Bo a tuma tempu pa lesa e edishonnan di e aña akí di E Toren di Vigilansia? Wèl, wak si bo por kontestá e siguiente preguntanan:

Kon Yehova ta trata hende muhé?

E no ta deskriminá nan ni e no ta preferá hende hòmber mas ku hende muhé. E ta skucha hende muhé, ta interesá den nan sintimentu- i preokupashonnan. E ta konfia nan pa hasi su trabou.—w24.01, pág. 15-16.

Kon nos por apliká Efesionan 5:​7, ku ta bisa: “No bira nan kómplise”?

Apòstel Pablo tabata spièrta nos pa no tin amistat ku hende ku no ta yuda nos pega na Yehova su normanan. E sorto di amistatnan ei no ta konta solamente pa hende en persona sino tambe riba ret sosial.—w24.03, pág. 22-23.

Ki sorto di informashon falsu nos mester rechasá?

Informashon ku nos rumannan òf amigunan manda pero ku no a ser verifiká, e-mail di hende ku nos no konosé i apóstata ku ta fingi di ta interesá den e bèrdat.—w24.04, pág. 12.

Kiko nos sa i kiko nos no sa tokante kon Yehova lo husga Rei Sálomon i e hendenan ku a muri na Sódoma i Gomora i den Diluvio?

Nos no por bisa ku Yehova lo no resusitá nan. Pero, nos sa ku Yehova sa tur e echonan i ta masha miserikòrdioso.—w24.05, pág. 3-4.

Komo ku Yehova “ta E Baranka,” ki siguransa nos tin? (Deu. 32:4)

Nos por buska refugio den Yehova. E ta konfiabel, semper e ta kumpli ku su promesanan. E no ta kambia, su personalidat i metanan no ta kambia.—w24.06, pág. 26-28.

Ki por yuda bo kustumbrá ku un kongregashon nobo?

Konfia den Yehova, lo e yuda bo meskos ku el a yuda su sirbidónan den pasado. Evitá di hasi komparashon ku bo kongregashon anterior. Enbolbé bo mes ku e kongregashon i hasi esfuerso pa sera amistatnan nobo.—w24.07, pág. 26-28.

Ki lès nos ta saka for di e tres ilustrashonnan na Mateo kapítulo 25?

Esun di karné i kabritu ta enfatisá e importansia di ta leal. Esun di e dies bírgennan ta resaltá e importansia di ta prepará i alerta. Anto esun di talento ta resaltá e importansia di traha duru i hasi esfuerso.—w24.09, pág. 20-24.

Kon haltu e veranda di Sálomon su tèmpel tabata?

Dos Krónikanan 3:4 den algun manuskrito antiguo ta bisa “120 kodo,” esei lo ke men ku e veranda lo tabata 53 meter haltu. Pero den otro manuskritonan konfiabel nos ta lesa “20 kodo,” kual ta nuebe meter haltu. Esaki parse ta kuadra mas ku kon diki e muraya di e tèmpel tabata.—w24.10, pág. 31.

Un sirbidó ministerial mester ta “esposo di ún esposa,” ki esei ke men? (1 Tim. 3:12)

Ku e mester ta kasá ku un hende muhé i no mester ta kometé inmoralidat seksual. Ademas, e no mester duna demasiado atenshon na un otro hende muhé ku no ta su kasá.—w24.11, pág. 19.

Dikon nos por bisa ku Huan 6:53 no ta indiká loke mester sosodé na Sena di Señor?

Na Huan 6:​53, Hesus a papia tokante e nesesidat di kome su karni i bebe su sanger. El a bisa e palabranan ei na aña 32 na Galilea na un multitut di hudiu ku te ainda mester a pone fe den dje. Pero, ta un aña despues el a introdusí e Sena di Señor na Herúsalèm. Ei el a papia ku esnan ku lo goberná kuné den shelu.—w24.12, pág. 10-11.