Bo a tuma tempu pa lesa e edishonnan di e aña akí di E Toren di Vigilansia? Wèl, wak si bo por kontestá e siguiente preguntanan:

Kiko “renobá boso mente” ta enserá? (Rom. 12:2)

E ta enserá mas ku djis hasi hopi bon obra. E ta enserá analisá ken nos ta di bèrdat i despues hasi e kambionan nesesario pa asina nos obedesé Yehova su normanan.—w23.01, pág. 8-9.

Kon nos por ta balansá ora ta sigui notisia?

Nos ta interesá pa mira kon e susesonan di mundu ta kumpli ku profesianan di Beibel. Pero, na lugá di spekulá i kousa desunion den e kongregashon, ta mihó pa nos kòmbersashonnan ta basá riba loke a sali den nos publikashonnan. (1 Kor. 1:10)—w23.02, pág. 16.

Ki diferensia tin entre boutismo di Hesus i di su siguidónan?

Debí ku Hesus a nase den un nashon ku ya tabata dediká na Dios, e no mester a dediká su mes na Dios, manera nos. Hesus tabata un hòmber perfekto, sin piká. E no mester a arepentí di niun piká.—w23.03, pág. 5.

Kiko nos por hasi pa mas ruman duna komentario?

Nos por tene nos komentarionan kòrtiku. Asina ei ta sobra tempu pa mas ruman komentá. Nos por evitá di menshoná tur e puntonan ya e otro rumannan tin algu pa komentá riba dje.—w23.04, pág. 23.

Kiko e “Kaminda Santu” na Isaías 35:8 ta referí na dje?

E “Kaminda Santu” ku Isaías a papia di dje na promé instante a referí na e ruta simbóliko ku e hudiunan lo a usa pa biaha for di Babilonia pa Israel. Pero kiko di nos tempu? Durante transkurso di hopi aña promé ku 1919, trabounan a tuma lugá pa yuda kita opstákulo. Un ehèmpel di esei ta tradukshon i imprenta di Beibel. Dios su pueblo ta kana riba e “Kaminda Santu” akí i esei ta yuda nan sigui adorá Yehova aworakí i tambe den futuro ora nan haña e bendishonnan ku e Reino lo trese.—w23.05, pág. 15-19.

Kiko e dos muhénan den Proverbionan kapítulo 9 ta representá?

Proverbionan ta papia tokante un “muhé bobo.” Su invitashon ta hiba na “Graf.” “Berdadero sabiduria” ta ser representá pa un otro muhé i su invitashon ta hiba na “komprondementu” i na bida. (Pro. 9:​1, 6, 13, 18)—w23.06, pág. 22-24.

Kon Dios a mustra ku e ta humilde i rasonabel den su trato ku Lòt?

Yehova a bisa Lòt pa sali for di Sódoma i hui bai den e serunan. Lòt no tabata ke, i el a roga Dios p’e bai Zoar. Dios a permitié hasi esei.—w23.07, pág. 21.

Kiko un esposa por hasi si su kasá ta wak pornografia?

E no mester kulpa su mes. Ta mihó p’e focus riba su amistat ku Yehova i meditá riba e relatonan den Beibel di hende muhé ku tabata sinti nan hopi anshá, pero ku a hasi orashon na Yehova i a haña konsuelo. E por yuda su kasá evitá situashonnan ku por laga e kasá kai den tentashon.—w23.08, pág. 14-17.

Ora un hende kuestioná nos kreensianan, kon perspikasia lo yuda nos kontestá na un manera suave?

Nos por mira esaki komo un oportunidat pa mira kiko ta biba den kurason di e hende òf kiko ta importante p’e. Asina ei nos ta mihó prepará pa kontest’é na un manera suave.—w23.09, pág. 17.

Kiko nos por siña for di Maria tokante haña forsa?

Ora Maria a haña sa ku lo e bira mama di Mesías, e tabatin mester di forsa. El a haña e forsa ei for di otro hende. Gabriel i Elisabèt a dun’é animashon basá riba Skritura. Nos rumannan tambe por duna nos forsa.—w23.10, pág. 15.

Kon Yehova por kontestá nos orashonnan?

El a primintí di skucha nos orashonnan i ta tene kuenta ku su propósito. (Yer. 29:12) E por kontestá orashonnan paresido na diferente manera, pero semper lo e t’ei pa nos.—w23.11, pág. 21-22.

Romanonan 5:2 ta papia tokante “speransa,” dikon versíkulo 4 ta bolbe menshoná speransa?

Ora un hende tende e bon notisia, e ta haña e speransa di disfrutá di bida den Paradeis aki riba tera. Pero segun ku e ta hañ’é ku tribulashon, ta perseverá i ta mira ku Yehova ta kontentu kuné, su speransa ta bira mas fuerte i ta bira mas di dje.—w23.12, pág. 12-13.