E Bijbel ta bisa cu Satanas ta “gañando henter e tera habitá.” (Revelacion 12:9) Satanas i su demoñonan no kier pa nos kere Dios su Palabra, e Bijbel. Nan ta trata di laga hende kere cu e mortonan ta bibu un caminda den e region spiritual. Laga nos mira con nan ta haci esei.

Hopi religion ta siña cu tur hende tin un alma cu ta pasa p’e region spiritual despues di morto dje curpa físico. Nan ta bisa cu e curpa ta muri pero cu e alma no ta muri. Ademas, nan ta pretendé cu e alma no por muri, cu e ta inmortal.

Pero Dios su Palabra no ta siña esei. E Bijbel ta mustra cu e alma ta e persona, no algu den un persona. Por ehempel, describiendo e creacion di Adam, e Bijbel ta declará: “I Jehova Dios a pasa na forma e homber for di stof di tera i supla den su nanishi e rosea di bida i e homber a bira un alma bibiente.” (Génesis 2:7) Pues Adam no a haña un alma; e tabata un alma.

 Bestia tambe ta wordu yamá alma.—Génesis 1:20, 21, 24, 30.

Siendo cu e palabra bíblico “alma” kier men e persona mes, no mester sorprendé nos pa sa cu alma por i ta muri. E Scritura ta bisa:

• “E alma cu ta pecando—e mes lo muri.”—Ezekiel 18:4.

• “I Samson a pasa na bisa: ‘Laga mi alma muri cu e filisteonan.’”—Huez 16:30.

• “Ta legal pa riba sabat haci un bon obra of haci un mal obra, pa salba of pa mata un alma?”—Marco 3:4.

Otro textonan ta mustra cu alma por ser destruí (Génesis 17:14), matá dor di spada (Hosué 10:37), sofocá (Job 7:15) i hogá (Jonás 2:5). Pues, e alma ta muri.

Si bo lesa e Bijbel di kaft pa kaft, nunca lo bo haña e frase “alma inmortal.” E alma humano no ta un spiritu. E siñansa dje alma inmortal no ta un siñansa bíblico. E ta un siñansa di Satanas i su demoñonan. Jehova ta odia tur mentira religioso.—Proverbio 6:16-19; 1 Timoteo 4:1, 2.

Un otro manera cu Satanas ta gaña hende ta dor di mediumnan. Un medium ta un persona cu por ricibí mensahenan directamente for dje mundu di spiritu. Masha hopi hende, incluyendo e mediumnan mes, ta kere cu e mensahenan aki ta bin di spiritu dje mortonan. Pero manera nos a mira for dje Bijbel, esaki ta imposibel.—Eclesiastés 9:5, 6, 10.

Di ken, anto, e mensahenan aki ta bin? Dje demoñonan mes! E demoñonan ta capas pa observá un persona ora e ta na bida; nan sa con e persona a papia, con su aparencia tabata, kico el a haci i kico e tabata sa. P’esei ta fácil pa nan imitá hende cu a muri.—1 Samuel 28:3-19.

Un otro manera cu Satanas ta promové e mentira tocante e mortonan ta dor di historianan falsu. Tal historia hopi bes ta apartá hende dje berdad bíblico.—2 Timoteo 4:4.

Na Africa tin hopi cuenta tocante hende cu tabata mirá bibu despues cu nan a muri. Típicamente, tal miramentu a sosodé leu for di caminda e persona tabata biba. Pero puntra bo mes: ‘Ta parce rasonabel cu si un persona tabatin e poder di bin bek for di morto, cu lo el a bolbe na un lugar leu for di su famia i amigunan?’

Tambe, no por tabata cu e persona mirá simplemente ta parecido na e persona cu a muri? Por ehempel, dos minister cristian cu tabata predicando den un teritorio di cunucu a ripará un homber bieu cu tabata sigui nan pa algun ora. Ora nan a interogu’é, nan a haña sa cu e homber a pensa cu un dje ministernan tabata su ruman homber cu a muri algun aña promé. Naturalmente, e tabata ekibocá, pero el a nenga di kere cu e tabata robes. Imaginá e historia cu e homber bieu lo a conta despues na su amigu i bisiñanan![4]

Sin duda bo sa di cosnan straño cu hende a yega di mira, tende of soña. Tal experencianan sobrenatural hopi bes ta spanta esnan cu tin nan. Marein, kende tabata biba na West Africa, regularmente tabata tende e bos di su wela defuntu yam’é anochi. Spantá, Marein tabata grita, lantando henter su famia for di soño. Cu tempu, el a bira loco.[5]

Awor, si e mortonan realmente tabata na bida, ta rasonabel cu nan lo a spanta nan sernan stimá? Naturalmente cu no. E fuente di tal mensahenan dañoso ta e demoñonan.

Pero ki tal di mensahenan cu ta parce di ta probechoso i consolador? Por ehempel, Gbasai, di Siera Leona, tabata malu. E tabatin un soño den cua su tata defuntu a aparecé na dje. El a instruí Gbasai pa bai na un cierto palu, tuma un bladji, mescl’é cu awa i beb’é. E no mester a papia cu ni’un hende promé cu e haci esei. El a haci esaki i a bira bon.[6]

Un otro muher a bisa cu su esposo a aparecé na dje un anochi despues cu el a muri. E muher a bisa cu e tabata masha nechi i tabatin paña bunita bistí.[7]

 Tal mensahe i visionnan ta parce bon i probechoso. Nan ta bin di Dios? No, nan no ta di dje. Jehova ta “e Dios di berdad.” (Salmo 31:5) Nunca lo e bai di acuerdo pa traha un trampa of gaña nos. Solamente e demoñonan ta haci esei.

Pero tin demoñonan cu ta bon? No. Aunke tin bes nan por parce di ta útil, nan tur ta malu. Ora e Diabel a papia cu Eva, el a parce amigabel. (Génesis 3:1) Pero kico a para di Eva ora el a scuch’é i a haci loke el a bisa? Eva a muri.

Bo sa cu no ta straño pa un mal hende ser amigabel cu esnan cu e kier gaña i coge den trampa. E proverbio africano ta bisa, “Djente blancu, curason pretu.” I Dios su Palabra ta bisa: “Satanas mes ta sigui transformá su mes den un angel di lus.”—2 Corintio 11:14.

Dios no ta drenta den contacto cu hende riba tera mas mediante soño, vision, of bosnan for dje mundu di spiritu. E ta guia i ta instruí nan mediante e Bijbel, locual por haci un persona “completamente ekipá pa tur bon obra.”—2 Timoteo 3:17.

Pues, ora Jehova ta spierta nos contra e trikinan dje Diabel, e ta haci esei pasobra e ta stima nos. E sa cu e demoñonan ta enemigunan peligroso.