1. Dikon boutismo ta un paso importante? (Wak e promé plachi.)

TUR aña, míles di studiante di Beibel ta batisá. Hopi di nan ta tiner i mucha. Kisas nan a lanta den e bèrdat. Abo ta un di nan? Si ta asina, nos ta elogiá bo. Un kristian mester batisá, i esei ta un paso importante pa e por haña salbashon.—Mat. 28:19, 20; 1 Ped. 3:21.

2. Dikon bo no mester tin miedu di batisá?

² Aunke boutismo ta habri kaminda pa nos haña hopi bendishon, e ta trese hopi responsabilidat kuné tambe. Kon asina? Dia ku bo a batisá, bo a kontestá ‘sí’ riba e pregunta: “A base di e sakrifisio di Hesukristu, bo a arepentí di bo pikánan i a dediká bo mes na Yehova pa hasi su boluntat?” Bo boutismo ta mustra ku bo a dediká bo bida na Yehova. Esei ta un promesa solèm ku bo a hasi na Yehova pa stim’é i pone su boluntat promé ku tur kos. Esei ta algu serio. Bo mester lamentá ku bo a hasi e promesa akí? Sigur ku nò! E desishon pa laga Yehova guia bo bida semper ta un desishon sabí. Pensa  riba lo siguiente: Un hende ku no ta biba segun e normanan di Yehova ta bou di gobernashon di Satanas. Diabel no ta interesá den bo salbashon. De echo, lo e keda kontentu si bo tuma parti p’e i rechasá e soberania di Yehova i keda sin haña bida eterno.

3. Ki bendishon bo ta haña ora bo dediká bo bida na Yehova?

³ Pensa riba kon Yehova a bendishoná bo pasobra bo a dediká bo bida na dje i a batisá. Awor ku bo a dediká bo bida na Yehova, bo por bisa ku tur konfiansa: “SEÑOR ta ku mi; lo mi no tin miedu; kiko hende por hasi mi?” (Sal 118:6) Ta un gran privilegio pa ta na banda di Dios i tin su aprobashon.

4, 5. (a) Dikon nos por bisa ku nos dedikashon ta un responsabilidat personal? (b) Ki pruebanan tur kristian, sin importá nan edat, ta enfrentá?

⁴ Komo un hóben batisá, no ta pasobra bo mayornan tin un bon amistat ku Yehova ta nifiká ku outomátikamente abo tambe tin un bon amistat ku Yehova. Al kontrario, bo ta responsabel pa bo mes salbashon, asta si ainda bo ta biba huntu ku bo mayornan. Dikon ta importante pa bo tene esei na mente? Pasobra bo no sa ki prueba bo ta bai enfrentá den futuro. Por ehèmpel, si bo a batisá tempu bo tabata mucha, kisas lo bo haña bo ku emoshon- i difikultatnan nobo ora bo bira tiner. Un mucha muhé tiner a splika: “Por lo general, un mucha Testigu di Yehova lo no sintié malu djis pasobra e no por kome bolo di hasimentu di aña na skol. Pero algun aña despues ora e deseo pa hasi sèks bira mas fuerte, e hóben ei mester ta plenamente konvensí ku semper ta mihó pa obedesé e lei di Yehova.”

⁵ Di mes, no ta hóbennan so ta enfrentá prueba. Asta esnan ku a batisá komo adulto ta enfrentá diferente reto ku ta pone nan fe na prueba. Algun prueba por ta relashoná ku matrimonio, problemanan ku salu òf empleo. Tur hende, sin importá nan edat, lo enfrentá situashonnan ku ta pone nan lealtat na Yehova na prueba.—Sant. 1:12-14.

6. (a) Kiko bo a primintí Yehova? (b) Ki lès bo por saka for di Filipensenan 4:11-13?

⁶ Pa yuda bo keda fiel na Yehova, kòrda ku bo a primintié ku lo bo keda fiel na dje bou di tur sirkunstansia. Esei ta nifiká ku bo a bisa e Soberano di universo ku lo bo sigui sirbié asta si bo amigunan òf mayornan stòp di sirbié. (Sal. 27:10) Den tur situashon, ku e yudansa di Yehova lo bo haña e forsa pa biba di akuerdo ku loke bo a primintié.—Lesa Filipensenan 4:11-13.

7. Kiko ke men traha pa alkansá bo salbashon “ku temor i temblamentu”?

⁷ Yehova ke pa bo ta su amigu. Pero pa bo mantené bo amistat ku Yehova i traha pa alkansá bo salbashon, bo mester hasi esfuerso. De echo, Filipensenan 2:12 ta bisa: “Sigui traha ku temor i temblamentu pa alkansá boso salbashon.” E palabranan ei ta nifiká ku bo mester pensa riba kon pa mantené bo amistat ku Yehova i kon pa keda fiel na dje, apesar di kualke reto. No pensa ku bo no por kai for di e bèrdat. Asta algun sirbidó di Dios ku a sirbié pa hopi tempu despues a stòp di sirbié. Pues, kiko bo por hasi pa bo traha pa alkansá bo salbashon?

8. Kiko estudio personal ta enserá, i dikon esei ta importante?

⁸ Pa nos por tin un amistat ku Yehova, nos mester tin bon komunikashon kuné,  esta, nos mester skuch’é i papia kuné. Estudio personal di Beibel ta e manera prinsipal ku nos ta skucha Yehova. Esei ta enserá entre otro ku nos ta gana konosementu ora nos ta lesa e Palabra di Dios i publikashonnan basá riba Beibel i ku nos ta meditá riba loke nos ta lesa. I ora bo hasi esei, tene na mente ku estudio di Beibel no mester ta manera un tarea ku bo ta hasi pa skol ni e no mester ta manera algu ku bo ta siña for di kabes pa traha un prufwèrk na skol. Mas bien, e mester ta manera un biahe kaminda bo ta buska i deskubrí kosnan nobo tokante Yehova su personalidat. Esei lo yuda bo hala serka Dios, i lo e hala serka bo.—Sant. 4:8.

9. Ki publikashon a yuda bo den bo estudio personal?

⁹ E organisashon di Yehova ta proveé un kantidat di publikashon ku por yuda bo traha un bon programa di estudio personal. Por ehèmpel, bou di e sekshon “Jóvenes” riba jw.org (na spañó) tin “Actividades para estudiar la Biblia,” kaminda bo por haña lèsnan práktiko for di relatonan di Beibel. Ademas, e blachinan di tarea “Kiko Beibel ta Siña Realmente?” riba jw.org por yuda bo pa fortalesé bo fe i nan por yuda bo tambe pa splika otro hende bo kreensianan. Anto den e artíkulo “Los jóvenes preguntan. ¿Cómo disfrutar la lectura de la Biblia?” den ¡Despertad! di aprel 2009 bo por haña mas idea pa bo estudio personal. Estudio personal i meditashon ta importante pa bo por sigui traha pa alkansá bo salbashon.—Lesa Salmo 119:105.

10. Dikon orashon ta masha importante pa un kristian?

¹⁰ Ora nos ta studia Beibel, nos ta skucha Yehova, i ora nos ta hasi orashon, nos ta papia kuné. Nos no mester mira orashon komo djis un rutina ni e no ta un tipo di amuleto ku ta yuda nos haña éksito den loke nos ta hasi. Mas bien, ora bo ta hasi orashon, bo ta ègt papia ku nos Kreador. I Yehova ke skucha bo. (Lesa Filipensenan 4:6.) Ora bo tin kualke preokupashon, e konseho sabí ku Beibel ta duna ta pa “tira bo karga riba SEÑOR.” (Sal. 55:22) Di bèrdat bo ta kere  ku bo por hasi esei? Tin miónes di ruman ku por bisa bo ku e konseho ei a yuda nan. I e por yuda abo tambe!

11. Dikon semper nos mester yama Yehova danki?

¹¹ Orashon ta duna bo mas ku djis e oportunidat pa pidi Yehova pa yuda bo. Beibel ta bisa: “Mustra ku boso ta gradisidu.” (Kol. 3:15) Tin biaha nos por ta asina preokupá ku nos problemanan ku nos no ta mira nos bendishonnan. Dikon no pone komo meta pa tur dia bo pensa riba por lo ménos tres kos ku bo ta gradisidu p’e? Despues, yama Yehova danki pa e kosnan ei. Abigail, un tiner ku a batisá tempu e tabatin 12 aña, ta bisa: “Mi ta haña ku Yehova meresé pa nos gradisié mas ku kualke otro persona den universo. Nos mester probechá di tur oportunidat pa yama Yehova danki pa e regalonan ku e ta duna nos. Un biaha mi a tende un bon kos pa pensa ariba: Imaginá ku mañan mainta bo ta lanta i bo tin solamente e kosnan ku bo a yama Yehova danki p’e awe, kiko lo bo tin?” *

12, 13. Kon abo a eksperensiá ku Yehova ta bon, i dikon ta importante pa bo meditá riba esei?

¹² Yehova a yuda Rei David wanta hopi prueba difísil. P’esei e por a kanta: “O purba i mira ku SEÑOR ta bon; bendishoná ta e hende ku ta tuma refugio den dje!” (Sal. 34:8) E versíkulo ei ta mustra ku nos mester eksperensiá e bondat di Yehova pa nos mes. Ora bo ta lesa Beibel i nos publikashonnan i ta asistí na reunion, bo ta siña for di eksperensianan animante kon Dios a yuda su sirbidónan keda fiel. Pero segun ku bo ta krese spiritualmente, bo mester mira kon Yehova ta yudando bo personalmente. Den ki maneranan abo a eksperensiá ku Yehova ta bon?

¹³ Tin ún manera ku tur kristian a eksperensiá ku Yehova ta bon. Esei ta ora Dios a invitá kada un di nos pa hala serka dje i su Yu. Hesus a bisa: “Ningun hende no por bini serka mi a ménos ku e Tata, ku a manda mi, hal’é serka mi.” (Huan 6:44) Bo ta sinti ku Yehova a hala abo serka dje? Un hóben por rasoná: ‘Yehova a hala mi mayornan serka dje, i ami a djis sigui nan.’ Pero ora bo a dediká bo bida na Yehova i a batisá, bo a demostrá ku bo a forma un amistat spesial ku Dios. Awor Dios konosé bo di bèrdat. Beibel ta garantisá nos: “Si un hende stima Dios, Dios konosé e hende akí.” (1 Kor. 8:3) P’esei, semper purba di balorá i apresiá e lugá ku bo tin den Yehova su organisashon.

14, 15. Kon bini bo fe ta bira mas fuerte ora bo prediká?

¹⁴ Un otro manera ku nos por eksperensiá ku Yehova ta bon ta ora nos ta mira kon e ta apoyá nos ora nos ta papia ku otro hende tokante nos kreensianan. Bo por hasi esei den sirbishi òf na skol. Algun hóben tin difikultat pa prediká na skol, i kisas bo por komprondé pa nan, pasobra bo no tin niun idea kon bo kompañeronan di skol lo reakshoná. E por ta mas difísil pa papia ku un grupo grandi di bo kompañeronan di skol ku papia ku un so. Kiko por yuda bo?

¹⁵ Di promé, pensa dikon bo ta konvensí di bo kreensianan. E blachinan di tarea riba jw.org ta disponibel den bo idioma? Si bo no sa sigur, dikon bo no ta  pone tempu pa bai wak nan? E tareanan ei ta trahá di tal manera ku nan por yuda bo analisá loke bo ta kere aden, dikon bo ta kere loke bo ta kere i kon bo por splika bo kreensianan na otro hende. Ora bo fe ta fuerte i bo ta bon prepará, lo bo sinti bo motivá pa papia ku otro hende tokante Yehova.—Yer. 20:8, 9.

16. Kiko por yuda bo ora bo ta vasilá pa prediká tokante bo kreensianan?

¹⁶ Sinembargo, asta ora bo ta bon prepará, kisas bo ta vasilá pa papia tokante bo kreensianan. Un ruman muhé di 18 aña ku a batisá tempu e tabatin 13 aña ta atmití: “Mi sa kiko mi kreensianan ta, pero tin bes mi tin problema pa bisa loke mi ta pensa.” Kon el a trata ku e problema akí? E ta agregá: “Mi ta purba di kòmbersá na un manera natural i trankil. Mi kompañeronan di klas ta papia libremente di kosnan ku nan ta hasi. Mi tambe mester sinti mi liber pa papia. Pues mi ta menshoná algu, manera ‘Poko dia ei mi tabata duna un kurso di Beibel i . . . ’ I despues mi ta sigui ku loke mi ke bisa. Aunke ku e punto prinsipal no ta tokante Beibel, hopi biaha nan ta kurioso pa sa kiko mi ta hasi ora mi ta siña otro hende tokante Beibel. Tin biaha nan ta hasi mi pregunta tokante esei. Mas mi usa e método akí, mas fásil e ta bira pa mi kòmbersá ku nan. I despues mi ta sinti mi great!”

17. Dikon ta importante pa nos papia ku konfiansa tokante nos fe?

¹⁷ Ora bo ta mustra rèspèt na otro hende i interes den nan, lo ta mas fásil pa nan respetá bo i bo kreensianan. Olivia, kende tin 17 aña i a batisá tempu e tabata mucha, a bisa: “Semper mi tabatin miedu ku si mi usa Beibel den un kòmbersashon, hende lo kere ku ta un fanátiko mi ta.” Pero despues el a kambia su manera di pensa. En bes ku Olivia keda enfoká riba su miedu, el a pensa: “Hopi hóben no sa nada tokante Testigunan di Yehova. Nos ta e úniko Testigunan ku nan konosé. Pues nos kondukta por determiná kon nan lo reakshoná na nos. Kiko si nos ta tímido, si nos tin difikultat pa papia tokante nos fe òf si nos tin miedu di papia? Esei por pone hende pensa ku nos no ta orguyoso di ta un Testigu. Nan por asta reakshoná na un mal manera pasobra nos no a demostrá kurashi. Pero si nos demostrá ku nos tin sigur di loke nos ta kere i ta hasi esei parti di nos kòmbersashonnan di tur dia, lo tin mas chèns ku hende ta respetá nos.”

18. Kiko bo mester hasi pa traha pa alkansá bo salbashon?

¹⁸ Manera nos a mira, ta un responsabilidat serio pa traha pa alkansá bo salbashon. Algun kos ku bo mester hasi ta lesa e Palabra di Dios i meditá riba loke bo ta lesa, hasi orashon i meditá riba kon Yehova a bendishoná bo personalmente. Ora bo hasi esei, lo bo tin mas konfiansa ku Yehova ta bo amigu. I esei na su turno lo motivá bo pa papia tokante bo kreensianan.—Lesa Salmo 73:28.

19. Dikon ta bale la pena pa bo sigui traha pa alkansá bo salbashon?

¹⁹ Hesus a bisa: “Si un hende ke sigui mi, lag’é nenga su mes, kue su staka di tormento i sigui mi kontinuamente.” (Mat. 16:24) Sí, pa nos sigui Hesus, kada kristian mester dediká su bida na Yehova i batisá. Esei lo duna bo hopi bendishon for di awor i den futuro lo bo por biba pa semper den Dios su mundu nobo. Pues bo tin tur motibu pa sigui traha pa alkansá bo salbashon.