1. Konta kiko a pasa ora Hesus a hasi su promé milager.

 IMAGINÁ ku ta lènte di aña 29, rònt di e tempu ku Hesus a kaba di kuminsá ku su sirbishi. Hesus ku su mama, Maria, i algun di su disipelnan a haña invitashon pa un kasamentu na Kana, un pueblo nort di Názarèt, kaminda Hesus tabata biba. Maria tabata bon amigu di e famia i parse ku e tabata yuda atendé ku e invitadonan. Pero durante e fiesta, algu a pasa ku por a pone kara di e pareha ku a kasa i nan famia na bèrgwensa—biña a kaba. b Kisas mas hende a bini di loke nan a ferwagt. Mesora Maria a bai serka su yu i bis’é: “Nan no tin mas biña.” (Huan 2:1-3) Kiko Hesus a hasi? Algu ekstraordinario—el a hasi awa bira biña, i no kualke biña, pero “e mihó biña.”—Huan 2:9, 10.

2-3. (a) Ki tipo di milager Hesus a hasi? (b) Dikon ta bon pa analisá Hesus su milagernan?

² Durante Hesus su sirbishi, el a hasi hopi otro milager mas. c El a usa su poder pa yuda míles i míles di hende. Por ehèmpel, na un okashon el a alimentá 5.000 hòmber i na un otro okashon, 4.000. Pero, si konta e hende muhénan i muchanan ku tambe tabat’ei, e total kisas lo  a bira mas ku 27 mil hende. (Mat. 14:15-21; 15:32-38) Na tur e dos okashonnan ei, Hesus a kura tambe hopi hende malu. (Mat. 14:14; 15:30, 31) Kon bo ta kere e hendenan ei lo a sinti ora ku Hesus a kura i alimentá nan?

³ Nos por siña hopi lès for di Hesus su milagernan. Den e artíkulo akí, nos ta bai trata algun di e lèsnan ei ku lo fortalesé nos fe. Despues nos ta bai wak kon nos por imitá e humildat i kompashon ku Hesus a mustra ora el a hasi e milagernan ei.

4. E milagernan di Hesus ta siña nos tokante ken?

⁴ E milagernan di Hesus ta siña nos lèsnan importante no solamente tokante dje, pero tambe tokante Yehova. Al fin i al kabo, ta Yehova a duna Hesus poder pa hasi e milagernan ei. Echonan 10:38 ta bisa ku ‘Dios a ungi Hesus ku spiritu santu i ku poder, i el a pasa den henter e region hasiendo bon i kurando tur esnan ku Diabel tabata oprimí. E por a hasi tur esei pasobra Dios tabata kuné.’ Kòrda tambe ku den tur loke Hesus a bisa i hasi—inkluso e milagernan—el a imitá perfektamente e manera ku su Tata a pensa i sinti. (Huan 14:9) Laga nos wak awor tres lès ku nos por siña for di Hesus su milagernan.

5. Kiko a motivá Hesus pa hasi milager? (Mateo 20:30-34)

⁵ Promé, Hesus i su Tata stima nos masha hopi mes. Na e milagernan ku Hesus a hasi pa aliviá sufrimentu di hende, el a mustra kuantu e tabata stima hende. Un biaha, dos hòmber siegu tabata grita pa Hesus yuda nan. (Lesa Mateo 20:30-34.) “Hesus a haña duele di nan” i a kura nan. Den e versíkulo akí, e verbo griego tradusí komo “haña duele” ta indiká un sintimentu di kompashon intenso ku un hende ta sinti te den su paden. Ta e sintimentu di kompashon intenso ei, ku ta un demostrashon di amor, ta loke a motivá Hesus tambe pa alimentá hende ku tabatin hamber i pa kura un leproso. (Mat. 15:32; Mar. 1:41) Nos por ta sigur ku Yehova, e Dios di “tierno kompashon” i su Yu, ta stima nos masha hopi i ta duel nan ora nan mira nos sufri. (Luk. 1:78; 1 Ped. 5:7) Nan tin hopi gana di kaba ku tur e problemanan ku ta pone humanidat sufri.

6. Ki poder Yehova a duna Hesus?

⁶ Di dos, Yehova a duna Hesus poder pa kaba ku tur problema di humanidat. Tin problemanan ku hamas nos por resolvé. Pero Hesus, ku su milagernan, a demostrá ku e sí por. Por ehèmpel, e tin poder pa libra nos di piká i tur loke e ta trese kuné, manera malesa i morto. (Mat. 9:1-6; Rom. 5:12, 18, 19) Su milagernan a proba ku e por kura “tur sorto di malesa” i asta resusitá hende ku a muri. (Mat. 4:23; Huan 11:43, 44) Tambe e tin poder pa kalma bientu fuerte i libra hende for di spiritu malbado. (Mar. 4:37-39; Luk. 8:2) Esta felis nos ta ku Yehova a duna su Yu tur e poder ei!

7-8. (a) Ki siguransa e milagernan di Hesus ta duna nos? (b) Kua milager abo tin hopi gana di mira sosodé?

⁷ Di tres, nos por ta kompletamente sigur ku Dios su Reino lo trese bendishonnan pa nos den futuro. E milagernan ku Hesus a hasi tempu ku e tabata aki riba  tera ta mustra nos loke lo e hasi riba un eskala mas grandi komo Rei di Dios su Reino. Imaginá kon bida lo ta un djis akí ora Kristu ta goberná tera. Komo ku lo e kita tur malesa i desabilidat, nos tur lo tin salú perfekto. (Isa. 33:24; 35:5, 6; Rev. 21:3, 4) Nunka mas nos lo pasa hamber ni sufri debí na desaster natural. (Isa. 25:6; Mar. 4:41) Nos lo ta super kontentu pa yama nos sernan kerí ku tabata den graf bon biní. (Huan 5:28, 29) Kua milager bo tin mas gana di mira sosodé den e mundu nobo?

⁸ Ora Hesus a hasi milager, el a demostrá humildat i kompashon, anto eseinan ta dos kualidat ku nos tambe mester tin. Laga nos trata dos relato kaminda el a demostrá e kualidatnan ei. Ban kuminsá ku e kasamentu na Kana.

9. Dikon Hesus a hasi e milager na e fiesta di kasamentu? (Huan 2:6-10)

⁹ Lesa Huan 2:6-10. Akaso Hesus mester a hasi algu ora ku biña a kaba na e fiesta di kasamentu? Nò. Niun profesia no a bisa ku e Mesías mester a kambia awa den biña. Pero, pensa un ratu: Kon abo lo a sinti bo si kos di bebe kaba na bo kasamentu? Pues, ta di komprondé dikon Hesus a sinti kompashon pa e famia, foral pa e pareha resien kasá. Sin duda, e no tabata ke pa nan pasa bèrgwensa. P’esei, el a hasi e milager ku nos a papia  tokante dje na paragraf 1. El a kambia 390 liter (103 galòn) di awa den e mihó biña ku tin. Pero, dikon un kantidat asina grandi? Kisas por a usa loke a sobra na un otro okashon òf bend’é pa yuda e pareha resien kasá. E pareha ei sigur lo a keda hopi kontentu!

10. Menshoná algun detaye interesante di e relato na Huan kapítulo 2. (Wak e plachi.)

¹⁰ Tuma nota di algun detaye interesante di e relato na Huan kapítulo 2. Bo a ripará ken a yena e tinashinan ku awa? No tabata Hesus. Komo ku e no kier a hala atenshon na su mes, el a pidi e sirbidónan pa hasi esei. (Versíkulo 6, 7) Pero despues di a hasi e milager ei, ken a hiba biña pa e direktor di fiesta purba? Atrobe no tabata Hesus. El a pidi e sirbidónan pa hib’é p’e. (Versíkulo 8) Anto bo ta kere ku Hesus lo a tuma un kopa di biña, his’é na laira i tur orguyoso a bisa e invitadonan: ‘Purba e biña dushi akí ku ami a kaba di traha’? Hamas i nunka!

11. Kiko nos ta siña for di Hesus su milager?

¹¹ Kiko nos ta siña for di e milager akí di Hesus? Un lès di humildat. Hesus no a broma. De echo, nunka el a broma tokante nada ku el a hasi. Al kontrario, e tabata humilde i semper a duna tur gloria i onor na su Tata. (Huan 5:19, 30; 8:28) Si nos ta hasi meskos ku Hesus, nos lo no pensa mas di nos mes ni broma ku nos logronan. Pues, nos lo no gaba ni broma tokante nada ku nos ta hasi pa Yehova. Mas bien, nos lo broma tokante e Dios maravioso ku nos tin e onor di sirbi. (Yer. 9:23, 24) P’esei, semper dun’é e gloria ku e meresé. Al fin i al kabo, sin yudansa di Yehova nos no por logra nèt-nèt nada.—1 Kor. 1:26-31.

12. Den ki otro manera nos por imitá Hesus su humildat? Duna un ehèmpel.

¹² Tin un otro manera tambe ku nos por imitá Hesus su humildat. Imaginá ku un ansiano ta pasa hopi tempu yudando un sirbidó ministerial hóben prepará su promé diskurso públiko. I danki na esei, e hóben ta duna un ekselente diskurso i henter e kongregashon ta gusta su diskurso mashá. Despues di reunion, un hende ta bisa e ansiano: ‘Ruman Tal i tal su diskurso tabata bon!’ E ansiano ei por bisa: ‘Sí, ta hopi tempu m’a pasa ta yud’é.’ Pero, lo ta hopi mas mihó si e ansiano bisa: ‘Sí, el a hasi un bon trabou. Mi ta hopi orguyoso di dje.’ Un hende humilde no ta buska rekonosementu pa e bon kosnan ku e ta hasi pa otronan. Mas bien, pa é ta sufisiente pa sa ku Yehova ta mira i ta balorá tur loke e ta hasi. (Kompará ku Mateo 6:2-4; Heb. 13:16) Nos por tin sigur ku Yehova lo ta masha felis ora e mira ku nos ke ta humilde meskos ku Hesus.—1 Ped. 5:6.

13. Kiko Hesus a mira ora el a yega Nain, i kiko el a hasi? (Lukas 7:11-15)

¹³ Lesa Lukas 7:11-15. Loke a pasa ei a sosodé mas o ménos dos aña despues ku Hesus a kuminsá ku su sirbishi aki riba tera. El a biaha bai Nain, un stat di Galilea no muchu leu fo’i Súnèm, kaminda Profeta Eliseo a resusitá yu di un señora. (2 Rei. 4:32-37) Nèt ora Hesus a yega na porta di e stat Nain, el a mira ku un entiero tabata bai tuma lugá. Loke a hasi e situashon hopi mas tristu tabata ku e entiero tabata di un biuda su úniko yu. E mama no tabata su so; tabatin un grupo grandi di hende di e stat huntu  kuné. Hesus a para e grupo i a hasi algu ku nunka mas e mama ei lo a lubidá: el a resusitá su yu! Esaki ta e promé di e tres resurekshonnan ku Hesus hasi ku ta pará skirbí den e Evangelio.

14. Kiko ta algun detaye importante ku nos ta siña for di e relato na Lukas kapítulo 7? (Wak e plachi.)

¹⁴ Laga nos analisá algun detaye importante for di e relato na Lukas kapítulo 7. Bo a ripará den ki órden e kosnan a pasa? Promé, Hesus “a mira” kuantu doló e mama tabatin i despues “el a haña duele di dje.” (Versíkulo 13) Kisas Hesus a mira e mama ta yora segun ku e tabata kana dilanti di e kurpa di su yu. Loke Hesus a opservá ei a kibra su kurason. Hesus no a djis sinti duele di e mama, sino el a demostrá esei ku akshon. Sin duda, ku un stèm trankilisante el a bis’é: “No yora mas.” Pero, e no a keda te ei; el a resusitá e yu i “a entreg’é na su mama.”—Versíkulo 14, 15.

15. Kiko nos ta siña for di Hesus su milager?

¹⁵ Kiko nos ta siña for di e milager akí di Hesus? Ku nos tin ku demostrá kompashon na esnan ku a pèrdè un ser kerí den morto. Ta bèrdat ku nos no por lanta hende for di morto manera Hesus a hasi ku e yu di e biuda. Pero, nos por siña sí pa demostrá kompashon na esnan ku a pèrdè un ser kerí. Promé, nos tin ku opservá i despues tuma inisiativa pa bisa òf hasi algu ku lo yuda nan i konsolá nan. d (Pro. 17:17; 2 Kor. 1:3, 4; 1 Ped. 3:8) Palabranan simpel i muestranan di kariño chikitu por nifiká hopi pa nan.

16. Manera nos por mira riba e plachi, kiko nos ta siña for di e eksperensia den e paragraf?

¹⁶ Wak loke a pasa algun aña pasá na un reunion. Miéntras ku nan tabata kanta un kantika di resurekshon, un ruman muhé a mira un otro ta yora den un otro rei. E tabata yora pasobra resientemente su yu muhé a fayesé. Komo ku e ruman muhé tabata sa loke e mama tabata  pasando aden, sin pensa dos biaha el a bai serka dje, bras’é i kanta sobrá di e kantika kuné. Mas despues e mama a bisa: “M’a ègt sinti ku e rumannan ta stima mi.” E tabata hopi kontentu ku el a bai su reunion. El a sigui bisa: “Mi tabata sa ku ei, na Salòn di Reino, lo m’a haña yudansa.” Nos por tin sigur ku Yehova ta mira i balorá asta e kosnan chikitu ku nos ta hasi pa demostrá kompashon na esnan ku a pèrdè un ser kerí i ku ta desanimá.—Sal. 34:18.

17. Kiko Hesus su milagernan ta siña nos?

¹⁷ Ora nos studia e milagernan di Hesus, nos fe lo bira hopi mas fuerte. E relatonan ei di e Evangelionan ta siña nos ku Yehova i Hesus ta stima nos masha hopi mes, ku Hesus tin tur poder pa kaba ku tur problema di humanidat i ku nos por ta kompletamente konvensí ku un djis akí e bendishonnan di Dios su Reino lo bira realidat. Ademas, nan lo duna nos chèns pa meditá riba kon pa imitá e kualidatnan di Hesus. Pues, lo ta bon pa bo studia e otro milagernan di Hesus sea den bo estudio personal òf estudio di famia. Durante e seshonnan ei, focus riba e lèsnan ku bo ta siña i papia di nan ku otronan. Asina ei sigur lo bo tin kòmbersashonnan masha animante!—Rom. 1:11, 12.

18. Kiko nos lo analisá den e siguiente artíkulo?

¹⁸ Kasi na final di Hesus su sirbishi, nos ta lesa tokante e di tres i último resurekshon ku tin registrá den e Evangelionan. Pero esun akí tabata diferente pasobra el a resusitá un bon amigu di dje ku tabata morto pa kuater dia kaba. Kiko nos por siña for di e milager ei? I kon nos por fortalesé nos fe den e speransa di resurekshon? Nos lo wak esei den e siguiente artíkulo.