1. Dikon nos por bisa ku Ábraham su speransa tabata bon fundá?

 YEHOVA a primintí su amigu Ábraham ku lo e tin un yu i ku tur nashon riba tera lo ser bendishoná pa medio di su desendiente. (Gén. 15:5; 22:18) Debí ku Ábraham tabatin fe fuerte den Dios, e tabata konvensí ku e promesa ei lo a bira realidat. Pero, ora Ábraham tabatin 100 aña i su kasá 90, e pareha fiel akí ainda no tabatin un yu. (Gén. 21:​1-7) Apesar di esei, Beibel ta bisa: “[Ábraham] a karga speransa i tabatin fe ku lo el a bira tata di hopi nashon. El a kere den loke Dios a bis’é.” (Rom. 4:18) Nos sa ku loke Ábraham tabata spera riba dje a bira realidat. El a bira tata di Ísak, e yu ku tantu el a spera riba dje. Dikon Ábraham tabata asina konvensí ku Yehova lo a kumpli ku su palabra?

2. Dikon Ábraham tabata konvensí ku loke Yehova a primintié lo a bira realidat?

² Debí ku Ábraham tabatin un amistat hopi será ku Yehova, “e tabata plenamente konvensí ku loke Dios a primintí” lo a bira realidat. (Rom. 4:21) Ábraham tabatin Yehova su aprobashon i Yehova a deklar’é hustu pa motibu di su fe. (Sant. 2:23) Manera Romanonan 4:18 ta mustra, Ábraham tabatin tantu fe komo speransa. Awor, laga nos wak loke Apòstel Pablo ta bisa tokante speransa na Romanonan kapítulo 5.

3. Kiko Pablo lo yuda nos komprondé tokante speransa?

 ³ Pablo ta splika dikon nos por tin sigur ku nos ‘speransa no ta hiba na desilushon.’ (Rom. 5:5) E ta yuda nos komprondé tambe kon nos speransa por bira mas fuerte. Segun ku nos ta analisá Romanonan 5:​1-5, pensa riba kon bo speransa a bira mas fuerte ku tempu. Tambe lo bo mira loke bo por hasi pa fortalesé bo speransa aun mas. Promé, laga nos analisá un bunita speransa ku Pablo ta bisa ku lo no hiba na desilushon.

4. Kiko Romanonan 5:1 i 2 ta papia di dje?

⁴ Lesa Romanonan 5:​1, 2. Pablo a skirbi e palabranan ei na e kongregashon na Roma. E rumannan einan a siña tokante Yehova i Hesus, a demostrá fe i a bira kristian. Pues, Dios a “deklará [nan] hustu pa motibu di fe” i a ungi nan ku spiritu santu. For di e momento ei nan tabatin un bunita speransa, i nan tabatin sigur ku nan lo a risibié.

5. Ki speransa e ungínan tin?

⁵ Despues Pablo a splika e kristiannan ungí na Efeso tokante e speransa ku Dios a duna nan. El a bisa ku nan lo haña un “herensia pa e santunan.” (Efe. 1:18) Anto na e rumannan na Kolósas el a bisa unda nan lo a haña e rekompensa ku nan tabata spera riba dje. El a bisa nan: “[E] ta reservá pa boso den shelu.” (Kol. 1:​4, 5) Pues, e kristiannan ungí tin e speransa di resusitá i biba pa semper den shelu, kaminda nan lo goberná ku Kristu.—1 Tes. 4:​13-17; Rev. 20:6.

6. Kiko un ruman ungí a bisa tokante su speransa?

⁶ Kristiannan ungí ta balorá e speransa ku nan tin mashá. Un di nan, Ruman Frederick Franz, kende a sirbi Yehova fielmente pa hopi dékada, na 1991 a bisa di kurason: “Nos speransa ta sigur, i lo e kumpli pa kada un di e  144.000 miembronan di e tou chikitu. Nos rekompensa lo ta muchu mas mihó ku loke nos a imaginá. . . Ketu bai [nos] ta balorá e speransa ei. . . . Mas nos warda riba dje, mas nos ta apresi’é. Ta bale la pena warda riba dje, asta si mester hasi esei pa miónes di aña. Mi ta balorá nos speransa mas tantu awor ku promé.”

7-8. Ki speransa mayoria di nos tin? (Romanonan 8:​20, 21)

⁷ Mayoria di nos ku ta sirbi Yehova awe tin un otro speransa. Kua esei ta? E mesun ku Ábraham tabatin: bida eterno riba tera bou di Dios su Reino. (Heb. 11:​8-10, 13) Pablo a skirbi tambe tokante e bunita speransa akí. (Lesa Romanonan 8:​20, 21.) Ora ku b’a haña sa di Beibel su promesa pa futuro, kiko b’a gusta mas di dje? E echo ku lo bo no peka mas i lo bo ta perfekto? Òf bo tabata enkantá pa haña sa ku bo sernan kerí lo resusitá i biba den Paradeis riba tera? Sea kual sea e kaso, b’a komprondé ku e speransa ku Dios a duna nos tin hopi kos bunita kuné.

⁸ Nos tur tin un speransa ku ta hasi nos masha felis, sea ta pa biba pa semper den shelu òf riba tera. Anto nos bunita speransa por bira aun mas fuerte. Kon nos por logra esei? Ban sigui wak loke Pablo a skirbi. Su palabranan lo yuda nos haña mas konfiansa ainda ku nos speransa no ta hiba na desilushon.

9-10. Manera tabata e kaso di Pablo, kiko nos sa ku nos lo haña nos kuné? (Romanonan 5:3) (Wak e plachi.)

⁹ Lesa Romanonan 5:3. Pablo a bisa ku tribulashon por fortalesé nos speransa. Esei ta sorprendé bo? Echo ta ku tur siguidó di Kristu lo haña nan ku tribulashon. Wak e kaso di Pablo mes. El a bisa e rumannan na Tesalónika: “Tempu nos tabata serka boso, nos tabata bisa boso  di antemano ku nos lo pasa den tribulashon, i manera boso sa, esei ta loke a sosodé tambe.” (1 Tes. 3:4) Anto el a bisa e rumannan na Korinto: “Nos ke pa boso sa di e tribulashon ku nos a pasa aden . . . Nos tabata teme pa nos bida.”—2 Kor. 1:8; 11:​23-27.

¹⁰ Meskos ta konta awe. Nos sa ku komo kristian nos lo haña nos ku tribulashon. (2 Tim. 3:12) Kiko abo a pasa aden debí ku bo a pone fe den Hesus i a bira su siguidó? Kisas famia- òf amigunan a hasi chèrchi di bo òf asta trata bo malu. B’a haña bo ku problema na trabou debí ku bo ke ta onesto den tur kos? (Heb. 13:18) B’a haña bo ku oposishon di parti di gobièrnu debí ku bo a papia ku otro hende tokante bo speransa? Sea kual sea e tribulashon ku nos haña nos kuné, Pablo ta bisa ku nos mester alegrá. Dikon?

11. Dikon nos mester ta determiná pa perseverá?

¹¹ Nos ta alegrá ora nos ta pasa den tribulashon pasó e ta yuda nos kultivá un kualidat importante. Romanonan 5:3 ta bisa: “Tribulashon ta produsí perseveransia.” Tur kristian lo haña nan ku tribulashon, pues nos tur mester ta determiná pa perseverá. Ta solamente si nos perseverá nos lo haña e rekompensa ku nos ta spera asina tantu riba dje. Nos no ke ta mané e hendenan ku Hesus tabatin na mente ora el a papia dje komparashon di e simia ku a kai den baranka. Nan ta aseptá e palabra ku goso, pero ora “ku tribulashon òf persekushon” presentá, nan ta trompeká. (Mat. 13:​5, 6, 20, 21) Ta bèrdat ku nos niun no gusta haña nos ku oposishon ni prueba, pero nos lo benefisiá si nos perseverá. Kon asina?

12. Ki bentaha tin ora nos ta perseverá?

¹² Disipel Santiago a menshoná e bentahanan di perseverá ora el a bisa: “Laga perseveransia kompletá su obra, pa boso por ta perfekto i sin defekto den tur sentido, sin ku boso tin falta di nada.” (Sant. 1:​2-4) Pues, perseveransia tin un obra òf un trabou pa hasi. Ki trabou esei ta? Yuda bo haña mas pasenshi, mas fe i mas konfiansa den Dios. Pero, perseverá tin un otro gran bentaha.

13-14. Kiko perseveransia ta produsí, i ki efekto esei tin riba nos speransa? (Romanonan 5:4)

¹³ Lesa Romanonan 5:4. Pablo a bisa ku perseveransia “ta produsí un kondishon aprobá pa Dios.” Esei no ke men ku Yehova ta kontentu ora bo ta pasa den prueba òf tribulashon, mas bien e ta kontentu ku bo ta perseverá fielmente. Bo no ta kontentu pa sa ku bo por hasi Yehova felis?—Sal. 5:12.

¹⁴ Kòrda ku Ábraham a perseverá apesar di vários prueba i Yehova a keda masha kontentu kuné. Yehova a mir’é komo Su amigu i a konsider’é un hòmber hustu. (Gén. 15:6; Rom. 4:​13, 22) Meskos ta konta den nos kaso. Yehova su aprobashon, esta, ku e ta keda kontentu ku nos, no ta dependé di tur loke nos ta hasi p’e ni di e privilegio òf responsabilidat ku nos tin. E ta kontentu ku nos pasó nos ta perseverá fielmente. I nos tur por hasi esei, sin importá nos edat, sirkunstansia òf abilidat. Bo ta pasando den un prueba aworakí? Keda kòrda ku si bo keda fiel, Yehova lo  ta kontentu ku bo. E echo ku nos sa ku Yehova ta kontentu ku nos tin gran efekto riba nos speransa: e ta hasié fuerte.

15. Kiko Pablo a bisa na Romanonan 5:4 i 5, i kiko kisas nos lo puntra nos mes?

¹⁵ Manera nos a mira, Pablo a splika ku nos ta haña Yehova su aprobashon si nos perseverá. Pero, ripará kiko Pablo ta sigui bisa: “E kondishon aprobá pa Dios, na su turno, ta produsí speransa, i e speransa ei no ta hiba na desilushon.” (Rom. 5:​4, 5) Na Romanonan 5:​2, Pablo a bisa ku e kristiannan na Roma tabatin un speransa, “e speransa di risibí e gloria di Dios.” P’esei, kisas nos ta puntra nos mes: ‘Si e kristiannan ei ya tabatin un speransa, dikon Pablo ta bolbe papia di speransa?’

16. Kiko un hende tin ku hasi pa bira konvensí ku e speransa den Beibel no ta un fantasia? (Wak e plachi.)

¹⁶ Nos por komprondé loke Pablo tabata ke men si nos tene na mente ku speransa ta algu ku ta bira mas fuerte. Por ehèmpel, pensa riba e promé biaha ku b’a tende di e bunita speransa di biba pa semper den Paradeis riba tera. Na e momento ei, kisas b’a pensa ku esei ta puru fantasia. Pero, segun ku b’a siña konosé Yehova i e promesanan den Beibel mihó, b’a bira mas i mas konvensí ku e speransa ei ta leu di ta un fantasia. E ta un realidat!

17. Kon bo speransa a sigui bira mas fuerte despues di bo boutismo?

¹⁷ Asta despues di bo boutismo, bo speransa a sigui bira fuerte pasobra b’a sigui konosé Yehova mas mihó i stim’é mas ainda. (Heb. 5:13–6:1) Kasi sigur b’a eksperensiá loke Romanonan 5:​2-4 ta menshoná. Aunke b’a pasa den vários tribulashon, b’a perseverá i Yehova a laga bo mira ku e ta kontentu ku bo, sí, ku bo tin su aprobashon. Komo ku bo ta konvensí ku Dios ta stima  bo i ta kontentu ku bo, bo ta asta mas konvensí ainda ku Yehova lo kumpli ku loke el a primintí. Bo speransa ta mas fuerte awor ku loke e tabata na prinsipio. E ta mas real pa bo i tin un nifikashon spesial pa bo. E ta influensiá delaster un parti di bo bida i ta kambia e manera ku bo ta trata bo famia, desishonnan ku bo ta tuma i kon bo ta usa bo tempu.

18. Ki garantia Yehova ta duna nos?

¹⁸ Despues ku Apòstel Pablo a bisa ku un kondishon aprobá pa Dios ta produsí speransa, el a agregá un punto masha importante: bo por tin sigur ku e speransa ei lo kumpli. Dikon bo por tin sigur di esei? Wèl, Pablo a menshoná e garantia ku Dios ta duna tur kristian: “E speransa ei no ta hiba na desilushon; pasobra nos kurason a yena ku amor di Dios pa medio di e spiritu santu ku nos a risibí.” (Rom. 5:5) Pues, bo tin shen porshento sigur ku bo speransa lo bira realidat.

19. Di kiko bo por tin sigur?

¹⁹ Kòrda riba Ábraham. Yehova a hasié un promesa, el a dun’é Su aprobashon i a mir’é komo Su amigu. Anto loke Ábraham a spera riba dje a bira realidat. Beibel ta bisa: “Despues ku Abraham a warda ku pasenshi, el a haña e promesa.” (Heb. 6:15; 11:​9, 18; Rom. 4:​20-22) Meskos ku Ábraham, bo por tin sigur ku si bo keda fiel na Yehova, bo speransa no ta hiba na desilushon. Lo bo haña e rekompensa ku tantu bo ta spera riba dje. Bo por alegrá pasobra bo speransa ta real. (Rom. 12:12) Pablo a skirbi: “Ku e Dios ku ta duna speransa yena boso ku pleno goso i pas pa medio di boso konfiansa den dje, pa asina boso por abundá den speransa ku poder di spiritu santu.”—Rom. 15:13.