▪ Huramentu ta “un deklarashon òf promesa formal pa kumpli ku algu. Mayoria di biaha ta menshoná Dios den dje.” E por ta sea verbal òf por eskrito.

Tin hende ta pensa ku no mag di hura pasobra Hesus a bisa: “No hura mes . . . Simplemente, laga boso ‘sí’ ta sí, i boso ‘nò,’ nò; pasobra tur loke ta mas ku esei ta bini di e Malbado.” (Mat. 5:33-37) Hesus tabata sa ku e Lei di Moises a rekerí e israelitanan hura den algun situashon i ku algun fiel sirbidó di Dios a yega di hura. (Gén. 14:22, 23; Éks. 22:10, 11) E tabata sa tambe ku Yehova mes a yega di hura. (Heb. 6:13-17) Pues, Hesus no tabata ke men ku nos no tin mag di hura. Mas bien, e tabata ke men pa no hura pa kosnan chikitu òf kosnan sin sentido. Semper nos mester kumpli ku nos palabra pasobra esei ta loke Yehova ke pa nos hasi.

Pero kiko si nan pidi bo pa huramentá? Promé, hasi sigur ku bo por kumpli ku loke bo ta bai bisa. Si bo no tin sigur, ta mihó bo no huramentá. Beibel ta spièrta: “Ta mihó bo no primintí, ku primintí i keda sin kumpli.” (Ekl. 5:5) Despues, analisá prinsipionan di Beibel ku tin di haber ku e huramentu ku bo ta bai hasi i djei tuma desishon di akuerdo ku bo konsenshi bon entrená. Ban wak algun di e prinsipionan ei.

Algun huramentu no ta bai kontra Dios su boluntat. Por ehèmpel, ora Testigunan di Yehova kasa, nan ta hasi un voto, ku ta un tipo di huramentu. Dilanti Dios i e testigunan, e brùit i e brùidehòm ta primintí ku nan lo kuida, stima i respetá otro “tanten ku [nan] dos ta na bida riba tera.” (Aunke no ta tur pareha ta usa e palabranan ei ora nan kasa, di tur manera nan ta hasi un voto sí dilanti di Dios.) E ora ei nan ta bira kasá di otro i ta ser ferwagt di nan ku nan lo keda kasá pa restu di nan bida. (Gén. 2:24; 1 Kor. 7:39) E tipo di voto ei ta apropiá i ta na armonia ku Dios su boluntat.

Algun huramentu sí ta bai kontra Dios su boluntat. Un kristian berdadero lo no huramentá por ehèmpel pa defendé un pais ku arma ni tampoko pa nenga su fe den Dios. Si e hasi e tipo di huramentu ei, e ta bai kontra Dios su mandamentunan. Komo kristiannan, nos “no ta parti di mundu.” P’esei, nos no ta mete den debate- ni konfliktonan di mundu.—Huan 15:19; Isa. 2:4; Sant. 1:27.

Algun huramentu ta kuestion di konsenshi. Tin biaha, promé ku nos disidí si nos ta bai hura òf nò, nos tin ku tuma tempu pa  tene kuenta ku Hesus su konseho ora el a bisa: “Duna Sésar loke ta di Sésar, ma Dios loke ta di Dios.”—Luk. 20:25.

Por ehèmpel, suponé ku un kristian ke apliká pa haña pasport òf siudadania di un pais, anto pa haña esaki e mester hasi un huramentu di lealtat. Si e huramentu ei ta enserá ku e mester hasi algu ku ta bai kontra di e lei di Dios, su konsenshi bíblikamente entrená lo no permitié hasi e huramentu ei. Sinembargo, gobièrnu por permitié ahustá e palabranan di e huramentu di manera ku su konsenshi por ta trankil.

Ta posibel pa hasi un huramentu di lealtat ku ta adaptá di akuerdo ku e prinsipio na Romanonan 13:1 ku ta bisa: “Laga tur alma ta sumiso na outoridatnan superior.” Pues, un kristian por konkluí ku no tin nada malu den hura pa hasi algu ku Dios ta rekerí kristiannan hasi.

Un kristian lo tin ku wak tambe si su konsenshi ta permitié huramentá usando un opheto òf hasiendo un gesto. Hopi siglo pasá, e romanonan i e skitanan tabata hura pa nan spada. Di e manera ei, nan tabata pone e dios di guera komo testigu ku nan ta bai kumpli ku nan palabra. E griegonan tabata hisa nan man pa shelu ora nan tabata hasi un huramentu. Ku esei, nan tabata rekonosé ku tin un poder divino ku ta wak kiko hende ta bisa i hasi, i na kende hende mester duna kuenta i rason.

Ta klaru ku un sirbidó di Yehova lo no hura pa un emblema nashonal ku ta relashoná ku adorashon falsu. Pero, kiko awor si den korte nan pidi bo pa hura ku bo man riba Beibel ku lo bo pa papia e bèrdat? Un kristian por disidí di hasi esei pasobra Beibel ta papia di hendenan fiel ku a hasi un gesto ora nan a hura pa hasi algu. (Gén. 24:2, 3, 9; 47:29-31) Pero sa sí ku ora bo hasi e huramentu ei, bo ta hura dilanti di Dios ku lo bo papia e bèrdat. Pues, bo mester ta prepará pa kontestá tur pregunta ku e bèrdat.

Nos amistat ku Yehova ta masha balioso mes pa nos. P’esei, promé ku nos huramentá, nos tin ku hasi orashon i tuma tempu pa hasi sigur ku e huramentu no ta bai kontra nos konsenshi òf e prinsipionan di Beibel. Si bo disidí di huramentá, bo mester kumpli kuné.—1 Ped. 2:12.