1. Kiko nos ta sinti ora nos pensa riba e promesa di bida eterno ku Yehova ta duna nos?

 YEHOVA ta primintí ku hende ku obedes’é lo tin “bida eterno.” (Rom. 6:23) Ora nos pensa riba e promesa bunita ei, nos amor pa Yehova ta krese mas ainda. Djis pensa un ratu: nos Tata den shelu stima nos asina tantu ku e ta ofresé nos e regalo ei pa nos no separá for di dje nunka.

2. Den ki manera e promesa di bida eterno ta yuda nos?

² Dios su promesa di bida eterno ta yuda nos tene pasenshi i soportá prueba ku nos ta pasa aden. Asta ora nos enemigunan menasá nos ku morto, nos lo no stòp di sirbi Yehova. Dikon nò? Un motibu ta ku nos sa ku si nos muri fiel na Yehova, lo e resusitá nos i nos lo tin e speransa di no muri nunka mas. (Huan 5:28, 29; 1 Kor. 15:55-58; Heb. 2:15) Pero, dikon nos tin sigur ku nos por biba pa semper? Laga nos wak algun motibu.

3. Dikon nos tin sigur ku Yehova tin e abilidat pa mantené nos na bida pa semper? (Salmo 102:12, 24, 27)

³ Nos sa ku Yehova tin e abilidat pa mantené nos na bida pa semper pasó e ta e Fuente di bida i e ta biba pa semper. (Sal. 36:9) Wak algun teksto di Beibel ku ta proba ku Yehova semper a i lo eksistí. Salmo 90:2 ta bisa ku e t’ei “for di eternidat te na eternidat.” Salmo 102 tambe ta bisa esei bon kla. (Lesa Salmo 102:12, 24, 27.)  Anto Profeta Habakuk a skirbi lo siguiente tokante nos Tata den shelu: “Abo, o Yehova, no ta eksistí for di eternidat? O mi Dios, mi Dios Santu, abo no ta muri.”—Hab. 1:12, NW.

4. Si ta difísil pa nos komprondé ku Yehova semper a eksistí, dikon esei no mester wòri nos?

⁴ Bo ta haña ku ta difísil pa komprondé ku Yehova semper a eksistí? (Isa. 40:28) No ta abo so. Eliú a bisa lo siguiente tokante Yehova: “Su kantidat di aña ta algu ku nos no por komprondé.” (Yòb 36:26, nota) Ta bèrdat ku tin algun kos ku ta difísil pa nos komprondé, pero esei no ke men ku nan no ta bèrdat. Por ehèmpel, pa mayoria di nos kisas ta difísil pa komprondé kon koriente ta funshoná, pero esei no ke men ku e no ta eksistí. Di mes manera, Yehova semper a i lo eksistí. Anto esei ta un bèrdat, sea ku nos por komprondé òf nò. (Rom. 11:33-36) Ademas, el a eksistí promé ku tur kos den universo. Nos ta konvensí ku ta Yehova “ta Esun ku a traha tera pa medio di su poder,” i el a eksistí promé ku “el a span e shelunan.” (Yer. 51:15; Echo. 17:24) Ban wak un otro motibu ku ta konvensé nos ku nos por biba pa semper.

5. Ki speransa e promé pareha tabatin?

⁵ Di tur e sernan bibu ku Yehova a krea riba tera ta hende so el duna e speransa di biba pa semper. Pero Yehova a atvertí Adam, e promé hende: “Di e palu di konosementu di bon i malu lo bo no kome, pasobra e dia ku bo kome di dje, lo bo muri sigur.” (Gén. 2:17) Si Adam i Eva a skucha na Yehova, nan lo no a muri. Anto probablemente ku tempu, Yehova lo a laga nan kome for di “e palu di bida.” Asina ei Yehova lo a garantisá nan ku nan lo a “biba pa semper.” b—Gén. 3:22.

6-7. (a) Ki prueba nos tin ku nos no ta kreá pa muri? (b) Kiko lo bo ke hasi den Paradeis? (Wak e plachinan.)

⁶ Komo averahe, hende ta biba entre 70 pa 80 aña. Pero, ta interesante ku algun sientífiko a haña prueba ku nos selebro por warda hopi mas ku djis e añanan ei so. Na 2010, un revista sientífiko merikano a bisa ku segun kálkulo nos selebro por warda mas o ménos 2,5 mion gigabyte di informashon,  ku ta ekivalente na tres mion ora di programa di televishon. Esei ta un total di mas ku 300 aña. Pero, kisas nos selebro por warda hopi mas aña di informashon. E kapasidat di nos selebro ta mustra ku Yehova a krea nos pa biba hopi mas tempu ku djis 70 òf 80 aña.—Sal. 90:10.

⁷ Yehova a krea nos tambe ku un deseo fuerte pa sigui biba. Na Eklesiástes 3:11 nos ta lesa ku Yehova “a pone eternidat den [hende su] kurason.” Esei ta un motibu dikon nos ta mira morto komo un enemigu. (1 Kor. 15:26) Imaginá ku bo a bira hopi malu. Lo bo djis sinta man krusá i warda morto yega? Niun ratu so! Normalmente, nos ta bai dòkter i usa remedi pa bringa e malesa. De echo, nos ta hasi tur loke rasonablemente ta den nos man pa nos no muri. Anto ora un amigu òf famia di nos muri, sea e ta yòn òf di edat, nos ta keda kibrá pa hopi tempu. (Huan 11:32, 33) Si Yehova, kende ta stima nos, su propósito no tabata pa nos biba pa semper, lo e no a duna nos e deseo i kapasidat pa sigui biba. Pero, ainda nos tin mas motibu pa kere ku nos por biba pa semper. Laga nos wak algun kos ku Yehova a i ta hasi ku ta proba ku su propósito no a kambia.

8. Kiko Isaías 55:11 ta garantisá nos tokante Yehova su propósito?

⁸ Aunke Adam ku Eva a peka i pa nan falta tur nan desendientenan ta  muri, Yehova no a kambia su propósito. (Lesa Isaías 55:11.) Te ainda e ke pa hende fiel biba pa semper. Nos por konkluí esei debí na tur e kosnan ku Yehova a bisa i hasi pa kumpli ku su propósito.

9. Kiko Yehova a primintí? (Daniel 12:2, 13)

⁹ Yehova a primintí ku lo e resusitá hende ku a muri i duna nan e oportunidat di biba pa semper. (Echo. 24:15; Tito 1:1, 2) Yòb tabatin sigur ku Yehova tabata anhelá pa resusitá hende ku a muri. (Yòb 14:14, 15) Profeta Daniel tabata sa ku hende ku ser resusitá lo tin oportunidat di biba pa semper. (Sal. 37:29; lesa Daniel 12:2, 13.) E hudiunan den tempu di Hesus tambe tabata sa ku Yehova por duna su sirbidónan fiel “bida eterno.” (Luk. 10:25; 18:18) Hopi biaha, Hesus a papia tokante e promesa ei i e mes a ser resusitá dor di su Tata.—Mat. 19:29; 22:31, 32; Luk. 18:30; Huan 11:25.

10. Kiko e resurekshonnan di pasado a proba? (Wak e plachi.)

¹⁰ Yehova ta Esun ku ta duna nos bida i ku por duna bida na hende ku a muri. El a duna Profeta Elías poder pa resusitá yu di e biuda na Sarepta. (1 Rei. 17:21-23) Mas despues, ku yudansa di Dios, Profeta Eliseo a resusitá yu di un señora sunamita. (2 Rei. 4:18-20, 34-37) E resurekshonnan ei i otronan ta proba ku Yehova tin poder pa duna bida atrobe na hende ku a muri. Ora Hesus tabata riba tera, el a demostrá bon kla ku su Tata a dun’é e poder ei. (Huan 11:23-25, 43, 44) Awor Hesus ta den shelu i a haña “tur outoridat den shelu i riba tera.” Pues, e por kumpli ku e promesa di ku “tur esnan ku ta den graf” lo bolbe na bida ku e speransa di sigui biba pa semper.—Mat. 28:18; Huan 5:25-29.

11. Kon e reskate ta hasi posibel pa nos biba pa semper?

¹¹ Dikon Yehova a laga su Yu stimá muri un morto asina doloroso? Hesus mes a duna e kontesta ora el bisa: “Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.” (Huan 3:16) Dor ku Yehova a duna su Yu komo reskate pa pordon di nos pikánan, nos tin e oportunidat di biba pa semper. (Mat. 20:28) Apòstel Pablo a splika e parti importante ei di Dios su propósito asin’akí: “Ya ku morto a bini pa medio di un hende, resurekshon di e mortonan tambe ta bini pa medio di un hende. Meskos ku den Adam tur ta muri, asina tambe den Kristu tur lo haña bida.”—1 Kor. 15:21, 22.

12. Kon Yehova lo kumpli ku su propósito?

¹² Hesus a siña su disipelnan resa pa e Reino di Dios bini i pa Dios su boluntat sosodé riba tera. (Mat. 6:9, 10) Parti di Dios su propósito ta pa hende biba pa semper riba tera. Pa logra esei, el a nombra su Yu komo Rei di Su Reino. For di promé siglo, Dios a kuminsá reuní 144.000 hende for di tera pa traha huntu ku Hesus pa kumpli ku Su boluntat.—Rev. 5:9, 10.

13. Kiko Yehova ta hasiendo aktualmente, i kon nos por yuda ku esei?

¹³ Aktualmente, Yehova ta reuní “un multitut grandi” di hende i ta siña nan kon pa biba bou di su Reino. (Rev. 7: 9, 10; Sant. 2:8) Aunke mundu ta dividí debí na odio i guera, esnan ku ta forma parti di e multitut grandi ta hasi esfuerso pa ranka tur sorto di odio for di nan kurason. Den un sentido, ya nan ta bati nan spadanan traha plug ku nan. (Mik. 4:3) Na lugá di bringa den guera, ku ta kousa destrukshon i morto, nan ta siña hende tokante e Dios berdadero i su propósito i asina yuda tur hende haña “loke realmente ta bida.” (1 Tim. 6:19) Komo ku nan ta apoyá e Reino di Dios, kisas nan por haña nan ku oposishon di famia òf ku difikultat finansiero, pero Yehova semper lo hasi sigur ku nan tin loke nan mester. (Mat. 6:25, 30-33; Luk. 18:29, 30) Tur e kosnan ei ta sigurá nos ku e Reino di Dios ta un realidat i ku lo e sigui kumpli ku Yehova su propósito.

14-15. Kon Yehova su promesa di kaba ku morto pa semper lo kumpli?

¹⁴ Hesus ya ta Rei den shelu i lo kumpli ku tur e promesanan di Yehova. (2 Kor. 1:20) Desde 1914, Hesus ta goberná meimei di su enemigunan. (Sal. 110:1, 2) Umbes akí, e huntu ku e 144.000 lo kompletá nan viktoria i destruí tur hende malbado.—Rev. 6:2.

¹⁵ Durante e Reinado di Mil Aña,  Hesus lo resusitá hende ku a muri i yuda tur hende obedesidu bira perfekto. Despues di e prueba final, hende ku Yehova konsiderá ‘hustu lo heredá tera, i nan lo biba riba dje pa semper.’ (Sal. 37:10, 11, 29) Anto morto, “e último enemigu,” lo ser destruí. (1 Kor. 15:26) Esta un alegria esei lo ta!

16. Kiko mester ta nos motibu prinsipal pa sirbi Yehova?

¹⁶ Manera nos a mira, nos speransa di biba pa semper ta firmemente fundá riba e Palabra di Dios. E speransa ei ta yuda nos keda fiel durante e último dianan difísil akí. Pero, e deseo di biba pa semper so lo no yuda nos agradá Yehova. E motibu prinsipal ku nos ke keda fiel na Yehova i na Hesus ta pasó nos stima nan. (2 Kor. 5:14, 15) E amor ei lo motivá nos pa sigui nan ehèmpel i papia ku otro hende tokante nos speransa. (Rom. 10:13-15) Ora nos hasi esfuerso pa ta mas generoso i pa no pensa riba nos mes so, Yehova lo ke ta nos amigu pa semper.—Heb. 13:16.

17. Ki responsabilidat kada un di nos tin? (Mateo 7:13, 14)

¹⁷ I kiko di abo? Lo bo ta entre esnan ku lo biba pa semper? Yehova a duna nos tur e oportunidat ei. Pero, ta keda na kada un di nos pa keda riba e kaminda ku ta hiba na bida. (Lesa Mateo 7:13, 14.) Ma, kon bida lo ta ora nos ta biba pa semper? Nos lo haña sa esei den e siguiente artíkulo.