Bo a tuma tempu pa lesa e último edishonnan di E Toren di Vigilansia? Wèl, wak si bo por kontestá e siguiente preguntanan:

Kon Beibel ta mustra ku Dios tin empatia pa nos?

Ora e israelitanan tabata esklabo na Egipto, Dios tabata sa ku nan tabata sufri i el a sinti nan doló. (Éks. 3:7; Isa. 63:9) Dios a krea nos den su imágen i p’esei nos por mustra empatia. Dios tin empatia pa nos asta ora nos ta sinti ku nos no meresé su amor.—wp18.3, pág. 8-9.

Kon e siñansanan di Hesus ta yuda hende vense prehuisio?

Hopi hudiu den tempu di Hesus tabatin prehuisio. Kristu a enfatisá ku nos mester ta humilde. Ademas, el a kondená diskriminashon. El a urgi su siguidónan pa nan mira otro komo ruman.—w18.06, pág. 9-10.

Kiko nos por siña for di e echo ku Dios no a permití Moises drenta e Tera Primintí?

Moises tabatin un amistat será ku Yehova. (Deu. 34:10) Kasi na final di e 40 añanan ku e israelitanan a pasa den desierto, nan a keha pa di dos biaha pa motibu di falta di awa. Dios a bisa Moises pa papia ku e baranka. Sinembargo, Moises no a papia ku e baranka. Mas bien, el a dal e baranka. Kisas Yehova a bira indigná pa motibu ku Moises no a sigui Su instrukshonnan òf pa motibu ku Moises no a duna gloria na Dios pa e milager. (Num. 20:6-12) Esaki mester siña nos e importansia di obedesé Yehova i dun’é gloria.—w18.07, pág. 13-14.

Kon nos por faya fásilmente si nos ta husga segun aparensia?

Tin tres faktor ku hopi biaha ta influensiá nos manera di mira hende: un hende su rasa òf nashonalidat, su posishon finansiero i su edat. Ta importante pa nos purba di mira otro hende sin prehuisio, manera Dios ta mira nan! (Echo. 10:34, 35)—w18.08, pág. 8-12.

Den ki manera ansianonan di mas edat por yuda otronan?

Dios ainda ta balorá un ruman di edat ku a haña un kambio di asignashon i e ruman akí ainda por hasi hopi pa yuda otronan. E por mustra interes den e esposonan ku no ta Testigu di Yehova, dirigí estudio di Beibel i partisipá den diferente forma di predikashon.—w18.09, pág. 8-11.

Kiko kristiannan tin den nan Kaha di Hèrmènt pa Siña Hende e Bèrdat?

Tin karchi di kontakto i invitashon. Tin ocho tratado bon diseñá i tambe tin e revistanan Toren di Vigilansia i Spièrta! E kaha di hèrmènt ta kontené tambe algun foyeto, dos buki ku ta prinsipalmente pa dirigí estudio i kuater vidio útil pa un promé kòmbersashon, inkluso e vidio Dikon Analisá Loke Beibel Ta Bisa?​—w18.10, pág. 16.

Kon un kristian por “kumpra bèrdat” manera Proverbionan 23:23 ta bisa?

Nos no mester di plaka pa kumpra bèrdat. Sinembargo, nos mester hasi esfuerso i invertí tempu pa hañ’é.—w18.11, pág. 4.

Kiko nos por siña for di e manera ku Oséas a trata ku su kasá, Gomer?

Gomer a kometé adulterio bes tras bes pero Oséas a pordon’é i a keda kasá kuné. Si un kristian kometé inmoralidat seksual, e esposo òf esposa inosente por pordon’é. Si un esposo òf esposa inosente kuminsá tene relashon seksual atrobe ku su kasá ku a kometé inmoralidat seksual, e ora ei, lo no tin base mas pa un divorsio.—w18.12, pág. 13.