Na 2 Korintionan 12:2, 3 Pablo a papia di un hende ku “a ser hibá na e di tres shelu.” Ken e hende ei tabata? Ora Pablo a skirbi e kongregashon na Korinto, el a enfatisá ku Dios tabata us’é komo apòstel. (2 Kor. 11:5, 23) Despues, el a papia di “vishonnan . . . i revelashonnan di Señor.” Den e konteksto, Pablo no a menshoná ningun otro ruman. Pues, ora Pablo a papia di un hende ku a risibí vishon i revelashon, ta lógiko ku e tabata papia di su mes.—2 Kor. 12:1, 5.

Ta bisto anto ku ta Pablo mes “a ser hibá na e di tres shelu” i “den paradeis.” (2 Kor. 12:2-4) E echo ku Pablo a usa e palabra “revelashonnan,” ta indiká ku el a risibí informashon tokante algu ku lo eksistí den futuro.

Kiko “e di tres shelu” ku Pablo a mira ta?

Den Beibel, “shelu” por referí na e shelu literal, esun ku nos ta mira. (Gén. 11:4; 27:28; Mat. 6:26) Pero e por referí na otro kos tambe, manera un gobièrnu humano. (Dan. 4:20-22) Òf, e por referí tambe na e gobièrnu di Dios, manera ta e kaso ku e Reino di Dios.—Rev. 21:1.

Na kiko Pablo a referí ora el a usa e ekspreshon “e di tres shelu”? Tin biaha Beibel ta ripití algu tres bes pa pone énfasis. (Isa. 6:3; Eze. 21:27; Rev. 4:8) Ta parse ku ora Pablo a papia di “e di tres shelu,” e tabata enfatisá un gobièrnu di e mihó kalidat: e Reino Mesiániko goberná pa Hesus i e 144.000 ko-gobernantenan. (Wak Perspicacia para comprender las Escrituras, Tomo 1, pàg. 473,  476.) Manera apòstel Pedro a skirbi, nos ta spera “shelu nobo” segun Dios su promesa.—2 Ped. 3:13.

Kiko e “paradeis” ku Pablo a menshoná ta?

“Paradeis” por tin vários nifikashon: (1) Si nos pensa riba e hòfi ku Dios a traha pa e promé pareha, e ora ei “paradeis” por referí na e paradeis riba tera ku lo eksistí den futuro. (2) E por referí na e kondishon spiritual ku Dios su pueblo lo disfrutá di dje den futuro. (3) Ademas, e por referí na e kondishonnan maravioso den shelu, esta, “e paradeis di Dios” menshoná na Revelashon 2:7.—Wak E Toren di Vigilansia, 15 di yüli 2015, pág. 8 par. 8.

Ora ku Pablo tabata deskribí na 2 Korintionan 12:4 loke el a mira, ta posibel ku e tabata referí na tur tres nifikashon.

Pa resumí:

“E di tres shelu” menshoná na 2 Korintionan 12:2 probablemente ta e Reino Mesiániko den man di Hesukristu i e 144.000, esta, e “shelu nobo.”—2 Ped. 3:13.

E ta ser yamá “e di tres shelu” pasobra e Reino ta un gobièrnu di e mihó kalidat.

E “paradeis” kaminda Pablo “a ser hibá” den vishon probablemente ta referí na (1) e paradeis ku lo eksistí riba tera den futuro, (2) e paradeis spiritual ku lo eksistí den e tempu ei, ku lo ta mas mihó ku e paradeis spiritual ku ta eksistí awor i (3) “e paradeis di Dios” den shelu. Tur esakinan lo eksistí pareu den e mundu nobo.

Pues, e mundu nobo lo ta un kombinashon di e shelu nobo i e tera nobo. Esaki lo ta algu nobo, ku ta inkluí tantu e Reino selestial komo humanidat ku ta sirbi Yehova den un paradeis riba tera.