Durante e luna di sèptèmber, nos lo hasi esfuerso pa ofresé un estudio di Beibel na tur hende ku nos papia kuné, usando e foyeto Bo Por Disfrutá di Bida pa Semper! Si bo ke traha pionero ousiliar, bo por skohe pa traha 30 ora. Kiko nos lo hasi durante e kampaña spesial akí?

• Na e Promé Kòmbersashon: Usa e parti patras di e foyeto pa lanta interes di e persona i purba di mustr’é kon un estudio di Beibel ta bai. Kòrda riba e hendenan ku a yega di mustra interes, inkluso bo rebishitanan. Asta si nan no a aseptá un estudio di Beibel den pasado, kisas nan lo ta interesá den e foyeto i método di studia nobo akí. Nos no mester laga e foyeto ora nos no haña hende na kas, ni nos no mester manda e foyeto den karta pa hende ku no a mustra interes ainda. Komité di Sirbishi di Kongregashon por organisá mas salida pa sirbishi durante e luna ei.

• Mas Oportunidat: Si bo kongregashon ta usa stènt di literatura, bo por pone e foyeto Bo Por Disfrutá di Bida pa Semper! den dje. Ora un persona mustra interes, bis’é ku e foyeto ta bini ku un kurso di Beibel grátis. Durante e promé kòmbersashon ei mes, bo por mustr’é brevemente kon un estudio di Beibel ta bai, òf bo por traha afsprak pa mustr’é mas despues. E superintendente di sirbishi por hasi areglo pa publikadó kualifiká bai na e negoshinan ku tin den nan teritorio i ofresé estudio di Beibel. Ademas, bo por ofresé un estudio di Beibel na bo koleganan di trabou òf na hende ku bo ta prediká na dje informalmente.

Hesus a duna e mandamentu pa “hasi hende . . . disipel” i “siña nan.” (Mat 28:19, 20) Nos ta spera ku e kampaña akí por yuda nos kumpli ku e meta ei, usando e foyeto Bo Por Disfrutá di Bida pa Semper!