NOS sirbishi ta importante i balioso. Pero no ta tur hende ku nos ta prediká na dje ta komprondé esei. Asta hende ku ta mustra interes den e mensahe di Beibel no semper ta mira e nesesidat pa studia e Palabra di Dios ku nos.

Tuma e ehèmpel di Gavin. El a kuminsá asistí na reunion, pero e no kier a tuma un estudio di Beibel. El a bisa: “Mi no tabata sa mashá di Beibel, i mi tabatin bèrgwensa pa laga otro hende ripará esei. Mi tabatin miedu di ser engañá, i mi no kier a komprometé mi mes.” Kiko bo ta pensa? Lo bo konkluí ku Gavin ta un kaso pèrdí? Nò! Wak ki bon efekto e siñansa di Beibel por tin riba hende. Yehova a bisa su pueblo di pasado: “Laga mi . . . diskurso gotia manera serena, manera gota di awa riba yerba fresku.” (Deu. 31:19, 30; 32:2) E karakterístikanan di serena ta mustra kon nos por yuda tur sorto di hende den nos sirbishi.—1 Tim. 2:3, 4.

Serena ta suave. Serena ta forma gradualmente segun ku e damp di awa den aire ta bira gotanan chikitu di awa. E palabranan di Yehova a “gotia manera serena” den e sentido ku el a papia na un manera bondadoso i suave ku su pueblo. Nos ta imit’é ora nos mustra rèspèt pa e punto di bista di otro hende. Nos ta animá hende pa rasoná i asina yuda nan yega na nan mes konklushonnan. E ora ei nan lo ta mas dispuesto pa aseptá nos palabranan, i nos sirbishi lo ta mas efikas.

Serena ta refreskante. Nos sirbishi ta refreská otro hende ora nos pensa riba kon nos por sigui kultivá nan interes. Por ehèmpel Chris, e promé ruman ku a papia ku Gavin tokante e bèrdat, no a pone preshon riba dje pa aseptá un estudio di Beibel. Na lugá di esei, Chris a buska vários manera pa laga Gavin sintié mas kómodo ora nan tabata trata temanan di Beibel. Chris a splik’é ku Beibel tin un tema i ku ora e komprondé esei, lo e por sigui e reunionnan mas mihó. Despues, Chris a bisa Gavin ku ta profesianan bíbliko a konvensé e mes ku loke Beibel ta bisa ta e bèrdat. Komo resultado, nan a kòmbersá hopi tokante kumplimentu di profesianan di Beibel. Esei a laga Gavin sinti su mes refreská, i finalmente el a aseptá un estudio di Beibel.

Serena ta sostené bida. Na e tera di Israel tin un temporada kayente i seku den kua áwaseru ta keda sin kai pa vários luna. Sin e humedat di serena, e matanan ta marchitá i muri. Awe tin un sekura spiritual, manera Yehova a profetisá. (Ámos 8:11) El a primintí ku e ungínan lo ta “manera serena for di SEÑOR” segun ku nan ta proklamá e mensahe di Reino huntu ku nan kompañeronan, e ‘otro karnénan.’ (Mik. 5:7; Huan 10:16) E mensahe di e bon notisia di Reino ku nos ta prediká ta parti di e provishonnan di Yehova ku ta sostené bida. Abo ta balorá e mensahe ei?

Serena ta un bendishon di Yehova. (Deu. 33:13) Nos sirbishi por ta un bendishon pa hende ku reakshoná faborablemente. Gavin ta un bon ehèmpel di esei pasobra durante su estudio di Beibel el a haña kontesta pa tur su preguntanan. El a progresá i no a dura muchu ku el a batisá, i awor e ku su kasá, Joyce, ta gusta prediká e bon notisia di Reino.

Ora nos kompará nos trabou di prediká ku serena, nos lo balorá mas loke kada un di nos ta hasi den sirbishi. Kon asina? Un gota riba su mes no tin muchu efekto, pero miónes di gota di serena huntu ta saturá tera ku awa. Di igual manera, kisas nos ta pensa ku loke nos ta hasi personalmente den sirbishi no ta yuda mashá. Pero ora nos agregá esei na e esfuersonan di miónes di sirbidó di Yehova, e bon notisia ta yega na hende di “tur nashon.” (Mat. 24:14) Nos sirbishi lo demostrá di ta un bendishon di Yehova pa otronan? Esei lo ta e kaso ora ku e mensahe ku nos ta prediká ta manera serena suave i refreskante ku ta sostené bida.