1-2. Kiko nos tur tin ku sigui hasi segun ku nos ta warda e mundu nobo yega?

 NOS ta masha kontentu ku Yehova a primintí di deshasí di e mundu malbado akí i trese un mundu nobo yená ku hustisia. (2 Ped. 3:13) Nos no sa e fecha presis ku esei lo tuma lugá, pero loke nos ta mira ta sosodé rònt di nos ta mustra ku nos no tin ku warda mashá.—Mat. 24:32-34, 36; Echo. 1:7.

² Mientrastantu, nos tur tin ku sigui fortalesé nos fe den e promesa ei sin importá kuantu tempu nos tin den e bèrdat. Dikon? Pasobra asta si nos fe ta fuerte aworakí, ku tempu e por bira suak. De echo, Apòstel Pablo a yama falta di fe “e piká ku fásilmente ta stroba nos.” (Heb. 12:1) Pues pa evitá ku nos fe ta bira suak, nos tin ku sigui repasá e kosnan ku a konvensé nos ku e mundu nobo no ta leu.—Heb. 11:1.

3. Kiko nos ta bai trata den e artíkulo akí?

³ Den e artíkulo akí nos ta bai trata tres kos ku nos por hasi pa fortalesé nos fe den Yehova su promesa di un mundu nobo: (1) Meditá riba e reskate, (2) meditá riba Yehova su poder i (3) keda okupá ku aktividatnan spiritual. Djei nos ta bai mira kon e mensahe ku Yehova a duna Habakuk tambe ta fortalesé nos fe. Tin situashonnan awe ku, pa nos por trata ku nan, nos mester tin un fe fuerte den Yehova su promesa di un mundu nobo. Ban kuminsá wak algun di e situashonnan ei.

 DEN KI SITUASHON NOS MESTER DI UN FE FUERTE?

4. Nos mester di fe fuerte pa tuma ki desishonnan?

⁴ Pa tuma bon desishon, nos mester di un fe fuerte. Por ehèmpel, tur dia nos mester disidí tokante nos amistatnan, entretenimentu, edukashon, matrimonio, nos yunan i trabou. Ta bon pa nos puntra nos mes: ‘Mi desishonnan ta mustra ku mi ta konvensí ku e mundu malbado akí ta temporal i ku pronto Yehova lo trese su mundu nobo? Òf mi ta hiba mi bida manera e hendenan ku ta pensa ku morto ta fin di tur kos?’ (Mat. 6:19, 20; Luk. 12:16-21) Nos lo tuma mihó desishon si nos sigui konvensé nos mes ku e mundu nobo ta hopi serka.

5-6. Dikon nos mester tin un fe fuerte ora nos haña nos ku difikultat? Duna un ehèmpel.

⁵ Nos mester tin un fe fuerte pa logra enfrentá difikultatnan tambe. Dikon? Pasobra nos por haña nos ku persekushon, malesa króniko òf otro kos ku por laga nos bira desanimá. Na komienso kisas nos ta sinti ku nos por dil ku nos difikultat. Pero si e situashon dura pa mas largu, manera mayoria di biaha sa pasa, nos lo tin mester di un fe fuerte pa wanta i sigui sirbi Yehova ku goso.—Rom. 12:12; 1 Ped. 1:6, 7.

⁶ Ora nos ta pasando den difikultat, nos por sinti ku e mundu nobo lo no yega nunka mas. Esei ta nifiká ku nos fe no ta dje fuerte ei? No nesesariamente. Laga nos wak un ilustrashon. Suponé ku ya pa vários siman awa ta yobe sin miserikòrdia. Kisas nos por pensa ku solo lo no sali nunka mas. Asina tambe, ora nos ta desanimá, nos por sinti ku e mundu nobo lo no yega nunka mas. Pero si nos fe ta fuerte, nos lo tin sigur ku e promesanan di Yehova lo kumpli. (Sal. 94:3, 14, 15; Heb. 6:17-19) Ku e siguransa ei, nos lo sigui tene adorashon di Yehova na promé lugá den nos bida.

7. Kiko nos mester tene kuidou kuné?

⁷ Pa prediká tambe nos tin mester di un fe fuerte. Hopi hende ku nos ta papia kuné den sirbishi ta haña ku e “bon notisia” tokante e mundu nobo ta zona muchu bon pa ta bèrdat. (Mat. 24:14; Eze. 33:32) Nos tin ku tene kuidou pa e manera di pensa ei no pone nos duda den loke Yehova ta siña nos. P’esei, nos mester sigui fortalesé nos fe. Laga nos wak tres kos ku nos por hasi.

MEDITÁ RIBA E RESKATE

8-9. Dikon nos mester meditá riba e reskate si nos ke fortalesé nos fe?

⁸ Un manera ku nos ta fortalesé nos fe ta meditá riba e reskate. E reskate ta sigurá nos ku Dios lo kumpli ku su promesanan. P’esei, meditá riba e motibu pakiko Yehova a perkurá e reskate i riba tur loke esei a enserá. Esei lo duna nos un fe mas fuerte di ku Dios su promesa di bida eterno den un mundu nobo lo kumpli sigur. Dikon nos por bisa esei?

⁹ Pensa riba tur loke e reskate a enserá. Yehova a manda su promé Yu, e persona ku mas el a stima, pa nase na mundu komo hende perfekto. Ora Hesus tabata riba tera, el a pasa den tur sorto di difikultat pa despues muri un morto doloroso. Sin duda, e preis ku Yehova a paga ta hopi haltu. Komo un Dios  amoroso, nunka lo el a permití su Yu sufri asina tantu pa nos por tin un mihó bida djis pa un par di aña so. (Huan 3:16; 1 Ped. 1:18, 19) Yùist pasobra Yehova a paga un preis asina haltu, lo e hasi sigur ku nos por biba pa semper den e mundu nobo.

MEDITÁ RIBA YEHOVA SU PODER

10. Segun Efesionan 3:20, kiko Yehova por hasi?

¹⁰ Un di dos manera ku nos por fortalesé nos fe ta di para ketu i pensa riba e poder ku Yehova tin. Ku e poder ei, e por kumpli ku tur loke e ta primintí. Ta bèrdat ku e promesa di por biba pa semper den un mundu nobo por parse imposibel pa nos komo hende. Pero, Yehova hopi biaha ta primintí kosnan ku ta imposibel pa nos komo hende hasi. Kon ku bai bin, e ta Todopoderoso. (Yòb 42:2; Mar. 10:27) P’esei, no ta sorprendé nos ora e primintí nos kosnan maravioso.—Lesa Efesionan 3:20.

11. Menshoná un di e promesanan di Yehova ku a parse imposibel. (Wak e kuadro “ Algun Promesa Ku A Parse Inkreibel, Pero Ku A Kumpli.”)

¹¹ Ban wak algun promesa ku Yehova a hasi na su sirbidónan den pasado i ku a parse imposibel. Por ehèmpel, aunke Ábraham ku Sara tabata grandi kaba, Yehova a bisa nan ku nan lo a haña un yu. (Gén. 17:15-17) Tambe el a bisa Ábraham ku su desendientenan lo a haña e pais Kánan. Pero, pa hopi aña e desendientenan ei, esta, e israelitanan, tabata katibu na Egipto. Pues, nan por a pensa ku e promesa ei lo no a kumpli nunka. Pero, Yehova a kumpli kuné sí. Hopi aña despues, Yehova a bisa Elisabèt, kende ya tabata di edat, ku lo el a haña un yu. Tambe el a bisa Maria, kende tabata un bírgen, ku lo el a haña un yu; Yehova su mes Yu. Esei lo a kumpli ku un promesa ku Yehova a hasi míles di aña promé, den e Hòfi na Éden.—Gén. 3:15.

12. Kiko Hosue 23:14 i Isaías 55:10 i 11 ta yuda nos realisá tokante Yehova su poder?

¹² Ora nos para pensa riba tur e promesanan ku Yehova a hasi i kon el a kumpli ku nan, nos ta realisá kuantu poder e tin. E ora ei, nos fe ku Yehova lo trese e mundu nobo lo bira mas fuerte. (Lesa Hosue 23:14; Isaías 55:10, 11.) Komo resultado, nos lo ta mihó prepará pa yuda otro hende realisá ku e promesa di e mundu nobo no ta un soño ni un fantasia. Yehova mes a bisa tokante e promesa di un shelu nobo i un tera nobo: “E palabranan akí ta digno di konfiansa i bèrdat.”—Rev. 21:1, 5.

KEDA OKUPÁ KU AKTIVIDATNAN SPIRITUAL

13. Kon nos reunionnan ta fortalesé nos fe? Splika.

¹³ E di tres manera pa fortalesé nos fe ta di keda okupá ku aktividatnan spiritual. Por ehèmpel, pensa riba nos reunionnan. Anna, kende tin hopi aña den e trabou di tempu kompleto, a bisa: “E reunionnan a yuda mi mantené mi fe fuerte. Asta si e ruman ku tin un parti no ta e mihó maestro òf no ta trese nada nobo, semper mi ta tende algu ku ta yuda mi komprondé Beibel mihó i ku ta fortalesé mi fe.” b I sin duda, komentario di nos rumannan tambe ta fortalesé nos fe.—Rom. 1:11, 12; 10:17.

14. Kon sirbishi ta fortalesé nos fe?

 ¹⁴ Sirbishi tambe ta fortalesé nos fe. (Heb. 10:23) Barbara tin mas ku 70 aña ta sirbi Yehova. El a bisa: “Pa ami, sirbishi semper a fortalesé mi fe. M’a realisá ku mas mi papia tokante Yehova i su promesanan maravioso, mas fuerte mi fe ta bira.”

15. Kon estudio personal ta fortalesé nos fe? (Wak e plachinan.)

¹⁵ Algu ku tambe ta fortalesé nos fe ta estudio personal. Susan a ripará ku un skèdjel ta yud’é masha hopi. El a bisa: “Djadumingu mi ta prepará mi Toren di Vigilansia pa e siguiente siman. Djaluna ku djamars mi ta prepará pa e reunion di den siman. I e otro dianan mi ta hasi proyekto di estudio personal.” Dor ku Susan ta pega na su skèdjel, su fe ta sigui bira mas fuerte. Irene, kende tin hopi aña ta sirbi na e sede mundial, ta haña ku su fe ta bira mas fuerte ora e studia profesianan di Beibel. El a bisa: “Mi ta haña masha fasinante pa mira kon Yehova su profesianan ta kumpli te den e detaye di mas chikitu.” c

“E LO BIN SIGUR”

16. Kon nos sa ku loke Yehova a bisa Habakuk ta konta pa nos tambe? (Hebreonan 10:36, 37)

¹⁶ Algun sirbidó di Yehova tin hopi aña kaba ta warda riba fin di e mundu malbado akí. Ta bèrdat ku komo hende bo por pensa ku kumplimentu di e promesa ei a tarda. Yehova ta komprondé kon nos ta sinti. De echo, el a sigurá Profeta Habakuk: “E vishon lo ta pa e tempu stipulá; e ta pura yega na e fin, i e lo no faya. Maske e ta tarda, sper’é; pasobra e lo bin sigur, e lo no tarda.” (Hab. 2:3) Loke Yehova a bisa Habakuk ta konta pa  nos tambe. Kon nos sa? Wèl, bou di inspirashon, Apòstel Pablo a usa e mesun palabranan ei ora el a papia ku e kristiannan ku tabata sperando e mundu nobo. (Lesa Hebreonan 10:36, 37.) Pues, maske nos por sinti ku Yehova su promesa ta tarda, nos por konfia ku “e lo bin sigur, e lo no tarda.”

17. Kon un ruman a sigui e konseho ku Yehova a duna Habakuk?

¹⁷ Tin hopi sirbidó di Yehova ku a sigui su konseho pa spera riba kumplimentu di su promesa, i algun di nan a hasi esaki pa dékadanan largu. Por ehèmpel Louise, un ruman ku a kuminsá sirbi Yehova na 1939, a bisa: “E tempu ei m’a pensa ku Armagedon lo a bini promé ku m’a kaba skol. Pero, esei no a sosodé. Loke a yuda mi atraves di e añanan ta e relatonan den Beibel di sirbidónan di Yehova ku mester a warda riba kumplimentu di su promesanan. Mi tabata lesa e relatonan di Noe, Ábraham, Yósef i otronan ku mester a warda hopi tempu promé ku Yehova a kumpli ku su promesanan. M’a keda spera riba kumplimentu di e promesanan anto esei a yuda ami i otro hende keda konvensí ku e mundu nobo no ta leu.” Nos tin sigur ku basta ruman ku tin hopi tempu ta sirbi Yehova ta pensa meskos.

18. Kon kreashon por yuda bo haña mas fe den e promesa di un mundu nobo?

¹⁸ Ta bèrdat ku e mundu nobo no ta eksistí ainda. Pero, tuma un ratu i pensa riba algun kos ku sí ta eksistí, manera strea, palu, bestia i hende. Aunke ku niun hende no ta duda ku nan tur ta real, bo tabata sa ku tabatin un tempu ku nan niun no tabata eksistí? Pero, awor nan ta eksistí pasó Yehova a krea nan. (Gén. 1:1, 26, 27) Awèl, meskos tambe nos Dios a primintí ku lo e trese un mundu nobo anto lo e kumpli ku e promesa ei tambe. Anto den e mundu nobo ei, hende lo disfrutá di salú perfekto pa semper. Nos por tin sigur ku Dios su mundu nobo lo yega na e tempu ku é a stipulá.—Isa. 65:17; Rev. 21:3, 4.

19. Kon bo ta fortalesé bo fe?

¹⁹ Mientrastantu, usa tur chèns ku bo haña pa fortalesé bo fe. Bo por hasi esei ora bo ta meditá riba e reskate, meditá riba Yehova su poder i keda okupá ku aktividatnan spiritual. Ora bo hasi tur eseinan, lo bo ta un di “esnan ku pa medio di fe i pasenshi ta risibí loke Dios a primintí.”—Heb. 6:11, 12; Rom. 5:5.