Nò. Loke el a skirbi ta klòp.

Wak loke el a skirbi na Salmo 61:8 i versíkulonan similar: ‘Lo mi alabá bo nòmber ku kantika pa semper, i tur dia lo mi kumpli ku mi promesanan solèm.’ ‘Yehova, mi Dios, mi ta alabá bo ku henter mi kurason; lo mi onra bo nòmber pa semper.’ ‘Lo mi alabá bo nòmber pa tur eternidat.’—Sal. 61:8; 86:12; 145:1, 2.

David no tabata eksagerá. E no a pensa ku nunka lo e no muri. E tabata sa ku tur hende lo muri debí na piká. Anto e mes a atmití ku e tabata un pekadó. (Gén. 3:3, 17-19; Sal. 51:4, 5) E tabata sa ku asta hende ku tabatin aprobashon di Dios, manera Abraham, Isak i Yakòb, a muri. E tabata sa ku, ku tempu, e tambe lo muri. (Sal. 37:25; 39:4) Pero, e palabranan ku David a skirbi na Salmo 61:8 ta mustra su deseo i determinashon pa alabá Dios pa semper, esta, tanten ku e tabata na bida.—2 Sám. 7:12.

Algun kos ku David a skirbi ta papia tokante eksperensianan ku e tabatin den bida, manera nos por mira den e introdukshonnan di Salmo 18, 51 i 52. Na Salmo 23, el a deskribí Yehova komo un wardador ku ta guia, kuida i protehá. I komo ku David mes tabata un wardadó asina, e tabatin e deseo di sirbi Yehova ‘tur e dianan di su bida.’—Sal. 23:6.

Ta bon pa kòrda ku tur loke David a skirbi a ser inspirá pa Yehova. Entre e kosnan ku el a skirbi, tabatin profesianan tokante kosnan ku lo pasa den futuro. Por ehèmpel, na Salmo 110, David a papia di un dia ku su Señor lo “sinta na [Dios su] man drechi” den shelu i haña hopi outoridat. Ku e outoridat ei lo e dominá e enemigunan di Dios i “ehekutá huisio kontra e nashonnan” riba tera. David tabata antepasado di Hesus, kende tabata e Mesías. E Mesías lo goberná for di shelu i lo ta un “saserdote pa semper.” (Sal. 110:1-6) Hesus a bisa ku e profesia na Salmo 110 ta papia tokante dje i ku lo e tin un kumplimentu den futuro.—Mat. 22:41-45.

Pues manera nos a mira, Yehova a inspirá David pa skirbi tokante kosnan ku tabatin di haber ku su tempu i tambe tokante kosnan ku lo sosodé den futuro ora e lanta for di morto i por alabá Yehova pa semper. A base di esei, nos por komprondé ku Salmo 37:10, 11 i 29 tabatin un kumplimentu den pasado na Israel i lo tin un kumplimentu den futuro ora Dios kumpli ku su promesanan rònt mundu.—Wak paragraf 8 di e artíkulo, “Lo Bo Ta ku Mi den Paradeis” den e revista akí.

P’esei, Salmo 61:8 plùs tekstonan similar ta laga nos komprondé ku, tanten David tabata na bida, e kier a alabá Yehova. I nan ta mustra nos tambe loke David lo hasi den futuro asina ku Yehova lant’é for di morto.