Dikon Nos Tin Ku Bai Nos Reunionnan?
“Tur dia nan tabata bini huntu den tèmpel.”—ECHO. 2:46.
KANTIKA: 20, 119
1-3. (a) Kon kristiannan a demostrá ku nan ta ansioso pa reuní huntu? (Wak e promé plachi.) (b) Kiko nos lo konsiderá den e artíkulo akí?
TEMPU Corinna tabatin apénas 17 aña, nan a arestá su mama i hib’é un kampo soviétiko di trabou fòrsá. Despues, nan a manda Corinna Siberia, míles di kilometer leu for di su kas. Ei nan a trat’é komo katibu, i tin biaha e mester a traha pafó den un frialdat ekstremo sin paña adekuá. Apesar di e kondishonnan mashá difísil ei, Corinna i un otro ruman muhé tabata determiná pa bai reunion.
2 El a bisa: “Atardi nos tabata sali for di kaminda nos tabata traha i kana bai un stashon di trein ku a keda 25 kilometer leu. E trein tabata sali dos or di mardugá, nos tabata biaha seis ora den trein i despues kana 10 kilometer pa yega kaminda e rumannan tabata reuní.” Tur e esfuerso ei tabata bale la pena? Corinna a konta: “Na reunion nos tabata studia E Toren di Vigilansia i kanta kantika di Reino. E eksperensia ei a fortalesé nos fe i a animá nos mashá.” Despues di tres dia nan tabata bai bèk na nan trabou na un boerderij sin ku e manager ripará mes ku nan no tabata einan.
3 Semper e pueblo di Yehova a balorá okashonnan ku nan por reuní huntu. Mesora despues ku e kongregashon kristian Echo. 2:46) Kisas abo tambe ta deseá di asistí regularmente na e reunionnan. Sinembargo, tur kristian ta haña nan ku opstákulo. Por ehèmpel, trabou, un skèdjel drùk òf kansansio debí na tantu kos di hasi ta pone ku podisé ta difísil pa bai reunion. Kiko lo motivá nos pa purba di superá e opstákulonan akí i bai reunion regularmente? [1] Kon nos por yuda nos studiantenan di Beibel i otro hende mira e importansia di asistí na reunion? Den e artíkulo akí nos lo konsiderá ocho motibu pakiko nos tin ku bai reunion. Nos por parti nan den tres kategoria: (1) Kon e reunionnan ta benefisiá nos? (2) Kon otronan ta benefisiá ora nos bai reunion? (3) Ki efekto nos baimentu di reunion tin riba Yehova? [2]
a ser formá, e siguidónan di Hesus ‘tabata bini huntu den tèmpel tur dia.’ (KON E REUNIONNAN TA BENEFISIÁ NOS?
4. Kon e reunionnan ta yuda nos siña tokante Yehova?
4 E reunionnan ta masha instruktivo. Kada reunion ta siña nos tokante nos Dios, Yehova. Por ehèmpel, resientemente, mayoria di kongregashon a studia e buki Hala Serka Yehova den e Estudio di Beibel di Kongregashon. E estudio akí di e kualidatnan di Dios i e komentarionan di e rumannan a duna bo mas amor pa bo Tata selestial, no ta bèrdat? Tambe nos ta haña mas konosementu di e Palabra di Dios ora nos presta bon atenshon na e diskursonan, e demostrashonnan i lesamentu di Beibel. (Neh. 8:8) Anto pensa riba kuantu hoyanan spiritual bo ta haña tur siman ora bo ta prepará pa e puntonan sobresaliente di e lesamentu di Beibel i ta skucha nan na reunion.
5. Kon e reunionnan a yuda bo apliká loke Beibel ta siña i bira mas efikas den bo sirbishi?
5 E reunionnan ta siña nos kon pa apliká prinsipio di Beibel den tur aspekto di nos bida. (1 Tes. 4:9, 10) Por ehèmpel, e Estudio di Toren di Vigilansia ta adaptá na e nesesidatnan di e pueblo di Dios. Un Estudio di Toren di Vigilansia a yega di motivá bo pa hasi mas pa Yehova, pa pordoná un ruman òf pa mehorá e kalidat di bo orashonnan? E reunion di den siman ta siña nos kon pa prediká e bon notisia i kon pa siña otro hende tokante prinsipionan bíbliko na un manera efikas.—Mat. 28:19, 20.
6. Kon e reunionnan ta animá i fortalesé nos?
6 E reunionnan ta animá nos. E sistema di kosnan akí por debilitá nos fe i por laga nos sinti nos desanimá i ku hopi strès. Na kontraste, e reunionnan di kongregashon ta animá i fortalesé nos. (Lesa Echonan 15:30-32.) Na hopi reunion nos ta analisá kumplimentu di profesianan di Beibel. Komo resultado, nos ta keda mas konvensí ainda ku e promesanan di Yehova pa futuro tambe lo kumpli. Klaru ku no ta solamente e rumannan ku ta papia for di riba podio ta enkurashá nos. E rumannan ku ta duna komentario i ku ta kanta di kurason tambe ta edifiká nos. (1 Kor. 14:26) I ora nos kòmbersá ku nos rumannan promé i despues di reunion, nos ta sinti nos refreská i ku nos ta parti di un hermandat kristian.—1 Kor. 16:17, 18.
7. Dikon ta asina importante pa ta na reunion?
7 E reunionnan ta trese nos bou di influensia di spiritu santu. Ora Hesukristu a bolbe bèk na shelu, el a bisa: “Laga esun ku tin orea tende loke spiritu santu ta bisa e kongregashonnan.” (Rev. 2:7) Sí, Hesus ta dirigí e kongregashon kristian mediante spiritu santu. Nos mester di spiritu santu pa yuda nos resistí tentashon, pa duna nos kurashi i prepará nos pa sirbishi, i pa yuda nos tuma bon desishon. No ta sabí anto pa nos probechá di tur provishon, inkluso e reunionnan kristian, pa risibí e spiritu ei?
KON OTRONAN TA BENEFISIÁ ORA NOS BAI REUNION?
8. Kon nos asistensia, komentarionan i kantamentu na reunion ta yuda nos rumannan? (Wak tambe e kuadro “Semper E Ta Sinti Su Mes Mihó Despues di Reunion.”)
8 E reunionnan ta duna nos oportunidat pa demostrá ku nos ta stima nos rumannan. Pensa riba e retonan ku algun ruman di bo kongregashon ta enfrentá. No ta nada straño ku apòstel Pablo a skirbi: “Laga nos presta atenshon na otro.” Despues Pablo a splika ku nos por mustra interes den nos rumannan ora nos “bai e reunionnan.” (Heb. 10:24, 25) Ora bo ta na reunion, bo ta demostrá ku bo rumannan meresé bo tempu, atenshon i ku bo ta interesá den nan. Ademas, ora bo ta kanta i duna komentario di kurason, bo ta animá bo rumannan.—Kol. 3:16.
9, 10. (a) Splika kon e palabranan di Hesus na Huan 10:16 ta yuda nos mira dikon ta importante pa reuní ku nos rumannan. (b) Si nos ta na reunion regularmente, kon nos por yuda esnan ku nan famia a rechasá?
9 E reunionnan ta uni nos mas ku nos rumannan. (Lesa Huan 10:16.) Hesus a kompará su mes ku un wardadó i su siguidónan ku un tou di karné. Pensa riba esaki: Si tin dos karné riba un seritu, dos karné mas den un sabana i un otro karné ta kome yerba otro kaminda, bo por bisa ku e sinku karnénan ei ta forma ún tou? Normalmente, un tou di karné ta keda huntu bou di kuido di nan wardadó. Di igual manera, nos no por sigui nos Wardadó si nos disidí di isolá nos mes. Nos tin ku reuní huntu ku otro ruman kristian pa nos por ta “ún tou bou di ún wardadó.”
10 Ora nos bai reunion, nos ta kontribuí na e union di nos hermandat. (Sal. 133:1) Algun di nos rumannan a keda rechasá pa nan mayornan i rumannan karnal. Sinembargo, Hesus a primintí ku lo e duna nan un famia spiritual ku lo stima nan i kuida nan. (Mar. 10:29, 30) Ora bo ta asistí regularmente na reunion, bo por bira manera un tata, mama òf ruman pa un di e rumannan stimá ei. E idea ei sigur ta motivá nos pa hasi nos bèst pa bai tur reunion.
KI EFEKTO NOS BAIMENTU DI REUNION TIN RIBA YEHOVA?
11. Kon baimentu di reunion ta yuda nos duna Yehova loke e meresé?
11 Ora nos bai reunion, nos ta duna Yehova loke e meresé. Komo nos Kreador, Yehova meresé alabansa, gloria, gradisimentu i onor. (Lesa Revelashon 7:12.) Ora nos ta hasi orashon, kanta i papia tokante Yehova na nos reunionnan, nos ta dun’é loke e meresé asina tantu: nos adorashon. Nos ta balorá e privilegio di por onra Esun ku a hasi asina tantu pa nos.
12. Kon Yehova ta sintié ora nos obedesé e mandamentu pa asistí na reunion?
12 Ademas, Yehova meresé nos obedensia. El a bisa nos pa no keda sin reuní huntu, spesialmente durante e tempu di fin akí. Yehova ta keda masha kontentu ora ku di buena gana nos obedesé e mandamentu ei. (1 Huan 3:22) E ta mira i balorá e esfuerso ku nos ta hasi pa asistí na kada reunion.—Heb. 6:10.
13, 14. Kon e reunionnan ta yuda nos hala serka Yehova i Hesus?
13 Ora nos bai reunion, nos ta mustra Yehova ku nos ke hala serka dje i su Yu. Na reunion, nos Magnífiko Instruktor ta guia nos mediante su Palabra, Beibel. (Isa. 30:20, 21) Asta hende ku no ta Testigu ku asistí na nos reunionnan lo por bisa: “Di bèrdat Dios ta meimei di boso.” (1 Kor. 14:23-25) Yehova ta bendishoná e reunionnan ku su spiritu i ta dirigí e programa di siñansa bíbliko. Pues ei nos ta skucha Yehova su “stèm” i ta sinti ku e ta stima nos. Komo resultado, nos ta hala serka dje.
14 Hesus a bisa: “Kaminda dos òf tres ta reuní den mi nòmber, einan mi ta meimei di nan.” (Mat. 18:20) Básikamente, e palabranan di Hesus ta apliká na nos reunionnan. Komo kabes di e kongregashon, Kristu ta “kana meimei” di e kongregashonnan di e pueblo di Dios. (Rev. 1:20–2:1) Pensa un ratu riba esei! Yehova i Hesus ta aktivamente enbolbí den fortalesé nos na reunionnan kristian. Kon bo ta kere Yehova ta sintié ora e mira nos esfuerso sinsero pa hala serka dje i su Yu?
15. Ora nos bai reunion, kon nos ta mustra Dios ku nos ke obedes’é?
15 Ora nos bai reunion, nos ta demostrá ku nos ta apoyá Dios su soberania. Aunke Yehova ta manda nos bai reunion, e no ta fòrsa nos sí. (Isa. 43:23) P’esei, ta keda na nos pa mustra Yehova kuantu nos ta stim’é i si nos ta apoyá su manera di goberná. (Rom. 6:17) Por ehèmpel, nos doño di trabou por preshoná nos pa keda traha en bes di bai reunion. Kisas gobièrnu ta oponé nos i menasá nos ku si nos reuní huntu, nos lo haña but, bai prizòn òf sufri konsekuensianan pió. Òf podisé nos ta sinti e tentashon pa rekreá en bes di bai reunion. Den kada un di e situashonnan akí nos tin ku hasi un eskoho: Ken nos lo obedesé? (Echo. 5:29) Ora nos skohe pa apoyá e soberania di Yehova, nos ta hasi su kurason kontentu.—Pro. 27:11.
SIGUI BAI REUNION
16, 17. (a) Kon nos por sa ku e reunionnan tabata masha importante pa e kristiannan di promé siglo? (b) Kiko ruman George Gangas a sinti pa ku e reunionnan?
16 E promé kristiannan no a djis reuní huntu pa un tempu kòrtiku despues di e milager asombroso dia di Pentekòste di aña 33. Beibel ta bisa ku “tur dia nan tabata bini huntu den tèmpel.” (Echo. 2:46) Nan a perseverá ku hopi esfuerso. No tabata fásil pa e kristiannan ei bai reunion debí ku nan tabata bou di dominio di e Imperio Romano i tabata haña oposishon di lidernan religioso hudiu. Apesar di esei, nan a perseverá.
17 Hopi sirbidó di Yehova di nos tempu ta mustra masha apresio pa e reunionnan. George Gangas, kende a forma parti di e Kuerpo Gobernante pa mas ku 22 aña, a bisa: “Pa mi, reuní ku e rumannan ta un di e plasernan di mas grandi di bida i un fuente di animashon. Mi gusta ta entre e proménan pa yega Salòn di Reino i entre e últimonan pa bai fo’i djei, si ta posibel. Mi ta sinti un goso di paden ora mi ta papia ku otro sirbidó di Dios. Ora mi ta entre nan, mi ta sinti mi na kas ku mi famia. Ta manera mi ta den un paradeis spiritual.” Anto el a agregá: “Meskos ku un kompas semper ta mustra na nort, asina tambe, mi pensamentunan i deseo di mas profundo ta pa asistí na e reunionnan.”
18. Kiko bo ta sinti pa ku nos reunionnan, i kiko bo ta determiná pa hasi?
18 Bo tambe ta sinti meskos pa ku e reunionnan? Si ta asina, sea determiná pa sigui hasi esfuerso pa bai reunion regularmente. Asina bo ta mustra ku bo ta di akuerdo ku Rei David, kende a bisa: “SEÑOR, mi ta stima e kas kaminda bo ta biba.”—Sal. 26:8.
^ [1] (paragraf 3) Algun ruman no por bai reunion regularmente debí na sirkunstansianan ku no ta den nan man, manera malesa grave. Ma nan por tin sigur ku Yehova ta komprondé nan situashon i ta apresiá ku nan ta sirbié di henter kurason. Ansianonan por laga e rumannan akí skucha e reunion via telefòn òf grab’é pa nan, i asina yuda nan benefisiá di e reunionnan.
^ [2] (paragraf 3) Wak e kuadro “Motibunan pa Bai Reunion.”