1. Ken a duna nos e kapasidat di papia?

 YEHOVA ta esun ku a regalá nos nos kapasidat di papia. Asina ku Adam a wòrdu kreá, e por a komuniká ku su Tata den shelu. Tambe, e tabatin e kapasidat di inventá palabra nobo den su vokabulario. Anto el a usa e abilidat ei ora e tabata duna e bestianan nòmber. (Gén. 2:19) Anto bo por imaginá kon kontentu e tabata ora ku pa promé biaha e por a papia ku un otro hende—su bunita esposa, Eva?—Gén. 2:22, 23.

2. Kon hende den pasado i awe ta hasi mal uso di nan kapasidat di papia?

² Pero, no a tarda mashá ku a kuminsá usa e kapasidat di papia na un manera robes. Satanas e Diabel a gaña Eva anto debí na e mentira ei, hende ta pekadó i imperfekto. (Gén. 3:1-4) Adam a hasi mal uso di su abilidat di papia ora el a kulpa Eva i asta Yehova pa su erornan. (Gén. 3:12) Kain a gaña Yehova despues ku el a mata su ruman Abel. (Gén. 4:9) Despues, un desendiente di Kain ku yama Lamèk, a komponé un poema ku a reflehá e violensia ku tabatin den e tempu ei. (Gén. 4:23, 24) Anto kiko nos por bisa di awe? Tin biaha polítikonan no tin niun tiki bèrgwensa pa papia palabra malu den públiko. I ta masha difísil mes pa haña un pelíkula ku no tin palabra malu den dje. Anto tantu na skol komo na trabou hende ta usa palabra malu òf palabra ònbeskòp. E echo ku palabra malu a bira algu asina gewon ta mustra kon baho e mundu akí a bira.

3. Kiko nos tin ku paga tinu kuné, i kiko nos lo analisá den e artíkulo akí?

 ³ Bo por kustumbrá di skucha palabra malu asina tantu ku si bo no paga tinu bo mes ta kuminsá papia nan. Ta klaru ku debí ku nos ke agradá Yehova, nos no ta papia palabra malu. Pero, nos tin ku hasi mas ku esei. Nos tin ku usa nos abla na e manera korekto: pa alabá Yehova. Den e artíkulo akí nos lo wak kon nos por hasi esei (1) den sirbishi, (2) na reunion i (3) den kòmbersashon. Pero promé, nos ta bai wak dikon nos abla ta importante pa Yehova.

4. Segun Malakías 3:16, dikon nos abla ta importante pa Yehova?

⁴ Lesa Malakías 3:16. Yehova a skirbi den su “buki di memoria” nòmber di hende ku nan abla ta mustra ku nan ta tem’é i ta meditá riba su nòmber. Dikon el a hasi esei? Pasobra nos abla ta mustra kiko tin den nos kurason. Hesus mes a bisa: “Di loke kurason ta yen di dje, boka ta papia.” (Mat. 12:34) Loke nos ta kòmbersá tokante dje ta mustra kuantu nos ta stima Yehova. I Yehova ke pa esnan ku ta stim’é biba pa semper den e mundu nobo.

5. (a) Ki nos abla tin di haber ku nos adorashon na Yehova? (b) Manera e plachinan ta mustra, kiko nos lo evitá di hasi si nos ke agradá Yehova ku nos abla?

⁵ E manera ku nos ta papia ta determiná si Yehova ta aseptá nos adorashon òf nò. (Sant. 1:26) Algun hende ku no ta sirbi Dios ta papia na un manera agresivo, brutu i arogante. (2 Tim. 3:1-5) Klaru, nos no ke ta manera nan. Semper nos ke pa Yehova keda kontentu ku nos abla. Pero, nos no ta hasi Yehova kontentu si nos ta usa palabranan amabel den kongregashon i den sirbishi pero na kas ku nos famia, un otro gai ta kanta.—1 Ped. 3:7.

6. Ki tabata e resultado debí na Kimberly su bon manera di papia?

⁶ Ora ku nos ta hasi bon uso di nos abla, otro hende lo mira e diferensia  “entre un ku ta sirbi Dios i un ku no ta sirbié.” (Mal. 3:18) Pues, tur hende lo mira bon kla ku nos ta sirbidó di Yehova. Wak kiko a pasa ku un ruman ku yama Kimberly. * E ku un mucha di su klas mester a traha huntu riba un proyekto. Segun ku nan tabata traha huntu, el a ripará ku Kimberly tabata otro. Semper Kimberly tabata amabel, e no tabata papia riba otro hende i nunka e tabata usa palabra malu. Esei a pone ku el a bira kurioso i ku tempu el a kuminsá studia Beibel. Yehova ta keda hopi kontentu ora nos manera di papia ta hala hende na e bèrdat.

7. Ki lo bo ke logra ku bo abla?

⁷ Nos tur ke pa nos manera di papia onra Yehova i hala nos mas serka di nos rumannan. P’esei, nos lo bai wak algun sugerensia ku lo yuda nos sigui ta un “bon ehèmpel” den nos “manera di papia.”

8. Kon nos por ta meskos ku Hesus den sirbishi?

⁸ Sea amabel i respetuoso ora hende papia malu ku bo. Ora Hesus tabata riba tera, hende a akus’é di ta haragan, buraché, kolaboradó di Diabel, kibradó di sabat i te asta blasfemadó di Dios. (Mat. 11:19; 26:65; Luk. 11:15; Huan 9:16) Pero, Hesus nunka a kontestá nan na mal manera. P’esei si un hende papia malu ku nos, nos mester ta meskos ku Hesus i no papia malu ku nan bèk. (1 Ped. 2:21-23) Pero, esei no ta bai asina fásil. (Sant. 3:2) Kiko por yuda nos anto?

9. Kon nos por dominá nos lenga den sirbishi?

⁹ Ora hende papia malu ku bo den sirbishi, purba di no rabia. Un ruman ku yama Sam a bisa: “Mi ta purba di kòrda den mi mes ku e persona akí tin ku skucha e bèrdat i e por kambia.” Tin biaha, e persona ta rabiá pasobra nos a yega na un mal momento. Ora nos haña nos mes ku un persona ku ta rabiá, nos por hasi loke Lucia a hasi. Hasi un orashon kòrtiku na Yehova, pidié yuda bo keda kalmu i pa no falta niun hende rèspèt.

10. Segun 1 Timoteo 4:13, kiko mester ta nos meta?

¹⁰ Hasi esfuerso pa bira un mihó maestro. Timoteo tabatin hopi eksperensia den e trabou di prediká. Pero asina mes, e mester a sigui mehorá komo maestro. (Lesa 1 Timoteo 4:13.) Kon nos por bira bon maestro den sirbishi? Wèl, nos tin ku prepará bon. Nos ta kontentu ku nos tin diferente material ku por yuda  nos bira mihó maestro. Manera e foyeto Dediká Bo Mes na Lesamentu i na Dunamentu di Siñansa i e sekshon “Sea Diligente den Sirbishi” den nos Material i Tarea pa Reunion Nos Bida i Sirbishi Kristian. Bo ta hasi bon uso di e sugerensianan ku tin den nan? Ora nos prepará bon, nos lo ta ménos nèrvioso i por papia ku mas konfiansa.

11. Kiko algun ruman a hasi pa bira mihó maestro?

¹¹ Nos por bira mihó maestro si nos opservá otro rumannan i siña for di nan. Sam, menshoná na paragraf 9, ta puntra su mes: ‘Ki ta hasi e rumannan akí bon maestro?’ E ta opservá nan métodonan i ta purba di imitá nan. Un ruman ku yama Talia ta presta bon atenshon na e manera ku e diskursantenan eksperensiá ta desaroyá diskurso. Esei a yud’é siña kon pa papia i rasoná riba temanan ku hendenan ta bini kuné den sirbishi.

12. Kiko no ta fásil pa algun ruman hasi?

¹² Nos kantamentu i komentarionan bon prepará ta hasi nos reunionnan dushi pa asistí na nan. (Sal. 22:22) Pero pa algun ruman, kantamentu i dunamentu di komentario no ta algu fásil. Wèl, si esei ta bo kaso, lo bo keda kontentu di sa kiko ta loke a yuda algun ruman vense e miedu ei.

13. Kiko por yuda bo kanta di kurason?

¹³ Kanta di kurason. E motibu di mas importante pa kanta na nos reunionnan ta pa alabá Yehova. Un ruman ku yama Sara ta haña ku e no ta kanta bon. Pero, esei no ta kita su gana di alabá Yehova ku kantika. P’esei ora e ta prepará pa reunion, e no ta bula e kantikanan. E ta train nan i ta purba di wak kon e kantika ta mara ku loke lo bai trata na reunion. El a bisa: “Esei ta yuda ku mi ta konsentrá mas riba e letranan i ménos riba mi kantamentu.”

14. Si bo ta un hende tímido, kiko por yuda bo duna komentario?

¹⁴ Tin e kustumber di duna komentario. Pa ta sinsero, pa algun ruman esei no ta nada fásil. Talia, menshoná na paragraf 11, a bisa: “Mi tin fobia di papia dilanti di otro hende. Pues, ta hopi difísil pa mi duna komentario.” Pero Talia no ta laga esei strob’é. Ora e ta prepará pa e reunionnan, e ta keda kòrda ku e promé kontesta di un pregunta mester ta kòrtiku i dirèkt. El a bisa: “Pues, no ta malu pa mi komentario ta dirèkt i kòrtiku pasobra ta e tipo di komentarionan ei e ruman ku ta dirigí ke.”

15. Kiko nos tin ku kòrda tokante nos komentarionan?

 ¹⁵ Sa sosodé ku asta rumannan ku no ta tímido kasi nunka ta duna komentario. Dikon? Un ruman ku yama Juliet a bisa: “Tin biaha mi no ta hisa mi man pa duna komentario pasobra mi tin miedu ku mi komentarionan no ta bon i ta muchu simpel.” Esei tambe sa pasa ku bo? Ta bon pa nos kòrda ku Yehova ke pa nos duna e mihó komentario ku nos por duna. * E ta kontentu ora nos hasi nos esfuerso pa duna komentario na reunion aunke ku tin biaha nos lo ta bon nèrvioso.

16. Ki tipo di abla nos mester evitá?

¹⁶ Evitá “papiamentu di kos ofensivo.” (Efe. 4:31) Manera nos a mira, palabra malu hamas mester sali for di boka di un kristian. Pero sin ku nos sa nos por papia kosnan ofensivo, anto nos tin ku tene kuenta ku esei. Por ehèmpel, nos tin ku tene kuidou pa nos no papia malu tokante otro hende su kultura, tribu òf nashonalidat. Ni tampoko nos lo no bisa kos ku ta laga otro hende sinti nan malu òf ku ta ofendé nan. Un ruman hòmber a atmití: “Tin biaha mi a yega di bisa kos ku segun mi tabata masha prèt i ku pa mi no tabata nada malu. Pero, eigenlijk nan no tabata niun tiki amabel i a hùrt otro hende. Mi kasá a yuda mi hopi. Durante añanan, ora ku mi a papia kosnan ku no tabata bon òf ku a hùrt otro hende, mi kasá tabata hala mi atenshon ora nos tabata nos so.”

17. Segun Efesionan 4:29, kon nos por edifiká otronan?

¹⁷ Papia kos ku ta edifiká. En bes di ta lihé pa keha i kritiká, purba di elogiá otronan. (Lesa Efesionan 4:29.) E israelitanan tabatin masha tantu kos pa ta gradisidu p’e, pero tur ora bai nan tabata keha. Kehamentu ta un kos ku ta pega masha lihé. Kòrda ku debí na e mal informe ku e dies spionnan a bini kuné, “tur e yunan di Israel” a “murmurá kontra Moises.” (Num. 13:31–14:4) Di otro un banda, si nos elogiá otronan, esei ta pone ku tur hende ta sinti nan felis. Debí ku e yu muhé di Yefta tabata haña elogio di su amiganan ku tabata bai bishit’é, e por a keda den su asignashon. (Hues. 11:40) Sara, menshoná na paragraf 13, a bisa: “Ora nos elogiá otronan, nos ta laga nan sinti ku Yehova stima nan i ku nan tin un  lugá den su organisashon.” P’esei, buska oportunidat pa elogiá bo rumannan.

18. Segun Salmo 15:1 i 2, dikon nos mester papia e bèrdat, i kiko esei ta inkluí?

¹⁸ Papia e bèrdat. Si nos no hasi esei, Yehova no ta keda kontentu ku nos pasobra e ta odia tur tipo di gañamentu. (Pro. 6:16, 17) Aunke awendia hopi hende ta mira gañamentu komo algu masha normal, nos sí ta keda ku Yehova su punto di bista. (Lesa Salmo 15:1, 2.) Ta klaru ku nunka nos lo ke papia un mentira, pero tampoko nos lo no skonde informashon pa laga un otro hende pensa un kos ku no ta bèrdat.

19. Kiko mas nos mester tene kuidou kuné?

¹⁹ No plama redu. (Pro. 25:23; 2 Tes. 3:11) Juliet, menshoná na paragraf 15, a splika kon redu ta lag’é sinti: “Ora mi tende hende ta hasi redu, e kos ei ta desanimá mi i mi ta pèrdè tur konfiansa den e hende ku ta hasi redu. Kon mi por sa ku e mesun hende akí lo no bai papia riba mi despues?” Si un kòmbersashon kuminsá bira redu, bòltu e kòmbersashon mesora pa algu positivo.—Kol. 4:6.

20. Kiko bo ta determiná pa hasi?

²⁰ E manera ku mayoria di hende awe ta usa nan abla ta laga hopi di deseá. P’esei, nos tin ku hasi esfuerso pa hasi sigur ku nos abla ta agradá Yehova. Kòrda ku ta Yehova a duna nos nos kapasidat di papia, i e ta interesá den kon nos ta us’é. Si nos hasi nos esfuerso pa onra Yehova ku nos abla den sirbishi, na reunion i den nos kòmbersashonnan, lo e bendishoná nos. Ora Yehova destruí e mundu malbado akí, lo ta hopi mas fásil pa nos onra Yehova ku nos abla. (Hudas 15) Miéntras tantu, sea determiná pa hasi Yehova kontentu ku “e palabranan di [bo] boka.”—Sal. 19:14.