1. Dikon hopi hende ta pensa ku ta imposibel pa biba pa semper?

 HOPI hende ta hasi nan bèst pa keda salú dor di wak bon ki nan ta kome i hasi ehersisio. Ma nan sa ku tur esei lo no evitá nan di bira bieu i muri. Kisas nan ta pensa ku ta imposibel pa biba pa semper. Pero na Huan 3:16 i 5:24 Hesus a bisa ku “bida eterno” ta posibel.

2. Kiko Huan kapítulo 6 ta bisa tokante bida eterno? (Huan 6:​39, 40)

² Manera nos a mira den e artíkulo anterior, Hesus a duna míles di hende pan i piská pa kome. (Huan 6:​5-35) Esei tabata algu asombroso, pero loke el a bisa nan e siguiente dia ora nan a siguié te Kapernaum, serka di kosta di laman di Galilea, tabata asta mas asombroso ainda. Einan el a bisa nan ku lo e resusitá hende ku a muri i ku nan lo haña bida eterno. (Lesa Huan 6:​39, 40.) Ku e palabranan ei Hesus a indiká ku hopi hende ku a muri lo resusitá. Esei no ta laga bo pensa riba bo amigunan i sernan kerí ku a fayesé? Tantu nan komo abo por biba pa semper. Pero loke Hesus a sigui bisa despues di Huan 6:40 tabata difísil pa mayoria di hende di e multitut komprondé. Anto esei ta e kaso pa mayoria di hende awe tambe. Ta kiko Hesus a bisa anto?

3. Segun Huan 6:​51, kiko Hesus a bisa di su mes?

 ³ E multitut di hende ku a bini Kapernaum a mira un konekshon entre e pannan ku Hesus a duna nan e dia promé i e mana ku Yehova a duna nan antepasadonan. Beibel mes ta yama mana “pan for di shelu.” (Sal. 105:40; Huan 6:31) Hesus a usa e tópiko di mana pa siña nan algu masha importante. El a splika nan ku tabatin un diferensia grandi entre é i e mana. Aunke e mana tabata un regalo di Yehova, esnan ku a kom’é, ku tempu, a muri. (Huan 6:49) Pero Hesus a yama su mes “e berdadero pan ku ta bini for di shelu,” “e pan ku Dios ta duna” i “e pan di bida” anto el a agregá: “Si un hende kome di e pan akí, lo e biba pa semper.” (Huan 6:​32, 33, 35; lesa Huan 6:51.) E palabranan ei a laga e hudiunan ei tur konfundí. Ta kon Hesus por bisa ku el a baha for di shelu i ku e ta un mihó “pan” ku e mana ku Dios a duna nan antepasadonan? Djei Hesus a bisa nan: “E pan ku lo mi duna pa mundu por biba ta mi karni.” Ta kiko lo e tabata ke men ku esei? Ta importante pa nos sa e kontesta pasó asina nos lo haña sa kon nos i nos sernan kerí por biba pa semper. Ban wak di kiko Hesus tabata papia.

LOKE “PAN BIBU” I “MI KARNI” KE MEN

4. Dikon algun hende a spanta ora nan a tende loke Hesus a bisa?

⁴ Algun di e hudiunan a spanta ora nan a tende Hesus bisa ku lo e duna su “karni pa mundu por biba.” Kisas nan a pensa ku e tabata ke pa nan kome su karni mes, ku lo ta kanibalismo. (Huan 6:52) Pero loke Hesus a sigui bisa a shòk nan mas tantu ainda. El a bisa: “A ménos ku boso kome e karni di e Yu di hende i bebe su sanger, boso lo no haña bida.”—Huan 6:53.

5. Dikon nos por tin sigur ku Hesus no tabata pidiendo e hudiunan pa bebe su sanger?

⁵ For di den tempu di Noe, Dios a prohibí hende di kome sanger. (Gén. 9:​3, 4) Yehova a bolbe ripití esei den su Lei ku el a duna e israelitanan. Mester a mata tur hende ku tabata kome sanger. (Lev. 7:27) Hesus tabata tene su mes na tur loke e leinan di Yehova a bisa. (Mat. 5:​17-19) Pues ta imposibel ku Hesus lo tabata ke pa nan literalmente kome su karni i bebe e sanger den su benanan. El a usa e palabranan ei mas bien pa hala atenshon di e hudiunan pasó e kier a siña nan kon pa “haña bida eterno.”—Huan 6:54.

6. Kon nos tin ku komprondé loke Hesus a bisa na Huan 6:53?

⁶ Ta opvio ku Hesus tabata usando komparashon, mané el a hasi anteriormente ora el a bisa e muhé samaritano: “Ken ku bebe di e awa ku ami lo dun’é lo no haña set nunka mas; mas bien, e awa ku ami lo dun’é lo bira den dje un fuente di awa ku ta brota pa duna bida eterno.” (Huan 4:​7, 14) a Hesus no tabata bisando ku pa e muhé samaritano haña bida eterno e mester a bebe awa di un pos spesífiko. Asina tambe, ora el a papia ku e multitut na Kapernaum, e  no tabata bisando nan ku pa nan biba pa semper nan mester a kome su karni i bebe su sanger literal.

DOS OKASHON DIFERENTE

7. Kiko algun hende ta bisa tokante loke Hesus a bisa na Huan 6:53?

⁷ Tin sierto religion ta para ariba ku na Huan 6:53 Hesus eigenlijk tabata bisando loke tin ku sosodé na Sena di Señor, pasó el a usa palabranan paresido na e momento ei. (Mat. 26:​26-28) Nan ta bisa ku ora di pasa e pan i e biña, tur hende tin ku kome i bebe. Pero nan tin rason? Ta importante pa nos averiguá esei pasó tur aña miónes di hende ta reuní ku nos pa e evento ei. Laga nos wak algun diferensia entre loke tin skirbí na Huan 6:53 i loke Hesus a bisa na e Sena di Señor.

8. Menshoná dos diferensia entre e dos okashonnan. (Wak e plachi.)

⁸ Laga nos analisá dos diferensia. E promé ta e momento ku Hesus a papia i luga, i e di dos ta ku ken e tabata papiando. Ban kuminsá ku e promé. Hesus a bisa e palabranan na Huan 6:​53-56 na aña 32 di promé siglo na Galilea. Anto mas o ménos un aña despues el a introdusí e Sena di Señor na Herúsalèm. Ban pa e di dos diferensia.  Mayoria di e hendenan ku Hesus tabata papiando kuné na Galilea tabata mas interesá den kuminda ku den siña tokante Yehova òf Dios su Reino. (Huan 6:26) De echo, ora ku Hesus a bisa algu ku nan a haña difísil pa komprondé, mesora nan a pèrdè fe den dje. Asta algun di su disipelnan a stòp di siguié. (Huan 6:​14, 36, 42, 60, 64, 66) Pero, e hendenan ei tabata kompletamente diferente for di e 11 apòstelnan fiel ku tabata ku Hesus un aña despues na aña 33 durante e Sena di Señor. Aunke e 11 apòstelnan no a komprondé tur loke Hesus tabata siña nan na e okashon ei, nan tabata konvensí ku e tabata e Yu di Dios ku a bini for di shelu. (Mat. 16:16) P’esei Hesus a elogiá nan i a bisa: “Boso ta esnan ku a keda huntu ku mi durante mi pruebanan.” (Luk. 22:28) E dos diferensianan akí só ta mustra ku na Huan 6:53 Hesus no tabata bisa loke tin ku sosodé na e Sena di Señor. Pero tin mas diferensia ainda.

HESUS SU PALABRANAN I ABO

9. Loke Hesus a papia di dje na e Sena di Señor ta konta pa ken?

⁹ Durante e Sena di Señor, Hesus a ofresé su apòstelnan pan sin zürdeg i a bisa nan ku esei a representá su kurpa. Djei el a pasa e biña i a bisa nan ku esei a representá e “sanger di e pakto.” (Mar. 14:​22-25; Luk. 22:20; 1 Kor. 11:24) Loke el a bisa ei ta masha importante. E pakto nobo no ta ku henter humanidat pero solamente ku “e kas di Israel,” esta, ku esnan ku lo goberná ku Hesus den Dios su Reino. (Heb. 8:​6, 10; 9:15) Na e momento ei, e apòstelnan no a komprondé tur kos tokante e pakto. Pero, un par di tempu despues nan lo a ser ungí i lo a forma parti di e pakto nobo pa haña un lugá huntu ku Hesus den shelu.—Huan 14:​2, 3.

10. Ki ta un otro diferensia entre loke Hesus a bisa na Galilea i loke el a bisa na e Sena di Señor? (Wak e plachi.)

¹⁰ Loke Hesus a bisa durante Sena di Señor tabata konta pa e “tou chikitu.” E promé hendenan ku a forma parti di e grupo ei tabata Hesus su fiel apòstelnan ku tabata kuné den e kamber. (Luk. 12:32) Tantu nan komo otro hende ku lo forma parti di e grupo ei tin ku kome di e pan i bebe di e biña. Nan tur lo haña un lugá den shelu huntu ku Hesus. Esaki ta un otro diferensia entre loke Hesus a bisa na Galilea i loke el a bisa su apòstelnan na e Sena di Señor. Na Galilea e tabatin un multitut grandi di hende na mente, i no un grupo chikitu manera na e Sena di Señor.

11. For di kiko ta bisto ku loke Hesus a bisa na Galilea no tabata pa un grupo limitá?

¹¹ Na aña 32, ora Hesus tabata na Galilea, e tabata papiando prinsipalmente ku hudiunan ku tabata ke p’e duna nan pan. Pero el a purba di yuda nan komprondé ku tabatin algu muchu mas importante ku kuminda literal. Algu ku por a duna nan bida eterno. Hesus asta a bisa ku hende ku muri por haña resurekshon riba e último dia i biba pa semper. E no tabata papia aki di un bendishon pa un grupo limitá di hende mané den kaso di Sena di Señor. Mas bien, e tabata papia di un  bendishon ku tur hende por a haña. El a bisa: “Si un hende kome di e pan akí, lo e biba pa semper . . . E pan ku lo mi duna pa mundu por biba ta mi karni.”—Huan 6:51. b

12. Kiko un hende tin ku hasi pa haña bida eterno?

¹² Pero akaso Hesus tabata ke men ku delaster un hende ku a biba lo haña bida eterno? Nò. Solamente esnan ku “kome di e pan akí,” esta, ku pone fe den Hesus, lo haña esei. Hopi hende awe ta bisa ku nan ta kere den Hesus i ta yam’é nan salbador. (Huan 6:29) Pero esei so no ta sufisiente. Hopi di esnan na Galilea na promé instante a kere den Hesus, pero despues nan a stòp di siguié. Dikon?

13. Kiko ta un berdadero disipel di Hesus?

¹³ Mayoria di e hendenan den e multitut a sigui Hesus djis pasó el a duna nan loke nan tabata ke. Nan tabata ke pa e kura nan, duna nan di kome i bisa nan e kosnan ku nan kier a tende. Pero Hesus a laga nan komprondé ku e no a bini na mundu pa djis duna nan loke nan tabata ke. El a bin pa siña nan loke nan tin ku hasi pa bira berdadero disipel di dje. Nan mester a “bini serka” dje, esta, aseptá i obedesé tur loke el a siña nan.—Huan 5:40; 6:44.

14. Kiko nos tin ku hasi pa benefisiá di Hesus su karni i sanger?

¹⁴ Hesus a enfatisá na e multitut ku  nan mester pone fe. Pero fe den kiko? Den e echo ku e karni i sanger ku Hesus lo a sakrifiká lo hasi posibel pa nan haña bida eterno. E fe ei tabata masha importante pa e hudiunan ei, i e ta importante pa nos awe tambe. (Huan 6:40) Pues, loke Hesus a bisa na Huan 6:53 ta nifiká ku nos mester tin fe den e reskate pa haña bida eterno. Anto un kantidat grandi di hende por haña e bendishon ei.—Efe. 1:7.

15-16. Ki kosnan importante nos a siña for di Huan kapítulo 6?

¹⁵ Den Huan 6 nos a siña hopi kos ku ta importante i animante pa nos tur. Nos a mira ku Hesus stima hende. Na Galilea, el a kura hende malu, siña hende tokante e Reino i duna nan kuminda. (Luk. 9:11; Huan 6:​2, 11, 12) Pero mas importante ainda, el a siña nan ku e “ta e pan ku ta duna bida.”—Huan 6:​35, 48.

¹⁶ E hendenan ku Hesus a yama “otro karné” no mag kome di e pan ni bebe di e biña na Memorial. (Huan 10:16) Pero nan ta benefisiá sí di e karni i sanger di Hesus. Nan ta hasi esei ora nan demostrá fe den Hesus su sakrifisio di reskate i e kosnan ku e ta hasi posibel. (Huan 6:53) Esnan ku ta kome di e pan i bebe di e biña ta mustra ku nan ta forma parti di e pakto nobo i tin speransa di ta heredero den e Reino. Pues, sea ku nos ta parti di e ungínan òf di e otro karnénan, ta masha importante pa nos komprondé Huan kapítulo 6. E ta mustra nos ku nos tur mester tin fe fuerte den e reskate pa asina biba pa semper.