Bo a tuma tempu pa lesa e edishonnan di e aña akí di E Toren di Vigilansia? Wèl, wak si bo por kontestá e siguiente preguntanan:

Ki benefisio nos lo haña si nos tuma tempu pa papia, skucha i pensa tokante Yehova?

Nos lo tuma mihó desishon, bira mihó maestro, nos fe lo bira mas fuerte i nos lo stima Yehova mas ainda.—w22.01, pág. 30-31.

Dikon ta bon pa nos siña konfia Yehova i e rumannan ku ta dirigí?

Awor ta tempu pa nos siña konfia e manera ku Dios ta hasi kosnan dor di no duda instrukshon i desishon di e ansianonan. Ora tribulashon grandi dal aden, nos lo obedesé mesora asta si nos haña instrukshon ku por parse straño òf ilógiko.—w22.02, pág. 4-6.

Dikon un angel a bisa Zakarías pa wak e “chumbu-di-midi den man di [Gobernador] Zorobabel”? (Zak. 4:8-10)

E vishon akí a sigurá e pueblo di Dios ku pa simpel ku e tèmpel por a parse lo el a keda kla i lo a kumpli ku Dios su rekisitonan.—w22.03, pág. 16-17.

Kon nos por ta “un bon ehèmpel . . . den [nos] manera di papia”? (1 Tim. 4:12)

Ora nos ta den sirbishi, nos abla ta amabel i respetuoso, na reunion nos lo kanta di kurason i duna komentario regularmente. Ademas, nos lo papia bèrdat, edifiká otronan i evitá di papia kos ofensivo.—w22.04, pág. 6-9.

Dikon e bestia na Revelashon 13:1 i 2 tin e karakterístikanan di e kuater bestianan (reinonan) menshoná na Daniel kapítulo 7?

E bestia na Revelashon 13 no ta representá djis un gobièrnu, manera Roma. Mas bien, e ta representá tur e gobièrnunan ku a yega di goberná riba humanidat.—w22.05, pág. 9.

Den ki manera importante nos por mustra ku nos ta konfia den Yehova su hustisia?

Si un hende insultá nos, ofendé nos òf peka kontra nos, nos ta purba di no keda rabiá ni karga renkor, ma nos ta laga e asuntu den Yehova su man. Lo e drecha tur daño ku piká a kousa.—w22.06, pág. 10-11.

Kiko un ruman ku ta hasi orashon na reunion tin ku keda kòrda?

No por usa orashon pa duna konseho ni pa hasi anunsio. Foral na komienso di reunion, no mester “usa hopi palabra.” (Mat. 6:7)—w22.07, pág. 24-25.

Den ki sentido “esnan ku praktiká maldat” lo haña “resurekshon di huisio”? (Huan 5:29)

Nan lo no risibí un huisio desfaborabel debí na e kosnan ku nan a hasi promé ku nan a muri. Nan lo ser evaluá a base di nan kondukta despues di nan resurekshon.—w22.09, pág. 18.

Ki animashon J. F. Rutherford a duna na un asamblea na sèptèmber 1922?

Na e asamblea na Cedar Point, Ohio, Merka, el a deklará: “E Rei ta reina! Boso ta su agentenan di publisidat! P’esei, anunsiá, anunsiá, anunsiá, e Rei i su Reino!”—w22.10, pág. 3-5.

Segun Isaías kapítulo 30, kua ta e tres maneranan ku Yehova ta yuda nos wanta prueba?

E kapítulo ta mustra ku e ta (1) skucha nos orashonnan ku atenshon i ta kontesta nan, (2) guia nos i (3) bendishoná nos aworakí i den futuro.—w22.11, pág. 9.

Dikon nos por konkluí ku e palabranan di Salmo 37:10, 11 i 29 a kumpli den pasado i lo kumpli den futuro tambe?

E palabranan ei di David ta deskribí e situashon bendishoná ku tabatin na Israel, manera durante Sálomon su reinado. Ora Hesus a referí na un paradeis den futuro, el a menshoná versíkulo 11. (Mat. 5:5; Luk. 23:43)—w22.12, pág. 8-10,  14.