Tantu e Páginanan di Resúmen di e buki Siña Nos komo e buki Beibel Ta Siña ta presentá e mesun bèrdatnan, den e mesun sekuensia. E lèsnan di e Páginanan di Resúmen ta korespondé ku e kapítulonan di e buki Beibel Ta Siña. Sinembargo, e Páginanan di Resúmen ta usa palabranan mas simpel i fásil pa komprondé. A prepará nan pa yuda hende ku tin difikultat pa komprondé e buki Beibel Ta Siña. Meskos ku e buki Beibel Ta Siña, nos por ofresé e Páginanan di Resúmen tur ora, asta ora e no ta e oferta di luna. Kon nos por usa e Páginanan di Resúmen ora di dirigí un estudio di Beibel?

Pa mayoria di hende, e método di lesa paragraf i hasi pregunta usando e buki Beibel Ta Siña ta sufisiente pa nan siña bèrdatnan básiko. Pero, suponé ku un studiante tin difikultat pa komprondé loke e ta lesa òf no sa lesa masha bon. Den un kaso asina, bo por skohe pa usa e Páginanan di Resúmen pa dirigí e estudio. Ademas, bo por animá e studiante pa lesa e informashon di e kapítulo korespondiente den e buki Beibel Ta Siña riba su mes. Bo por siña un persona un bèrdat bíbliko den un seshon di estudio ku ta dura mas o ménos 15 minüt. Komo ku e Páginanan di Resúmen no ta kontené tur informashon ku tin den e kapítulonan di e buki Beibel Ta Siña, esun ku ta dirigí e estudio mester hasi bon preparashon teniendo kuenta ku nesesidat di e studiante. Ademas, si bo ta usa e buki Beibel Ta Siña pa dirigí un estudio di Beibel, bo por usa e Páginanan di Resúmen pa repasá e kapítulo.