1, 2. Dikon ta sabí pa bo skucha bo Kreador ora di tuma desishon importante tokante bo futuro? (Wak e promé plachi.)

SI BO ta un hóben, kasi sigur bo a haña hopi konseho tokante loke bo tin ku hasi ku bo futuro. Dosente, mèntòr di skol òf otro hende kisas a animá bo pa sigui enseñansa superior pa bo haña un bon trabou i gana hopi plaka. Sinembargo, Yehova ta duna bo un konseho diferente. Ta klaru ku Yehova ke pa bo siña bon na skol pa asina bo por sostené bo mes ora bo kaba skol. (Kol. 3:23) Pero, e sa tambe ku ora bo ta yòn bo mester tuma desishon importante ku lo tin efekto riba bo futuro. P’esei, el a perkurá algun prinsipio pa guia bo i pa yuda bo biba un bida ku ta agrad’é den e tempu di fin akí.—Mat. 24:14.

² Tene na mente tambe ku Yehova sa tur kos. E sa kiko lo bai pasa ku e mundu akí i kon lihé lo e yega na su fin. (Isa. 46:10; Mat. 24:3, 36) Es mas, e konosé bo bon. E sa kiko ta hasi bo felis i kiko ta hasi bo infelis. Pues, aunke tin biaha konseho di  hende por zona bon, e konsehonan ei no ta sabí si nan no ta basá riba e Palabra di Dios.—Pro. 19:21.

3, 4. Kiko tabata e resultado ora Adam ku Eva a skucha e mal konseho di Satanas?

³ Pa hopi tempu kaba mal konseho ta eksistí. E promé mal konseho a bini di Satanas. Satanas a bisa Eva ku e ku su kasá, Adam, lo ta mas felis si nan disidí pa nan mes kon pa biba. (Gén. 3:1-6) Pero en realidat, Satanas su motibunan tabata egoista. Satanas tabata ke pa Adam ku Eva, i nan futuro desendientenan, someté nan mes na é i adorá é en bes di Yehova. Pero kiko Satanas a yega di hasi pa nan? Nada! Yehova tabata esun ku a duna nan tur loke nan tabatin: Nan matrimonio, e bunita hòfi ku nan tabata biba aden i un kurpa perfekto ku lo a permití nan biba pa semper.

⁴ Lamentablemente, Adam ku Eva a desobedesé Yehova i a daña nan amistat kuné. Manera nos sa, e resultado tabata trágiko. Meskos ku un flor ku bo kita for di un mata ta marchitá i muri, asina tambe Adam ku Eva poko poko a bira bieu i a muri. Nan yunan tambe a sufri pa motibu di piká. (Rom. 5:12) Asina mes, mayoria di hende no ke someté nan mes na Dios. Nan ke biba manera nan ta haña ta bon. (Efe. 2:1-3) Ku ki resultado? Beibel ta mustra bon kla ku “no tin sabiduria . . . kontra SEÑOR,” ku otro palabra, tur konseho ku ta bai kontra loke Yehova ta bisa, no ta konseho sabí.—Pro. 21:30.

5. Kiko Yehova tabatin sigur di dje, i dikon nos sa ku e tabatin rason?

⁵ Sinembargo, Yehova tabatin sigur ku lo tin algun hende, inkluso hopi hende yòn, ku lo ke siña konos’é i sirbié. (Sal. 103:17, 18; 110:3) Yehova ta balorá nan mashá! Abo ta un di nan? Si ta asina, sin duda bo ta disfrutando di e “kosnan bon” di Dios ku ta hasi bo mas felis. (Lesa Salmo 103:5; Pro. 10:22) Manera nos ta bai mira, e “kosnan bon” ta inkluí un abundansia di kuminda spiritual, e mihó amigunan ku bo por tin, meta ku ta bale la pena i berdadero libertat.

6. Dikon bo mester satisfasé bo nesesidat spiritual, i kon Yehova ta yuda bo hasi esei?

⁶ Bestia no tin nesesidat spiritual, esta, nan no tin nesesidat pa konosé nan Kreador. Pero hende sí. (Mat. 4:4) Ora bo skucha Yehova, bo ta haña komprondementu, sabiduria i felisidat. Hesus a bisa: “Felis ta esnan ku ta konsiente di nan nesesidat spiritual.” (Mat. 5:3) Dios ta satisfasé bo nesesidat spiritual pa medio di su Palabra i e abundansia di kuminda spiritual ku e ta perkurá mediante “e esklabo fiel i prudente.” (Mat. 24:45) Esta un variedat grandi di kuminda spiritual nos tin!—Isa. 65:13, 14.

7. Kon kuminda spiritual lo yuda bo? Splika esei.

⁷ E kuminda spiritual ku Yehova ta perkurá por protehá bo den diferente manera pasobra e ta duna bo sabiduria i diskreshon, esta, kapasidat di pensa. (Lesa Proverbionan 2:10-14.) Por ehèmpel, e kualidatnan akí ta yuda bo rekonosé siñansa falsu i idea robes, manera e mentira ku no tin un Kreador òf e idea robes ku plaka i kos material ta hiba na felisidat. Ademas, e kualidatnan akí lo yuda bo resistí deseo robes i práktika ku lo perhudiká bo. Pues, sigui buska sabiduria di Dios i usa bo kapasidat di pensa. E ora ei, lo bo mira pa bo mes ku Yehova ta stima bo i ku e ke lo mihó pa bo.—Sal. 34:8; Isa. 48:17, 18.

8. Dikon bo mester hala serka Dios awor, i kon esei lo benefisiá bo den futuro?

⁸ Pronto, henter e mundu di Satanas lo  ser destruí i ta Yehova so lo por protehá nos. De echo, por yega e tempu ku nos lo mester konfia riba Yehova pa asta nos siguiente kuminda! (Hab. 3:2, 12-19) P’esei, for di awor nos mester hala serka nos Tata selestial i fortalesé nos konfiansa den dje. (2 Ped. 2:9) Si bo hasi esei, sin importá kiko pasa rònt di bo, lo bo sinti meskos ku e salmista David, kende a skirbi: “Mi a pone SEÑOR semper mi dilanti; pasobra e ta na mi man drechi, lo mi no wòrdu moví.”—Sal. 16:8.

9. (a) Segun Huan 6:44, kiko Yehova ta hasi? (b) Kiko ta remarkabel ora bo topa un otro Testigu di Yehova?

⁹ Ora bo topa un hende ku no ta Testigu di Yehova pa promé biaha, kuantu kos bo por sa di dje? Kisas bo sa su nòmber i kon su aparensia ta, pero probablemente bo no sa muchu mas di dje. Esei ta kompletamente diferente ora bo topa un Testigu di Yehova pa promé biaha. Bo sa ku e ta stima Yehova. Bo sa ku Yehova a mira algu bon den dje i a invit’é pa forma parti di su famia spiritual. (Lesa Huan 6:44.) Sin importá di ki pais e persona ei ta òf unda el a lanta, bo sa hopi kos di dje kaba i e tambe sa hopi kos di bo!

10, 11. Kiko tur sirbidó di Yehova tin en komun, i kon esei ta benefisiá nos?

¹⁰ Por ehèmpel, mesora bo ta ripará ku boso tin e kosnan di mas importante en komun. Bo sa ku boso ta papia e mesun “idioma puru” di e bèrdat. (Sof. 3:9, NW) Esei ta nifiká ku boso tur dos ta kere den  Dios, boso tin e mesun normanan moral i boso tin e mesun speransa pa futuro. E kosnan akí ta yuda boso konfia otro i sera un amistat ku lo dura pa semper.

¹¹ Sí, komo adoradó di Yehova bo tin e mihó amigunan, i nan ta tur kaminda na mundu, aunke bo no a topa nan ainda. Ki un bunita regalo e pueblo di Yehova ta disfrutá di dje!

12. Ki meta spiritual bo por pone pa bo mes?

¹² Lesa Eklesiástes 11:9–12:1. Bo a pone ún òf mas meta spiritual pa bo alkansá? Kisas bo ta trata di lesa Beibel tur dia. Òf kisas bo ta purba di mehorá bo abilidat di papia i di siña hende. Sea kual sea e kaso, kon bo ta sinti bo ora bo mira bon resultado òf ora otro hende elogiá bo? Sin duda bo ta sinti bo felis ku bo a logra bo meta. I bo tin rason di sinti bo asina, pasobra bo a pone e boluntat di Yehova na promé lugá, meskos ku Hesus a hasi.—Sal. 40:8; Pro. 27:11.

13. Dikon ta mihó pa nos pone meta spiritual i no meta ku mundu ta konsiderá importante?

¹³ Ora bo ta enfoká riba meta spiritual, esei lo duna bo berdadero satisfakshon pasobra bo ta hasiendo algu ku ta bale la pena. Apòstel Pablo a skirbi: “Bira firme, inmovibel, semper teniendo hopi di hasi den e trabou di Señor, pasobra boso sa ku boso trabou duru en konekshon ku Señor no ta enbano.” (1 Kor. 15:58) Di otro banda, si bo ta kore tras di meta ku mundu ta konsiderá importante, manera gana hopi plaka òf bira famoso, lo bo no tin berdadero felisidat. (Luk. 9:25) Rei Sálomon a komprobá esei pa su mes i pa nos.—Rom. 15:4.

14. Kiko nos por siña for di loke Sálomon a hasi?

¹⁴ Sálomon, un hòmber sumamente riku i poderoso, a disidí di purba e plasernan di bida pa mira si tin benefisio den esei. (Ekl. 2:1-10) Pues, el a traha kas, diseñá hardin i parke i el a kumpli ku tur deseo ku e tabatin. Kon el a sintié despues di tur esaki? El a sintié kontentu òf satisfecho? Nò, pasobra ora el a wak bèk na tur loke el a hasi, el a bisa: “Mi a konsiderá tur mi aktividatnan ku mi mannan a hasi . . . i mira, tur tabata banidat . . . No tabatin probecho.” (Ekl. 2:11) Lo bo hasi kaso di e lès poderoso ei?

15. Dikon fe ta importante, i segun Salmo 32:8 kon fe ta benefisiá bo?

¹⁵ Algun hende no ta siña e lèsnan di bida tanten ku nan no kometé eror i sufri e konsekuensianan. Pero, Yehova no ke pa esei pasa ku bo. P’esei fe ta importante, pasobra Dios ke pa bo obedes’é i pone su boluntat na promé lugá den bo bida. Pero, pa bo por hasi esei bo tin mester di fe. Nunka lo bo lamentá e desishonnan ku bo a tuma a base di bo fe. Nò, Yehova nunka lo lubidá ‘e amor ku bo a mustra pa su nòmber.’ (Heb. 6:10) Pues, traha duru pa kultivá fe fuerte, i lo bo mira pa bo mes ku bo Tata selestial ke lo mihó pa bo.—Lesa Salmo 32:8.

16. Dikon bo mester balorá bo libertat i us’é na un manera responsabel?

¹⁶ Pablo a skirbi: “Kaminda e spiritu santu di Yehova ta, ei tin libertat.” (2 Kor. 3:17) Sí, Yehova ta stima libertat, i el a krea nos di tal manera ku nos tambe ta stima libertat. Na mes momento, e ke pa bo usa e libertat ei na un manera responsabel, pasobra esei lo ta un protekshon pa bo. Kisas bo konosé algun hóben ku ta wak pornografia, praktiká inmoralidat seksual,  usa droga, bebe di mas òf praktiká deporte peligroso. I podisé nan ta asta disfrutá di algun momento di plaser. Pero, hopi biaha e kosnan akí ta trese konsekuensia doloroso manera malesa, adikshon òf asta morto. (Gal. 6:7, 8) Klaramente anto, esei no ta berdadero libertat.—Tito 3:3.

17, 18. (a) Kon obedensia na Dios ta duna nos berdadero libertat? (b) Kon nos por kompará e libertat ku Adam ku Eva tabatin den e hòfi di Eden ku e libertat ku hende tin awe?

¹⁷ Di otro banda, kuantu hende bo konosé ku a bira malu pa motibu ku nan a pega na e normanan di Beibel? Pues anto, obedensia na Yehova ta bon pa nos salú i ta duna nos berdadero libertat. (Sal. 19:7-11) Es mas, ora bo usa bo libertat na un manera sabí, esta, denter di e límitenan di Dios su leinan i prinsipionan perfekto, bo ta mustra Dios i bo mayornan ku bo ta kla pa nan konfia bo ku mas libertat. De echo, e propósito di Dios ta pa duna su fiel sirbidónan libertat perfekto, òf manera Beibel ta yam’é: “E glorioso libertat di e yunan di Dios.”—Rom. 8:21.

¹⁸ Adam ku Eva a eksperensiá e tipo di libertat ei. Kuantu kos Yehova a prohibí nan den e hòfi di Eden? Ún so. Nan no tabatin mag di kome fruta di ún palu. (Gén. 2:9, 17) Abo lo bisa ku e prohibishon ei tabata kruel òf inhustu? Klaru ku nò. Djis pensa riba e kantidat di lei ku hende a traha i a fòrsa otro hende pa siña i obedesé.

19. Kon Yehova i Hesus ta siña nos bira persona liber?

¹⁹ Nos ta mira Yehova su sabiduria den e manera ku e ta trata nos. En bes di duna nos un gran kantidat di lei, ku pasenshi e ta siña nos kon pa apliká e lei di amor. E ke pa nos biba segun su prinsipionan i odia loke ta malu. (Rom. 12:9) Hesus su Sermon Riba Seru ta un bon ehèmpel di e siñansa ei pasobra e ta menshoná e kousa prinsipal di maldat. (Mat. 5:27, 28) Komo Rei di e Reino di Dios, Kristu lo sigui instruí nos den e mundu nobo di manera ku nos lo tin e mesun aktitut ku e tin relashoná ku hustisia i maldat. (Heb. 1:9) Ademas, Hesus lo yuda nos alkansá perfekshon físiko i mental. Imaginá bo, lo bo no sinti e tentashon di kometé piká ni lo bo no eksperensiá e konsekuensianan horibel di piká. Anto finalmente lo bo disfrutá di “e glorioso libertat” ku Yehova a primintí bo.

20. (a) Kon Yehova ta usa su libertat? (b) Kon bo por imitá Dios?

²⁰ Ta klaru ku nunka nos lo no tin libertat apsoluto. Nos libertat semper lo ta guiá pa amor pa Dios i pa nos próhimo. De echo, e úniko kos ku Yehova ta pidi nos ta pa nos imit’é. Aunke su libertat ta sin límite, el a skohe pa laga amor gui’é den su trato ku nos. (1 Huan 4:7, 8) P’esei, ta di komprondé ku nos por tin berdadero libertat solamente si nos imitá Dios i laga amor guia nos.

21. (a) Kiko David a bisa Yehova? (b) Kiko nos lo trata den e siguiente artíkulo?

²¹ Bo ta apresiá e “kosnan bon” ku Yehova a duna bo, esta, un abundansia di kuminda spiritual, bon amigunan, meta ku ta bale la pena i e prospekto maravioso di libertat perfekto? (Sal. 103:5) Si ta asina, probablemente bo ta sinti mes kontentu ku David, kende a bisa Yehova: “Lo bo mustra mi e berea di bida; den bo presensia tin plenitut di goso; na bo man drechi tin delisia pa semper.” (Sal. 16:11) E siguiente artíkulo lo trata algun hoya spiritual mas ku nos ta haña den Salmo 16. E hoyanan ei lo yuda nos mira kon nos por tin un bida ku ta berdaderamente felis.