1. Kon importante pan tabata den tempu di Beibel?

 DEN tempu di Beibel, pan tabata un alimento básiko. (Gén. 14:18; Luk. 4:4) E tabata dje importante ei ku Beibel tin biaha ta us’é pa referí na kuminda en general. (Mat. 6:11) Pan tabata e kos sentral den dos di Hesus su milagernan bon konosí. (Mat. 16:​9, 10) Un di nan nos ta haña na Huan kapítulo 6. Nos por saka vários lès for di e relato ei. Ban wak ki nan ta.

2. Ki situashon a presentá despues ku Hesus a papia ku un kantidat grandi di hende?

² E apòstelnan a kaba di bini for di un gira di predikashon. Hesus a bai ku nan den un boto na e otro banda di Laman di Galilea pa asina nan por a sosegá. (Mar. 6:​7, 30-32; Luk. 9:10) Nan a yega na un lugá solitario den área di Bètsaida. Pero hende a tende ku Hesus tabata einan, i no a tarda mashá ku un kantidat grandi di hende a bin pa wak é. Hesus no a ignorá nan. Mas bien, e tabata amabel i a usa su tempu pa papia ku nan tokante e Reino i kura esnan malu. Komo ku a kuminsá bira lat, e disipelnan tabata puntra nan mes: ‘Ta unda tur e hendenan akí lo haña algu di kome?’ Algun di nan kisas tabatin un tiki kuminda, pero mayoria di nan lo mester a bai den e pueblitonan i kumpra algu di kome. (Mat. 14:15; Huan 6:​4, 5) Kiko Hesus lo a hasi?

 UN MILAGER DI PAN

3. Kiko Hesus a bisa su apòstelnan hasi pa e hendenan? (Wak e plachi.)

³ Hesus a bisa su apòstelnan: “Nan no tin nodi di bai; boso duna nan algu di kome.” (Mat. 14:16) Esei tabata parse imposibel pasó tabatin mas o ménos 5.000 hende hòmber. Anto si a konta hende muhé i mucha aserka, lo tabatin kisas 15.000 hende. (Mat. 14:21) Andres a bisa: “Tin un mucha hòmber chikitu akinan ku tin sinku pan di puspas i dos piská chikitu. Ma kon esakinan por yega pa tantu hende asina?” (Huan 6:​9, nota) Pan di puspas tabata komun i barata i e piskánan chikitu kisas tabata seku i salgá. Pero e kantidat di kuminda ei hamas lo a yega pa tantu hende asina.

4. Kiko nos por siña di Huan 6:​11-13? (Wak e plachi.)

⁴ Hesus ke tabata hospitalario, pues el a pidi e hendenan pa sinta na grupo riba e yerba. (Mar. 6:​39, 40; lesa Huan 6:​11-13.) Djei, el a gradisí su Tata pa e pan i e piskánan. Esei tabata na lugá pasó ta Yehova ta esun ku a pèrkurá e kuminda. Ta bon pa, meskos ku Hesus, semper nos resa promé ku nos kome, sin importá unda nos ta. Despues, Hesus a laga parti e kuminda, i e hendenan a kome barika yen. Tabatin asina tantu kuminda te ku a sobra. Hesus no tabata ke pa nada bai dispidí, p’esei el a bisa su disipelnan pa kue tur loke a sobra, kisas pa usa despues. Esei ta un bon ehèmpel pa nos. Si nos tin yu, nos por usa e relato akí pa siña nan resa promé ku kome, pa ta  hospitalario, pa siña parti ku hende i pa no dispidí.

5. Kon e hendenan a reakshoná ora nan a mira e milagernan ku Hesus a hasi, pero kiko Hesus a hasi?

⁵ E hendenan a keda impreshoná pa Hesus su manera di siña i pa su milagernan. Sabiendo ku Moises a primintí ku Dios lo manda un gran profeta, kisas nan lo a puntra nan mes: ‘Ta Hesus ta e profeta aki?’ (Deu. 18:​15-18) Den e kaso ei, kisas nan a pensa ku Hesus lo ta un gobernante eksepshonal, ku te asta por duna tur hende na Israel pan. Ta p’esei nan kier a ‘gara Hesus pa hasié rei.’ (Huan 6:​14, 15) Si Hesus a permití esei, lo e tabata partisipá den polítika. Kiko Hesus a hasi? Beibel ta bisa ku ‘el a kita bai den seru.’ Apesar ku nan a preshon’é, e no a mete den polítika. Esei ta un lès masha importante pa nos.

6. Kon nos por imitá Hesus? (Wak e plachi.)

⁶ Klaru ku niun hende lo no pidi nos pa hasi milager di pan ni pa kura hende. Tampoko nan lo no purba di hasi nos rei ni gobernante. Ma nan por purba di konvensé nos pa vota òf, pa di un manera òf otro, apoyá un hende ku nan ta kere por drecha kosnan. Pero, e ehèmpel ku Hesus a laga pa nos ta bon kla. El a nenga di mete den asuntunan polítiko. Mas despues, el a asta bisa: “Mi reino no ta parti di e mundu akí.” (Huan 17:14; 18:36)  Komo kristian, nos tin ku pensa i aktua mané Hesus. Nos ta apoyá Dios su Reino, ta konta otro hende tokante e Reino ei i ta resa pa e bini. (Mat. 6:10) Tin mas kos ku nos por siña for di Hesus su milager di pan.

“E NIFIKASHON DI E PANNAN”

7. Kiko Hesus a hasi, i kon e apòstelnan a reakshoná? (Huan 6:​16-20)

⁷ Despues ku Hesus a alimentá e hendenan, el a bisa su apòstelnan pa regresá Kapernaum ku boto. Pero e mes a bai den seru pa evitá ku e hendenan lo a hasié rei. (Lesa Huan 6:​16-20.) Miéntras ku e apòstelnan tabata riba laman, un tormenta a forma kompañá ku ráfaga di bientu fuerte i ola grandi. Diripiente nan a mira Hesus ta kana bin serka nan riba awa. El a bisa Pedro ku e tambe por kana riba awa. (Mat. 14:​22-31) Asina ku Hesus a subi e boto, e tormenta a kalma. E disipelnan a keda masha asombrá mes te ku nan a bisa: “Di bèrdat bo ta Yu di Dios.” a (Mat. 14:33) Ta interesante ku nan a bisa esei despues ku Hesus a kana riba awa i no despues ku el a hasi e milager di pan. Tuma nota di loke Marko a skirbi tokante e mesun relato. El a skirbi: “[E apòstelnan] a keda masha asombrá mes, pasobra nan no a kapta e nifikashon di e pannan ku el a parti, i den nan kurason, ainda nan tabatin problema pa komprondé.” (Mar. 6:​50-52) Nan no a komprondé kuantu poder Yehova a duna Hesus pa hasi milager. Un poko despues, Hesus a papia tokante e milager di pan i nos por saka un otro lès importante for di loke el a trese dilanti.

8-9. Dikon e multitut a bai buska Hesus? (Huan 6:​26, 27)

⁸ E siguiente dia, e mesun multitut a bai na e lugá ku Hesus a duna nan algu di kome. Pero ora nan a mira ku ni Hesus ni su apòstelnan no tabat’ei, nan a subi boto ku a bini for di Tiberias i a bai Kapernaum pa buska Hesus. (Huan 6:​22-24) Akaso nan a hasi tur esei pa skucha mas tokante e Reino? Nò. Básikamente loke nan tabata ke ta pa Hesus duna nan mas pan. Kon nos sa esei?

⁹ Wak loke a pasa ora nan a haña Hesus serka di Kapernaum. Hesus a bisa nan ku nan a bin busk’é djis pasó nan tabata ke pan. El a bisa ku nan “a kome di e pannan i [a] keda satisfecho,” ku “kuminda ku ta daña.” Ma, el a animá nan pa traha pa “kuminda ku ta dura i ku ta hiba na bida eterno.” (Lesa Huan 6:​26, 27.) Tambe el a bisa nan ku su Tata lo pèrkurá e kuminda ei pa medio di dje. Nan lo a keda sorprendé di tende ku un kuminda por duna nan bida eterno. Pero ta kua kuminda esei lo ta, i kon nan por a hañ’é?

10. Kiko e hendenan mester a hasi pa “haña bida eterno”?

¹⁰ E hudiunan ei tabata ke sa ki nan mester a hasi pa haña e kuminda ei. Kisas nan a pensa ku nan mester a hasi e kosnan ku Lei di Moises a bisa. Pero, Hesus a bisa nan: “Esaki ta loke Dios ta aprobá: pa boso pone fe den esun ku El a manda.” (Huan 6:​28, 29) Pa “haña bida eterno,” nan mester a pone fe den esun ku Dios a manda. Hesus a yega di papia tokante esei kaba. (Huan 3:​16-18, 36)  I mas despues lo el a bolbe papia tokante loke nos tin ku hasi pa haña bida eterno.—Huan 17:3.

11. Kon e hudiunan a mustra ku ta riba pan literal so nan tabata pensa? (Salmo 78:​24, 25)

¹¹ E hudiunan ei no kier a kere ku nan mester pone fe den Hesus. Nan a puntr’é: “Ki señal milagroso abo ta bai hasi pa nos por mira i asina kere bo?” (Huan 6:30) Nan a bisa ku den tempu di Moises, nan antepasadonan a haña mana, ku tabata nan pan, esta, nan kuminda di tur dia. (Neh. 9:15; lesa Salmo 78:​24, 25.) Ta bisto ku nan mente tabata riba pan literal. Anto ora Hesus a papia despues tokante “e berdadero pan” ku, kontrali na e mana, por duna nan bida eterno, nan no a wòri puntr’é mes kiko e tabata ke men. (Huan 6:32) Nan tabata asina di focus riba nan nesesidat físiko ku nan no tabata skucha loke Hesus tabata purba di siña nan tokante hañamentu di bida eterno. Kiko nos por siña for di esaki?

LOKE MESTER TA MAS IMPORTANTE PA NOS

12. Kon Hesus a mustra bon kla loke ta mas importante?

¹² Un lès importante ku nos ta haña na Huan kapítulo 6 ta ku nos nesesidatnan spiritual, esta, obedesé Yehova i tin un bon amistat kuné, mester ta e kos di mas importante den nos bida. Hesus a mustra esei ora Satanas a purba di hink’é den tentashon. Na e okashon ei, Hesus a mustra ku obedensia na Yehova tabata mas importante ku satisfasé e nesesidat físiko ku e tabatin. (Mat. 4:​3, 4) Durante Sermon Riba Seru, tambe el a enfatisá ku nos mester ta konsiente di nos nesesidat spiritual. (Mat. 5:3) Pues ta na su lugá pa nos puntra nos mes: ‘E manera ku ami ta hiba mi bida ta mustra ku mi amistat ku Yehova ta mas importante ku satisfasé e deseonan ku mi tin?’

13. (a) Dikon no ta malu ku nos ta disfrutá di kuminda? (b) Ki atvertensia nos mester tuma na serio? (1 Korintionan 10:​6, 7, 11)

¹³ No tin nada malu pa nos pidi Yehova e kosnan ku nos mester i pa disfrutá di nan. (Luk. 11:3) Beibel ta bisa ku “ta bon pa un hende kome i bebe i haña goso di su trabounan duru ku e ta hasi,” i ku esaki ta “danki na e Dios berdadero.” (Ekl. 2:24; 8:15; Sant. 1:17) Pero, asina mes nos tin ku paga tinu pa no laga nos nesesidatnan material bira e kos di mas importante den nos bida. Anto ta esei Apòstel Pablo a kòrda e rumannan ku el a skirbi na Korinto. El a menshoná algun kos di Israel su pasado, inkluso loke a sosodé serka di Seru Sinaí. Djei, el a spièrta e rumannan pa no “deseá kosnan perhudisial, manera [e israelitanan] a deseá.” (Lesa 1 Korintionan 10:​6, 7, 11.) Yehova a hasi milagernan pa pèrkurá kuminda pa e israelitanan. Pero debí na nan deseo golos pa kuminda, e kuminda a bira perhudisial, òf malu, pa nan. (Num. 11:​4-6, 31-34) Ora nan a adorá e bisé di oro, nan a mustra ku nan tabata mas interesá den kome, bebe i gosa ku obedesé Yehova. (Éks. 32:​4-6) Pablo a usa e kosnan ku a sosodé ei komo un spièrtamentu pa e kristiannan ku tabata biba serka di e tempu ku Herúsalèm i su tèmpel a ser destruí na aña 70 D.K. Awe nos tambe ta biba hopi serka di e tempu ku e mundu malbado akí lo ser destruí, pues ta masha importante  pa nos no kometé e mesun fayo ku e israelitanan.

14. Kiko Beibel ta bisa tokante kuminda den e mundu nobo?

¹⁴ Ora Hesus a siña nos pa pidi Dios pa “nos pan di kada dia,” el a papia tambe di e tempu ku Dios su boluntat lo “sosodé na tera, meskos ku den shelu.” (Mat. 6:​9-11) Kon bo ta imaginá mundu lo ta e tempu ei? Beibel ta indiká ku Dios su boluntat ta inkluí bon kuminda tambe. Na Isaías 25:​6-8 nos ta lesa ku lo tin hopi kuminda dushi i di bon kalidat. Anto Salmo 72:16 ta bisa: “Lo tin abundansia di grano riba tera, sí, asta riba tòp di seru.” Bo ta mira bo mes kaba ta traha bo pan faborito ku e grano ei òf ta purba un reseta nobo kuné? Anto bo por disfrutá di biña di wendrùif ku bo mes a planta. (Isa. 65:​21, 22) Tur hende na mundu lo disfrutá di e kosnan maravioso akí.

15. Kiko hende ku resusitá lo siña? (Huan 6:35)

¹⁵ Lesa Huan 6:35. Kiko ta spera e kantidat grandi di hende ku a kome di e pan i piská ku Hesus pèrkurá? Aunke hopi di nan por ta no a pone fe den Hesus, kisas nan lo haña resurekshon i bo por sera konosí ku algun di nan. (Huan 5:​28, 29) Pero nan lo tin ku siña loke e siguiente palabranan di Hesus ta nifiká: “Ami ta e pan ku ta duna bida. Esun ku bini serka mi, lo no haña hamber mas.” Nan mester pone fe den Hesus su sakrifisio di reskate, esta, fe ku el a duna su bida pa nan. E tempu ei den e mundu nobo, tur hende ku resusitá i kualke yu ku nase lo siña e bèrdat tokante Yehova i su propósito. Nos lo ta masha kontentu pa yuda nan siña e kosnan maravioso akí. Yuda otro hende krea un amistat ku Yehova lo duna nos mas satisfakshon ku kualke pan ku nos lo kome den mundu nobo.

16. Kiko nos lo analisá den e siguiente artíkulo?

¹⁶ Te asina leu ta un parti so nos a trata di Huan kapítulo 6. Pero Hesus tabatin mas kos di bisa tokante “bida eterno.” Esei tabata algu di interes pa e hudiunan ei i pa nos tambe. Den e siguiente artíkulo nos lo sigui analisá Huan kapítulo 6.