Satanas i e demoñonan semper tabata cruel i peligroso. Den tempu di antigua Satanas a mata e tou di bestia i sirbidornan di fiel Job. Despues, el a mata Job su dies yunan dor di laga “un bientu fuerte” destruí e cas cu nan tabata aden. Despues di esei Satanas a dal Job cu “un mal yaga for di su plant’i pia te n’e corona di su cabes.”—Job 1:7-19; 2:7.

Den tempu di Jesus, e demoñonan a haci algun hende muda i ciegu. (Mateo 9:32, 33; 12:22) Nan a tormentá un homber i a pon’é corta su mes cu piedra. (Marco 5:5) Tambe nan a pone un mucha homber grita, a dal’e abou na suela i a lagu’é cai “djimpi violentamente.”—Lucas 9:42.

Awe, Satanas i su demoñonan ta mas cruel cu nunca. En realidad, nan actividad malbado a  aumentá desde cu nan a ser sacá for di cielu. Informenan rond mundu ta duna prueba di nan crueldad. Nan ta plaga algun hende cu malesa. Otronan nan ta tormentá den anochi, strobando nan di drumi of dunando nan soñonan teribel. Otronan nan ta abusá sexualmente di nan. Ainda tin otronan cu nan ta conducí na locura, asesinato of suicidio.[2]

Lintina, kende ta biba na Surnam, ta conta cu un demoño, of mal spiritu, a mata 16 miembro di su famia i a torment’é físicamente i mentalmente pa 18 aña. For di experencia personal Lintina ta bisa cu e demoñonan “ta disfrutá di torturá nan víctimanan inboluntario te na morto.”[3]

Pero Jehova ta capas di protegá su sirbidornan for di Satanas su atakenan.—Proverbio 18:10.