1-3. (a) Den ki situashon hóbennan ta, i ku kiko bo por kompará nan situashon? (Wak e promé plachi.) (b) Kiko por yuda hóbennan kristian tuma bon desishon?

IMAGINÁ ku bo a plania pa asistí na un evento importante na un stat ku ta keda leu. Pa bo yega einan, bo mester kore oranan largu den bùs. Pero, na e parada di bùs tin asina tantu hende i bùs ku bo ta sinti bo un poko konfundí. Sinembargo, komo ku bo sa presis unda bo ta bai, bo ta subi e bùs ku ta hiba bo na bo destinashon. Pues, ta bisto ku lo bo no subi un bùs ku lo hiba bo otro kaminda.

² Hóbennan, boso ta manera e pasaheronan den e bùs. Boso tin un biahe largu boso dilanti, no den bùs, sino riba e kaminda di bida. Tin biaha, boso por sinti boso konfundí debí na e oportunidatnan ku tin boso dilanti i e desishonnan ku boso mester tuma. Pero hóben, si bo sa kiko bo ke hasi, ta bira mas fásil pa bo tuma e desishon korekto.

³ E artíkulo akí ta animá hóbennan pa semper hasi esfuerso pa agradá Yehova na promé lugá. Esei ta nifiká sigui su konsehonan den tur bo desishonnan, manera por ehèmpel, ora di tuma desishon tokante enseñansa, trabou i kasamentu  i hañamentu di yu. E ta enserá tambe ku nan mester hasi esfuerso pa alkansá metanan spiritual. Hóbennan ku semper ta hasi esfuerso pa agradá Yehova na promé lugá por tin sigur ku Yehova lo bendishoná nan i duna nan éksito den bida.—Lesa Proverbionan 16:3, NW. *

4. Kiko nos lo analisá den e artíkulo akí?

⁴ Ta bon pa bo pone meta spiritual. Dikon? Nos lo analisá tres motibu. E promé dos motibunan ta mustra ku ora bo traha pa alkansá meta spiritual, bo relashon ku Yehova ta bira mas fuerte. E di tres motibu ta resaltá e benefisio di pone meta spiritual ora bo ta yòn.

5. Kiko ta e motibu prinsipal pakiko nos mester pone meta spiritual?

⁵ E motibu prinsipal pakiko nos mester pone meta spiritual ta pa mustra Yehova ku nos ta gradisidu pa su amor i pa loke e ta hasi pa nos. E salmista a bisa: “Ta bon pa duna gradisimentu na SEÑOR. . . . Pasobra abo, o SEÑOR, a hasi mi kontentu ku loke bo a hasi; pa motibu di e obranan di bo mannan lo mi kanta di goso.” (Sal. 92:1, 4) Hóben, pensa riba tur loke Yehova a duna bo: bo bida, bo fe, Beibel, e kongregashon i un speransa bunita pa futuro. Un manera ku nos por mustra Dios ku nos ta gradisidu pa e bendishonnan akí ta di duna prioridat na asuntunan spiritual, i esei lo hala nos mas serka dje.

6. (a) Ki efekto metanan spiritual tin riba bo relashon ku Yehova? (b) Ki metanan bo por pone for di chikitu?

⁶ E di dos motibu ta ku ora bo ta hasi esfuerso pa alkansá metanan spiritual, bo ta kuminsá traha un bon nòmber serka Yehova. I esei ta hala bo asta mas serka dje. Apòstel Pablo a sigurá nos: “Dios no ta inhustu pa lubidá boso trabou i e amor ku boso a mustra pa su nòmber.” (Heb. 6:10) Nunka bo no ta muchu yòn pa pone meta spiritual. Christine tabatin dies aña ora el a disidí di lesa historia di bida di Testigunan fiel regularmente. Tempu Toby tabatin 12 aña, el a pone meta pa lesa henter Beibel promé ku e batisá. Maxim tabatin 11 aña i su ruman muhé Noemi tabatin dies aña tempu ku nan a batisá. Despues, tur dos a kuminsá traha riba nan meta pa sirbi na Bètel. Pa yuda nan keda enfoká riba esei, nan a pega un solisitut pa Bètel riba un muraya den kas. I kiko di abo? Bo por pensa riba metanan ku for di awor bo por traha riba dje?—Lesa Filipensenan 1:10, 11.

7, 8. (a) Dikon ora nos tin meta ta mas fásil pa nos tuma desishon? (b) Dikon un tiner a disidí di no bai universidat?

⁷ Kiko ta e di tres motibu pa pone metanan spiritual ora bo ta yòn? Hóbennan tin ku tuma desishon enkuanto enseñansa, trabou i otro asuntunan. Bo por kompará tumamentu di desishon ku skohementu di e kaminda korekto na un krusada. Si bo sa unda bo tin ku bai, ta fásil pa skohe e kaminda korekto. Di mes manera, si bo sa kiko bo metanan ta, ta mas fásil pa bo tuma bon desishon. Proverbionan 21:5 ta bisa: “E plannan di hende balente siguramente ta kondusí na abundansia,” òf éksito. Mas trempan bo kuminsá plania i pone bon meta, mas lihé lo bo tin éksito. Esei ta loke Damaris a eksperensiá ora e mester a tuma un desishon importante tempu e tabata tiner.

⁸ Damaris a kaba skol sekundario ku sifranan haltu. E por a aseptá un beka pa studia lei na universidat, pero en bes di  esei el a skohe pa traha na banko. Dikon? El a bisa: “For di yòn mi a pone meta pa traha pionero. Pa logra esei, mi mester a traha partaim. Si mi a studia lei, lo mi a gana hopi plaka. Pero lo tabata difísil pa mi haña un trabou partaim.” Awor Damaris tin 20 aña ta traha pionero. Kiko e ta pensa di e meta ku el a pone i e desishon ku el a tuma tempu e tabata tiner? El a kontestá: “Na e banko kaminda mi ta traha, mi ta topa hopi abogado. Nan ta hasi e trabou ku ami lo a hasi si mi a studia lei. Ma, hopi di nan no ta felis ku nan trabou. Mi desishon pa traha pionero a yuda mi evitá e frustrashon ku trabou sekular por trese kuné, i mi ta sinti mi hopi felis sirbiendo Yehova tur e añanan akí.”

9. Dikon nos hóbennan meresé nos elogio sinsero?

⁹ Den e kongregashonnan rònt mundu tin míles di hóben ku meresé nos elogio sinsero. Nan ta konfia Yehova den tur loke nan ta hasi i ta enfoká riba metanan spiritual. E hóbennan ei ta disfrutá di bida i ala bes nan ta siña kon pa sigui guia di Yehova den tur kos, manera por ehèmpel, ora di tuma desishon tokante enseñansa, trabou i kasamentu i hañamentu di yu. Sálomon a skirbi: “Konfia den SEÑOR ku henter bo kurason.  . . . Den tur bo kamindanan rekonos’é, i e lo dirigí bo bereanan.” (Pro. 3:5, 6) Hóbennan den kongregashon kristian ta presioso den bista di Yehova, kende ta stima nan mashá, ta protehá nan, guia nan i bendishoná nan.

10. (a) Dikon sirbishi mester ta un di nos prioridatnan? (b) Kon nos por ta mas efikas ora di duna testimonio?

¹⁰ Pa un hóben ku ke usa su bida pa agradá Yehova, sirbishi ta masha importante. Hesukristu a enfatisá ku ‘mester prediká e bon notisia promé.’ (Mar. 13:10) Komo ku e trabou di prediká ta asina importante, e mester ta un di nos prioridatnan. Hóben, bo por pone meta pa traha mas den sirbishi? Bo por traha pionero? Awor kiko si bo no gusta sirbishi mashá? I kon bo por ta mas efikas ora di duna testimonio? Tin dos kos ku por yuda bo: Prepará bon i no kansa di kompartí loke bo sa ku otronan. Lo bo keda sorprendí kuantu goso lo bo haña ora bo ta prediká.

11, 12. (a) Kon hóbennan por prepará pa duna testimonio? (b) Kon un hóben a probechá di un oportunidat pa duna testimonio na skol?

¹¹ Pa kuminsá, bo por prepará pa kontestá un pregunta ku hopi di bo kompañeronan di skol ta hasi, por ehèmpel: “Dikon bo ta kere den Dios?” Riba nos website jw.org tin artíkulonan pa yuda hóbennan prepará pa kontestá e pregunta ei. Bai na SIÑANSA DI BEIBEL > HÓBENNAN. Einan lo bo haña e blachi di tarea “Dikon Mi Ta Kere den Dios?” E blachi ei lo yuda bo prepará bo kontesta. E tin tres teksto ku bo por usa pa bo splika loke bo ta kere: Hebreonan 3:4, Romanonan 1:20 i Salmo 139:14. Tin mas blachi di tarea ku por yuda bo kontestá otro preguntanan.—Lesa 1 Pedro 3:15.

¹² Si bo haña oportunidat, animá bo kompañeronan di skol pa nan bai riba jw.org. Esei ta loke Luca a hasi ora su lès tabata tokante diferente religion. El a ripará ku su buki di skol tabatin algun informashon inkorekto tokante Testigunan di Yehova. Aunke ku e tabata nèrvioso, el a pidi su yùfrou pèrmit pa splika dikon e informashon den e buki tabata inkorekto. Ora Luca a  haña pèrmit, e no a solamente splika su kreensianan, pero tambe el a mustra henter klas nos website. Pa hùiswèrk, e yùfrou a bisa tur mucha pa wak e vidio Defendé Bo Kurpa sin Usa Moketa. Luca a keda masha kontentu ku e por a duna un bon testimonio.

13. Dikon nos no mester desanimá ora nos haña nos ku difikultat?

¹³ No desanimá si riba bo kaminda di bida bo haña bo ku difikultat. (2 Tim. 4:2) Ora bo haña bo ku difikultat, sigui hasi esfuerso pa alkansá bo metanan. Katharina tabatin 17 aña ora el a pone meta pa duna testimonio na kada ún di su koleganan di trabou. Un di nan a insult’é vários biaha, pero e no a desanimá. I su bon kondukta a impreshoná un otro kolega di dje ku yama Hans. Komo resultado di esei, Hans a kuminsá lesa nos publikashonnan, studia Beibel i a batisá. Komo ku Katharina a muda, e no tabata sa di nada. Ta despues di 13 aña el a mira Hans atrobe. E dia ei, e tabata na Salòn di Reino huntu ku su famia i Hans tabata e oradó bishitante. Bo por imaginá bo Katharina su goso? Ta bon ku Katharina no a entregá pero a sigui hasi esfuerso pa alkansá su meta, esta, pa duna testimonio na su koleganan di trabou.

14, 15. (a) Kiko bo mester kòrda ora bo haña bo ku preshon? (b) Kon hóbennan por resistí preshon di pareu?

¹⁴ Te asina leu, e artíkulo akí a animá bo pa semper hasi esfuerso pa agradá Yehova i pone metanan spiritual. Podisé otro hóbennan di bo edat ke dibertí so, i kisas nan ta asta invitá bo pa djòin nan. Tardi òf trempan, bo mester demostrá kon determiná bo ta pa alkansá bo metanan. No laga preshon di pareu distraí bo. Kòrda riba e ilustrashon di e bùs. Siguramente lo bo no subi kualke bùs djis pasobra ta parse ku e pasaheronan ta pasando bon.

¹⁵ Tin vários manera ku bo por resistí preshon di pareu. Por ehèmpel, bo mester  evitá situashonnan ku por ta un tentashon pa bo. (Pro. 22:3) I kòrda riba e konsekuensianan doloroso di mal kondukta. (Gal. 6:7) Ademas, bo tin ku rekonosé ku bo mester di yudansa di otronan. Si bo ta humilde, bo ta aseptá sugerensia di bo mayornan i di rumannan spiritualmente maduro.—Lesa 1 Pedro 5:5, 6.

16. Konta un eksperensia ku ta mustra dikon ta importante pa nos ta humilde.

¹⁶ Ban wak e ehèmpel di Christoph, kende tabata humilde i a aseptá bon konseho. Poko despues ku el a batisá, el a kuminsá train regularmente na un gym. Einan, otro hóbennan a invit’é pa e djòin nan klup di deporte. El a papia tokante e asuntu ku un ansiano. E ansiano a bisa Christoph pa promé ku e tuma un desishon, e pensa tokante algun peliger ku e por hañ’é kuné, manera e spiritu di kompetensia. Apesar di esei, Christoph a disidí di djòin e klup tòg. Sinembargo, ku tempu el a ripará ku e deporte tabata violento i asta peligroso. El a bolbe papia ku ansiano, i nan tur a dun’é konseho bíbliko. Christoph a bisa: “Yehova a duna mi bon konsehero. I aunke a tuma mi poko tempu, mi a skucha Dios.” Abo ta sufisiente humilde pa aseptá bon konseho?

17, 18. (a) Kiko Yehova ke pa hóbennan awe? (b) Kiko bo tin ku hasi pa bo no tin ku lamentá pa motibu di desishonnan ku bo a tuma tempu bo tabata yòn? Duna un ehèmpel.

¹⁷ Beibel ta bisa: “Regosihá, hóben, durante di bo hubentut, i laga bo kurason tin plaser durante di e dianan di bo adolesensia.” (Ekl. 11:9) Sí, Yehova ke pa bo ta felis. E artíkulo akí a mustra un manera ku bo por logra esei. Bo tin ku keda enfoká riba bo metanan spiritual i tene kuenta ku Yehova den tur bo plannan. Mas trempan bo kuminsá hasi esei, mas lihé lo bo mira kon Yehova ta guia bo, protehá bo i bendishoná bo. Meditá riba tur e bon konsehonan ku bo ta haña den Beibel i sigui e konseho akí: “Kòrda tambe riba bo Kreador den e dianan di bo hubentut.”—Ekl. 12:1.

¹⁸ Niun hende no ta keda yòn pa semper. Hóbennan ta bira grandi masha lihé. Lamentablemente, ora nan ta adulto, hopi di nan ta lamentá ku nan a sigui metanan robes tempu nan tabata yòn òf pasobra nan no a pone niun meta. Pero hóbennan ku ta keda enfoká riba nan metanan spiritual lo sinti nan satisfecho ora nan ta adulto. Esaki tabata e kaso ku Mirjana. Tempu e tabata tiner, e tabata masha bon den deporte, i el a ser invitá pa partisipá den Weganan Olímpiko di Wenter. Pero en bes di esei, el a drenta sirbishi di tempu kompleto. Despues di mas ku 30 aña, ainda Mirjana ta den sirbishi di tempu kompleto huntu ku su kasá. El a splika: “Fama, onor, poder i rikesa ta metanan temporal i di poko balor. Loke sí ta di balor i duradero ta nos sirbishi na Yehova i nos esfuersonan pa yuda hende den sentido spiritual.”

19. Dikon ta bon pa pone metanan spiritual for di yòn?

¹⁹ Hóbennan den kongregashon ta meresé nos elogio sinsero pa e manera ku nan ta trata ku difikultat i pa e echo ku nan ta determiná pa agradá Yehova. Nan ta hasi esei ora nan ta hasi esfuerso pa alkansá metanan spiritual i ta hasi e trabou di prediká nan prioridat. Ademas, nan ta desididu pa no laga e mundu akí distraí nan. Nan por tin sigur ku nan esfuerso no ta pòrnada. Nan tin e amor i apoyo di nan rumannan, i ora nan konfia Yehova, nan plannan lo tin éksito.