DIOS a pone Adam ku Eva den hòfi di Edén. Maske nan a desobedesé Dios i muri, Dios a sòru pa nan yunan sí por biba pa semper den Paradeis, i nos tambe. Beibel ta primintí ku “e hustunan lo heredá e tera, i lo biba den dje pa semper.”—Salmo 37:29.

Beibel ta papia di “shelunan nobo” i “un tera nobo.” (Isaias 65:17; 2 Pedro 3:13) E “shelunan” ku tin awor ta e gobièrnunan di hende ku tin awendia. Pero Hesukristu i e otronan ku ta bai reina kuné den shelu lo bira un ‘shelu nobo,’ esta, un gobièrnu nobo i hustu di Dios ku lo trese pas. E gobièrnu aki ta bai goberná henter mundu. Esta dushi lo ta ora e dia ei yega, no!

Anto, kiko e “tera nobo” ta?— E tera nobo lo ta e bon hendenan ku ta stima Yehova, pasobra tin biaha ora Beibel ta papia di “tera,” e kier men e hendenan ku ta biba riba tera, i no e tera mes. (Génesis 11:1; Salmo 66:4; 96:1) Pues, e hendenan ku ta forma e tera nobo ta bai biba aki riba mundu mes.

E tempu ei, e mundu di mal hende ku tin awor akí lo no t’ei mas. Kòrda ku e Diluvio di tempu di Noe a kaba ku henter un mundu di mal hende. I manera nos a siña kaba, Armagedón lo destruí e mundu malu ku tin awor akí tambe. Awor, laga nos ban wak kon bida lo ta den Dios su mundu nobo despues di Armagedón.

 Abo ke biba pa semper den Paradeis den e mundu nobo pasífiko di Dios?— Niun dòkter no por hasi nos biba pa semper. No ta eksistí niun remedi ku por pone nos biba sin muri nunka. Ta un manera so tin pa nos biba pa semper: nos mester hala serka Dios. I e Gran Maestro ta siña nos kon pa hasi esaki.

Laga nos kohe nos Beibel anto habrié na Juan kapítulo 17, versíkulo 3. Aki nos por lesa e siguiente palabranan di e Gran Maestro: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.”

Kier men, kiko Hesus a bisa ku nos mester hasi pa nos biba pa semper?— Promé nos mester siña konosé nos Tata den shelu Yehova, i tambe su Yu ku a duna su bida pa nos. Esei kier men ku nos mester studia Beibel. E buki aki, Siña for di e Gran Maestro, ta yudando nos hasi esei.

Pero dikon nos tin ku siña tokante Yehova pa nos por biba pa semper?— Wèl, meskos ku nos tin mester di kuminda tur dia, nos mester siña tokante Yehova tur dia tambe. Beibel ta bisa: “Hende lo no biba di pan so, ma di tur palabra ku sali for di boka di Dios.”—Mateo 4:4.

Nos mester siña konosé Hesukristu e Yu di Dios tambe, pasobra Dios a mand’é pa kita nos pika. Beibel ta bisa: “No tin salbashon den ningun otro.” I tambe Beibel ta bisa: “Esun ku kere den e Yu tin bida eterno.” (Echonan 4:12; Juan 3:36) Ma nos ta kere di bèrdat-bèrdat den Hesus? Nos tin sigur ku sin dje nos no por biba pa semper?— Si nos ta kere den dje di bèrdat, nos lo sigui siña for di e Gran Maestro tur dia, i nos lo hasi loke e ta bisa tambe.

Un bon manera pa nos siña for di e Gran Maestro ta dor di lesa e buki aki di nobo kada bes, wak tur e plachinan i pensa  riba nan. Wak si bo por kontestá e preguntanan ku tin n’e plachinan. I lesa e buki ku bo mama òf bo tata. Si bo mama ku bo tata no por, les’é ku otro hende grandi i ku otro mucha. Lo no ta hopi dushi si bo por yuda otro hende siña for di e Gran Maestro pa nan haña sa loke nan mester hasi pa nan por biba pa semper den e mundu nobo di Dios?—

Beibel ta bisa nos: “E mundu ta pasa bai.” Ma despues di esei Beibel ta splika nos kiko nos mester hasi pa nos biba pa semper den e mundu nobo di Dios. E ta bisa: ‘Esun ku hasi e boluntat di Dios ta keda pa semper.’ (1 Juan 2:17) Awèl, ta kiko nos mester hasi pa nos biba pa semper den e mundu nobo di Dios?— Sí, nos mester siña tokante Yehova i su Yu stimá Hesus. Pero esei no ta tur kos. Nos tin ku hasi e kosnan ku nos siña tambe. Nos ta spera ku ora bo studia e buki aki, esei lo yuda bo hasi tur e kosnan ei.