PREOKUPASHON por laga bo sinti bo anshá, kibrá i deprimí. (Pro. 12:25) Bo a yega di sinti bo asina? Bo a yega di bisa: ‘Te aki mi a yega, mi no por mas?’ Si ta asina, bo no ta so. Hopi di nos a yega di sinti nos kansá, anshá i deprimí pa vários motibu. Por ehèmpel, algun di nos mester a kuida un famia ku tabata malu òf nos a pèrdè un ser kerí den morto òf nos a pasa den un desaster natural. Kiko por yuda nos dil ku preokupashon? *

Wèl, loke por yuda nos ta si nos analisá kon Rei David a trata ku su preokupashonnan. El a pasa den hopi situashon difísil i asta a hañ’é kara kara ku morto. (1 Sám. 17:34, 35; 18:10, 11) Kon el a trata ku su ansiedat i preokupashonnan? I kon nos por imit’é?

Tabatin biaha ku David a hañ’é ku yen di problema pareu. Por ehèmpel, pensa kiko a pasa kuné ora e tabata hui pa Rei Saul, kende tabata busk’é pa mata. Ora David i su hòmbernan a regresá for di un bataya, nan a bin haña sa ku enemigunan a hòrta tur nan pertenensianan, kima nan kasnan i a bai ku nan famianan. Kon David a reakshoná? “David i e hòmbernan ku tabata huntu kuné a grita yora masha duru mes; nan a yora te ora nan no tabatin forsa mas pa yora.” Pero esei no ta tur kos. Riba dje, e hòmbernan ku tabata huntu kuné “tabata blo papia di piedr’é.” (1 Sám. 30:1-6) Pues, David a hañ’é ku tres problema grandi pareu: su famia tabata kore peliger, e tabatin miedu ku su hòmbernan lo a mat’é i ketu bai Rei Saul tabata busk’é pa mata. Bo por imaginá kuantu ansha i tenshon David tabata sinti?

Kiko David a hasi? Di biaha, el a “akudí na Yehova, su Dios, i el a haña ánimo atrobe.” David semper tabatin kustumber di hasi orashon na Yehova pa yudansa i di meditá riba kon Yehova a yud’é den pasado. (1 Sám. 17:37; Sal. 18:2, 6) David tabata sa e importansia di buska guia serka Yehova, p’esei el a puntra Yehova kiko e mester a hasi. Manera el a komprondé kiko Yehova tabata ke p’e hasi, el a aktua mesora. Komo resultado, Yehova a bendishoná e i su hòmbernan, i nan a haña nan famia- i pertenensianan bèk. (1 Sám. 30:7-9, 18, 19) Bo a wak e tres kosnan ku David a hasi? El a hasi orashon na Yehova pa yudansa, el a meditá riba kon Yehova a yud’é den pasado i el a aktua mesora riba e instrukshonnan ku el a haña di Yehova. Ban wak kon nos por imitá David den e tres kosnan ei.

1. Hasi orashon. Asina ku nos sinti ansiedat, hasi orashon na Yehova i pidié yudansa pa sa kiko pa hasi. Loke por yuda nos sinti nos mihó ta si nos tuma tempu pa konta Yehova tur loke ta preokupá nos. Si e situashon no ta permití, hasi un orashon kòrtiku. Kada bes ku nos pidi Yehova yudansa, nos ta demostrá e mesun konfiansa ku David tabatin, kende a bisa: “SEÑOR ta mi baranka i mi fòrti, i mi libertador, mi Dios, mi baranka, den kende mi ta tuma refugio.” (Sal. 18:2) Pero di bèrdat orashon ta yuda? Wak kiko un pionero ku yama Kahlia a bisa: “Despues  ku mi hasi orashon, mi ta sinti mi trankil. Orashon ta yuda mi mira kosnan manera Yehova ta mira nan i ta yuda mi konfia mas den dje.” Sin duda, orashon ta un regalo maravioso di Yehova ku ta yuda nos dil ku nos ansiedat- i preokupashonnan.

2. Meditá. Bo a yega di sinti ku bo no tabata por mas anto ku Yehova a yuda bo? Dor di kòrda kon Yehova a yuda abo i tambe su sirbidónan den pasado, lo bo haña trankilidat i mas konfiansa den dje. (Sal. 18:17-19) Un ansiano ku yama Joshua a bisa: “Mi a traha un lista di tur e orashonnan ku Yehova a kontestá mi. Asina ei mi por kòrda tur e biahanan ku mi a pidié algu spesífiko i kon el a duna mi nèt lokual mi tabatin mester.” Sí, ora nos meditá riba tur e biahanan ku Yehova a yuda nos den pasado, nos ta haña forsa pa lucha kontra ansiedat i preokupashon.

3. Aktua. Promé ku bo disidí kiko bo ta bai hasi den un situashon, bai den Beibel. Ei lo bo haña e mihó guia. (Sal. 19:7, 11) Hopi ruman ta sinti ku ora nan hasi investigashon riba un sierto teksto, nan ta komprondé hopi mas mihó kon pa usa e teksto ei den nan bida. Un ansiano ku yama Jarrod a splika: “Ora mi hasi investigashon riba un versíkulo, esei ta yuda mi komprond’é mas mihó i ta yuda mi kapta kiko Yehova ke bisa mi. Ta e ora ei numa e kos ta yega na mi kurason, i mi ta aktua riba Yehova su guia.” Ora nos buska guia di Yehova den su Palabra i obedesé loke el a bisa nos, nos lo ta mihó prepará pa dil ku nos preokupashonnan.

David a komprondé ku pa e por dil ku su ansiedat i preokupashonnan, e tabatin mester di Yehova su yudansa. E tabata asina kontentu ku Yehova su yudansa ku el a bisa: “Ku mi Dios mi por bula over di un muraya, . . . e Dios ku ta faha mi ku forsa.” (Sal. 18:29, 32) Tin biaha nos ta sinti ku nos problemanan ta manera muraya haltu ku nos no por bula over di dje. Pero ku Yehova su yudansa, nos por bula over di nan tur! Sí, ora nos hasi orashon na Yehova pa yudansa, meditá riba tur loke el a hasi pa nos i aktua riba su guia, nos por tin sigur ku lo e duna nos tantu e forsa komo e sabiduria ku nos tin mester pa nos por dil ku nos ansiedat i preokupashonnan.