1. Kon algun ruman ta sinti ora nan tin ku prediká? (Wak e plachi.)

 NOS komo Testigunan di Yehova ta prediká na hende pasó nos stima nos Tata den shelu i ke pa nan siña konosé nos Tata. Algun di nos gusta prediká, pero otro no dje tantu ei. Kon bini? Wèl, algun por ta hopi tímido i insigur. Tin no gusta bai kas di hende sin ku e hende a invitá nan. Algun tin miedu pa hende rechasá nan. Anto algun a siña den bida pa evitá konflikto ku otro hende. Aunke tur e rumannan ei stima Yehova ku henter nan kurason, tòg ta difísil pa nan kòmbersá tokante e bon notisia ku hende ku nan no konosé. Apesar di tur esei, nan sa kon importante e trabou akí ta i ta prediká regularmente. Nan esfuerso ta hasi Yehova hopi kontentu!

2. Dikon bo no mester sinti bo malu si no ta tur biaha bo tin gana di bai sirbishi?

² Kiko di abo? Abo semper tin gana di bai sirbishi? Si no ta asina, no sinti bo malu. Ban bisa bo ta sinti bo insigur. Wèl esei por indiká ku bo ta humilde i bo no ke ta mashá den spotlight. Kisas tambe ta pasó bo no gusta diskutí. Anto klaru ku bo no ke pa hende rechasá bo, foral si bo ta purba di yuda nan. Bo Tata den shelu sa bon-bon kon bo ta sinti i ke yuda bo. (Isa. 41:13) Den e artíkulo akí nos lo wak sinku kos ku nos tin ku hasi ora nos tin e sintimentunan ei i kon nos por haña goso den nos sirbishi.

 HAÑA FORSA FOR DI DIOS SU PALABRA

3. Kiko a yuda Profeta Yeremías pa prediká?

³ Atraves di tempu, e mensahe di Yehova a fortalesé su sirbidónan ora ku nan tabatin asignashon difísil nan dilanti. Por ehèmpel, Profeta Yeremías a haña miedu ora Yehova a dun’é asignashon pa prediká. Yeremías a bisa: “Mi no sa kon pa papia; ta mucha mi ta.” (Yer. 1:6) Kiko a yud’é haña kurashi pa prediká? Yehova su palabranan a fortales’é. Yeremías a bisa: “Su palabranan tabata kima manera . . . un kandela será den mi wesunan. Mi a keda kansá di tene nan aden.” (Yer. 20:8, 9) Yeremías su teritorio no tabata fásil. Pero apesar di esei, e mensahe ku e mester a prediká a dun’é kurashi.

4. Kiko ta pasa ora nos lesa Dios su Palabra i meditá riba dje? (Kolosensenan 1:9, 10)

⁴ Awendia, kristiannan tambe ta haña kurashi for di e mensahe den Dios su Palabra. Apòstel Pablo a skirbi un karta na e kristiannan na Kolósas. El a bisa nan ku si nan siña mas tokante Yehova su boluntat, esei lo yuda nan “kana na un manera digno di Yehova” i dje manera ei “sigui duna fruta den tur bon obra.” (Lesa Kolosensenan 1:9, 10.) E bon obra ei ta enserá e trabou di prediká. Pues, ora nos lesa Dios su Palabra i meditá riba dje, nos fe den Yehova ta bira mas fuerte i nos ta komprondé e importansia di prediká e mensahe dje Reino.

5. Kon bo por saka mihó probecho ora bo ta lesa i studia Dios su Palabra?

⁵ Pa saka mihó probecho for di Dios su Palabra, evitá di lesa, studia i meditá lihé-lihé. Ora bo ta studia, tuma bo tempu. Si bo dal den un teksto ku bo no ta komprondé, no salt’é. Mas bien bai den Guia pa Buska Informashon den Publikashonnan di Testigunan di Yehova i buska splikashon di e teksto ei. Si bo tuma bo tempu pa studia, lo bo ta mas sigur ku loke Dios su Palabra ta bisa ta bèrdat. (1 Tes. 5:21) Mas sigur bo ta di esei, mas lo bo disfrutá di papia ku otro hende tokante loke bo a siña.

PREPARÁ BON

6. Dikon nos mester prepará bon pa sirbishi?

⁶ Si bo prepará bon pa sirbishi, lo bo sinti bo mas kómodo pa papia ku  otro hende. Hesus a yuda su disipelnan prepará bon promé ku el a manda nan den sirbishi. (Luk. 10:1-11) Debí ku nan a hasi loke Hesus a siña nan, nan por a logra hopi kos bon i esei a hasi nan masha kontentu.​—Luk. 10:17.

7. Kon nos por prepará pa sirbishi? (Wak e plachi.)

⁷ Kon nos por prepará pa sirbishi? Nos tin ku pensa bon riba loke nos ke papia. Asina ei ora nos haña hende, nos por papia ku nos mes palabra. Algu otro ku por yuda nos ta di imaginá dos òf tres kos ku hende por bisa anto pensa kon nos lo kontestá. E ora ei ora nos haña hende, nos por rilèks, smail i sea amigabel.

8. Den ki sentido kristiannan ta manera e pòchi di klei menshoná den Pablo su ilustrashon?

⁸ Den un ilustrashon, Apòstel Pablo a splika kiko ta nos ròl den e trabou di prediká. El a bisa: “Nos tin e tesoro akí den pòchi di klei.” (2 Kor. 4:7) E tesoro ta e mensahe dje Reino ku nos ta prediká; un trabou ku ta salba bida. (2 Kor. 4:1) E pòchi di klei ta representá sirbidónan di Yehova ku ta hiba e bon notisia na otro hende. Den tempu di Pablo, komersiantenan tabata usa pòchi di klei pa transportá kosnan balioso manera kuminda, biña i plaka. Asina tambe, Yehova a duna nos algu hopi balioso kual ta su mensahe, e bon notisia. Ku Yehova su yudansa, nos tin e forsa pa hiba e mensahe ei fielmente.

PIDI YEHOVA KURASHI

9. Kiko nos por hasi si nos tin miedu di oposishon òf rechaso? (Wak e plachi.)

⁹ Sa sosodé ku nos ta sinti miedu di oposishon òf rechaso. Si ta asina, kiko bo por hasi? Wak loke e apòstelnan a hasi ora ku nan enemigunan a prohibí nan di prediká. Nan no a haña miedu i stòp di prediká, mas bien nan a pidi Yehova pa yuda nan “sigui papia [su] palabranan ku kurashi.” Anto Yehova a kontestá nan orashon mesora. (Echo. 4:18, 29, 31) Ora bo tambe sinti miedu, pidi Yehova yuda bo. Pidié yuda bo hasi e amor ku bo tin pa hende mas fuerte ku bo miedu.

10. Ki yudansa Yehova ta duna nos? (Isaías 43:10-12)

 ¹⁰ Yehova a skohe nos pa ta su Testigunan i ta primintí di duna nos kurashi. (Lesa Isaías 43:10-12.) At’akí kuater manera ku e ta hasi esei. Di promé, Hesus ta ku nos ki ora ku nos prediká. (Mat. 28:18-20) Di dos, Yehova ta manda su angelnan pa yuda nos. (Rev. 14:6) Di tres, Yehova ta duna nos su spiritu santu pa yuda nos kòrda e kosnan ku nos a siña. (Huan 14:25, 26) Di kuater, Yehova a duna nos nos rumannan den kongregashon pa prediká huntu ku nos. Si nos tin yudansa di Yehova i di nos rumannan, nos tin tur loke nos mester pa sigui prediká ku kurashi.

SEA FLEKSIBEL I KEDA POSITIVO

11. Kiko bo por hasi pa haña mas hende pa papia kuné? (Wak e plachi.)

¹¹ Bo sa sinti desanimá ora kasi no tin niun hende na kas? Si ta asina, puntra bo mes: ‘Unda e hendenan ta?’ (Echo. 16:13) ‘Nan ta trahando, hasiendo kompra òf nan ta na laman?’ Den e kaso ei, tin algu otro ku bo por hasi? Kisas prediká den áreanan públiko? Wak loke Ruman Joshua a bisa: “Kanando den lugánan públiko, m’a logra topa hopi hende.” E ku su kasá, Bridget, ta topa mas tantu hende ora nan prediká promé ku bira skur i tambe riba djadumingu despues di mèrdia.​—Efe. 5:15, 16.

12. Kon nos por saka afó kiko hende ta pensa òf loke ta importante pa nan?

¹² Si hende no ta masha interesá den nos mensahe, purba di saka afó kiko nan ta pensa òf kiko ta importante pa nan. Joshua i Bridget ta usa e pregunta di e tratadonan pa kuminsá un kòmbersashon. Por ehèmpel, ora nan usa e tratado Kiko Bo Ta Pensa di Beibel?, nan ta bisa: “Tin hende ta haña ku Beibel ta di Dios, pero tin hende nò. Kiko abo ta pensa?” Asina ei hopi biaha un kòmbersashon ta habri.

13. Dikon nos por bisa ku nos a logra nos meta asta si hende no skucha? (Proverbionan 27:11)

 ¹³ Pero sea ku hende skucha òf nò, nos a logra nos meta tòg. Dikon nos por bisa esei? Pasó nos a hasi presis loke Yehova i su Yu a manda nos hasi: duna testimonio. (Echo. 10:42) Pues, no ta importá si nos no logra papia ku niun hende òf si nan rechasá nos mensahe. Semper nos por sinti goso pasobra nos sa ku nos ta hasiendo nos Tata den shelu kontentu.​—Lesa Proverbionan 27:11.

14. Dikon henter kongregashon por alegrá ora un publikadó haña un hende interesá den teritorio?

¹⁴ Ora un otro publikadó haña un hende interesá den teritorio, nos tambe por alegrá kuné. E Toren di Vigilansia a yega di kompará nos trabou ku búskeda di un mucha pèrdí. Tin hopi hende ku lo busk’é, kubriendo un área tras di otro. Ora ku por fin un hende haña e mucha, no solamente esun ku a hañ’é ta alegrá ma tur hende lo alegrá. Asina tambe, tur publikadó den kongregashon ta yuda ku e trabou di hasi hende disipel. Nan ta kubri henter e teritorio i tur ta alegrá ora un hende kuminsá bin reunion.

FOCUS RIBA AMOR

15. Kon nos por haña mas gana di prediká? (Mateo 22:37-39) (Wak e plachi.)

¹⁵ Nos por haña mas gana di prediká si semper nos keda kòrda ku nos trabou di prediká ta un manera ekselente pa mustra ku nos stima Yehova i nos próhimo. (Lesa Mateo 22:37-39.) Djis imaginá kon kontentu Yehova ta ora e mira nos prediká i kon felis hende lo ta ora nan kuminsá studia Beibel. Anto pensa tambe ku esnan ku skucha nos mensahe i skohe pa sirbi Yehova por biba pa semper.​—Huan 6:40; 1 Tim. 4:16.

16. Kon nos por sinti goso den nos sirbishi ora nos no por sali fo’i kas? Duna ehèmpel.

¹⁶ Si pa un motibu òf otro bo no por sali fo’i kas, focus riba loke sí bo por hasi pa mustra bo amor pa Yehova i pa bo próhimo. Durante pandemia di COVID-19, Samuel i Dania no por a sali  fo’i kas. Atraves di tur e tempu difísil ei, nan a prediká via telefòn, a skirbi karta i a duna estudio di Beibel via Zoom. Tambe Samuel tabata prediká na e klínika kaminda e tabata haña tratamentu di kanser. El a bisa: “Difikultatnan den bida por kansa nos mentalmente, físikamente i spiritualmente. P’esei nos mester di e goso ku e sirbishi di Yehova ta duna nos.” Meimei di tur esei, Dania a kai i a keda na kama pa tres luna largu. Despues, e mester a usa ròlstul pa seis luna. Dania a bisa: “M’a purba di hasi tur loke mi tabata por den mi sirkunstansia. Mi por a prediká na un zùster ku tabata bishitá mi i papia ku hende ku tabata trese kos na kas pa mi. Tambe mi tabatin bon kòmbersashonnan na telefòn ku un representante di un kompania ku ta bende artíkulonan médiko.” Ta bèrdat ku Samuel i Dania no por a hasi mesun tantu ku nan tabata hasi promé, pero nan a hasi loke nan tabata por i a sinti goso den esei.

17. Na ki momento e sinku puntonan menshoná den e artíkulo akí lo funshoná mihó?

¹⁷ Purba di apliká tur e sinku puntonan menshoná den e artíkulo akí. Kada un di nan ta manera ingrediente di un resèpt. Ora bo usa tur e ingredientenan huntu, e resultado lo ta bon i dushi. Asina tambe, si nos apliká tur e sinku puntonan huntu, nos lo ta mas kapas pa lucha kontra nos sintimentunan negativo i haña mas goso den nos sirbishi.