KIKO ta nifiká broma? Abo sa?— Wak un ehèmpel aki. Bo a yega di purba hasi un kos ku bo no por hasi muchu bon? Bo a yega di purba skòp un bala di futbòl, òf bula kabuya, anto un hende a bisa bo: “Ata! Ami por hasié mihó ku bo”?— Wèl, e ora ei, esun ku a bisa bo e kos ei tabata broma.

Kon bo ta sinti bo ora un otro hende hasi e kos ei? Bo gusta?— Anto kon bo ta kere ku otro hende lo sinti si abo broma tokante bo mes?— Ta bondadoso pa bisa un hende: “Mi ta mihó ku bo”?— Yehova gusta hende ku ta hasi asina?—

E Gran Maestro tabata sa di un par di hende ku ta kere ku nan ta mihó ku otro. Nan tabata broma òf gaba tokante nan mes, i sinti ku tur otro hende ta ménos ku nan. P’esei, un dia Hesus a konta nan un kuenta pa mustra nan kon malu ta pa broma tokante bo mes. Laga nos skuch’é.

E kuenta ta tokante un fariseo i un kobradó di belasting. Fariseonan tabata maestronan religioso, i hopi bes nan tabata hasi manera kos ku nan ta mas bon den bista di Dios òf mas santu ku otro hende. E fariseo den e kuenta di Hesus a subi bai Dios su tèmpel na Yerusalèm pa resa.

Hesus a bisa ku un kobradó di belasting tambe a subi bai n’e tèmpel pa resa. Mayoria hende no tabata gusta kobradó di belasting. Segun nan, kobradónan di belasting tabata purba hòrta nan. I ta bèrdat ku hopi kobradó di belasting no tabata onesto tur ora.

Den tèmpel, e fariseo a kuminsá resa na Dios asin’aki: ‘Ai Dios,  danki ku mi no ta un pekadó manera otro hende. Mi no ta hòrta hende ni hasi otro kos malu. Mi no ta manera e kobradó di belasting eibanda. Mi ta un hòmber hustu. Mi ta keda sin kome dos biaha pa siman pa mi tin mas tempu pa pensa riba bo. I mi ta duna e tèmpel dies porshento di tur e kosnan ku mi haña.’ E fariseo tabata hopi sigur ku e ta mihó ku otro hende, no?— I el a asta bisa Dios e kos ei.

Pero e kobradó di belasting sí no tabata asina. E no a ni hisa su kara na shelu pa resa. El a keda para un poko leu ku su kabes abou. E kobradó di belasting tabatin hopi duele di e pikánan ku el a hasi. E tabata asta bati su pechu di duele. E no a purba bisa Dios kon bon e ta. Nò, el a resa: ‘Ai Dios, tene miserikòrdia di mi, un pekadó.’

Kua di e dos hòmbernan aki bo ta kere ku Dios a keda kontentu kuné? E fariseo ku a kere ku e ta asina bon, òf e kobradó di belasting ku tabatin duele di su pikánan?—

Hesus a bisa ku ta ku e kobradó di belasting Dios a keda kontentu. Bo sa dikon? Hesus a splika: ‘Pasobra ken ku purba hasi manera kos ku e ta mihó ku otro hende lo ser rebahá. Pero esun ku humiá su mes lo ser halsá.’—Lukas 18:9-14.

Ki lès Hesus a siña nos ku e kuenta aki?— El a  siña nos ku ta malu pa pensa ku nos ta mihó ku otro hende. Kisas nos no ta bisa ku nos ta mihó ku otro. Pero tòg nos lo por mustra ku nos ta kere asina, dor di kos ku nos ta hasi. Abo a yega di komportá bo mes asina?— Wak kiko a yega di pasa ku apòstel Pedro.

Ora Hesus a bisa su apòstelnan ku nan tur lo bandon’é ora hende bin koh’é prezu, Pedro a broma: ‘Ni maske tur otro hende bai laga bo, ami sí no ta bai laga bo nunka!’ Pero Pedro tabata robes. E tabata muchu sigur di su mes. El a bai laga Hesus tòg. Pero na Kapítulo 30 di e buki aki nos ta bai haña sa ku tòg despues el a bolbe.—Mateo 26:31-33.

Laga nos tuma un ehèmpel di nos tempu. Laga nos bisa ku nan ta hasi abo i un otro mucha den bo klas un par di pregunta na skol. Kiko lo bo hasi si abo por duna tur e kontestanan mesora, pero e otro mucha sí no por? Klaru ku bo ta sinti bo bon pasobra bo sa e kontestanan. Pero ta bondadoso pa bo bai kompará bo mes ku esun ku ta tarda mas pa kontestá?— Ta korekto pa bo mustra kon bon bo ta, dor di laga un otro hende keda laf?—

Ta esei e fariseo a hasi. El a broma ku e ta mihó ku e kobradó di belasting. Pero e Gran Maestro a bisa ku e fariseo ta robes. Ta bèrdat ku tin bes un hende por hasi un kos mihó ku otro hende. Pero esei no ta nifiká ku di bèrdat e ta un mihó hende.

Awèl, bo ta kere ku nos tin bon motibu pa broma si nos sa mas kos ku un otro hende?— Pensa un ratu. Ta nos mes a traha nos selebro?— Nò, ta Dios a duna kada un di nos un selebro. I kasi tur kos ku nos sa, ta di otro hende nos a siña nan. Tin kos ku nos a lesa den buki, i tin kos ku ta hende a konta nos. I asta si ta nos mes a komprondé un kos, ta kon nos por a komprond’é?— Sí, dor di usa e selebro ku Dios a duna nos.

 Ora un hende hasi su bèst, ta lif di bo parti pa bis’é algu ku ta pon’é sinti su mes bon. Bis’é ku bo a gusta e kos ku el a hasi. Por ta bo por asta yud’é hasié mihó. Abo lo gusta si otro hende hasi asina ku bo, tòg?—

No ta tur hende tin mes tantu forsa. Awor, si bo tin mas forsa ku bo ruman hòmber òf bo ruman muhé, bo ta kere ku esei ta un motibu pa bo broma?— Nò. Ta e kuminda ku nos ta kome ta yuda nos haña forsa. I ta Dios ta duna e lus di solo, e áwaseru i tur otro kos ku tin mester pa mata krese, pa nos haña kos di kome. Òf nò?— Awèl ta Dios nos mester yama danki si nos tin forsa.—Echonan 14:16, 17.

Nos niun no gusta tende hende broma tokante nan mes, no ta bèrdat?— Laga nos keda kòrda loke Hesus a bisa: ‘Meskos ku bo ke pa hende hasi ku bo, asina bo mester hasi ku nan.’ Si nos hasi asina, nunka nos lo no bira manera e fariseo ku a broma tokante su mes den e kuenta ku e Gran Maestro a konta.—Lukas 6:31.

 Un dia un hende a yama Hesus “bon.” Kiko e Gran Maestro a kontestá? Bo ta kere ku el a bisa: ‘Sí, mi ta bon bèrdat’?— Nò, e no a bisa asina. Loke el a bisa ta: “Niun hende no ta bon sino Dios so.” (Marko 10:18) Maske e Gran Maestro tabata perfekto, e no a broma tokante su mes. Na lugá di esei el a laga tur alabansa bai pa su Tata Yehova.

Tin un hende antó ku sí nos por broma tokante dje?— Sí, nos por broma tokante Yehova Dios, nos Kreadó. Ora nos mira un bahada di solo bunita, òf ora nos mira un otro kreashon maravioso, nos por bisa un hende: ‘Ta nos gran Dios Yehova a traha e kos ei!’ Laga nos ta kla tur ora pa papia tokante e kosnan grandi ku Yehova a hasi, i esnan ku e ta bai hasi den futuro.