Ora nos mira e mundu awe, ta bisto ku Yehova tin hopi pasenshi; pero pronto su pasenshi lo kaba. Religion falsu lo ser destruí, un koalishon (òf grupo) di nashon lo ataká Dios su pueblo i Yehova lo destruí e malbadonan na Armagedon. Tur kristian awe ta anhelá pa e susesonan ei tuma lugá.

Klaru, nos no sa tur detaye tokante tribulashon grandi. Nos no sa ki motibu e polítikonan lo duna pa ataká religion. Nos no sa pa kuantu tempu e nashonnan lo ataká Dios su pueblo ni kiko e atake ei lo enserá. Nos no sa eksaktamente kiko Yehova lo usa pa destruí hende malbado na Armagedon.

Sinembargo, Beibel ta duna nos tur informashon ku nos mester pa enfrentá futuro ku konfiansa i kurashi. Por ehèmpel, nos sa ku nos ta bibando na final di “e último dianan.” (2Ti 3:1) Nos sa ku Dios lo hasi e dianan di e atake riba religion “kòrtiku” pa asina e religion berdadero no ser destruí. (Mat 24:22) Nos sa ku Yehova lo salba su pueblo. (2Pe 2:9) I nos sa ku Esun ku Yehova a skohe pa destruí hende malbado i salba e multitut grandi na Armagedon ta hustu i poderoso.—Rev 19:11, 15, 16.

E susesonan ku lo tuma lugá den futuro, sin duda, lo pone hende “desmayá di miedu.” Sinembargo, ora nos lesa i meditá riba kon Yehova a salba su pueblo den pasado i riba kiko el a bisa tokante futuro, nos por “para stret i lanta [nos] kabes,” pasobra nos tin konfiansa ku nos liberashon ta serka.​—Luk 21:26, 28.