1, 2. (a) Dikon nos no mester keda strañá si nos ta eksperensiá un poko ansiedat? (Wak e promé plachi.) (b) Kiko nos lo analisá den e artíkulo akí?

NOS ta bibando den tempunan masha difísil. Satanas e Diabel ta furioso i “ta kana rònt manera un leon ku ta grita, buskando ken e por habraká.” (1 Ped. 5:8; Rev. 12:17) P’esei, no ta nada straño ku tin biaha asta nos komo sirbidónan di Dios sa sinti inkietut. De echo, tin biaha asta fiel sirbidónan di Yehova di pasado, manera Rei David, tabatin ansiedat. (Sal. 13:2, NW) Kòrda tambe ku apòstel Pablo a sinti “inkietut pa tur e kongregashonnan.” (2 Kor. 11:28) Pero kiko nos por hasi si nos ta sinti ku ansiedat ta kabando ku nos?

² Nos Tata den shelu stima su sirbidónan. P’esei, den pasado el a yuda personanan fiel, i awe e ta hasi posibel pa nos haña alivio di angustia òf preokupashon. Beibel ta urgi nos: “Tira tur boso inkietut [“preokupashonnan,” nota] riba dje, pasobra e ta interesá den boso.” (1 Ped. 5:7) Pero kon bo por hasi esei? Tin kuater kos ku por yuda bo: (1) hasi orashon di kurason, (2) lesa e Palabra di Dios i meditá riba dje, (3) pidi Yehova pa su spiritu santu i (4) papia ku un hende di konfiansa tokante bo sintimentunan. Segun ku nos ta analisá e  kuater puntonan akí, purba di saka afó ki medidanan práktiko bo por tuma.

3. Kon bo por “tira bo karga riba Yehova” mediante orashon?

³ E promé kos ku nos por hasi ta orashon sinsero na Yehova. Ora bo haña bo den un situashon ku ta hasi bo intrankil òf ku ta duna bo miedu òf ansiedat, deshogá bo kurason serka bo Tata den shelu ku ta stima bo. E salmista David a roga Yehova: “Skucha mi orashon, o Dios.” Mas despues, den e mesun salmo, David a bisa: “Tira bo karga riba [Yehova], i e lo sostené bo.” (Sal. 55:1, 22) Despues ku bo a hasi tur loke bo por pa resolvé un problema, orashon di kurason lo yuda bo hopi mas tantu ku si bo sigui preokupá. Pero kon orashon por yuda bo pa no bira anshá ku pensamentunan ku ta preokupá bo i ta kousa angustia?—Sal. 94:18, 19.

4. Ora nos ta anshá, dikon orashon ta asina importante?

⁴ Lesa Filipensenan 4:6, 7. Yehova por kontestá nos súplikanan persistente i hasí di kurason. Kon e ta hasi esei? E ta duna nos un pas mental ku por kalma nos mente i kurason di strès. Hopi ruman a eksperensiá esaki. Na lugá di ansiedat, un presentimentu ku algu teribel ta bai pasa, Dios a yuda nan haña un sintimentu profundo di pas i trankilidat ku ta surpasá tur komprondementu humano. Abo tambe por eksperensiá esaki. Pues, e “pas di Dios” por yuda bo vense kualke difikultat ku lo bo por tin. Bo por konfia kompletamente den e promesa akí di Yehova: “No desmayá, pasobra mi ta bo Dios. Lo mi fortalesé bo, sí, lo mi yuda bo.”—Isa. 41:10.

5. Kon e Palabra di Dios por duna nos pas mental?

⁵ Un di dos kos ku por yuda nos haña pas mental ta e bon kustumber di lesa tekstonan di Beibel i meditá riba nan. Dikon esei ta importante? Pasobra Beibel ta kontené guia spiritual ku ta práktiko i ku por yuda bo enfrentá, baha òf asta evitá ansiedat. No lubidá ku e Palabra di Dios tin e poder pa yuda bo i refreská bo pasobra e ta kontené e Kreador su mes palabranan di sabiduria. Lo bo haña hopi fortalesa segun ku bo ta meditá di dia i anochi riba Dios su pensamentunan i ta analisá kon ta e mihó manera pa apliká e guia práktiko di Beibel. Yehova mes a bisa spesífikamente ku si bo lesa su Palabra, lo bo ‘ta fuerte i lo tin kurashi’ i lo bo no “tembla ni desmayá.”—Hos. 1:7-9.

6. Kon Hesus su palabranan por yuda bo?

⁶ Den Beibel nos ta haña tambe Hesus su palabranan di konsuelo. Su palabra- i su siñansanan a refreská su oyentenan. Hopi hende tabata bai serka dje pasobra e tabata trankilisá nan kurason kibrá, e tabata fortalesé esnan débil i konsolá esnan deprimí. (Lesa Mateo 11:28-30.) E tabatin interes den hende i a trata ku nan nesesidatnan spiritual, emoshonal i físiko. (Mar. 6:30-32) Te ainda Hesus ta apoyá nos, manera el a primintí. Esaki por konta pa bo tambe meskos ku tabata e kaso ku e apòstelnan ku tabata biaha ku Hesus. Bo no tin nodi di ta huntu ku Hesus pa risibí su yudansa. Komo Rei den shelu, Hesus te ainda tin i ta sigui mustra interes den nos. Pues, ora bo ta anshá, ‘e por duna bo yudansa’ i lo hasi esei “na e momento apropiá.” Sí, Hesus su palabranan por yuda bo trata ku  preokupashon, trankilisá bo kurason i duna bo speransa i kurashi.—Heb. 2:17, 18; 4:16.

7. Ora bo pidi Dios pa spiritu santu, kon esei lo benefisiá bo?

⁷ Hesus a primintí ku nos Tata den shelu lo no keda sin duna spiritu santu na esnan ku pidié. (Luk. 11:10-13) Asina ta ku nos por konta ku un di tres kos ku por yuda nos haña alivio pa nos ansiedat: e fruta di spiritu. E bon kualidatnan ku e forsa aktivo di Dios ta yuda nos kultivá ta un refleho di e personalidat ku nos Dios todopoderoso tin. (Lesa Galationan 5:22, 23; Kol. 3:10) Segun ku bo ta kultivá e fruta di spiritu, bo relashon ku otro hende lo mehorá. Pues, lo bo ripará ku bo por evitá hopi situashon ku di otro manera por kousa tenshon. Ban wak kon e fruta di spiritu por yuda bo.

8-12. Kon e fruta di e spiritu di Dios por yuda bo evitá òf trata ku situashonnan ku por kousa ansiedat?

⁸ “Amor, goso, pas.” Ora bo hasi esfuerso pa trata otro hende ku rèspèt, lo bo mira ku ta mas fásil pa kontrolá bo mes emoshonnan negativo. Dikon? Esei ta pasobra ora bo ta mustra amor di ruman, tierno kariño i onor, lo bo evitá situashonnan ku por kousa ansiedat.—Rom. 12:10.

⁹ “Pasenshi, amabilidat, bondat.” Lo bo mantené pas ku otro hende ora bo apliká e siguiente konseho: “Bira bondadoso ku otro, mustra tierno kompashon, pordoná otro libremente.” (Efe. 4:32) Ora bo hasi esei, bo ta evitá di haña bo den situashonnan ku lo por kousa angustia. Ademas, bo por trata mihó ku e difikultatnan ku sa surgi debí na imperfekshon di hende.

¹⁰ “Fe.” Awe, loke hopi biaha ta kousa ansiedat ta preokupashon ku plaka i kosnan material. (Pro. 18:11) Un fe fuerte den Yehova su kuido amoroso por yuda bo enfrentá òf evitá tal preokupashon. Kon asina? Bo por evitá di preokupá demasiado ora bo sigui e konseho di apòstel Pablo pa ‘keda kontentu ku loke bo tin.’ Pablo a agregá: “Pasobra Dios a bisa: ‘Hamas lo mi bandoná bo, i hamas lo mi laga bo desampará.’ P’esei nos por ta yen di ánimo i bisa: ‘Yehova ta mi ayudante; lo mi no tin miedu. Kiko hende por hasi mi?’”—Heb. 13:5, 6.

¹¹ “Suavedat, dominio propio.” Pensa kon bon i práktiko e kualidatnan ei ta. Pues, nan lo yuda bo evitá di hasi loke por kousa preokupashon pa bo, i lo bo saka benefisio ora bo evitá “amargura malisioso, rabia, furia, gritamentu i papiamentu di kos ofensivo.”—Efe. 4:31.

¹² Ta bèrdat ku bo tin ku desplegá humildat pa bo someté bo mes “bou di e man poderoso di Dios” i pa bo ‘tira tur bo inkietut riba dje.’ (1 Ped. 5:6, 7) Pero ora bo kultivá humildat, lo bo por haña Dios su aprobashon i lo e sostené bo. (Mik. 6:8, NW) Si bo mantené un punto di bista realístiko di bo abilidatnan físiko, mental i emoshonal, lo bo tin ménos chèns di bira demasiado anshá pasobra bo ta konfia den Dios.

13. Kiko Hesus tabata ke men ora el a bisa pa “no sea nunka anshá”?

¹³ Na Mateo 6:34 (les’é), nos ta haña e siguiente konseho sabí di Hesus: “No sea nunka anshá.” Pero por parse difísil pa sigui e konseho ei. Kiko Hesus tabata ke men ora el a bisa pa “no sea nunka anshá”? Klaru ku e no tabata ke men ku un sirbidó di Dios lo no eksperensiá  ansiedat na un sierto momento den su bida; manera nos a mira kaba David i Pablo mes a pasa den situashonnan di angustia. Pero Hesus kier a yuda su disipelnan komprondé ku demasiado ansiedat òf preokupá sin ta na nodi no ta resolvé problema. Kada dia tin su mes problemanan, pues kristiannan no tin nodi di duna nan mes mas preokupashon pensando riba asuntunan di pasado i di futuro. Kon bo por apliká Hesus su konseho i haña alivio di ansiedat?

14. Kiko bo por hasi si bo ta anshá debí na fayonan ku bo a kometé den pasado?

¹⁴ Un hende por ta anshá debí na e fayonan ku el a kometé den pasado. Kisas sintimentu di kulpa ta molesti’é pa loke el a hasi den pasado, podisé asta hopi aña pasá. Algun biaha, Rei David a sinti ku su fayonan tabata manera un karga pisá. El a atmití: “Mi ta keha pa motibu di e inkietut di mi kurason.” (Sal. 38:3, 4, 8, 18) Den e situashon ei, kiko tabata sabí pa David hasi? El a konfia ku Yehova ta miserikòrdioso i ku E por a pordon’é. Ku konvikshon el a bisa: “Bendishoná ta esun, kende su transgreshon ta pordoná.”—Lesa Salmo 32:1-3, 5.

15. (a) Dikon bo no mester ta demasiado preokupá debí na un situashon ku bo ta pasando aden aworakí? (b) Ki medidanan práktiko bo por tuma pa aliviá ansiedat? (Wak e kuadro “ Algun Manera Práktiko pa Aliviá Ansiedat.”)

¹⁵ Kisas bo ta anshá debí na un situashon ku bo ta pasando aden aworakí. Por ehèmpel, ora David a skirbi Salmo 55, e tabata teme pa su bida. (Sal. 55:2-5) Sinembargo, e no a laga ansiedat kaba ku su konfiansa den Yehova. David a roga Yehova pa yud’é ku su problemanan, pero el a komprondé tambe ku e tabatin ku tuma medidanan práktiko pa trata ku su ansiedat. (2 Sam. 15:30-34) Nos por saka un bon lès for di David su ehèmpel. En bes di preokupá di mas, tuma medida práktiko i hasi loke bo por pa trata ku e situashon, anto ku konfiansa den Yehova, laga e asuntu den su man.

16. Kon e nifikashon di Dios su nòmber por fortalesé bo fe?

¹⁶ Tin biaha un kristian por tormentá su mes pensando riba problemanan ku por presentá den futuro. Pero, bo no tin motibu di ta anshá, òf preokupá, tokante problemanan ku bo no sa si nan lo presentá mes. Dikon nò? Pasobra hopi biaha kosnan no ta resultá mes malu ku nos a pensa. Ademas, e Dios riba kende bo por tira tur bo preokupashonnan por yuda bo ku tur situashon. Su nòmber mes ta nifiká “E Ta Kousa pa Bira.” (Éks. 3:14, NW) E nifikashon profundo di e nòmber divino akí ta sigurá nos ku Dios ta kompletamente kapas pa kumpli ku su propósito pa ku su sirbidónan. Tambe bo por tin e siguransa ku Dios ta rekompensá su fiel sirbidónan i yuda nan kontrolá e ansiedat ku kosnan di pasado, presente i futuro por kousa.

17, 18. Kon otro rumannan por yuda bo trata ku ansiedat?

¹⁷ Un di kuater kos ku por yuda bo trata ku ansiedat ta di konta un persona di konfiansa loke bo ta sinti. Bo kasá, un bon amigu òf un ansiano di kongregashon por yuda bo keda ku un punto di bista balansá. Beibel ta bisa: “Ansha den kurason di hende ta hasié abatí, ma un bon palabra ta hasié kontentu.” (Pro. 12:25) Komunikashon franko i habrí por yuda bo komprondé i trata ku bo preokupashonnan. Ademas, Beibel ta bisa nos: “Pa falta di konseho plannan ta frakasá, ma ku hopi konsehero nan ta wòrdu lográ.”—Pro. 15:22.

¹⁸ Banda di esei, Yehova ta yuda nos trata ku ansiedat mediante nos reunionnan semanal. Na reunion, bo por asosiá ku rumannan ku ta interesá den bo i ku ke animá bo. (Heb. 10:24, 25) Tal “interkambio di estímulo” lo fortalesé bo den sentido spiritual i yuda bo trata mas ku ansiedat.—Rom. 1:12.

19. Dikon bo por tin sigur ku bo relashon ku Dios lo fortalesé bo?

¹⁹ Wak kon un ansiano na Canada a mira e balor di tira su ansiedatnan riba Yehova. E ta un dosente i mèntòr, i su trabou ta dun’é hopi strès. Anto pa kolmo, e ta sufri di un trastorno di ansiedat. Kiko a yud’é? E ta splika: “Loke a duna mi mas forsa pa trata ku mi emoshonnan negativo ta ora mi a hasi esfuerso pa fortalesé mi relashon ku Yehova. Den momentonan di angustia, e sosten di un bon amigu òf ruman spiritual ta un gran yudansa. Ademas, mi ta papia habrí ku mi kasá tokante mi sintimentunan. I otro ansianonan i e superintendente di sirkuito a yuda mi mira e kosnan manera Yehova ta mira nan. Tambe mi a buska yudansa di dòkter, a kambia e manera ku mi ta usa mi tempu i a kuminsá apartá tempu pa relahá i hasi ehersisio. Pokopoko mi a kuminsá sinti ku mi por tene mi emoshonnan mihó bou di kontrol. I si tin algu ku mi no por kontrolá, mi ta lag’é den man di Yehova.”

20. (a) Kon nos por tira nos ansiedatnan riba Dios? (b) Kiko nos lo trata den e siguiente artíkulo?

²⁰ Pues, nos a mira ku ta importante pa tira tur nos ansiedatnan riba Dios mediante orashon di kurason i lesamentu di su Palabra i meditashon riba loke nos lesa. Tambe nos a mira e importansia di kultivá e fruta di spiritu, di papia ku un hende di konfiansa tokante nos sintimentunan i di haña fortalesa ora nos ta asosiá ku nos rumannan. Den e siguiente artíkulo nos lo analisá kon Yehova ta sigui sostené nos ku e speransa di un rekompensa.—Heb. 11:6.