no ta skapa nos ora nos hasi kos di bobo. Pero asta ora nos no hasi kos di bobo, tòg kos malu por pasa nos. E angelnan no a haña òrdu pa skapa nos for di e kosnan ei. Na lugá di esei, Dios a duna nan un trabou spesial pa nan hasi.

Beibel ta konta nos di un angel ku ta bisa hende di tur parti di mundu pa nan adorá Dios. (Revelashon 14:6, 7) Kon e angel ta hasi e kos ei? Ta for di shelu e ta grita pa tur hende tende?— Nò, ta e siguidónan di Hesus riba tera ta papia ku hende tokante Dios, anto e angelnan ta guia nan den nan trabou. E angelnan ta sòru pa hende ku di bèrdat ke sa tokante Dios por haña chèns di tende loke e siguidónan di Hesus ta papia. Nos tambe por hasi e trabou di prediká ei, i e angelnan lo yuda nos.

Pero kiko ta pasa si hende ku no ta stima Dios kuminsá kousa nos problema? Kiko ta pasa si nan sera nos den prizon? E angelnan lo saka nos?— Nan por. Pero no ta semper nan ta hasié.

Un biaha Pablo, un siguidó di Hesus, tabata prezu. E tabata biahando riba laman den un barku durante un mal tempu pisá. Pero e angelnan no a lag’é sali liber mesora, pasobra tabatin mas hende ku mester a tende tokante Dios. Un angel a bisa: “No tene miedu,  Pablo; bo mester para dilanti di Cesar.” Sí, nan mester a hiba Pablo dilanti Cesar, un gobernante di mundu, pa Pablo por a prediká na dje. Tur ora e angelnan tabata sa unda Pablo ta, i nan tabata yud’é. I nan lo yuda nos tambe si nos ta sirbi Dios di bèrdat.—Echonan 27:23-25.

Tin un otro trabou importante ku e angelnan ta bai hasi, i nan ta bai hasié aki poko tempu. E tempu pa Dios kaba ku mal hende ta hopi serka. Tur hende ku no ta adorá e Dios berdadero lo ser destruí. Hende ku ta bisa ku nan no ta kere den angel pasobra nan no por mira nan, ta bai mira ku nan ta masha kibuká.—2 Tesalonisensenan 1:6-8.

Kiko lo para di nos e ora ei?— Si nos ta n’e mesun banda ku e angelnan di Dios, nan lo yuda nos. Pero nos ta na nan banda?— Nos ta na nan banda si nos ta sirbi Yehova. I si nos ta sirbi Yehova, nos ta bisa otro hende pa nan tambe sirbié.